Samuel Pahnihnak 16:1-23
16 David nih tlangpar a hei lonhka te ah khin Mefibosheth salpa Ziba cu kengdanh danhmi laa pahnih cung ah changreu hlum 200, mitsur car nenmi thlar 100, ṭhal thei* nenmi thlar 100 le mitsur zu ralca nganpi pakhat kha a khin i siangpahrang cu a va ton.
2 “Zeicah mah thil hna hi na rak put?” tiah a hal tikah Ziba nih “Laa hi siangpahrang innchungkhar i cit awkah a si, changreu le ṭhal thei hna cu na mi pawl ei awk le mitsur zu hi cu ramcar i nan tha a bat tikah din awkah a si” tiah a leh.
3 David nih “Na bawipa a fapa* tah?” tiah a hal tikah Ziba nih “‘Ka pa siangpahrang nawlngeihnak kha nihin ah Israel mi nih an ka pek ṭhan lai’ tiah a ti i Jerusalem ah a taangta” tiin a leh.
4 David nih “Mefibosheth ngeihmi vialte cu nangmah ta a si cang” tiah a ti tikah Ziba nih “Ka bawipa, upatnak kaan pekmi hi cohlang ko, na mithmai ṭha hmu ko ning” tiah a leh.
5 David cu Bahurim khua a phanh tikah Gera fapa Shimei timi Saul rualchan pakhat a rak chuak, David kha a au hnawh i chiat a serh.
6 Cun David, a salle, a orhlei le a kehlei ah a ummi miṭhawng hna le mi cu lung in a cheh hna.
7 Cun “Lainawng pa, mi zei ruaram lo! Kal, kal tuah!
8 Saul innchungkhar kha na thah hna i pennak kha a sinin na lak caah Jehovah nih aan cham ṭhanmi a si. Jehovah nih na fapa Absalom kha pennak cu a pek cang. Lai na nawn caah atu bantuk in harnak na tonmi a si!” tiah chiat a serh.
9 Zeruiah fapa Abishai nih “A thimi uico nih hin zeicah ka bawipa siangpahrang cu chiat a serh len ko? Ka va kal lai i a lu ka va tan lai” tiah David cu a nawl.
10 Cu tikah David nih “Zeruiah fapa hna, hi kong ah nan i thlak awk a si maw? Chiat ka serh ko seh. Jehovah nih ‘David kha chiat va serh!’ tiah a fial ahcun ‘Zeicah chiat na serh?’ tiah aho nih dah a ti ngam lai?” tiah a ti.
11 Cun David nih Abishai le a salle vialte kha “Ka chungchuak ka fapa hmanh pei keimah thah awkah aa zuam cu. Benjamin mipa nih cun zeitluk in dah aa zuam chinchin lai! Chia ko u, chiat rak ka serh ko seh, Jehovah nih a fialmi pei a si cu!
12 Jehovah nih ka harnak hi a hmuh ko hnga i nihin chiatserh ka simi canah Jehovah nih thluachuah tu a ka pek ko hnga” tiah a ti.
13 David le a mi pawl cu an kal thluahmah. Shimei zong an pawng tlangpang in David chiatserh pah in a kal ve. Lung in a cheh hna i leidip a vorh hna.
14 A donghnak ah David le a mi pawl cu an i tinhnak hmun kha an phan, an ba tuk i an i din.
15 Mah lioah Absalom le Israel pa hna cu Jerusalem khua ah an phan. Ahithofel zong a sinah a um ve.
16 David hawi,* Arkhi mi Hushai cu Absalom sinah a ra i “Siangpahrang cu a chan sau ko seh! Siangpahrang cu a chan sau ko seh!” tiah a ti.
17 Cu tikah Absalom nih “Na hawi cung ah hitihin maw a fekmi dawtnak na langhter? Zeicah a sinah na kal ve lo?” tiah a ti.
18 Hushai nih “Ka kal lai lo. Kei cu Jehovah thimmi, hi miphun le Israel mi hna nih an thimmi pa lei ah ka ṭang lai i a sinah ka um lai.
19 Ka chim rih lai, aho rian dah ka ṭuan awk a si? Siangpahrang fapa a si ko lo maw? Na pa rian ka rak ṭuan bantuk in na rian ka ṭuan lai” tiah a ti.
20 Absalom nih Ahithofel cu “Zeidah kan tuah awk a si? Ruahnak ka cheu tuah” tiah a ti.
21 Ahithofel nih “Siangpahrang inn zohkhenh awkah na pa nih a chiahtakmi a nuchun pawl kha ihpi hna. Cutin na tuah i na pa mual na phohmi kha Israel mi nih an theih ahcun nangmah lei ah a ṭangmi hna cu an tha a tho chinchin lai” tiah Absalom cu a ti.
22 Cu tikah mi nih siangpahrang inncung ah thlam an bunhpiak i Absalom nih Israel mi vialte hmaiah a pa nuchun pawl cu a ihpi hna.
23 Mah lio caan ah Ahithofel ruahnak cheuhnak kha a hmaanmi Pathian sinin a rami bantuk in an hmuh. David le Absalom zong nih Ahithofel ruahnak cheuhnak vialte kha cutin an hmuh ve.
