Samuel Pahnihnak 7:1-29
7 Siangpahrang David cu a inn ah a um i Jehovah nih a pawngkam ral vialte sinin dinhnak a pek tikah,
2 profet Nathan kha “Kei cu sidar thing inn i ka um lioah a hmaanmi Pathian biakamnak kuang cu puan thlam chung ah a um” tiah a ti.
3 Cu tikah Nathan nih “Jehovah cu na sinah a um caah na duh ning paoh in tuah ko” tiah a leh.
4 Cu zan hrimhrim ah Jehovah nih Nathan cu hitin a ti:
5 “Ka sal David kha na va chimh lai, ‘Jehovah bia cu hihi a si: “Ka caah inn cu na ka sakpiak awk a si maw?
6 Israel mi Izipt ram in ka rak chuahpi hna ni thawk in nihin ni tiang inn ah ka um lo. Puan thlam ah ka um i hmunkhat hnu hmunkhat ah ka rak i ṭhial.
7 Israel mi he ka vahvaih chung vialte ka miphun zohkhenhtu in rian ka pekmi hruaitu hna kha ‘Sidar thing in zeicah inn nan ka sakpiak lo?’ tiah kaa khat tal ka ti bal hna maw?”’
8 Ka sal David cu va chim: ‘Ralkapbu Bawipa Jehovah bia cu hihi a si: “Ka miphun Israel mi hruaitu si awkah tuu na khalhnak saṭil tlonnak hmun in kaan auh cang.
9 Na kalnak kip ah kaan umpi lai. Na ral kha na hmai in ka hloh dih hna lai i vawleicung minthangmi hna bantuk in na min ka thanter lai.
10 Ka miphun Israel mi an umnak ding caah hmun pakhat ka timh lai. Cuka ah khua an sa lai i ahohmanh nih hnahnawhnak an pe ti hna lai lo. A hlan bantuk in miṭhalo pawl zong nih an hrem ti hna lai lo.
11 Ka miphun Israel mi hruai awkah biaceihtu pawl rian ka pek hna lio bantuk in hrem an si ti lai lo. Na ral pawl sinin dinhnak kaan pek lai.
“‘“Cun Jehovah nih na chungkhar kha ka fehter lai ti zong in keimah Jehovah nih ka ti.
12 Na thih i na pupa hna sin na phanh tikah na tefa, nangmah chungchuak na fapa kha siangpahrang ah ka ser lai i a pennak kha ka fehter lai.
13 Amah nih ka min caah inn a sak lai i a pennak bawiṭhutdan kha zungzal in ka hmunhter lai.
14 Keimah cu a pa ka si lai i amah cu ka fapa a si lai. Palhnak a tuah ahcun ka chimhhrinh lai i minung nih an tuah tawn bantuk in fung in ka tuk lai.*
15 A cung ah a fekmi dawtnak ka langhter zungzal lai i na hmai in ka hlohmi Saul bantuk in ka hlaw lai lo.
16 Na chungkhar le na pennak cu zungzal in a hmun lai i na bawiṭhutdan zong zungzal in a hmun lai.”’”
17 Nathan nih langhnak in Pathian nih a chimhmi bia vialte kha David cu a chimh.
18 Siangpahrang David cu Jehovah hmaiah a ra i a ṭhu. Cun hitin thla a cam: “Maw Lianngan Bik Bawipa Jehovah, keimah le ka chungkhar cu zeidah kan si i hi tluk in ka cung ah ṭhatnak na langhter?
19 Maw Lianngan Bik Bawipa Jehovah, cu lawng hmanh a si rih lo. Na salpa innchungkhar cu hmailei caanpi tiang a hmun lai ti zong in na chim. Maw Lianngan Bik Bawipa Jehovah, cucu mi vialte caah na sermi phunglam a si.
20 Maw Lianngan Bik Bawipa Jehovah, na salpa David kong hi ṭha tein na hngalh caah zeidah ka chim chap khawh ti lai?
21 Na duhnak ning in le na biakam ning in hi thil lianngan vialte hi na tuah i na salpa sinah na phuan hna.
22 Cucaah Lianngan Bik Bawipa Jehovah, nangmah cu a lianngan taktakmi na si. Nangmah bantuk ahohmanh an um lo i nangmah hlei ah Pathian dang an um lo ti kha kan theih kan hngalhmi vialte nih a langhter.
23 Vawleicung ah na miphun Israel mi bantuk ahohmanh an um lo. Anmah kha na miphun si awkah na tlanh hna. Thil lianngan le khuaruahhar thil na tuahpiak hnanak thawng in na min kha na thanter. Izipt ram in na tlanhmi na miphun caah miphun dang le an pathian kha na ṭhawl hna.
24 Israel mi kha zungzal ca in na miphun ah na ser hna. Maw Jehovah, nang cu an Pathian na hung si.
25 “Maw Jehovah Pathian, na salpa le a innchungkhar he aa tlaiin bia naa kammi kha a zungzal in tlinter ko. Na biakamnak ning in tuah ko.
26 ‘Ralkapbu Bawipa Jehovah cu Israel Pathian a si’ tiah an ti nakhnga na min cu zungzal in hlorh si ko seh. Na sal David innchungkhar zong hmunhter zungzal ko.
27 Israel Pathian, ralkapbu Bawipa Jehovah, ‘Keimah nih na pennak kha ka fehter lai’ tiin na bia kha ka sinah na phuan. Cucaah na salpa nih hitin thla ka cam ngammi a si.
28 Maw Lianngan Bik Bawipa Jehovah, nang cu a hmaanmi Pathian na si. Na salpa hi thilṭha kaan pek lai tiah bia na ka kamh i na bia cu biatak an si.
29 Na duhnak ning in na salpa innchungkhar hi thluachuah pe law zungzal in na hmaiah hmunhter ko. Maw Lianngan Bik Bawipa Jehovah, nangmah nih bia naa kam cang caah na salpa innchungkhar hi zungzal in thluachuah pe ko.”
Footnotes
^ A hrampi, “minung hmanmi fung in ka chimhhrinh lai.”
