Ol Bigfala Poen Long Buk Blong Ol Wok
Tok Blong Jeova i Wan Samting We i Laef
Ol Bigfala Poen Long Buk Blong Ol Wok
BUK blong Ol Wok long Baebol, i tokbaot plante samting we i hapen long taem we Kristin kongregesen i stat mo i kam bigwan. Dokta Luk i raetem buk ya, mo hem i tokbaot wok we ol Kristin oli mekem samwe long 28 yia, stat long yia 33 kasem yia 61. Stori ya i laef mo i pulum intres blong yumi.
Faswan haf long buk blong Ol Wok, i tokbaot wok we aposol Pita i mekem, mo laswan haf blong hem i tokbaot wok blong Aposol Pol. Ol tok olsem “yumi” mo “mifala” we Luk i yusum long buk ya, i soemaot se hem i bin stap long taem we sam long ol samting ya oli bin hapen. Taem yumi lesingud long ol tok we oli stap long buk blong Ol Wok, bambae oli halpem yumi blong gat moa tangkiu long paoa we i kamaot long Tok blong God, Baebol, mo long tabu spirit blong hem. (Hib. 4:12) Fasin tangkiu ya bambae i pusum yumi blong lego ol samting we yumi nomo i wantem, mo blong mekem bilif blong yumi i kam strong moa long ol promes blong Kingdom.
PITA i YUSUM “OL KI BLONG KINGDOM”
Afta we ol aposol oli kasem tabu spirit, oli gohed we oli no fraet blong prij long ol man. Pita i yusum faswan “ki blong kingdom blong heven,” blong openem doa long ol man Jiu mo ol proselaet “we oli bilif long tok blong hem,” blong oli kasem save mo oli gat janis blong go insaed long Kingdom blong God. (Mat. 16:19, NW; Wok 2:5, 41) Taem bigfala fasin agens i kamaot, ol disaepol oli ronwe i go long ol narafala ples, mo samting ya i mekem se wok blong talemaot gud nius i kam bigwan moa.
Taem ol aposol long Jerusalem oli harem nius se ol man Sameria oli bilif long Tok blong God, oli sanem Pita mo Jon blong go luk olgeta. Long taem ya, Pita i yusum namba tu ki taem hem i givim janis long ol man Sameria blong oli go insaed long kingdom blong heven. (Wok 8:14-17) Long sem yia ya we Jisas i laef bakegen long ded, Sol blong Tasas i mekem wan bigfala jenis long laef blong hem. Hem i jenisim ol fasin blong hem mo i kam wan Kristin. Long 36 K.T., Pita i yusum namba tri ki mo long taem ya, God i kafsaedem tabu spirit blong hem long ol hiten man we oli bilif long Jisas mo we oli no sakomsaes.—Wok 10:45.
Ansa Blong Sam Kwestin Long Saed Blong Baebol:
2:44-47; 4:34, 35—?From wanem sam Kristin oli salem ol samting blong olgeta mo serem mane we oli kasem? Plante man we oli bilif long Jisas oli kam longwe, mo oli no gat naf mane blong stap longtaem long Jerusalem. Nating se i olsem, oli wantem stap smol taem blong lanem moa long saed blong niufala bilif blong olgeta, mo blong givim witnes long ol man. From samting ya, sam Kristin oli salem ol graon mo ol samting blong olgeta, nao oli seraotem mane long olgeta ya we oli sot long sam samting.
4:13—?Olsem wanem? ?Pita mo Jon, tufala i save rid mo raet mo tufala i skul no nogat? Si, tufala i save rid mo raet. Oli talem tufala se “oli no gat nem, mo oli no skul gud,” from we tufala i no bin joen long wan skul we i givim trening blong wosipim God.
5:34-39—?Ol man olbaot oli no save go long miting blong Kaonsel blong ol man Jiu, be olsem wanem Luk i save samting we Gamaliel i talem long miting ya? I gat tri rod we maet i mekem se Luk i save: (1) Pol i bin wan studen blong Gamaliel, mo ating Pol nao i talemaot samting ya long Luk, (2) Ating Luk i bin storian wetem wan fren we i memba blong kaonsel blong Sanhedrin, olsem Nikodimas, (3) Luk i kasem save ya tru long tabu spirit.
7:59—?Steven i prea long Jisas? Nogat. Wosip we man i mekem—mo prea blong hem tu—i mas go long Jeova God nomo. (Luk 4:8; 6:12) Plante taem Steven i prea long Jeova tru long nem blong Jisas. (Jon 15:16) Be long stori ya, Steven i luk long wan vison we “Pikinini blong Man hem i stap stanap long raet saed blong God.” (Wok 7:56) Long taem ya, Steven i kasem save se Jisas i kasem paoa blong mekem ol man oli laef bakegen long ded. Ale hem i no prea, be hem i toktok i go stret long Jisas, i askem Hem blong i lukaotgud long spirit blong hem, blong hem i save girap bakegen long ded.—Jon 5:27-29.
Ol Lesen Blong Yumi:
1:8. Wok blong talemaot gud nius long fulwol we ol man blong Jeova oli mekem, i no save gohed sipos tabu spirit i no givhan long olgeta.
4:36–5:11. Ol aposol oli givim wan narafala nem long Josef, we i blong aelan blong Saepras, se Banabas, we i minim “man blong leftemap tingting blong man.” Ating ol aposol oli putum nem ya Banabas from we hem i lavem ol man, i kaen, mo i givhan long olgeta. Yumi mas folem fasin blong hem, be yumi no folem fasin blong Ananaeas mo Safaera we tufala i soem se tufala i gudfala man be tufala i stap giaman nomo, tufala i gat tu fes, mo tufala i gat fasin blong trikim man.
9:23-25. Taem yumi ronwe long ol enemi, yumi mekem olsem blong bambae yumi save gohed long wok blong prij, be i no from we yumi fraet
9:28-30. Samtaem, sipos yumi prij long sam teritori, no long sam man, i gat sam samting we i save mekem se yumi kasem kil long bodi blong yumi no oli save spolem ol gudfala fasin blong yumi, nao yumi lusum fasin fren blong yumi wetem Jeova. Long taem olsem, yumi mas waes mo lukaotgud, yumi mas jusum weples mo wanem taem we bambae yumi prij long ol ples olsem.
9:31. Long taem blong pis, yumi mas traehad blong mekem bilif blong yumi i kam strong moa. Yumi mekem olsem taem yumi stadi mo tingting dip long ol samting we yumi lanem. Olsemia nao, bambae yumi gohed blong onagud long Jeova taem yumi mekem ol samting we yumi lanem mo taem yumi wok strong long wok blong prij.
STRONG TINGTING BLONG POL LONG WOK BLONG PRIJ
Long yia 44, Agabus i kam long Antiok. Banabas mo Saelas tufala i stap long ples ya “wan fulyia” finis, blong tijim ol man long Baebol. Agabus i talemaot se bambae i gat “hadtaem blong kasem kakae,” mo samting ya i kamtru tu yia biaen. (Wok 11:26-28) Afta we Banabas mo Sol “tufala i finisim wok ya we olgeta oli sanem tufala from” long Jerusalem, tufala i gobak long Antiok. (Wok 12:25) Long yia 47, hemia samwe long 12 yia afta we Sol i kam Kristin, tabu spirit i sanem Banabas mo Sol, blong tufala i go long wan misinari trip. (Wok 13:1-4) Long yia 48, tufala i gobak long Antiok, mo ‘long ples ya, God i stap givhan long tufala long gladhat blong hem.’—Wok 14:26.
Samwe naen manis biaen, Pol (we narafala nem blong hem Sol) i statem namba tu trip blong hem, nao hem i jusum Saelas blong i go wetem hem. (Wok 15:40) Long haf rod, Timoti mo Luk tufala i joenem hem. Luk i stop long Filipae, be Pol i go kasem Atens, mo i aot long ples ya i gotru long Korin, nao long ples ya hem i stap wetem Prisila mo Akwila, blong wan yia haf. (Wok 18:11) Pol i lego Timoti mo Saelas long Korin, mo long stat blong yia 52, hem i tekem Akwila mo Prisila wetem hem long sip blong go long Siria. (Wok 18:18) Akwila mo Prisila tufala i go wetem Pol kasem Efesas, mo tufala i stap long ples ya.
Pol i stap longtaem lelebet long Antiok, nao biaen, long yia 52, hem i statem namba tri trip blong hem. (Wok 18:23) Long Efesas, ‘tok blong [Jeova] i stap goaot moa long evri ples, i stap kam strong moa oltaem.’ (Wok 19:20) Pol i spenem klosap tri yia long ples ya. (Wok 20:31) Long dei blong Pentekos long yia 56, Pol i stap finis long Jerusalem. Afta we ol soldia oli holemtaet hem, hem i no fraet blong prij long ol haeman blong gavman. Long Rom, Pol i stap long kalabus blong tu yia (samwe long yia 59 kasem 61), mo long ples ya hem i faenem rod blong talemaot gud nius blong Kingdom mo tijim ol man long “gud nius blong Jisas Kraes, Masta blong yumi.”—Wok 28:30, 31.
Ansa Blong Sam Kwestin Long Saed Blong Baebol:
14:8-13—?From wanem ol man long Listra oli singaot Banabas se Sus, mo Pol se Heremes? Long bilif blong ol man Gris, Sus hem i jif blong ol god, mo oli singaot pikinini blong hem Heremes, from gudfala fasin blong hem blong toktok. From we Pol nomo i stap toktok long ol man long Listra, ale oli singaot hem se Heremes mo Banabas se Sus.
16:6, 7—?From wanem tabu spirit i blokem Pol mo ol fren blong hem blong oli no prij long distrik ya Esia mo Bitinia? I gat smol man nomo blong mekem wok blong prij, taswe tabu spirit i lidim olgeta blong oli go long ol ples we oli save karem gudfala frut long olgeta.
18:12-17—?From wanem Hed gavman Galio i no blokem ol man taem oli kilim Sostenes? Maet long tingting blong Galio, Sostenes ya nao i stap lidim grup ya blong agensem Pol. Taswe maet hem i ting se i stret nomo we Sostenes i kasem panis blong samting we hem i mekem. Be gudfala frut we i kamaot from trabol ya, hemia se Sostenes i kam wan Kristin. Biaen, Pol i tokbaot Sostenes se hem i “brata blong yumi.”—1 Kor. 1:1.
18:18—?Wanem promes we Pol i mekem? Ol man we oli stadi long saed blong Baebol oli talem se Pol i promes blong laef olsem wan Nasiraet. (Nam. 6:1-21) Be Baebol i no tokbaot wanem promes we Pol i mekem. Mo tu, Baebol i no tokbaot sipos Pol i bin mekem promes ya bifo no afta we hem i kam Kristin, mo sipos hem i jes statem promes ya no i kasem en blong promes ya. Nomata se i olsem wanem, be fasin blong wok folem promes blong yumi i no wan sin.
Ol Lesen Blong Yumi:
12:5-11. Yumi save mo yumi mas prea from ol brata blong yumi.
12:21-23; 14:14-18. Herod i glad blong kasem ona ya we i sud go long God nomo. !Fasin blong Pol mo Banabas i defren olgeta! !Tufala i soem long fasin mo long toktok blong tufala se tufala i no wantem nating we ol man oli leftemap mo givim ona long tufala! Nomata wanem gudfala wok we yumi mekem blong Jeova, be yumi no mas wantem blong ol man oli leftemap yumi from.
14:5-7. Fasin blong waes mo lukaotgud i save halpem yumi blong stap strong long wok blong prij.—Mat. 10:23.
14:22. Ol Kristin oli mas kasem trabol. Be oli no mas mekem wan samting we i agensem bilif blong olgeta, blong traem blong ronwe long ol trabol ya.—2 Tim. 3:12.
16:1, 2. Ol yangfala Kristin oli mas wok strong blong mekem wok blong Jeova insaed long kongregesen. Oli mas askem long Jeova blong i givhan long olgeta blong oli gat gudnem long kongregesen.
16:3. Yumi mas traehad blong mekem olgeta samting we i laenap wetem ol stamba rul blong Baebol, blong ol man oli save agri long gud nius.—1 Kor. 9:19-23.
20:20, 21. Wok blong talemaot gud nius long ol haos wanwan, i wan impoten haf blong wok blong prij.
20:24; 21:13. Fasin blong holemstrong long God i moa impoten, i bitim we yumi sevem prapa laef blong yumi.
21:21-26. Yumi mas wantem mo yumi mas glad blong kasem ol gudfala advaes.
25:8-12. Ol Kristin tede oli save mo oli mas yusum ol loa we ol haeman oli stanemap, blong “blokem ol enemi blong gud nius mo mekem hem i stanap strong long saed blong loa.”—Fil. 1: 7, NW.
26:24, 25. Yumi mas talemaot “ol tok ya we oli stret mo oli tru” nating sipos ‘man we tabu spirit i no stap long hem’ i luk se ol tok ya oli krangke nomo.—1 Kor. 2:14.
[Tok blong pija long pej 30]
?Wetaem Pita i yusum “ol ki blong kingdom”?
[Tok blong pija long pej 31]
Wok blong talemaot gud nius long fulwol i kamaot from tabu spirit