Samuel Pahnihnak 8:1-18
8 A hnuah David nih Filistin mi kha a doh hna i a tei hna. Metheg-ammah timi hmun kha Filistin mi sinin a lak.
2 Moab mi zong kha a tei hna, vawlei ah a ihter hna i hri in a tah hna. Cheu thum cheu hnih kha a thah hna i cheu khat kha a zuah hna. Cuticun Moab mi cu David sal an hung si i ngunkhuai an pek.
3 Rehop fapa, Zobah siangpahrang Hadadezer cu Zufrates Tiva pawngkam ah a nawlngeihnak lak ṭhan ding in a kal lioah David nih a tei.
4 Rang cung ralkap 1,700 le ke ralkap 20,000 kha a tlaih hna. Leng hnuktu rang 100 kha a nganh i a dang tu cu an tha a pheh dih hna.
5 Zobah siangpahrang Hadadezer bawmh awkah Damaskas khua i Siria mi hna an rat tikah David nih Siria mi 22,000 kha a thah hna.
6 David nih Siria ram, Damaskas ah khuavengtu ralkapbu a chiah hna. Siria mi cu David sal an hung si i ngunkhuai an pek. Jehovah nih David cu raltuknak kip ah teinak a pek.
7 Cun Hadadezer salle nih an i putmi a pummi sui phaw zong kha a lak hna i Jerusalem ah a tlunpi.
8 Hadadezer ta a simi Betah le Berothai khua in dar tampi zong a lak.
9 David nih Hadadezer ralkap vialte a tei dih hna ti kha Hamath siangpahrang Toi nih a theih tikah,
10 David va chawnhbiak awk le Hadadezer kha a doh i a tei caah va lawmhpi awkah a fapa Joram kha a thlah. (Zeicahtiah Hadadezer nih Toi kha a doh tawn.) Joram nih David cu ngun, sui le dar a rak phorh.
11 Siangpahrang David nih mah thil hna kha Jehovah sinah a pekchanh. A teimi miphun hna sinin a lakmi sui le ngun zong kha a pekchanh.
12 Mah cu Siria ram, Moab ram, Ammon mi, Filistin mi, Amalek mi le Rehop fapa, Zobah siangpahrang Hadadezer sinin a lakmi hranchaw an si.
13 Cite Nelrawn ah Edom mi 18,000 a thah hnanak in a rak kir tikah David cu a min a thang chinchin.
14 Edom ram pumpi ah khuavengtu ralkapbu a chiah hna i Edom mi vialte cu a sal an hung si. Jehovah nih David cu raltuknak kip ah teinak a pek.
15 David nih Israel ram vialte kha a uk. Rammi kha ding tein a uk hna.
16 Zeruiah fapa Joab cu ralbawi a si. Ahilud fapa Jehoshafat cu ram tuanbia ṭialtu a si.
17 Ahitub fapa Zadok le Abiathar fapa Ahimelek cu tlangbawi an si. Seraiah cu caṭialtu a si.
18 Jehoiada fapa Benaiah cu Khereth le Peleth mi hna uktu a si. David fapale cu a reng a sangmi bawi* an hung si.
Footnotes
^ A hrampi, “tlangbawi.”
