Samuel Pahnihnak 11:1-27
11 Kum hramthawklei siangpahrang pawl raldohnak i an kal tawn caan ah David nih Joab le a salle le Israel ralkap vialte kha Ammon mi va hrawh awkah a thlah hna. Annih nih Rabbah kha an kulh. Mah lioah David cu Jerusalem ah a rak um ko.
2 Voi khat cu zanlei sang ah David cu a ihnak in a tho i siangpahrang inncung ah aa chawk. Nu pakhat ti aa kholh lio kha inncung cun a hei hmuh. Mah minu cu aa dawh tuk.
3 David nih minu kong kha mi pakhat a hlatter tikah “Eliam fanu, Hit mi Uriah nupi Bathsheba a si” tiah a chimh.
4 David nih minu cu a va auhter hna. A sin a rak phanh tikah a ihpi. (Mah cu thianlonak* in aa thenh lioah a cangmi a si.) Cu hnuah minu cu a inn ah a ṭin.
5 Minu cu fa a hung pawi. Cucaah David sinah mi a thlah i “Fa ka pawi cang” tiah a chimh.
6 David nih Joab cu “Hit mi Uriah kha ka sinah rak kirter” tiah bia a cah. Cucaah Joab nih Uriah cu David sinah a kirter.
7 Uriah a rak phanh tikah David nih “Joab le ralkap pawl cu zeidah an lawh? Raldohnak tah zeidah a lawh?” tiah a hal.
8 Cun “Inn ah va ṭin law va i din*” tiah a ti. Siangpahrang inn in Uriah a chuah hnuah laksawng* zong kuat a si.
9 Asinain Uriah cu inn ah a ṭin lo i a dang salle sinah siangpahrang inn innka pawng ah a it ve.
10 “Uriah cu inn ah a ṭin lo” tiah an chimh tikah David nih “Lamhlapi in na rak tlung a si lo maw? Zeicah inn ah na ṭin lo?” tiah a ti.
11 Uriah nih “Biakamnak kuang le Israel pa pawl le Judah pa pawl cu thlam chung ah an um. Ka bawipa Joab le a salle zong raldohnak hmun ah an riak. Cu lioah cun maw va ei, va din awk le ka nupi he va ih awkah inn ah ka ṭin hnga? Na nun bang in ka chim lai, cutin ka tuah hrimhrim lai lo!” tiah a ti.
12 David nih Uriah cu “Nihin cu caam rih ko, thaizing ah na kal te lai” tiah a ti caah cu ni le a thaizing tiang Jerusalem khua ah a caam.
13 David nih a auh i an ei, an ding. Ri lakin a dangh. Asinain zanlei sang ah a inn ah ṭin loin a dang salle sinah a it ṭhan.
14 A thaizing zing ah David nih Joab sinah cakuat a ṭial i Uriah kha a phorhter.
15 Ca chung ah “Uriah cu raldohnak a fah biknak hmailei ah chia law ral kut in a thih nakhnga hnulei thawntak u” tiah a ṭial.
16 Joab nih khua kha ṭha tein a rak ngiat caah khoika ah dah a ṭhawngmi ralkap pawl an um ti kha a hngalh. Cuka ah Uriah cu a chiah.
17 Khuami pawl cu an hung chuak i Joab kha an doh tikah David salle cheukhat an thi. A thimi lakah Hit mi Uriah zong aa tel ve.
18 Joab nih David cu raldohnak kong kha thawng a thanh.
19 Joab nih a thlahmi lamkal kha hitin a ti: “Siangpahrang cu raldohnak kong thawngpang na chimh dih tikah,
20 a thin a hung lai i ‘Zeicah khua cu nan va naih tuk? Khua kulhnak vanpang cung in an kan kah lai ti kha nan hngal lo maw?
21 Jerubbesheth fapa Abimelek kha aho nih dah a thah? Nu pakhat nih khua kulhnak vanpang cung in facang rialnak a cunglei lung a thlak hnawh i Thebez ah a thi, a si lo maw? Zeicah khua kulhnak vanpang cu nan va naih tuk?’ tiah aan ti lai. Cu tikah ‘Na salpa Hit mi Uriah zong a thi’ tiah na va ti lai.”
22 Lamkal cu David sin a phanh tikah Joab nih a cahmi vialte kha a chimh dih.
23 Cun “Annih cu kanmah nakin an ṭhawng deuh. Kanmah doh awkah rawn tiang an rak chuak. Asinain khua hauka tiang kan va doh ṭhan hna.
24 Thal kaptu hna nih khua kulhnak vanpang cung in an kan kah i na salle cheukhat cu an thi. Na salpa Hit mi Uriah zong a thi” tiah a ti.
25 Mah tikah David nih lamkal cu “Joab kha ‘Hi kong ah na lungrethei hlah. Raldohnak ah cun aho paoh thih phung a si ko. Khua kha fak deuh in va do law va la’ tiin va chim, cun thazaang zong va pe” tiah a ti.
26 Uriah nupi nih a va a thi ti kha a theih tikah a va cu a ṭah.
27 A ṭah caan a dih tikah David nih Bathsheba cu a auhter hna i a inn ah an ratpi. A nupi a hung si i fapa pakhat a hrinpiak. Jehovah nih David tuahsernak kha a duh hrimhrim lo.
