Samuel Pahnihnak 17:1-29
17 Ahithofel nih Absalom kha “Ralkap 12,000 in ka thim hna lai i tuzan ah David kha ka va dawi lai.
2 A tha a bat lio le a derthawm lioah ka va doh lai i thinphan thlalau in a um lai. A sinah a ummi vialte an zam dih tikah siangpahrang lawng kha ka thah lai.
3 Mi vialte cu na sinah ka rak ratpi ṭhan hna lai. Na kawlmi pa a thih ahcun mi vialte cu na sinah an rak kir ṭhan lai i daihnak an hmu lai” tiah a ti.
4 Mah ruahnak cheuhnak nih Absalom le Israel upa vialte kha an lung a ton hna.
5 Asinain Absalom nih “Arkhi mi Hushai zong kha va au u law a chimmi kha ngai u sih” tiah a ti.
6 Hushai a rak phanh tikah Absalom nih “Ahithofel nih hitin ruahnak a kan cheuh. A chim ning in kan tuah awk a si maw? A si lo ahcun zeidah kan tuah awk a si ti kha rak kan chim” tiah a ti.
7 Hushai nih “Hi kong ah hin cun Ahithofel ruahnak cheuhnak hi a ṭha lo!” tiah a leh.
8 Hushai nih hitin a ti chap: “Na pa le a ralkap pawl cu an ṭhawng tuk ti kha na hngalh ko cu ta! Annih cu a fano tete an tlau caah a thin a hung tukmi vompi bantuk an si. Cun na pa cu a ṭhawngmi ralkap a si i a mi hna sinah a riak lai lo.
9 Atu ah cun lungkua asiloah kaa khatkhat ah aa thup cang lai. Na mi pawl kha a rak doh hmasa hna ahcun mah kong a theimi nih ‘Absalom mi cu an sung cang!’ tiah an ti lai.
10 Chiandeih bantuk in a ral a ṭhami hna hmanh an ṭih tuk lai i an khuk a ther lai. Zeicahtiah Israel mi vialte nih na pa cu miṭhawng a si ti le a mi hna cu mi ralṭha an si ti kha an hngalh.
11 Cucaah hitin ruahnak cheuh kaan duh: Israel mi vialte kha Dan in Beersheba tiang rilikam thetse zat in pum hna law nangmah nih raldohnak ah hruai hna.
12 A um lai tiah kan ruahnak hmun paoh ah kan chuah hnawh lai i vawlei ah a tlami dapti bantuk in ralkapbu nganpi he kan doh lai. Amah siseh, a sinah a ummi si hna seh pakhat hmanh an luat lai lo.
13 Khua pakhatkhat ah aa thuh ahcun Israel mi vialte nih hri kan i put lai i mah khua cu horkuang chung ah kan hnuh lai. Lung pelpawi pakhat te hmanh kan ngaan lai lo.”
14 Absalom le a sinah a ummi Israel mi vialte nih “Arkhi mi Hushai ruahnak cheuhnak cu Ahithofel ruahnak cheuhnak nakin a ṭha deuh” tiah an ti. Zeicahtiah Jehovah nih Ahithofel i a ṭhami ruahnak cheuhnak kha hrawh awkah bia a khiah cang. Cuticun Jehovah nih Absalom cung ah rawhralnak a tlunter khawh lai.
15 Hushai nih tlangbawi Zadok le Abiathar kha hitin a va chimh hna: “Ahithofel nih Absalom le Israel upa pawl kha hitin ruahnak a cheuh hna i kei zong nih hitin ruahnak ka cheuh hna.
16 Atu a rannak in David kha bia cah u law ‘Tuzan cu ramcar i Jordan Tiva a puanhnak pawng* ah riak hlah. Tiva cu tan law khattalei ral ah va um u. Cutin a si lo ahcun siangpahrang, nangmah le na mi vialte cu hloh dih nan si lai’ tiah ralrin va pe u.”
17 Jonathan le Ahimaaz cu mi nih an kan hmuh sual lai ti an phan caah khua chung ah an lut ngam lo i Enrogel cerhti put ah an um. Salnu te cu an sinah a ra i thawng a thanh hna. Annih zong siangpahrang David chimh awkah an i thawh.
18 Asinain mino pa pakhat nih a hmuh hna i Absalom kha a va chimh caah an pahnih cun an zam i Bahurim khuami pa pakhat inn ah an phan. Cu pa inntual ah tikhor pakhat a um. Mah tikhor chung ah cun an i thup.
19 Mipa a nupi nih tikhor kha a chinh i a cung ah fang a pho caah ahohmanh nih an hngal lo.
20 Absalom salle cu an ra i minu kha “Ahimaaz le Jonathan cu khoika ah dah an um?” tiah an hal tikah “Tiva lei ah an kal cang” tiah a leh hna. An kawl len hna nain an hmu hna lo i Jerusalem ah an kir ṭhan.
21 An kir hnuah Jonathan le Ahimaaz cu tikhor chung in an chuak i David sinah an kal. David kha “Ahithofel nih nangmah doh awkah ruahnak a cheuh hna caah tiva khattalei ral ah va tan zokzok” tiah an chimh.
22 Cu tikah David le a mi vialte nih Jordan Tiva kha an tan colh. Khua a dei tikah cun pakhat hmanh taang loin khattalei ral ah an phan dih.
23 Ahithofel nih a ruahnak cheuhnak ning in an tuah lomi kha a hmuh tikah laa kha kengdanh a danh i a khua ah a tlung. A innchungkhar kha bia a cahta hna hnuah hri in aa awk. A thi i a pupa hna thlan ah an vui.
24 Mah lio caan ah David cu Mahanaim khua ah a kal. Absalom zong a sinah a ummi Israel mi vialte he Jordan Tiva kha a rak tan.
25 Absalom nih Joab hmun ah Amasa kha ralbawi a ṭuanter. Amasa cu Israel mi Ithra le Abigail fa a si. Abigail cu Nahash fanu a si i Joab a nu Zeruiah nau a si.
26 Absalom le Israel mi hna cu Gilead ram ah riahhmun an khuar.
27 David cu Mahanaim a phanhle cangka Ammon mi hna khua Rabbah ah a ummi Nahash fapa Shobi, Lodebar khua ah a ummi Ammiel fapa Makhir le Rogelim khua ah a ummi Gilead mi Barzillai nih
28 ihphah, khengkuar, tlak um, changvut, barli, changvut dip, fangreu, be, pe,
29 khuaihliti, thawpat, tuu le cawhnuk khal hna kha David le a mi hna caah an rak put. “Ramcar ah an paw a ṭam lai, an tha a ba lai i an ti a hal lai” tiah an ti i mah thil vialte kha an rak put hna.
Footnotes
^ Asiloah “thetse ram rawn” ti zong a si kho.
