Samuel Pahnihnak 20:1-26
20 Benjamin phun Bikhri fapa Sheba timi buaibainak chuahtertu pakhat a um. Anih nih saki kha a tum i “David he kan i pehtlaihnak zeihmanh a um lo. Jesse fapa sinin covo zeihmanh kan ngei lo. Israel mi hna, nanmahle nan pathian sin* cio ah kir u” tiah a ti hna.
2 Cu tikah Israel mi nih David hnu zulh loin Bikhri fapa Sheba hnu tu kha an zulh. Asinain Judah mi nih cun an siangpahrang David kha Jordan in Jerusalem tiang an zulh ko.
3 David cu Jerusalem i a inn a phanh tikah inn zohkhenh awkah a chiahtakmi nuchun pahra kha a auh hna. Inn pakhat ah a khumh hna i cawngtu a chiah hna. Tirawl a pek hna nain a ihpi ti hna lo. Annih cu an va a nung ko nain nuhmei bantuk in an thih tiang cuticun khumh an si.
4 David nih Amasa kha “Nithum chung ah Judah mi kha hika ah pum hna law nangmah zong rak ra ve” tiah a ti.
5 Cucaah Amasa cu Judah mi pawl va pumh awkah a kal. Asinain siangpahrang nih ri a khiahpiakmi caan nakin tlai deuh ah a rak kir.
6 David nih Abishai kha “Bikhri fapa Sheba nih hin Absalom nakin harnak tam deuh a kan pek khawh. Cucaah ka ralkap pawl hi i kalpi hna law amah kha va dawi u. Cu lo ahcun kulhnak a ngeimi khua ah a lut lai i a luat sual lai” tiah a ti.
7 Joab ralkap, Khereth mi, Peleth mi le a ṭhawngmi ralkap vialte nih Abishai hnu kha an zulh i Bikhri fapa Sheba dawi awkah Jerusalem in an chuak.
8 Gibeon khua i lung nganpi pawng an phanh tikah Amasa he an i tong. Joab cu ralthuam aa hruk i a kawng ah sawhmi nam kha a tai ah aa thlaih. Amasa kha a va naih tikah a nam cu a tla.
9 Joab nih Amasa cu “Ka nau, na tlamtling maw?” tiah a ti hnuah Amasa khahmul kha a orhlei kut in a tlaih i a hnamh hnikmi bantuk in aa umter.
10 Amasa nih Joab kut i nam kha a hmu manh lo. Joab nih a paw ah a sawh i a chungril cu vawlei ah a tla dih. Amah thah awkah voi hnih sawh a hau lo. Voi khat lawng in a za. Cu hnuah Joab le a u Abishai nih Bikhri fapa Sheba kha an dawi.
11 Joab ralkap pakhat cu Amasa pawng ah a dir i “Joab lei a ṭangmi paoh le David ta a simi paohpaoh Joab hnu kha zul u!” tiah a ti.
12 Mah caan chung vialte Amasa cu lamkalai i a thi lakah a ril ko. A pawng an phanh tikah mi vialte an dirmi kha pa pakhat nih a hmuh tikah lamkam ah a hnuh i puan in a khuh.
13 Cutin a thawn hnuah mi vialte nih Bikhri fapa Sheba dawi awkah Joab hnu kha an zulh.
14 Sheba cu Israel phun vialte umnak ram kha a tan i Abel Beth-maakah ah a phan. Bikhri mi hna cu hmunkhat ah an i pum i Sheba hnu kha an zulh.
15 Joab le a mi hna zong an rak phan ve i Abel Beth-maakah khua kha an kulh. Khua velchum ah ralhruang chuntlung a um caah an kai khawh nakhnga raltuknak chuntlung an ser. Cun Joab a mi hna nih khua kulhnak vanpang chimh awkah a tang in an cawh.
16 A fimmi nu pakhat cu “Ngai u! Ngai u! Joab kha va chim u. Kaa hin ra seh, biaruah awk ka ngei” tiah khua kulhnak vanpang cung in a au.
17 Joab a rak phanh tikah minu nih “Joab na si maw?” tiah a hal i “Ka si ko” tiah a leh. “Na salnu bia hi ka ngaihpiak ko” tiah a ti tikah “Chim ko” tiah a leh.
18 Minu nih “Buainak donghter an duh ahcun ‘Abel khua ah va hal hna seh’ timi hlanlio bia a um.
19 Daihnak a duhmi, zumhfekmi Israel mi hna aiawh in ka chim. Israel ram ah nu can in a dirmi khua kha zeicah hrawh na timh? Jehovah ro hi zeicah hloh na duh?” tiah a ti.
20 Cu tikah Joab nih “Mah khua hloh awk le hrawh awk cu a ruah hmanh ka ruat ngam lo.
21 Cutin a si hrimhrim lo. Efraim tlangram i Bikhri fapa Sheba timi pa nih siangpahrang David kha a ralchanh. Mah pa kha ka kut ah nan ka pek ahcun ka kir ṭhan ko lai” tiah a ti. Minu nih cun “Cu pa a lu cu khua kulhnak vanpang cung in kan rak thlak lai” tiah a ti.
22 Minu nih khuami kha a va chimh colh hna i annih nih Bikhri fapa Sheba lu cu an tan. Cun Joab sinah an vun thlak. Joab nih saki a tum tikah a mi pawl nih khua cu an kaltak i anmahle an inn cio ah an kir. Joab zong Jerusalem i siangpahrang sinah a kir ve.
23 Joab cu Israel ralkapbu ah ralbawi a si. Jehoiada fapa Benaiah cu Khereth mi le Peleth mi hna haotu a si.
24 Adoram cu rianhrang ṭuan ding in hnekmi hna uktu a si. Ahilud fapa Jehoshafat cu ram tuanbia ṭialtu a si.
25 Sheva cu caṭialtu a si. Zadok le Abiathar cu tlangbawi an si.
26 Jair mi Ira cu David kut tang i a reng a sangmi bawi* a hung si.
