Pagpaniid sa Kalibotan

◼ Sa 2007, mga 47 ka milyong Insek ang nag-antos sa kakulang ug mainom nga tubig tungod sa grabeng hulaw sulod sa usa ka dekada. Kasamtangan, 42 milyones ang naapektohan sa mga bagyo, ug 180 milyones usab ang naapektohan sa mga baha.​—XINHUA NEWS AGENCY, TSINA.

◼ “Niadtong 2003, gibanabana nga sa matag lima ka pagmabdos sa tibuok kalibotan, usa ang gipakuha. Sa Uropa, sa halos tulo ka pagmabdos, usa ang gipakuha . . . [Sa] mga nasod sa kanhing Unyon Sobyet, . . . gibanabana nga 45% sa mga pagmabdos niadtong 2003 ang gipakuha.”​—BRITISH MEDICAL JOURNAL, BRITANYA.

Mapintas nga mga Dula sa Video Diha sa Simbahan

“Daghang ministro ug mga pastor nga nagtinguha nga pasimbahon ang mga batan-on ang gisaway tungod sa ilang linaing paagi sa pagpangdani,” nga naggamit ug “popular kaayo” apan “mapintas nga dula sa video,” nagtaho ang The New York Times. Ang maong dula alang unta sa mga hamtong. Niana ang magdudula, nga mao konohay ang sundalo, kinahanglang mopatay sa iyang mga kaaway sa lainlaing paagi. Bisan pa sa maong pagsaway, ang mga tig-organisar sa mga grupo sa mga batan-on nga membro sa Protestante ug ebanghelikal nga relihiyon “nagbutang gihapog mga dulaanan diha sa ilang mga simbahan nga nakadani sa daghang tin-edyer sa pag-alirong diha sa dagkong telebisyon ug sa pagrakrak sa ilang mga kaaway,” matod pa sa mantalaan.

Gigamit sa Uban ang Ngalan sa mga Bata

Nagkadaghan ang mga bata nga nabiktima niini nga krimen, nga makadaot sa ilang rekord. Tungod niana, sa dihang modako na sila, maglisod na sila sa pagpanghulam ug kuwarta ug magdaot usab kini sa ilang relasyon niadtong naggamit sa ilang ngalan, matod pa sa The Wall Street Journal. Ang maong mga krimen, nga sagad gihimo sa usa ka membro sa pamilya, mahimong dili masakpan sulod sa daghang dekada. “Kadaghanan sa mga tawo wala mahibalo nga ang ilang ngalan gigamit na diay sa ilegal nga paagi . . . ayha pa nila masayran kini sa dihang sila moaplay ug trabaho, mokuhag lisensiya sa pagdrayb, mangutang aron makatungha o manghulam ug kuwarta sa bangko,” matod pa sa maong mantalaan. Ang uban makadiskobre niana sa dihang ang ahensiya nga nagpautang maningil sa nagpatongpatong nga utang nga gikarga sa ilang ngalan.

Nukleyar nga mga Misil “Nawala”

Niadtong Agosto 30, 2007, ang usa ka B-52 nga ayroplano sa U.S. Air Force milupad sa Tinipong Bansa sulod sa tulo ka oras ug tunga nga may dalang unom ka nukleyar nga misil nga “nasaypag taod diha sa pako niini,” nagtaho ang The Washington Post. Ang mga piloto sa maong ayroplano ug ang nagtaod sa misil wala gayod makamatikod sa maong sayop “sulod sa 36 ka oras,” matod pa sa mantalaan. Sumala sa taho, “ang mga opisyales sa Air Force nag-ingon nga ang nukleyar nga mga misil wala pa iprograma nga mobuto mao nga dili ra kini peligro sa katilingban.” Bisan pa niana, misukna ang usa ka komentarista: “Dili ba angay gihapon kitang mabalaka?”

Polusyon Masukod Pinaagi sa mga Salampati

Ang pagtuon nga gihimo bahin sa mga salampati sa siyudad sa Jaipur nagpakita nga kining langgama magamit diay sa pagsukod sa polusyon sa siyudad, matod pa sa mga tigdukiduki sa Unibersidad sa Rajasthan, sa amihanang India. “Ang mga metal nga presente diha sa dapit nga gipuy-an sa mga langgam motapot sa ilang mga balhibo, ug magpabilin gihapon diha niana bisan pag mangatagak na [ang mga balhibo],” nag-ingon ang Gobar Times sa New Delhi, nga usa ka pasukip sa magasing Down to Earth. Sanglit ang mga salampati sagad magpuyo sa usa lang ka dapit, ang gidaghanon sa cadmium, chromium, tumbaga, ug tingga nga motapot sa ilang mga balhibo maoy kasaligan nga sukdanan kon unsa na ka hugaw ang maong dapit.