Ang Hunahuna sa Bibliya

Husto Bang Mogamit ug mga Imahen sa Pagsimba sa Diyos?

“Gitudloan ako nga ang mga imahen makapasuod nako sa Diyos.”​—Mack.

“Daghan mig mga imahen sa balay. Kami nagtuo nga kini makapahimuot sa Diyos.”​—Herta.

“Moluhod mi sa pipila ka imahen aron mangamuyo. Wala ra mi maghunahuna kon unsay bation sa Diyos sa among gihimo.”​—Sandra.

UNSAY imong hunahuna sa maong mga pahayag? Daghan ang nagtuo nga ang mga imahen makatabang kanila sa pagsimba sa Diyos. Husto ba kini nga panghunahuna? Labing hinungdanon, unsay hunahuna sa Diyos bahin niini? Tagda kon unsay giingon sa iyang Pulong, ang Balaang Bibliya.

Kon Unsay Hunahuna sa Diyos Bahin sa mga Imahen

Ang mga imahen ug mga idolo maoy mga hawas, o simbolo, sa bisan unsang butang nga gigamit sa mga tawo diha sa pagsimba. Naglakip kini sa krus, mga rebulto, estampa, o larawan sa bisan unsang butang sa langit o sa yuta. a Ang mga bandera ginasimba usab sa uban.

Libolibo nang katuigan nga gigamit kanang mga butanga diha sa pagsimba. Busa, sa 1513 W.K.P., sa dihang gihatagan sa Diyos ug Napulo ka Sugo ang bag-o pang natukod nga nasod sa Israel, siya tin-awng nagpahibalo kanila sa iyang hunahuna bahin sa mga imahen. Siya nag-ingon: “Dili ka magbuhat alang kanimo ug usa ka linilok nga larawan o usa ka dagway nga sama sa bisan unsa nga anaa sa kalangitan sa itaas o anaa sa yuta sa ubos o anaa sa mga tubig ilalom sa yuta. Dili ka magyukbo kanila ni maaghat sa pag-alagad kanila, tungod kay ako si Jehova nga imong Diyos maoy Diyos nga nagapangayo ug bug-os nga pagkamahinalaron.”​—Exodo 20:4, 5.

Matikdi ang duha ka butang nga gidili sa Diyos: Una, iyang gidid-an sila sa paghimog mga imahen alang sa pagsimba, ug ikaduha, kinahanglan nga dili sila ‘moyukbo’ o moalagad niini. Nganong gidili sa atong Maglalalang ang paghimog mga imahen? Ang usa ka hinungdan kon nganong gidili ang paghimog mga imahen sa Diyos tungod kay ‘wala [gayoy] tawo nga nakakita sa Diyos.’ Si Jehova  dili unodnon kondili espirituhanon ug siya nagpuyo sa langit. (Juan 1:18; 4:24) Gawas pa, ang Diyos nagkinahanglag “bug-os nga pagkamahinalaron,” mao nga wala niya itugot ang paghimog bisan unsang imahen. Siya nag-ingon: “Dili ko ihatag kang bisan kinsa ang akong kaugalingong himaya, ni ang akong pagdayeg ngadto sa kinulit nga mga larawan.” (Isaias 42:8) Tungod niini, sayop ang paghimog imahen nga gamiton sa pagsimba. Sa dihang ang usa ka pangulo sa Israel nga si Aaron naghimog imahen, misilaob ang kasuko ni Jehova.​—Exodo 32:4-10.

Nganong Dili Moyukbo Kanila?

Mahitungod sa mga idolo, ang Bibliya nag-ingon: “Sila adunay baba, apan sila dili makasulti; sila adunay mga mata, apan sila dili makakita; sila adunay mga igdulungog, apan sila dili makadungog.” Dayon kini nagdugang niining seryosong pasidaan: “Ang nagbuhat kanila mahisama gayod kanila”​—walay kinabuhi!​—Salmo 115:4-8.

Ang pagsimba sa mga idolo dili usab makataronganon. Suknaa ang imong kaugalingon, ‘Unsa kahay akong bation kon human nako hatagig mahalon nga regalo ang akong anak, siya molakaw ug magpasalamat sa uban o sa walay-kinabuhi nga butang?’ Ang imong tubag niining pangutanaha makatabang kanimo nga masabtan kon unsay bation sa atong Maglalalang ug Maghahatag-Kinabuhi sa dihang ang mga tawo magpasalamat ug mosimba sa uban​—lakip na sa walay-kinabuhi nga mga idolo—​inay kaniya.​—Pinadayag 4:11.

Hunahunaa usab kon unsa ka makauulaw alang sa usa​—nga gilalang sa larawan sa Diyos—​ang pagsimba sa walay-kinabuhi nga butang! (Genesis 1:27) Maylabot sa pipila nga nagbuhat niana, si manalagnang Isaias misulat: “Nagayukbo sila sa binuhat sa mga kamot, nianang hinimo sa mga tudlo sa usa ka tawo. Ug ang yutan-ong tawo magayukbo, ug ang tawo mahimong ubos, ug ikaw [Jehova nga Diyos] dili makapasaylo kanila.”​—Isaias 2:8, 9.

Insulto kaayo sa Diyos ang bakak nga pagsimba. Ngano? Tungod kay kini sa pagkatinuod maoy pagsimba sa mga demonyo​—ang mga kaaway sa Diyos. Sa dihang ang mga Israelitas mitalikod kang Jehova aron sa pagsimba sa mga idolo, sila ‘naghalad sa mga demonyo, dili sa Diyos,’ nag-ingon ang Deuteronomio 32:17.

Ang mga sumusunod ba ni Jesu-Kristo sa unang siglo nagsimba sa mga imahen o naggamit niini diha sa ilang pagsimba? Wala gayod! Ang apostoles ni Jesus nga si Juan misulat: “Minahal nga mga anak, pagbantay kamo gikan sa mga idolo.” (1 Juan 5:21) Ang librong Early Church History to the Death of Constantine nag-ingon: “Wala nay mas labaw pang dulumtanan alang sa mga disipulo sa unang siglo kay sa pagsimba sa mga imahen.”

Hustong Paagi sa Pagsimba

Si Jesus nag-ingon: “Ang matuod nga mga magsisimba magasimba sa Amahan uban sa espiritu ug sa kamatuoran, kay, sa pagkatinuod, ang Amahan nagapangita sa mga ingon kanila aron magasimba kaniya.” (Juan 4:23) Oo, buot gayod sa Diyos nga ato siyang mailhan​—kon unsay iyang gusto ug dili gusto, kon unsay iyang mga sukdanan, ug kon unsay iyang katuyoan alang kanato. (Juan 17:3) Gani, kanay hinungdan kon nganong iyang gipasulat ang Bibliya. (2 Timoteo 3:16) Tungod usab kay ang Diyos “dili halayo gikan sa matag-usa kanato,” kita makaampo kaniya bisan kanus-a, bisan asa, nga dili magkinahanglag mga imahen.​—Buhat 17:27.

“Pagsulod nako sa Kingdom Hall sa mga Saksi ni Jehova, wala koy nakitang mga imahen,” matod pa ni Sandra, nga gikutlo ganina. “Gigamit sa mga Saksi ang Bibliya aron ipakita kanako ang mga hiyas ug mga sukdanan sa Diyos. Busa, nakakat-on ako kon unsaon pag-ampo nga dunggon sa Diyos. Gibati nako karon nga tukma na ang akong kahibalo sa Maglalalang ug suod na ako kaniya.” Oo, si Sandra malipayon na karon tungod kay ang kamatuoran sa Bibliya nagpahigawas kaniya. (Juan 8:32) Ingon usab niana ang imong masinati.

[Footnote]

NAKAPAMALANDONG KA BA?

◼ Nganong angay natong likayan ang paggamit ug mga imahen diha sa pagsimba?​—Salmo 115:4-8; 1 Juan 5:21.

◼ Sa unsang paagi nato simbahon ang matuod nga Diyos?​—Juan 4:24.

◼ Sa unsang paagi nimo makat-onan ang kamatuoran bahin sa Diyos, ug unsang kaayohan ang mahimo nimong mabatonan?​—Juan 8:32; 17:3.