Isaías 37:1-38
37 Uka arunak istʼasasti, Ezequías reyejj isip chʼiyjasisaw llakisiñ isimp* uchasïna, ukatjja Jehová Diosan utaparuw mantäna.+
2 Ukjjarusti utat* encargatäkäna uka Eliaquim chachampiru, Sebná sat secretariompiru, sacerdotenakan ancianonakapampiruw llakisiñ isinakamp uchtʼasit khitäna, jupanakajj Amoz chachan yoqapäki uka Isaías profetan ukaruw sarapjjäna.+
3 Akham sasaw jupar sapjjarakïna: “Ezequías reyejj akham siwa: ‘Jichhürojj wali llakisiña, toqenoqatäña,* jiskʼachatäña uruwa. Nanakajj kunjamtï mä warmejj niya ususiñampïki, ukampis janirak ususiñatakejj chʼamanïki uka warmir uñtasitäpjjtwa.+
4 Inas Jehová Diosamajj rabsaqué chachan arunakap istʼchini, ukhamatwa kunanaktï jupajj siski uka arunakapat Jehová Diosajj cuenta mayispa, Asiria markan reyipajj jakkir Diosat burlasiñapatakiw jupar khitani.+ Ukhamajj khitinakatejj markan jiltʼapki ukanak laykuy+ oración luram’+ sasa”.
5 Ukatsti Ezequías reyin servirinakapajj Isaiasan ukaruw mantapjjäna.+
6 Isaías profetajj akham sasaw jupanakar säna: “Reyimarojj akham sapjjañamawa: ‘Jehová Diosajj akham siwa: “Jumajj istʼkta uka arunakarojj jan ajjsaramti,+ Asiria reyin servirinakapajj naya contra jan wali parlapki uka arunakarojj jan ajjsaramti.+
7 Nayajj mä amuyu pʼeqepar uchäjja, ukhamatwa jupajj mä yatiyäwi istʼasajj markapar kuttʼjjani.+ Ukatsti jupajj pachpa markapanwa espadamp jiwayat uñjasirakini”+ sasa’”.
8 Ukatjja rabsaqué chachajj Asiria markan reyipajj Lakís markat sarjjatapwa yatïna, reyin ukar kuttʼasasti Libná+ marka contra nuwasiskirwa reyirojj uñjarakïna.
9 Reyejja Etiopía toqenkir Tirhacá sat reyipjjat akham parlirwa istʼäna: “Juma contra nuwasiriw jupajj juti” sasa. Uk istʼasasti jupajj wasitatwa Ezequías reyin ukarojj chachanak khitäna,+ akham sasa:
10 “Judá markan Ezequías reyiparojj akham sapjjañamawa: ‘Jumajj confiykta uka Diosamampejj jan engañjayasimti, jupajj akham sasaw engañjasktamjja: “Jerusalén markajj janiw Asiria markan reyipan amparapar katuyatäkaniti”+ sasa.
11 Asiria markan reyinakapajj taqe markanakar qʼal tukjasajj kuntï lurapki uk jumajj yatisktawa.+ ¿Juma sapakis salvasiñamäkaspa ukhamti amuyasta?
12 ¿Nayra awkinakajajj tʼunjapki uka markanakan diosanakapajj uka markanakar salviti?+ ¿Kawkinkis Gozán, Harán,+ Rézef markanakasa, Tel-Asar lugarankapkäna uka Edenankir jaqenakasa?
13 ¿Kawkinkis Hamat, Arpad, Sefarvaim,+ Hená, Ivá sat markanakan reyinakapajja?’ sasa”.
14 Ezequías reyisti yatiyäwi apanirinakan amparapat cartanak katoqasajj liytʼänwa. Ukatjja Ezequías reyejj Jehová Diosan utapar makatasaw Jehová Dios nayraqatan uka cartanak janatatäna.+
15 Ezequías reyejj akham sasaw Jehová Diosar orasïna:+
16 “Ejercitonakan Jehová Dios Tatitupa,+ Israelan Diosapa, jumajj querubín angelanak patjjaruw* tronoman qontʼastajja, juma sapakiw aka oraqenkir taqe reinonakan* cheqpach Diosapätajja. Jumaw oraqsa alajjpachanaksa lurtajja.
17 ¡Jehová Dios Tata, jiñchum altʼayanikimaya, istʼakimaya!+ ¡Jehová Dios Tata, nayranakam jistʼaram, uñjakimaya!+ Kawkïr arunaktï Senaquerib chachajj juma jakkir Diosat burlasiñatak apayanki taqe uka arunak istʼakimaya.+
18 Jehová Dios Tata, cheqas Asiria markan reyinakapajj taqpach oraqenakwa tukjapjje,+ oraqepamppacha.
19 Jupanakajj ninampiw uka markanakan diosanakap phichantapjje,+ uka diosanakajj janiw cheqpach diosanakäpkiti, jan ukasti jaqenakan luratakiwa,+ maderata qalata luratakïpjjewa, ukatwa uka diosanakarojj qʼal tʼunjapjje.
20 Jichhasti Jehová Dios Tata, nanakan Diosaja, amparapat salvapjjakitaya, Jehová Dios Tata, ukhamat aka oraqen taqe reinonakapajj* juma sapaki cheqpach Diosätam yatipjjañapataki”+ sasa.
21 Ukatsti Amoz chachan Isaías sat yoqapajj akham sasaw Ezequías reyir mä yatiyäwi apayäna: “Israelan Jehová Diosapajj akham siwa: ‘Asiria markan Senaquerib reyipjjat nayar oración luratam laykojja,+
22 Jehová Diosajj akham sasaw jupa contrajj arsuraki:
“Sionan virgen phuchapaw jumar jiskʼachtam, jumatwa burlasiraki.
Jerusalén markan phuchapaw jumat larusisajj pʼeqep khiwisi.
23 ¿Khititsa jumajj burlasta?+ ¿Khiti contras jan wal parlarakta?
¿Khiti contras jumajj wali jachʼat arsta,+jachʼa jachʼa tukusin uñtarakta?
¡Israelan Santo Diosap contraw ukanak lurtajja!+
24 Servirinakam taypiw Jehová Dios contra saytʼastajja,+ akham saraktawa:
‘Nayajj guerran nuwasiñatak walja carronakajampiwqollunakan alto cheqanakapar makatäjja,+Líbano qollunakankir jaya cheqanakapkama.
Jachʼa cedro qoqanakapsa* suma enebro qoqanakapsa khuchuräwa.
Wali altonkir imantasiñanakaparusa suma montenakaparus* mantarakïwa.
25 Phujunak allsusajja* umwa umarakëjja;kayu plantanakajampiw Egipto markan jiskʼa jawiranakap wañtʼayäjja’ sasa.
26 ¿Janit istʼkta? Ukajj nayra tiempotpach amtatäjjänwa.*
Nayra urunakatpachaw nayajj uk wakichjjayäta.+
Jichhapï uk luräjja.+
Jumajj jachʼa perqanakamp muyuntat markanakwa tʼunjäta; uka markanakajj laqayanakar tukuyatäniwa.+
27 Uka markanakan markachirinakapajj jan khiti yanapirinïpjjaniwa;wal ajjsarayasipjjani, phenqʼachatäpjjarakiniwa.
Jupanakajj pampankir alinakjamäpjjaniwa, qoranakjamäpjjaniwa,inti jalsu toqet jutir thayamp nakharatäki uka terrazan* jilir qoranakjamäpjjaniwa.
28 Nayajj kunanaksa jumajj lurta uk sum yatta, qontʼasitamsa, saratamsa, kuttʼanitamsa,+naya contra wal coleratamsa yatiraktwa,+
29 cheqas naya contra wal colerasitamasa+ arnaqasitamasa jiñchujaruw purini.+
Ukatwa nayajj nasamar mä fierro ganchomp uchäma, lakamarojj mä frenompiw ucharakïma,+ukatsti kawki thaknamtï jutkta uka pachpa thaknamaw kuttʼayäma”.
30 ”’Akäniw jumatak* mä señalajja: aka marajj justupat jilir granonak manqʼasipjjäta,* jutir maransti uka pachpa cheqan jilir grano manqʼasipjjarakïta, ukampis kimsïr maransti jathanak phawasajj yawipjjarakïtawa, uvasanak ayrusajj* achunakap manqʼapjjarakïtawa.+
31 Judá markankirinakat escapapkani, jiltʼapkarakini ukanakajja,+ alinakjamaw manqha toqer saphintapjjani, patjja toqerusti achoqapjjarakiniwa.
32 Kuna laykutejj jiltʼirinakaw Jerusalén markat mistupjjani, escapirinakajj Sion Qollutwa mistupjjarakini.+ Cheqpachansa ejercitonakan Jehová Diosapaw uk lurani.+
33 ”’Ukhamasti Jehová Diosajj Asiria markan reyipat akham siwa:+
“Janiw jupajj aka markar mantankaniti,+janiw mä flechsa akan flechtʼkaniti,janirakiw mä escudompis aka marka contrajj saytʼkaniti,ni markar atacañatakis mä laqʼa montón montontʼkaniti”+ sasa’.
34 ‘Kawki thaknamtï jutki uka pachpa thaknamaw jupajj kuttʼjjarakini;janiw aka markar mantankaniti’ sasaw Jehová Diosajj arsu.
35 ‘Nayaw aka markar arjjatäjja,+ sutij laykuw salväjja,+David servirij laykuraki’”.+
36 Ukatjja Jehová Diosan angelapajj mistunisaw asirionakan campamentopan 185.000 chachanakar jiwarayäna. Wali alwat sartirinakasti, taqpach jiwat cuerponakwa uñjapjjäna.+
37 Ukatsti Asiria markan Senaquerib reyipajj sarjjänwa, Nínive markaruw kuttʼjjarakïna,+ ukanwa quedasjjarakïna.+
38 Kunapachatï jupajj Nisroc diosapan templopan* altʼasiskäna ukhajja, Adramélec ukhamarak Sarézer sat pachpa yoqanakapaw espadamp jupar jiwayapjjäna,+ ukatsti jupanakajj Ararat oraqeruw escapjjapjjäna.+ Esar-Hadón+ sat yoqapaw jupa lantejj reyëjjarakïna.
Notanaka
^ “Llakisiñ isi” siski uk glosarion liytʼäta.
^ Jan ukajja, “palaciot”.
^ Jan ukajja, “jan wali arunakamp toqetäña”.
^ Ukajja, “angelanak taypiruw” sasaw jaqokipasirakispa.
^ Jan ukajja, “gobiernonakan”.
^ Jan ukajja, “gobiernonakapajj”.
^ Jan ukajja, “bosquenakaparus”.
^ Jan ukajja, “arbolanakapsa”.
^ Variante: “jatʼsusajja”.
^ Hebreo arunjja, “luratäjjänwa”.
^ Jan ukajja, “uta patjjan”.
^ Variante: “mallkisajj”.
^ Jan ukajja, “willeqtir granonakat jilki uka achunakat manqʼasipjjäta”.
^ “Jumatak” sasinjja, Ezequías reyitwa parlaski.
^ Hebreo arunjja, “utapan”.
