Samuel Pahnihnak 10:1-19
-
Ammon mi le Siria mi a tei hna (1-19)
10 A hnuah Ammon siangpahrang cu a thi i a fapa Hanun cu siangpahrang a hung si.
2 “Nahash nih ka cung ah a fekmi dawtnak a langhter caah a fapa Hanun cung ah a fekmi dawtnak ka langhter ve lai” tiah David nih a ti i a pa a thih caah a ngaih a chiami Hanun kha va hnemh awkah a salle a thlah hna. Asinain David salle cu Ammon mi hna ram an va phanh tikah,
3 Ammon mi bawi pawl nih Hanun cu “David nih na pa kha a upat caah na sinah hnemtu a rak thlah hna tiah maw na ruah? A tak ti ahcun khua a hrawh khawh nakhnga ngiat awkah a salle a rak thlahmi hna a si” tiah an chimh.
4 Cucaah Hanun nih David salle cu a tlaih hna, an khahmul kap khat lei a mehpiak hna i an angki fual kha an ṭawk ri in a tanpiak hna. Cun a thlah ṭhan hna.
5 David nih mah kong a theihle cangka a salle ton awkah mi a hei thlah colh hna. Zeicahtiah annih cu fakpi in ningzah thlaih an si. Cucaah “Nan khahmul a sau ṭhan hlan tiang Jeriko ah um u, cu hnuah rak kir te u” tiah a ti hna.
6 David nih a kan huat tuk cang ti kha Ammon mi nih an hngalh tikah mi an thlah hna i Beth-rehob le Zobah khua in Siria ke ralkap 20,000; siangpahrang Maakah le a mi 1,000; Ishtob ram in mi 12,000 kha an hlan hna.
7 David nih mah kong kha a theih tikah ralkap ṭhawngṭhawng hna i telin Joab le a ralkap vialte kha a thlah hna.
8 Ammon mi cu an rak chuak i khua hauka pawng ah hmun an la. Zobah khua le Rehob khua i Siria mi hna, Ishtob rammi hna le Maakah siangpahrang i a mi pawl cu rawn ah hmun an la.
9 Joab nih an hnulei he, an hmailei he ral an ratmi kha a hmuh tikah Israel ralkap chung in a thiam bikbik kha a thim hna i Siria mi doh awkah timhcia in a umter hna.
10 A taangmi ralkap tu cu a upa Abishai a hruaiter hna i Ammon mi doh awkah timhcia in hmun an la ve.
11 Cun Joab nih “Siria mi nih an vun ka tei deuh ahcun na rak ka bawmh lai; Ammon mi nih an in tei deuh ahcun ka rak in bawmh ve lai.
12 Kan miphun le kan Pathian ta a simi khua hna caah ṭhawng ngai le ralṭha ngai in do u sih! Jehovah Pathian nih a mithmuh ah a ṭha a ti ning in a tuah ko lai” tiah a ti.
13 Joab le a mi pawl nih doh awkah an va naih hna tikah Siria mi cu an zam.
14 Siria ralkap an zam kha Ammon mi nih an hmuh tikah Abishai sinin an zam ve i khua chung ah an lut. Cu hnuah Joab cu Ammon mi hna sinin a rak kir i Jerusalem ah a tlung.
15 Israel mi nih an kan tei cang ti kha Siria mi nih an hmuh tikah hmunkhat ah an i pum ṭhan.
16 Hadadezer nih Tivapi* pawng ah a ummi Siria ralkap kha a auhter hna tikah annih cu Helam ah an ra. Hadadezer ralbawi Shobakh nih a rak hruai hna.
17 Mah kha David nih a theih tikah Israel ralkap vialte cu a pumh hna. Jordan Tiva kha an tan i Helam ah an rak phan. Siria ralkap pawl zong raldoh awkah timhcia in an um i David cu an doh.
18 Asinain Siria mi cu Israel mi sinin an zam. David nih Siria rangleng mawngtu ralkap 700 le rang cung ralkap 40,000 kha a thah hna. An ralbawi Shobakh zong kha cuka ah a thah.
19 Hadadezer kut tang i siangpahrang hna nih kan sung cang ti kha an hmuh tikah Israel mi he a rannak in daihnak an ser i an kut tang mi an hung si. Mah caan thawk in Siria mi nih Ammon mi kha an bawm ngam ti hna lo.
Footnotes
^ Mah cu Zufrates Tiva a si.
