Umaabot sa Yuta​—Kinsay Magtino Niini?

“ANG pag-init sa klima mao ang kinadak-ang problema nga atong giatubang sukad,” miingon ang Oktubre 2007 nga edisyon sa National Geographic. Aron atong masulbad ang maong problema, matod sa magasin, kita kinahanglang “determinado nga molihok dayon​—ug buhaton kana sa hamtong nga paagi nga talagsa ra natong gihimo ingong katilingban.”

Sulbaron ba sa tawo kining problemaha sa hamtong nga paagi? Adunay daghang babag sa pagsulbad niana: ang kawalay-pagpakabana, kadalo, kawalay-alamag, hakog nga mga tinguha, kagustohan sa mga tawo diha sa pobreng mga nasod nga modato dayon, ug ang tinamdan sa milyonmilyong tawo nga dili gustong bag-ohon ang ilang luho nga pagkinabuhi.

Ang usa ka karaang manalagna sa Diyos mikomento bahin sa kapasidad sa tawo sa pagsulbad sa atong mga problema sa moralidad, katilingban, ug sa gobyerno. Siya misulat: “Dili iya sa yutan-ong tawo ang iyang dalan. Dili iya sa tawo nga nagalakaw bisan ang pagtultol sa iyang lakang.” (Jeremias 10:23) Ang makapasubo nga kasaysayan sa tawo nagpamatuod nga tinuod kanang mga pulonga. Bisag miuswag na pag-ayo ang siyensiya ug teknolohiya, kita nag-atubang gihapon ug mga kapeligrohan nga kaniadto giisip nga imposibleng mahitabo. Busa makasalig ba kita nga moarang-arang ang umaabot?

Tinuod nga daghan na ang gihisgotan kon unsaon pagsulbad ang kausaban sa klima ug ang uban pang mga problema, apan diyutay ra ang nahimo. Pananglitan, unsay gibuhat sa mga nasod niadtong 2007 sa dihang ang Northwest Passage sa kataposan bug-os nang maagiag barko? Ang usa ka editoryal sa magasing New Scientist miingon: “Sila nag-inilogay pag-angkon sa nadayag nga bahin sa utlanan sa kontinente aron sila makakuhag aseite ug gas.”

Duolan sa 2,000 ka tuig kanhi, ang Bibliya tukmang nagtagna nga moabot ang panahon nga ang mga tawo ‘maglaglag sa yuta.’ (Pinadayag 11:18) Tataw nga ang kalibotan nagkinahanglag usa ka lider nga adunay kaalam ug gahom sa pagkab-ot sa maong mga tumong ug mga ginsakpan nga andam magpasakop kaniya. Ang usa ba ka matinud-anon ug makinaadmanong politiko o siyentipiko makahimo niana? Ang Bibliya nagtubag: “Ayaw ibutang ang inyong pagsalig sa mga hamili, ni sa anak sa yutan-ong tawo, nga kaniya walay kaluwasan.”​—Salmo 146:3.

 Umaabot sa Yuta​—Anaa sa Maayong mga Kamot!

Adunay usa lamang ka Lider nga makasulbad sa mga problema nga giatubang sa kalibotan. Mahitungod kaniya, ang Bibliya nagtagna: “Ang espiritu ni Jehova [nga Diyos] mopahiluna kaniya, ang espiritu sa kaalam ug sa pagsabot, ang espiritu sa tambag ug sa pagkagamhanan, ang espiritu sa kahibalo ug sa pagkahadlok kang Jehova . . . Uban sa pagkamatarong siya magahukom sa mga timawa, . . . ug pinaagi sa espiritu sa iyang mga ngabil iyang patyon ang daotan.”​—Isaias 11:2-5.

Kinsa man Siya? Walay lain kondili si Jesu-Kristo, kinsa mahigugmaong naghatag sa iyang kinabuhi alang kanato. (Juan 3:16) Sa pagkakaron, si Jesus usa na ka gamhanang espiritung persona ug siya gihatagan sa Diyos ug awtoridad ug gahom nga momando sa tibuok yuta.​—Daniel 7:13, 14; Pinadayag 11:15.

Apil sa mga kuwalipikasyon ni Jesus mao ang iyang dakong kahibalo bahin sa kalalangan sa Diyos, nga iyang nabatonan sa wala pa siya moanhi sa yuta. Gani, sa dihang gilalang sa Diyos ang pisikal nga uniberso dugay na kanhi, si Jesus mao ang iyang “batid nga magbubuhat.” (Proverbio 8:22-31) Hunahunaa ra kana: Si Jesus, ang usa nga mitabang sa paghimo sa yuta ug sa tanang buhing mga butang, maoy manguna sa pagtul-id sa kadaot nga gipahinabo sa tawo.

Kinsa man ang mahimong mga ginsakpan ni Kristo? Sila mao ang mga tawong maaghop ug matarong, kinsa nakaila sa matuod nga Diyos, si Jehova, ug nagmasinugtanon kang Jesu-Kristo ingong Magmamando. (Salmo 37:11, 29; 2 Tesalonica 1:7, 8) Si Jesus miingon nga sila “magapanunod sa yuta,” nga mahimong usa ka paraiso.​—Mateo 5:5; Isaias 11:6-9; Lucas 23:43.

Unsay imong buhaton aron makapahimulos ka sa katumanan sa mga saad sa Bibliya? Si Jesus mismo nagtubag niana: “Kini nagkahulogan ug kinabuhing walay kataposan, ang ilang pagkuha ug kahibalo bahin kanimo, ang bugtong matuod nga Diyos, ug sa usa nga imong gipadala, si Jesu-Kristo.”​—Juan 17:3.

Oo, ang atong planeta morag nameligro, apan kini magpabilin gayod ingong puy-anan sa tawo. Hinunoa, ang nameligro mao kadtong padayong nagdaot sa kalalangan sa Diyos ug wala magmasinugtanon kang Jesu-Kristo. Busa, ang mga Saksi ni Jehova nag-awhag kanimo sa pagkuhag kahibalo nga motultol sa kinabuhing walay kataposan.

[Kahon sa panid 8]

DILI GAYOD MASULBAD SA SIYENSIYA

Milyonmilyong tawo ang naggamit ug gidili nga mga droga, nag-abuso sa alkoholikong mga ilimnon, ug nanigarilyo, bisan pag nahibalo sila nga makadaot kini sa ilang kaisipan ug lawas. Wala nila isipa ang kinabuhi ingong sagradong gasa gikan sa Diyos. (Salmo 36:9; 2 Corinto 7:1) Ikasubo nga ingon usab niana ang tinamdan sa mga tawo ngadto sa yuta mao nga nagbuhat sila ug mga butang nga nakapasamot sa pagkadaot niini.

Nan, unsa may makasulbad niana? Makasulbad ba ang siyensiya ug sekular nga edukasyon? Dili gayod. Tungod kay ang hinungdan sa problema mao man ang kawalay kahibalo sa tawo bahin sa panglantaw ni Jehova sa yuta, ang solusyon mao ang pagkuhag kahibalo bahin sa Diyos. Mao kanay giingon sa Bibliya. Busa, kini nagsaad nga moabot ang panahon nga ang mga tawo ‘dili magadaot ni magagun-ob’ sa yuta tungod kay kini “mapuno sa kahibalo kang Jehova ingon sa katubigan nga nagtabon sa dagat mismo.”​—Isaias 11:9.

[Hulagway sa panid 8, 9]

Ilalom sa pagmando ni Kristo ang mga matarong makapakig-ambit sa paghimo sa tibuok yuta nga paraiso