Isaías 63:1-19
63 ¿Khitis Edom+ markat jutki ukajja?
¿Khitis Bozrá+ markat qhana coloranakani isimpi* jutki ukajja?
¿Khitis suma isimpi isintatäki ukajja?
¿Khitis wali chʼamampi sarantaski ukajja?
“Ukajj nayätwa, cheqapar parlirïki ukajj nayätwa,salvañatakejj wali chʼamanïki ukajj nayätwa”.
2 ¿Kunatsa isimajj wila colorajja?
¿Kunatsa isimajj uvas takirin isipjamajja?+
3 “Naya sapakiw uvas chʼirwañ lugaran uvasanak takta.
Markanakat janiw khitis nayamp chikäkänti.
Colerasitaj laykojja enemigonakajarojj takichasiskakiyätwa,wal colerasitaj laykojja jupanakarojj takichasiskakiyätwa.+
Isinakajajj jupanakan wilapampi chʼiteqsuyatänwa,taqpach isijajj wila mayakïnwa.
4 Vengasiñ urojja chuymajankiwa,+salvatanakajan* marapajj purinjjewa.
5 Nayajj uñtayätwa, ukampis janiw khiti yanaptʼiris utjkänti,jan khitis yanaptʼañ munatapatjja nayajj wal llakisiyäta.
Ukatwa amparajajj salvación* apanïna,+pachpa colerasiñajaw yanaptʼitäna.
6 Wal colerasitaj laykojja markanakaruw nayajj takichasiyäta,colerasiñajampiw jupanakar machjayarakiyäta,+jupanakan wilapjja oraqeruw wartarakiyäta”.
7 Kunanaktï Jehová Diosajj munasiñat jan jaytjasirïtapat lurkäna ukanakatwa nayajj parläjja,Jehová Diosan jachʼañchkay luratanakapatwa parläjja,kuna laykutejj taqe kunwa Jehová Diosajj jiwasanak laykojj luräna,+Israel marka laykojj walja sumanakwa lurarakïna,ukanakjja khuyaptʼayasirïtapata, munasirïtapata jan jaytjasirïtapatwa luräna.
8 Jupajj akham sänwa: “Jupanakajj cheqpachapuniw nayan markajäpjje, nayat jan jitheqtir wawanakäpjjaniwa”*+ sasa.
Ukhamatwa jupajj jupanakan Salviripar tukuwayi.+
9 Kunayman llakinakan uñjasipkäna ukhajja, jupajj llakisirakïnwa.+
Jupan pachpa yatiyiripaw* jupanakar salväna.+
Munasirïtapata sinttʼasirïtapatwa jupanakar salvarakïna,*+nayra tiemponakanjja sapüruw jupanakar waytäna, yanaptʼarakïna.+
10 Ukampis jupanakajja, jupa contraw saytʼasipjjäna,+ espíritu santoparus llakisiyapjjarakïnwa.+
Ukatwa jupajj jupanakan enemigopar tukjjäna,+jupanak contraw nuwasirakïna.+
11 Jupanakasti nayra tiemponakatwa amtasipjjäna,Moisés serviripan urunakapatwa akham sas amtasipjjäna:
“¿Kawkinkaraki markapan awatirinakapamp chika+ jupanakar qotat irpsunkäna+ ukasti?
¿Kawkinkaraki Moisesar espíritu santo churkäna ukasti?+
12 ¿Kawkinkaraki Moisesar* jachʼa chʼamapampi yanaptʼkäna ukasti?+
¿Kawkinkaraki jupanak nayraqatan umanak jaljtaykäna ukasti,+ukhamat sutipajj wiñayatak amtatäñapataki?+
13 ¿Kawkinkaraki wali suynir umanak* taypnama jupanakar sarnaqaykäna ukasti,ukhamat jupanakajj jan lanktʼasis sarnaqapjjañapataki,kunjamtï mä caballojj pampa oraqen* sarnaqki ukhama?
14 Kunjamtï uywanakajj samartʼañatak valle pampar saraqapkejja,ukhamarakiw Jehová Diosan espiritupajj jupanakar samartʼayäna”+ sasa.
Ukhamwa jumajj markamar irpayätajja,ukhamat suma sutimajj jachʼañchatäñapataki.+
15 Alajjpachatpach aynachar uñtanim, uñjarakim,santöki, wali sumäki, wali altonkkaraki uka utjäwimatpach uñtanim.
¿Kunatsa jumajj atencionamp jan istʼjjta? ¿Kunatsa chʼamamampejj jan kuns lurjjta?
¿Kawkinkisa chuymatpach sinttʼasiñamasa+ khuyaptʼayasiñamasa?+
Ukanakjja janiw jumajj nayar uñachtʼayjjestati.
16 Jumaw nanakan Awkijätajja,+Abrahanajj janis nanakar uñtʼapkchitojja,Israelajj janis nanakar uñtʼapkchitojja,Jehová Dios Tata, jumaw nanakan Awkijätajja.
Sutimajja nayra maranakatpach Nanakan Salvirijawa.*+
17 Jehová Dios Tata, ¿kunatsa thakinakamat saranukupjjañaj ukhamak jaytapjjesta?*
¿Kunatsa chuymanakajajj jan istʼasir tukuñap ukhamak jaytta,* ukhamat jumar jan ajjsarapjjañajataki?+
Servirinakamar munatam laykojj kuttʼanikimaya,juman herenciamäki uka tribunak laykojj kuttʼanikimaya.+
18 Sagrado markamajj mä qhawqha tiempokiw ukan jakäna.
Enemigonakajajj santuariomaruw takichasipjjäna.+
19 Nanakajja jaya tiempow jumamp janipun apnaqatäpkäna uka jaqenakjamäpjjta,janipun kunapachas sutim apapkäna uka jaqenakjamäpjjtwa.
Notanaka
^ Ukajja, “qhana wila color isimpi” sasaw jaqokipasirakispa.
^ Hebreo arunjja, “mayamp alatanakajan”.
^ Jan ukajja, “atipjäwi”.
^ Jan ukajja, “janiw engañiri wawanakäpkaniti”.
^ Jan ukajja, “Jupa nayraqatankir angelapaw”.
^ Hebreo arunjja, “mayamp alasirakïna”.
^ Hebreo arunjja, “Moisesan kupi amparapar”.
^ Jan ukajja, “manqha umanak”.
^ Jan ukajja, “wasaran”.
^ Hebreo arunjja, “Mayamp Alasirijawa”.
^ Hebreo arunjja, “kunatsa thakimat saranukuyapjjesta”.
^ Hebreo arunjja, “Kunatsa chuymajar jan istʼasirir tukuyta”.
