1, 2. Afta we Sekaraea i luk namba seven vison blong hem, ?ol man Jiu oli stap mekem wanem long Jerusalem?

SEKARAEA i gat plante samting blong tingbaot, afta long namba seven vison blong hem. Ating promes blong Jehova blong panisim ol man blong stil i givim paoa long hem. Be i no gat wan samting i jenis. Plante man oli stap mekem ol rabis fasin yet, oli stap stil, mo oli no finisim wok ya blong bildim bakegen haos blong God. ?From wanem oli kwik blong lego wok ya we Jehova i givim? ?Oli kambak long Jerusalem blong mekem prapa laef blong olgeta i kamgud nomo?

² Sekaraea i save se ol man Jiu we oli kambak long Jerusalem oli wosipim Jehova. Olgeta nao we ‘Jehova i wok long tingting blong olgeta’ blong oli lego haos mo bisnes blong olgeta long Babilon. (Esra 1:2, 3, 5) Oli aot long wan ples we oli save gud, blong kam long wan kantri we oli neva luk bifo. Long tingting blong olgeta, i impoten tumas blong wokem bakegen haos blong Jehova, taswe oli rere blong wokbaot  bitim 1,600 kilometa, long ples we i had mo i denja, blong kasem Jerusalem.

3, 4. ?Wanem trabol we ol man Jiu oli fesem?

³ Traem tingbaot longfala trip ya we oli mekem. Oli gat plante taem blong tingbaot mo tokbaot ples we oli stap go long hem. Oli harem ol olfala oli tokbaot Jerusalem mo haos blong God bifo, se oli naes tumas. (Esra 3:12) Sipos yu yu stap wokbaot wetem olgeta ya, ?bambae yu harem nogud blong luk se Jerusalem i bus, mo ol haos mo stonwol oli brokbrok? Taem yu luk stonwol ya wetem ol bigfala hol long ples we ol get mo taoa i stap bifo, ating bambae yu tingbaot ol bigbigfala stonwol blong Babilon we oli stap stanap strong. Be tingting blong ol man Jiu i no foldaon. ?From wanem? From we oli luk olsem wanem Jehova i givhan long olgeta mo i protektem olgeta, taem oli stap wokbaot i kambak. Taswe, taem oli kasem Jerusalem, oli wokem wan olta long ples we tempol i stap long hem fastaem, mo evri dei oli mekem sakrefaes i go long Jehova. (Esra 3:1, 2) I olsem we faea i laet long olgeta, mo oli rere blong wok. I luk olsem se i no gat wan samting we i save mekem tingting blong olgeta i foldaon.

⁴ Antap long wok ya blong bildim bakegen haos blong God, ol man Jiu oli mas wokem taon ya bakegen wetem ol prapa haos blong olgeta. Mo tu, oli mas planem garen blong givim kakae long famle blong olgeta. (Esra 2:70) !Hemia ol bigbigfala wok ya! Be i no longtaem, ol enemi oli agensem olgeta. Oli gohed 15 yia blong traem stopem olgeta, mo sloslo ol man Jiu oli kam slak. (Esra 4:1-4) Oli fesem wan narafala trabol bakegen long yia 522 bifo Kraes, taem king blong Pesia i stopem wok blong bildim ol haos long Jerusalem. I luk olsem se taon ya bambae i neva kamgud bakegen.—Esra 4:21-24.

5. ?Olsem wanem Jehova i givhan long ol man blong hem?

⁵ Jehova i luksave se ol man blong hem oli nidim help blong kam strong bakegen mo no fraet. Ale, Sekaraea i luk las vison blong hem, we i soemaot se Jehova i lavem ol man blong hem mo hem i glad taem oli traehad blong mekem wok blong hem. Hem i promes blong protektem olgeta sipos oli gohed long wok we hem i givim long olgeta. Hem i tokbaot wok ya blong bildim bakegen haos tempol, taem hem i talem se: ‘Sipos yufala i obei long ol tok blong mi, olgeta samting ya bambae i kamtru olsem.’—Sekaraea 6:15.

6. (1) ?Sekaraea i luk wanem long namba eit vison? (Yu luk pija long stat blong stadi.) (2) ?From wanem ol hos oli gat defdefren kala?

⁶ Laswan long ol eit vison blong Sekaraea i mekem bilif blong yumi i kam strong moa. (Ridim Sekaraea 6:1-3.) Traem tingbaot samting we hem i luk. Ol hos we oli pulum fo kat, oli kamaot “long medel blong tu hil,” we tufala i bras. Ol hos ya oli gat defdefren kala, hemia i mekem i isi blong luksave olgeta. Sekaraea i askem se: “?Ol kat ya oli minim wanem ya?” (Sekaraea 6:4) Yumi tu yumi wantem save samting ya, from we vison ya i blong yumi tu.

7, 8. (1) ?Tufala hil ya i minim wanem? (2) ?From wanem tufala hil ya i bras?

⁷ Plante taem Baebol i yusum ol hil blong minim ol kingdom o gavman. Tufala hil we Sekaraea i luk oli klosap sem  mak long tufala hil long profet tok blong Daniel. Wan hil i minim rul blong Jehova antap long heven mo wol, mo narawan i minim Kingdom blong Mesaea we Jisas i King blong hem. (Daniel 2:35, 45) Stat long 1914, taem Jisas i kam King, tufala hil ya i mekem wan spesel wok, blong stamba tingting blong God i save kamtru long wol.

⁸ ?From wanem tufala hil ya i bras? Bras i saen gud mo i sas. Taem ol man Isrel oli wokem haos tapolen blong God mo tempol long Jerusalem, Jehova i talem long olgeta blong oli wokem plante samting long bras. (Eksodas 27:1-3; 1 King 7:13-16) Tufala hil ya blong bras i soemaot se rul blong Jehova antap long heven mo wol mo Kingdom blong Mesaea, tufala i nambawan tumas, mo tufala bambae i mekem ol man oli harem se oli sef mo oli kasem plante blesing.

9. ?Wanem mining blong ol kat mo ol man we oli ron long olgeta? ?Wanem wok blong olgeta?

⁹ ?Wanem mining blong ol kat mo ol man we oli ron long olgeta? Oli minim ol enjel, ating ol defdefren grup blong ol enjel. (Ridim Sekaraea 6:5-8.) * “Masta blong olgeta ples long wol ya” i sanem olgeta blong oli mekem wan spesel wok. Oli go long ol ples we God i wantem, blong protektem ol man blong hem, speseli blong mekem se Babilon “long not” i no save spolem olgeta. Vison ya i soemaot se Jehova bambae i no letem ol man blong hem oli kam slef long Babilon bakegen. !Traem tingbaot olsem wanem samting ya i leftemap tingting blong ol man we oli stap wokem haos blong God! Oli save se ol enemi oli no save stopem olgeta.

10. ?Olsem wanem profet tok ya blong Sekaraea i givhan long yumi tede?

¹⁰ Tede, Jehova i stap yusum ol enjel blong hem yet, blong oli protektem ol man blong hem mo mekem olgeta oli strong. (Malakae 3:6; Hibrus 1:7, 14) Stat long yia 1919, taem ol man blong Jehova oli kamfri long kalabus blong Bigfala Babilon, ol enemi oli traehad blong blokem tru wosip blong i no kam bigwan moa. (Revelesen 18:4) Be oli no save mekem. From we Jehova i stap yusum ol enjel blong oli protektem ogenaesesen blong hem, yumi no nid blong fraet se ol man blong God bambae oli kalabus long giaman wosip bakegen. (Ol Sam 34:7) Be bambae yumi gohed nomo blong stap glad mo bisi long wosip blong Jehova. Profet tok blong Sekaraea i givhan long yumi, blong yumi kasem save se yumi stap sef from we tufala hil ya i protektem yumi.

11. ?From wanem yumi no nid blong fraet taem ol man oli agensem yumi?

¹¹ I no longtaem, ol politik paoa blong wol ya blong Setan bambae oli joen blong traem spolem fulwan ol man blong God.  (Esikel 38:2, 10-12; Daniel 11:40, 44, 45; Revelesen 19:19) Profet tok blong Esikel i tokbaot olgeta, olsem ol bigfala klaod we i kavremap olgeta ples long wol. Oli kros tumas, mo oli ron i kam long ol hos blong agensem ol man blong God. (Esikel 38:15, 16) * ?Bambae yumi fraet long olgeta? !Nogat! Jehova mo bigfala ami blong hem oli stap long saed blong yumi. Long taem blong bigfala trabol, ol enjel blong Jehova bambae oli protektem ol man blong hem, mo bambae oli spolem olgeta we oli agensem rul blong Jehova. (2 Tesalonaeka 1:7, 8) !Traem tingbaot glad blong yumi! ?Be hu bambae i lidim ami blong Jehova long heven?

12, 13. (1) ?Jehova i talem long Sekaraea blong i mekem wanem? (2) ?Olsem wanem yumi save se Niufala Gru i minim Jisas Kraes?

¹² Sekaraea nomo i luk ol eit vison ya. Be biaen, hem i mekem wan samting we ol narafala oli save luk, mo we i save leftemap tingting blong olgeta we oli stap wokem bakegen haos tempol. (Ridim Sekaraea 6:9-12.) * Trifala man ya, Heldae, Tobia, mo Jedaea, oli aot long Babilon oli kam. Jehova i talem long Sekaraea blong i tekem ol silva mo gol we trifala i karem i kam, mo yusum blong wokem “wan spesel hat.” (Sekaraea 6:11) ?Olsem wanem?  ?Hat ya i blong Hedgavman Serubabel, we hem i wan man Juda mo i wan laen blong King Deved? Nogat. Jehova i talem long Sekaraea blong i putum hat ya long hed blong Hae Pris, Josua. Ating ol man oli sek taem oli luk samting ya.

¹³ ?Olsem wanem? ?Hae Pris Josua i kam wan king? Nogat. Josua i no wan laen blong Deved, taswe hem i no save kam king. Taem Sekaraea i putum hat ya long Josua, hemia i pija blong wan king mo pris we bambae i rul blong olwe long fiuja, nem blong hem Niufala Gru. Baebol i talem se Niufala Gru ya hemia Jisas Kraes.—Aesea 11:1; Matiu 2:23, futnot.

14. ?Jisas i mekem wanem wok olsem King mo Hae Pris?

¹⁴ Jisas i King mo Hae Pris tu. Hem nao i lidim bigfala ami blong ol enjel blong Jehova, mo i stap wok had blong mekem ol man blong God oli harem save se oli sef, long wol ya we i fulap long raf fasin. (Jeremaea 23:5, 6) I no longtaem, Kraes bambae i winim ol neson blong wol ya. Bambae hem i sapotem rul blong God, mo i faet long saed blong ol man blong hem. (Revelesen 17:12-14; 19:11, 14, 15) Be Niufala Gru ya, Jisas, i gat wan bigfala wok blong mekem, bifo we dei ya i kamtru.

15, 16. (1) ?Olsem wanem ol man blong God oli kam klin mo tru wosip i gohed, mo hu i mekem wok ya? (2) ?Wol ya bambae i olsem wanem, afta we Kraes i rul blong wan taosen yia?

¹⁵ King mo Hae Pris Jisas, i kasem wok ya blong “bildim haos tempol blong Jehova.” (Ridim Sekaraea 6:13.) * Hem i mekem wok ya long yia 1919, taem hem i mekem ol man blong God oli kamfri long Bigfala Babilon, hemia ol giaman skul. Mo tu, hem i mekem Kristin kongregesen i kam strong bakegen, mo i putumap “gudfala slef we i waes.” Grup ya we tabu spirit i makemaot olgeta, i lidim wan impoten wok, long bigfala haos tempol blong Jehova long wol ya. (Matiu 24:45) Mo tu, Jisas i mekem ol man blong God oli kam klin moa, blong oli save mekem wosip long klin fasin.—Malakae 3:1-3.

¹⁶ Jisas mo ol 144,000 king mo pris blong hem bambae oli rul blong wan taosen yia. Long taem ya, bambae oli givhan long ol man blong God blong oli kam stret gud olgeta. Taem oli finisim wok ya, ol man we oli wosipim Jehova nomo bambae oli stap long wol ya. !Long  taem ya nao, tru wosip bambae i stanap fulwan bakegen!

17. ?Jehova i mekem wanem promes long ol man Jiu? ?Promes ya i mekem wanem long olgeta?

¹⁷ ?Ol tok blong Sekaraea oli mekem wanem long ol man Jiu? Jehova i promes se bambae hem i protektem mo givhan long olgeta, blong oli save finisim haos tempol. Promes ya i givim hop long olgeta. Be maet oli stap tingbaot yet, olsem wanem wan smol grup blong man nomo i save mekem wan bigfala wok olsem. Ale Sekaraea i talem wan samting we i mekem se oli no moa fraet mo oli no moa gat tu tingting. Jehova i talem se, i no Heldae, Tobia, mo Jedaea nomo we bambae oli “kam givhan blong stanemap bakegen” haos tempol, be plante narafala man tu. (Ridim Sekaraea 6:15.) Ol man Jiu oli sua se Jehova i stap sapotem wok ya. Nao oli no moa fraet, oli gohed blong bildim haos ya, nating se king blong Pesia i putum tabu long ol wok olsem. Tabu ya i olsem wan bigfala hil we i blokem olgeta, be Jehova i tekemaot. Ale oli gohed gogo oli finisim wok ya long yia 515 bifo Kraes. (Esra 6:22; Sekaraea 4:6, 7) Be ol tok ya blong Jehova i gat wan mining we i bigwan moa tede.

18. ?Olsem wanem Sekaraea 6:15 i stap kamtru tede?

¹⁸ Tede, plante milian man oli stap mekem wosip long Jehova. Oli glad blong yusum “ol nambawan samting” blong olgeta, olsem taem, paoa, mo mane, long wok blong hem. Long fasin ya, oli sapotem bigfala haos tempol blong Jehova tede. (Ol Proveb 3:9) Yumi save se Jehova i tinghae long olgeta samting ya we yumi mekem. Tingbaot we Heldae, Tobia, mo Jedaea i karem silva mo gol, nao Sekaraea i yusum blong wokem wan spesel hat. Hat ya i “wan memori” blong samting we trifala man ya i givim blong sapotem tru wosip. (Sekaraea 6:14) Jehova i no save fogetem ol wok we yumi mekem tu, blong soemaot se yumi lavem hem.—Hibrus 6:10.

19. ?Ol vison blong Sekaraea oli mekem wanem long yumi?

¹⁹ Long ol las dei ya, ol man blong Jehova oli stap mekem wan bigfala wok. Oli naf blong mekem wok ya from we Jehova i blesem olgeta mo Kraes i lidim olgeta. Yumi glad tumas blong joen long wan ogenaesesen we i stanap strong, i sef, mo i stap olwe, mo yumi save se tingting blong Jehova long saed blong tru wosip bambae i kamtru fulwan. Taswe, oltaem yu mas glad blong joen wetem ogenaesesen blong Jehova, mo “obei long ol tok blong hem.” Olsem nao, King mo Hae Pris wetem ol enjel, bambae oli protektem yu. Yu mas mekem evri samting we yu naf blong mekem, blong sapotem tru wosip. !Nao Jehova bambae i mekem se yu stap sef go kasem en blong rabis wol ya—mo blong olwe!