Muletontonkanya pa Musango wa Muntu Uo Mufwile Ukuba

“Imwe mufwile ukuba ne mibele ya mushilo ne milimo ya bukapepa!”—2 PET. 3:11.

KUTI MWAYASUKA SHANI?

Bushe tufwile ukuba abantu ba musango nshi pa kuti Lesa atutemwe?

Bushe Satana abepa shani abantu?

Finshi mufwile ukucita pa kuti mucingilile bucibusa bwenu na Yehova?

1, 2. Pa kuti Lesa atutemwe, bushe tufwile ukuba abantu ba musango nshi?

ILINGI line fwe bantu tulafwaya ukwishiba ifyo bambi batumona. Lelo fwe Bena Kristu, tufwile ukubika sana amano ku kwishiba ifyo Yehova atumona. Pantu na kuba, e Wapulamo mu muulu na pano isonde kabili e “ntulo ya mweo.”—Amalu. 36:9.

² Umutumwa Petro alandile ukuti pa kuti Yehova atutemwe tufwile ukuba ne “mibele ya mushilo ne milimo ya bukapepa.” (Belengeni 2 Petro 3:11.) Pa kuti Lesa atutemwe, tufwile ukuba ne “mibele ya mushilo” e kutila ukuba abasanguluka mu fyo tucita, mu fyo tutontonkanya, na mu fyo tupepa Lesa. Na kabili ukutemwa Lesa no kumucindika e kufwile ukutulenga twaba ne “milimo ya bukapepa.” Kanshi pa kuti Lesa atutemwe, tamona fye ifyo tucita lelo alamona ne fyo twaba mu mutima. Apo Yehova ‘alabebeta umutima,’ aleshiba nga twaliba ne mibele ya mushilo kabili nga e o tupepa fye eka.—1 Imila. 29:17.

3. Mepusho nshi tufwile ukuipusha?

³ Satana Kaseebanya, tafwaya ukuti Lesa atutemwe. Na kuba, alesha na maka pa kuti onaule bucibusa bwesu na Yehova. Lyonse abomfya ubufi no bucenjeshi pa kuti atufumye kuli Lesa uo tupepa. (Yoh. 8:44; 2 Kor. 11:13-15) Kanshi tufwile ukuipusha ukuti: ‘Bushe Satana alufya shani abantu? Kuti nacita shani pa kuti ncingilile bucibusa bwandi na Yehova?’

 BUSHE SATANA ALUFYA SHANI ABANTU?

4. Pa kuti Satana onaule bucibusa bwesu na Lesa, cinshi afwaya ukonaula, kabili mulandu nshi?

⁴ Umusambi Yakobo alembele ati: “Umuntu onse atunkwa ilyo ulunkumbwa lwakwe umwine lwamusembeleka no kumubeleleka. E lyo ulunkumbwa, ilyo lwaimita, lufyala ulubembu; no lubembu, ilyo lwakula, luleta imfwa.” (Yako. 1:14, 15) Pa kuti Satana onaule bucibusa bwesu na Lesa, afwaya ukonaula umutima wesu, umwaba fyonse ifyo tufwaya.

5, 6. (a) Finshi Satana abomfya pa konaula umutima wesu? (b) Fintu nshi fitatu ifyo Satana abomfya pa kuti umutima wesu ulefwaya ifyabipa, kabili cinshi twingalandila ukuti ni kalapashi?

⁵ Finshi Satana abomfya pa konaula umutima wesu? Baibolo itila: “Icalo conse calaala mu maka ya mubifi.” (1 Yoh. 5:19) Pa fyo Satana abomfya paba ne “fya muli ici calo.” (Belengeni 1 Yohane 2:15, 16.) Pa myaka iingi, Satana alilenga ifintu fya muli ici calo ukulamoneka bwino sana pa kuti abantu babelelekwe. Apo twikala muli cino calo, tufwile ukuicingilila ku fiteyo fya kwa Satana ifya-afya ukwiluka.—Yoh. 17:15.

⁶ Satana afwaya ukuti umutima wesu ulefwaya ifintu ifyabipa. Umutumwa Yohane alandile pa fintu fitatu ifyo Satana abomfya pa kutubeleleka: (1) “ulunkumbwa lwa mubili,” (2) “ulunkumbwa lwa menso,” na (3) “ukuitakishisha pa fyo umuntu akwata.” Ifi e fyo Satana abomfeshe pa kutunka Yesu mu matololo. Apo Satana alibomfya ifi fiteyo pa myaka iingi, alishiba sana ifya kufibomfya kabili alishiba ne citeyo ca kubomfya ku muntu umo umo. Ilyo tushilasambilila ifyo twingaicingilila kuli Satana, katumone imicenjelo abomfeshe pa kubepa Efa lelo iyafililwe ukubomba ku Mwana wa kwa Lesa.

“ULUNKUMBWA LWA MUBILI”

7. Bushe Satana abomfeshe shani “ulunkumbwa lwa mubili” pa kutunka Efa?

⁷ Abantu balakabila ifya kulya pa kuti babe abomi. Kabumba apangile isonde mu nshila ya kuti lilemesha ifya kulya ifingi. Ifi Lesa atupanga no kufwaya kwa kulya, Satana kuti abomfya uku kwine kufwaya pa kuti tubembukile Lesa. Moneni ifyo acitile kuli Efa. (Belengeni Ukutendeka 3:1-6.) Satana aebele Efa ukuti nga alya icisabo ca ku “muti wa kulenga ukwishibo ubusuma no bubi” takafwe, kabili amwebele no kuti mu bushiku akalyako akaba nga Lesa. (Ukute. 2:9) Satana Kaseebanya aleti Efa talekabila ukumfwila Lesa pa kuti abe no bumi. Ala ubu bwali bufi ubwafiita fititi! Pa numa ya kumweba ifi, Efa nomba alingile ukusalapo pa fintu fibili: Ukukaana ifyo bamwebele, nelyo ukutwalilila ukutontonkanya  pa kulya cilya cisabo. Nangu ca kuti mwi bala mwali imiti iingi iyo ali no kulyako, Efa asalilepo ukulatontonkanya pa muti uwali pa kati ke bala, kabili ‘alisabileko ifisabo fya uko no kulya alya.’ Satana alengele Efa ukulakumbwa ico Kabumba wakwe amuleseshe.

8. Bushe Satana alefwaya ukubeleleka shani Yesu ukubomfya “ulunkumbwa lwa mubili,” kabili mulandu nshi afililwe ukumubeleleka?

⁸ Satana abomfeshe imicenjelo imo ine pa kutunka Yesu mu matololo. Ilyo Yesu alekele ukulya pa nshiku 40 akasuba no bushiku, Satana alimutunkile ukubomfya ulunkumbwa lwa fya kulya. Aebele Yesu ukuti: “Nga uli mwana wa kwa Lesa, eba ilibwe ili libe umukate.” (Luka 4:1-3) Yesu alingile ukusalapo pa fintu fibili: Ukupanga ifya kulya mu cisungusho pa kuti alye, nelyo ukukanapanga. Yesu alishibe ukuti talingile ukubomfya amaka yakwe ku kuisekesha. Nangu ca kuti ali ne nsala, alicindamike sana bucibusa bwakwe na Yehova ukucila ifya kulya. Yesu aebele Satana ukuti: “Calilembwa ati, ‘Te ku fya kulya fyeka umuntu engekalila uwa mweo.’”—Luka 4:4.

“ULUNKUMBWA LWA MENSO”

9. Bushe amashiwi ya kuti “ulunkumbwa lwa menso” yalanga cinshi, kabili bushe Satana abomfeshe shani uyu mucenjelo pa kubeleleka Efa?

⁹ “Ulunkumbwa lwa menso” e mucenjelo na umbi uo Satana abomfya uo Yohane alandilepo. Aya mashiwi yalanga ukuti umuntu kuti atendeka ukukumbwa icintu nga acilolesha fye. Uyu e mucenjelo Satana abomfeshe pa kubeleleka Efa. Amwebele ukuti: “Amenso yenu yakashibulwa.” Ilyo Efa atwalilile ukulolesha icisabo ico babaleseshe ukulyako, e lyo acililemo ukucikumbwa. Efa amwene ukuti uyu muti wali “uwawama ukumona.”

10. Bushe Satana abomfeshe shani “ulunkumbwa lwa menso” pa kutunka Yesu, kabili bushe Yesu acitile shani?

¹⁰ Bushe Satana abomfeshe shani “ulunkumbwa lwa menso” pa kutunka Yesu? ‘Alangile Yesu mu kashita akanono fye amabufumu yonse aya bantu ba pe sonde; kabili Satana Kaseebanya atile: “Ndekupeela amaka pa mabufumu yonse aya no bucindami bwa yako.”’ (Luka 4:5, 6) Yesu tamwene amabufumu yonse aya pano calo mu kashita akanono fye, lelo Satana alemona ukuti Yesu nga amona ubucindami bwa aya mabufumu mu cimonwa kuti ayakumbwa. Ukwabula no kumfwako insoni, Satana atile: “Nga wampepako fye umuku umo, ndekupeela amaka pali ifi fyonse.” (Luka 4:7) Yesu alikeene ukuba umusango wa muntu uo Satana alefwaya ukuti abe. Ilyo line fye, Yesu amwaswike ati: “Calilembwa ati, ‘Yehova Lesa obe e o ulepepa, kabili eka fye e o ulebombela.’”—Luka 4:8.

 “UKUITAKISHISHA PA FYO UMUNTU AKWATA”

11. Bushe Satana abeleleke shani Efa?

¹¹ Ilyo Yohane alelanda pa fintu ifyaba muli ici calo, alandile na pa “kuitakishisha pa fyo umuntu akwata.” Ilyo Adamu na Efa bali pano isonde babili, takwali aba kuitakishishako. Lelo baishileba ne cilumba. Ilyo Satana aletunka Efa, amwebele ukuti Lesa alimutanine ifisuma. Satana Kaseebanya aebele Efa ukuti mu bushiku akalya ku muti uo Lesa abaleseshe, ‘umuti wa kulenga ukwishiba ubusuma no bubi amenso yakwe yakashibulwa kabili akaba nga Lesa, akeshiba ubusuma no bubi.’ (Ukute. 2:17; 3:5) Ifyo Satana alandile fyalolele mu kuti Efa kuti aitungulula umwine ukwabula Yehova. Icilumba nalimo e calengele ukuti Efa asumine ubufi bamubepele. Alile icisabo babaleseshe, pantu atontonkenye ukuti te kuti afwe. Ala kwena ali-ibepele!

12. Bushe Satana aeseshe shani Yesu, kabili Yesu amwaswike shani?

¹² Yesu tali nga Efa, ena ali uwaicefya! Satana alyeseshe Yesu na kabili, lelo Yesu alikeene ukucita icintu icali no kulenga bambi ukupapa kabili icali no kulenga aesha Lesa. Acita ifi, nga alangile ukuti aali ne cilumba! Lelo Yesu ayaswike Satana ukwabula ukupita mu mbali ati: “Calisoswa ukuti, ‘Wilaesha Yehova Lesa obe.’”—Belengeni Luka 4:9-12.

KUTI TWACINGILILA SHANI BUCIBUSA BWESU NA YEHOVA?

13, 14. Bushe Satana esha shani ukutulufya muno nshiku?

¹³ Muno nshiku, Satana abomfya imicenjelo imo ine nga ilya abomfeshe kuli Efa na Yesu. Satana Kaseebanya abomfya “ulunkumbwa lwa mubili,” pa kutunka abantu pa kuti balecita ubupulumushi, balenwesha ubwalwa no kulya sana. Abomfya “ulunkumbwa lwa menso” pa kuti abeleleke abantu ukulatamba ifye shiku, maka maka pa Intaneti. Kabili afwaya abantu ‘ukulaitakishisha pa fyo bakwata’ pa kubalenga ukuba ne cilumba, ukulafwaya ukuba na maka pa bantu bambi, ukulumbuka no kufwaya ukukwata sana ifyuma!

¹⁴ “Ifya muli ici calo” fyaba kwati bulyo ubo abalondo babomfya pa kwipaya isabi. Babika ubulyo ku bulobo pa kuti isabi libelelekwe no kumina ubulobo. Satana abomfya ifintu ifyo abantu bamona ukuti fyaliba fye bwino pa kuti alenge bapule  mu mafunde ya kwa Lesa. Ico acitila ifi, afwaya ukonaula umutima wesu na matontonkanyo. Afwaya tulemona ukutila ukuisakamana no kwikala bwino fyalicindama ukucila ukubombela Lesa. Bushe na ifwe kuti twabelelekwa ku fintu fya musango uyu?

15. Kuti twapashanya shani Yesu pa kuti tukaane amatunko ya kwa Satana?

¹⁵ Efa alibelelekwe kuli Satana, lelo Yesu ena alikeene amatunko ya kwa Satana. Lyonse Yesu aleasuka Satana ukubomfya Amalembo, aleti: “Calilembwa ati” nelyo “Calisoswa ukuti.” Nga tulesambilila Baibolo no mukoosha tukeshiba bwino Amalembo kabili tukalaibukisha ifikomo ifingatwafwa ilyo twatunkwa. (Amalu. 1:1, 2) Ukulaibukisha abantu ba kwa Lesa abalembwa mu Baibolo abali ne cishinka kukatwafwa ukuba aba cishinka. (Rom. 15:4) Ukuba na katiina kuli Yehova, ukutemwa ifyo atemwa no kupata ifyo apata, kukatucingilila.—Amalu. 97:10.

16, 17. Bushe ukubomfya ‘amaka yesu aya kupelulula’ kuti kwalenga twaba abantu ba musango nshi?

¹⁶ Umutumwa Paulo atukoselesha ukuti tulebomfya ‘amaka ya kupelulula’ pa kuti tube abantu abatontonkanya nge fyo Lesa atontonkanya, te fitontonkanya abantu ba mu calo. (Rom. 12:1, 2) Ilyo Paulo alelanda pa fyo cacindamina ukukaana amatontonkanyo yalubana, atile: “Tulewisha amatontonkanyo yalubana na conse icasansabala icilwisha ukwishiba Lesa; kabili tulanasha amatontonkanyo yonse pa kuti yanakile Kristu.” (2 Kor. 10:5) Amatontonkanyo yesu e yalenga twaishibikwa umusango wa muntu uo twaba, kanshi tulingile ‘ukutwalilila ukutontonkanya’ pa fintu ifingatukosha.—Fil. 4:8.

¹⁷ Pa kuti tube abasanguluka, tufwile ukukaana amatontonkanyo yabipa ne fintu ifyabipa ifyo imitima yesu ifwaya. Tufwile ukutemwa Yehova no ‘mutima uwasanguluka.’ (1 Tim. 1:5) Lelo umutima wa bucenjeshi, kabili te kuti twiluke no kuti natutemwa sana “ifya muli ici calo.” (Yer. 17:9) Kanshi lyonse ilyo tulesambilila Baibolo tufwile ‘ukulayesha ukumona nga tuli mu citetekelo no kulailinga fwe bene.’—2 Kor. 13:5.

18, 19. Mulandu nshi tulingile ukubombesha pa kuti tube umusango wa bantu abo Yehova afwaya?

¹⁸ Cimbi icingatwafwa ukukaana “ifya muli ici calo” kulatontonkanya pa mashiwi Lesa aebele Yohane ukuti: “Ici cine calo cileya pamo no lunkumbwa lwa ciko, lelo uucita ukufwaya kwa kwa Lesa akekalilila umuyayaya.” (1 Yoh. 2:17) Icalo ca kwa Satana cimoneka kwati tacakonaulwe. Lelo kasuba kamo cikonaulwa. Fyonse ifyaba mu calo ca kwa Satana fikonalulwa. Nga tuleibukisha ukuti fyonse ifyaba mu calo ca kwa Satana fikonaulwa, cikatwafwa ukukanabelelekwa na Satana Kaseebanya.

¹⁹ Umutumwa Petro atukoselesha ukuti tufwile ukuba umusango wa bantu abo Lesa atemwa ilyo ‘tulelolela no kufulukisha ukubapo kwa bushiku bwa kwa Yehova, ilyo imyulu ikapya no konaika ne fya mu muulu fikakaba se no kusunguluka!’ (2 Pet. 3:12) Ubu bushiku nabupalama sana, kabili Yehova ali no konaula icalo conse ica kwa Satana. Ilyo ubu bushiku bushilafika, Satana akatwalilila ukubomfya “ifya muli ici calo” pa kututunka, nga filya acitile kuli Efa na Yesu. Tatufwile ukuba nga Efa uwabikile amano ku kucita ifya kuisekesha fye. Ukucita ifi, cimo no kupepa Satana. Tufwile ukuba nga Yesu uwakeene amatunko, te mulandu ne fyo Satana engayalenga ukuti yalemoneka bwino. E ico bonse natulebombesha pa kuti tube umusango wa bantu abo Yehova afwaya.

[Ifipusho]

[Icikope pe bula 24]

Satana abomfeshe “ulunkumbwa lwa mubili” pa kubepa Efa

(Moneni paragrafu 7)

[Icikope pe bula 25]

Yesu talekele icili conse ukumupumbula

(Moneni paragrafu 8)

[Ifikope pe bula 26]

Malembo nshi mufwile ukutontonkanyapo mu fintu fya musango uyu? (Moneni paragrafu 13 na 14)