1. ?From wanem baptaes i impoten? (Yu luk pija long stat blong stadi.)

EVRI yia, plante taosen man we oli stadi Baebol oli baptaes. Plante long olgeta oli yangfala, o maet oli no yangfala yet. Samfala oli gruap long trutok. ?Yu yu wan long olgeta? Sipos yes, yu yu mekem wan gudfala jus. Olgeta Kristin oli mas baptaes. Mo yumi mas baptaes blong kasem laef we i no save finis.—Matiu 28:19, 20; 1 Pita 3:21.

2. ?From wanem yu no mas fraet blong givim laef blong yu long Jehova?

² Taem yu baptaes, Jehova i givim plante blesing we yu neva kasem bifo. Be yu kasem moa wok tu. ?Wanem wok? Brata we i givim tok blong baptaes i askem kwestin ya se: “From we yu bilif long sakrefaes blong Jisas Kraes, ?yu yu tanem tingting blong yu from ol sin blong yu, mo yu givim laef blong yu i go long Jehova blong mekem ol samting we hem i wantem?” Yu yu ansa se yes. Yu promes blong lavem  Jehova mo blong mekem wok blong hem fastaem long laef blong yu. ?Olsem wanem? ?Yu sore from we yu mekem strong promes ya? !Nogat! Bambae yu neva sore we yu letem Jehova i lidim yu. Traem tingbaot: Sipos yu no bin mekem promes ya, bambae yu no save Jehova mo yu stap long wol blong Setan. Setan i no kea long yu, mo i no wantem se yu kasem laef. Hem i glad sipos yu lego Jehova mo yu go long saed blong hem, nao yu lusum hop ya blong kasem laef we i no save finis.

3. ?Yu kasem wanem blesing taem yu givim laef blong yu i go long Jehova?

³ Traem tingbaot blesing we yu kasem taem yu baptaes. From we yu givim laef blong yu i go long Jehova, yu save talem wetem strong bilif se: ‘Oltaem Jehova i stap wetem mi, nao mi mi no save fraet. Man i no save mekem wan samting blong spolem mi.’ (Ol Sam 118:6) I no gat wan blesing i bigwan moa i bitim we yu stap klosap long Jehova mo yu save se hem i glad long yu.

4, 5. (1) ?From wanem baptaes i mas prapa desisen blong yu? (2) ?Wanem sam trabol we olgeta Kristin oli kasem?

⁴ Blong fren wetem Jehova, yu no save hang long strap blong papa mo mama blong yu. I no olsem we yu stap yusum mobaelfon blong tufala, be tufala nomo i stap fulumap kredit long hem. Nating se yu stap yet wetem tufala, be yu wan yu mas fren gud wetem Jehova. ?From wanem yu mas tingbaot samting ya oltaem? From we, i no gat wan long yumi we i save wanem trabol bambae i traem bilif blong yumi long fiuja. Traem tingbaot hemia: Maet yu baptaes taem yu pikinini nomo. Be naoia we yu kam yangfala, filing blong yu i jenis mo trabol we yu kasem i defren. Wan gel i talem se: “Taem yu pikinini, i no had tumas blong talem long ol fren long skul se yu wan Witnes blong Jehova, taswe yu no wantem kakae kek blong betde. Be taem yu kam yangfala mo filing blong seks i kam strong, i no isi nating blong jusum stret rod mo obei long Jehova. Yu mas bilif strong se ol loa blong Jehova oli stret.”

⁵ Afta long baptaes, i no ol yangfala nomo we oli fesem sam trabol we oli neva fesem bifo. Ol bigman tu oli kasem ol trabol we i traem bilif blong olgeta, long rod we oli neva tingbaot. Maet hemia trabol long mared, sik, o trabol long wok. Nating se yumi yangfala o olfala, be yumi evriwan i mas holemstrong long Jehova long plante defren trabol.—Jemes 1:12-14.

6. (1) ?Wanem promes we yumi mekem long Jehova? (2) ?Filipae 4:11-13 i tijim yumi long wanem?

⁶ Blong holemstrong long Jehova, oltaem yu mas tingbaot promes blong yu, se bambae yu mekem wok blong hem nomata wanem samting i hapen, hemia i min se nating sipos Papa mo Mama mo ol fren blong yu tu oli lego. (Sam 27:10) Nomata wanem samting we yu fesem, yu mas askem long Jehova blong i halpem yu blong holem promes ya.—Ridim Filipae 4:11-13.

7. ?I minim wanem se yu ‘fraet mo seksek’ taem yu wok had blong God i sevem yu?

⁷ Jehova i wantem se yu yu fren wetem hem oltaem. Hemia i min se yu mas traehad, mo yu mas wok had blong hem i sevem yu. Filipae 2:12 i talem se: “Yufala  i fraet mo yufala i seksek taem yufala i stap wok had blong God i sevem yufala.” Hemia i min se yu mas tingbaot olsem wanem blong stap klosap long Jehova mo holemstrong long hem, nomata se yu fesem wanem trabol. Yu no mas ting se samting ya bambae i hapen olsem nomo. Tingbaot se sam man we oli mekem wok blong God plante yia, oli lego hem. Ale, ?wanem sam samting we yu save wok had long hem, blong God i sevem yu?

8. ?Stadi i minim wanem? ?From wanem i impoten?

⁸ Blong fren gud wetem Jehova, yu mas toktok long hem mo yu mas lesin long hem. Yu lesin long hem taem yu ridim Baebol mo ol buk we oli tokbaot Baebol, yu stadi long olgeta, mo yu tingting dip long olgeta. Be stadi Baebol i no min se yu fulumap save long hed blong yu nomo, olsem long taem blong eksam long skul. Stadi i olsem wan bigfala wokbaot, we yu lukluk gud ol samting mo yu faenem plante niufala samting long saed blong Jehova. Nao yu kam klosap long hem, mo hem i kam klosap long yu.—Jemes 4:8.

9. ?Wanem sam tul we yu save yusum blong stadi?

⁹ Ogenaesesen blong Jehova i rerem plante samting blong givhan long yumi blong stadi. Sipos yu go long jw.org nao yu klik long “Ol Baebol Tijing” mo “Ol Yangfala,” bambae yu luk “Ol Eksasaes Blong Stadi Baebol.” Oli save givhan long yu blong yu folem samting we yu lanem long ol stori blong Baebol. Mo tu, i gat Ol Rod Blong Stadi long buk ya  “?Wanem Samting We Baebol i Rili Tijim?” Oli save mekem bilif blong yu i strong mo mekem se yu naf blong eksplenem bilif blong yu long ol narafala. Yu save faenem moa advaes long Wajtaoa N. 1 2017 pej 3-7 “?From Wanem i Gud Blong Ridim Baebol?”, “?Olsem Wanem Blong Stat?” mo “?Wanem i Save Mekem Se Yu Laekem Ridim Baebol?” Taem yu wok had blong God i sevem yu, i impoten tumas blong stadi mo tingting dip.—Ridim Ol Sam 119:105.

10. ?From wanem ol Kristin we oli baptaes finis oli mas prea?

¹⁰ Taem yu stadi Baebol, i olsem we yu lesin long Jehova, mo taem yu prea, yu toktok long hem. Yu no mas tingbaot prea olsem wan kastom blong yu nomo, o samting we i givim ‘laki,’ o i mekem yu yu win. Taem yu prea, yu toktok stret long God ya we i wokem yu. Tingbaot: !Jehova i stap wet blong harem samting we yu talem long hem! (Ridim Filipae 4:6.) Taswe, Baebol i talem se taem yu wari, ‘yu mas putum ol trabol blong yu long Jehova.’ (Ol Sam 55:22) !Plante milian brata mo sista oli talem se advaes ya i givhan long olgeta, mo i save givhan long yu tu!

11. ?From wanem yu mas talem tangkiu oltaem long Jehova?

¹¹ Be yu no mas prea blong Jehova i givhan long yu nomo. Baebol i talem se: ‘Yu mas talem tangkiu.’ (Kolosi 3:15) Samtaem yumi wari tumas long ol trabol blong yumi, nao yumi no moa luksave ol gudfala samting we yumi kasem. Taswe i gud yu traem samting ya: Evri dei, yu traem tingbaot tri samting blong talem tangkiu long Jehova from. Yangfala Abigel we i baptaes taem i gat 12 yia, i se: “I stret moa blong talem tangkiu long Jehova i bitim eni narafala man long heven o wol. Yumi mas tekem evri janis blong talem tangkiu long hem from ol presen we hem i givim.” Samtaem Abigel i askem kwestin ya se: ‘Sipos tumora, mi gat ol samting nomo we mi talem tangkiu long Jehova from tede, ?bae mi gat wanem?’ *

12, 13. ?Wanem gudfala samting we Jehova i mekem long yu? ?From wanem i impoten blong tingbaot samting ya?

¹² Jehova i givhan long King Deved blong i pastru long plante trabol. Deved i tingbaot samting ya taem hem i talem se: ‘Jehova i gud tumas. Yufala i traem trastem hem. Bambae yufala i faenemaot we hem i tru. Olgeta we oli go long hem blong faenem sefples, oli save harem gud.’ (Ol Sam 34:8) Vas ya i soemaot se yu wan yu mas faenemaot se Jehova i gud. Taem yu ridim Baebol mo ol buk blong yumi, mo yu go long miting, yu faenemaot olsem wanem Jehova i givhan long ol narafala blong oli holemstrong long hem. Be taem yu fren moa wetem hem, yu luksave olsem wanem hem i stap givhan long yu. ?Wanem gudfala  samting we yu yu luksave se Jehova i mekem long yu?

¹³ Jehova i mekem wan samting we i gud tumas long evri Kristin. Hem i pulum yumi wanwan i kam klosap long hem mo Pikinini blong hem. Jisas i talem se: “I no gat man i save kam long mi sipos Papa we i sanem mi mi kam, hem i no pulum hem.” (Jon 6:44) ?Yu yu harem se Jehova i pulum yu? ?O yu ting se: ‘Jehova i pulum Papa mo Mama i kam long hem mo mi jes folem tufala nomo?’ Yu no mas fogetem se taem yu givim laef blong yu i go long Jehova mo yu baptaes, yu wan yu kam fren blong hem. Baebol i talem se: “Sipos wan man i lavem God, man ya God i save hem.” (1 Korin 8:3) Oltaem yu mas glad se Jehova i pulum yu yu kam long ogenaesesen blong hem.

14, 15. ?Olsem wanem blong mekem se wok blong prij i givhan long bilif blong yu?

¹⁴ Mo tu, yu faenemaot se Jehova i gud taem hem i givhan long yu blong yu no fraet blong tokbaot bilif blong yu long ol narafala, long wok blong prij mo long skul. I no isi blong prij long ol yangfala long klas blong yu. Ating yu wari se maet oli no glad. Maet i had moa blong eksplenem bilif blong yu long fored blong ful klas. ?Wanem i save givhan long yu?

¹⁵ Traem tingbaot from wanem yu bilif olsem. Yu save yusum Ol Rod Blong Stadi we oli stap long jw.org. Oli pulum yu blong yu tingbaot bilif blong yu, from wanem yu bilif olsem, mo olsem wanem blong eksplenem long narafala. Sipos yu rere gud mo yu gat strong tingting se bilif blong yu i tru, bambae yu wantem tokbaot Jehova long ol narafala.—Jeremaea 20:8, 9.

16. ?Wanem i save mekem se yu no fraet blong tokbaot bilif blong yu?

¹⁶ Nating se yu rere gud, maet yu fraet yet blong eksplenem bilif blong yu. Wan sista blong 18 yia we i baptaes taem i gat 13 yia, i se: “Mi save gud bilif blong mi, be samtaem i had blong talemaot samting we i stap long tingting blong mi.” Taswe hem i traem blong joenem trutok i go long storian blong hem. Hem i se: “Mi luk se ol yangfala long klas oli no sem blong tokbaot ol samting we oli mekem. Taswe mi ting se mi tu mi mas olsem. Ale taem mi stap storian, mi talem olsem: ‘Long wiken, mi stap tijim wan man long Baebol, nao . . . ’ Mo mi gohed long storian blong mi. Nating se mi no stap tokbaot Baebol stret, plante taem wan yangfala bambae i wantem save se mi tijim ol man olsem wanem. Samfala oli askem kwestin blong save moa. Naoia, mi luk se i isi moa blong eksplenem bilif blong mi. Mo afta, !mi harem gud bitim mak!”

17. ?Wanem narafala samting i save mekem i isi moa blong tokbaot bilif blong yu?

¹⁷ Taem narafala i harem se yu kea long hem mo yu respektem hem, i moa isi blong hem i respektem yu mo bilif blong yu. Olivia, we i gat 17 yia mo i baptaes taem hem i yang nomo, i se: “Oltaem mi fraet se sipos mi joenem Baebol i go long  storian blong mi, bambae ol man oli ting se mi stap joen long wan krangke skul.” Be hem i jenisim tingting blong hem. Hem i no moa tingbaot ol samting we oli mekem hem i fraet, be hem i tingting se: “Plante yangfala oli no save wan samting long saed blong ol Witnes blong Jehova. Oli save nomo se mi nao mi wan Witnes. Taswe fasin blong mi i save pulum olgeta blong oli lesin o oli no lesin. Sipos mi fraet o i had blong tokbaot bilif blong mi, o mi sem blong tokbaot, ?bambae oli gat wanem tingting? Maet oli ting se mi no glad se mi wan Witnes. Maet oli jikim mi from we mi sem. Be sipos ol tok blong mi i soemaot se mi gat strong bilif, mo i isi blong tokbaot bilif blong mi mo joenem i go long storian, ating bambae oli respektem mi moa.”

18. ?Yu mas mekem wanem taem yu wok had blong God i sevem yu?

¹⁸ Yumi lanem finis se yumi mas tinghevi long ol samting we yumi mekem, taem yumi wok had blong God i sevem yumi. Taswe, yu mas ridim Tok blong God, tingting dip long hem, prea long Jehova, mo tingbaot olsem wanem hem i givhan long yu. Sipos yu mekem ol samting ya, bambae yu sua gud se Jehova i Fren blong yu. Nao bambae yu wantem tokbaot bilif blong yu long narafala.—Ridim Ol Sam 73:28.

19. ?Yu save kasem wanem gudfala samting taem yu wok had blong God i sevem yu?

¹⁹ Jisas i talem se: “Sipos eni man i wantem kam biaen long mi, hem i mas blokem ol samting we hem nomo i wantem mo i mas karem pos blong hem, mo hem i mas folem mi oltaem.” (Matiu 16:24) Taswe, evri Kristin we i biaen long Jisas i mas givim laef blong hem i go long Jehova mo baptaes. Hemia stat nomo blong wan nambawan laef naoia, mo i save lidim yu blong yu kasem laef we i no save finis long niufala wol. !Taswe yu mas mekem evri samting we yu naf blong mekem blong wok had, nao God bambae i sevem yu!