Samuel Pahnihnak 22:1-51
22 Jehovah nih ral vialte kut chung in le Saul kut chung in a khamh ni ah David cu Jehovah sinah hla a sa.
2 Hitin a sak:
“Jehovah cu ka lungpi, ka ralhruang le a ka luattertu a si.
3 Ka Pathian cu kaa dornak lungpi,Ka phaw, a ka khamhtu ki,* a himmi dornakKaa thuhnak hmun le a ka khamhtu a si; zaangennak in na ka khamh.
4 Thangṭhatnak hmuh awkah aa tlakmi Jehovah kha ka auh,Ka ral hna sinin a ka khamh lai.
5 Thihnak nih rili tilet bantuk in a rak ka kulh;Mi zei ruaram lomi hna nih ruahlopi in ti a lianh bantuk in an ka ṭhihphaih.
6 Thihnak* hri nih a ka ṭem;Thihnak rap cu ka hmaiah a um.
7 Harnak ka ton tikah Jehovah cu ka auh,Ka Pathian cu ka auh lengmang ko.
A biakinn chung in ka aw kha a theih,Bawmh hal in ka aunak cu a hna ah a phan.
8 Vawlei cu aa hnin i khatlei, khatlei ah aa vawr;Van hram hna cu an i hnin,A thinlinhnak ruang ah an i thui.
9 A hnar in meikhu a chuak,A kaa chung in mei alh a chuak;A sinin a alhmi meiṭil a chuak.
10 Pathian nih a ṭum tikah van kha a kunter,A ke tang ah khuadawm chahpi a um.
11 Cherubim kha aa cit i a zuang.
Vancungmi thla cung ah Pathian cu hmuh khawh a si.
12 Minmei tompi, khuadawm chahchah le,Muihnak kha a velchum ah a chiah.
13 A hmaika i nimtlau chung ah meiṭil a alh cuahmah.
14 Jehovah nih van in khua a ritter;Cungnung Bik nih a aw kha a thanter.
15 Thal a kah i ral pawl kha a ṭhek dih hna;Nimtlau a lekter i a tuai-urter dih hna.
16 Jehovah nih a chimhhrinh caah;A hnar in thaw a chuah caah rili tawne cu an lang,Vawlei hrampi zong an hung lang.
17 Cunglei in a kut a run samh;A ka tlaih i a thukmi ti chung in a ka chuah.
18 A ṭhawngmi ka ral hna,Keimah nakin a ṭhawng deuhmi a ka huatu hna kut in a ka khamh.
19 Harnak ka ton caan ah an rak ka doh,Asinain Jehovah nih a ka bawmh.
20 A himnak hmun ah a ka hruai;A lung ka ton caah a ka khamh.
21 Jehovah nih ka dinnak ning in laksawng a ka pek;Ka kut a thiannak ning in* a ka cham.
22 Jehovah lam kha ka zulh zungzal,Pathian kaltak cu thil ṭhalo a si caah cucu ka tuah lo.
23 A biakhiahnak kha kaa cinken zungzal;A nawlbia kha ka pialtak lai lo.
24 A hmaiah soi awk um loin ka um lai,Palhnak ka tuah lai lo.
25 Ka dinnak ning in le a hmaiah ka sual lonak ning in,Jehovah nih ka cham ko seh.
26 Zumhawk a tlakmi cung ah zumhawktlak tein na um;Soi awk um lomi kha soi awk um loin na pehtlaih;
27 Lungthin ṭha a ngeimi kha ṭha tein na pehtlaih,A fimzermi kha fimkhur tein na pehtlaih.
28 Aa toidormi kha na khamh hna,A ruamkaimi kha cu mitkem ngai in na zoh hna i na ṭhumh hna.
29 Maw Jehovah, nang cu ka meiinn na si;Ka pawngkam i muihnak a ceutertu cu Jehovah a si.
30 Nangmah bawmhnak thawng in damiah phu kha ka tei hna;Pathian pekmi ṭhawnnak in khua kulhnak ralhau cung ah ka kai kho.
31 A hmaanmi Pathian thil tining cu a tling;Jehovah bia cu a thiang.*
A sinah aa dormi hna caah phaw a si.
32 Jehovah hlei ah zei Pathian dah a um ti?
Kan Pathian bantuk lungpi an um lo.
33 A hmaanmi Pathian cu ka caah a fekmi ralhruang a si,Amah nih ka lam kha a tluanter lai.
34 Ka ke kha sazuk ke bantuk a siter;Hmunsang ah a ka dirter.
35 Ka kut kha raltuk thiam awkah a cawnpiak;Ka ban in dar likuk kha ka kawih khawh.
36 Khamhnak phaw kha na ka pek,Naa toidornak nih mi lianngan a ka siter.
37 Ka ke hlannak lam kha na kauhter;Ka ke* cu a nal lai lo.
38 Ka ral kha ka dawi hna lai i ka hrawh hna lai;Ka hloh dih hna hlan lo ka kir lai lo.
39 An thawh khawh ti nakhnga lo ka lamh chih hna lai i ka hloh hna lai;Ka ke tang ah an tlu lai.
40 Raltuknak caah thazaang na ka pek lai;Ka ral pawl kha ka ke tang ah na rilhter hna lai.
41 Ka ral kha ka hmai in na zamter hna lai;A ka huatu kha ka hrawh hna lai.
42 Bawmh hal in an au nain anmah a khamhtu ahohmanh an um lo;Jehovah sin hmanh ah an au nain a let hna lo.
43 Leidip bantuk in dip tein ka den hna lai;Lam cung i nawncek bantuk in ka lamh chih hna lai.
44 Ka miphun chung i ka sualnak a kawltu hna kut in na ka khamh lai.
Miphun hna hruaitu ka si khawh nakhnga na ka kilven lai;Ka hngalh bal lomi miphun phun khat nih ka rian an ṭuan lai.
45 Ramdang mi hna cu ka hmaiah an ra lai i an bawk lai;Ka kong kha an theih caah ka nawl an ngaih lai.
46 Ramdang mi cu ralṭhatnak an ngei ti lo;An ralhruang chung in ther le phang in an rak chuak lai.
47 Jehovah cu a nungmi Pathian a si! Ka Lungpi kha thangṭhat u!
Ka Pathian, a ka khamhtu lungpi cu hlorh si ko seh.
48 A hmaanmi Pathian nih phu a ka hlampiak;Mi kha ka ke tang ah a chiah hna;
49 Ka ral hna kut in na ka khamh.
A ka dotu hna nakin sang deuh ah na ka hlorh;Mi puarhrang kut in na ka khamh.
50 Cucaah maw Jehovah, miphun hna lakah kaan lawmh lai,Na min kha hla in ka thangṭhat lai:
51 A thimmi siangpahrang khamh awkah thil lianngan hna a tuah;Chiti a thuhmi David le a tefa cung ah,Pathian nih a fekmi dawtnak zungzal in a langhter.”
Footnotes
^ Biafang Fianternak ah zoh.
^ Asiloah “Thlan.” Biafang Fianternak ah zoh.
^ Asiloah “Ka sual lonak ning in.”
^ Asiloah “mei in thianter a si.”
^ Asiloah “fengbeo.”
