Isaías 53:1-12
53 ¿Kuntï nanakajj yatiyapkta ukarojj* khitirak confiyisti?*+
¿Khitirus Jehová Diosan chʼamapat* qhanañchasi?+
2 Jupajj mä ramar uñtataw jupa* nayraqatan mistuni,+ mä saphir uñtataw waña oraqen mistuni.
Jupajj janiw wali importante jaqjamäkiti, ni wali utjirin jaqjamäkisa,+kunapachatï jiwasajj jupar uñjtan ukhajja, uñnaqapajj janiw munkayäkiti.
3 Jupajj jiskʼachatänwa, jaqenakansa yaqhachatänwa,+jupajj kunas tʼaqesiñajj ukjja yatiñapänwa,* kunas usuntañajj uksa yatirakïnwa.
Ajanupajj jiwasat imantatäkaspas ukhamänwa.*
Jupajj jiskʼachatänwa, janis kuna valoranïkaspa ukhamwa jiwasajj uñjarakiyätanjja.+
4 Cheqpachansa jupaw usunakas apasjje,+juparakiw tʼaqesiñanakasjja apasjje.+
Ukampis Diosas usunakamp jan waltʼaykaspa, castigkaspa, tʼaqesiykaspa ukhamwa jiwasajj jupar uñjayätanjja.
5 Ukampis juchanakas laykuw+ juparojj maysat maysa passuyapjjäna,+pantjasitanakas laykuw juparojj wal tʼaqesiyapjjäna.+
Castigatajja jupajj aguantänwa, ukhamat jiwasajj sumankañ jikjjatañasataki,+usuchjatanakap laykuw jiwasajj qollatäjjtanjja.+
6 Taqeniw jiwasajj ovejanakar uñtat chhaqanukut sarnaqayätanjja,+sapa maynirakiw pachpa thakipar sarjje,Jehová Diosasti taqe jiwasanakan pantjasitanakaswa jupjjar uchi.+
7 Jupajj tʼaqesiyatänwa,+ tʼaqesiyapjjañapjja jupajj dejakïnwa,+janirakiw ni mä arsa arskänti.
Jupajj mä ovejar uñtataw jiwayañatak apatäna.+
Kunjamtï mä ovejajj tʼarwa yawirinakapatak amukïkejja ukhamänwa,ukatjja jupajj janiw kuns arskänti.+
8 Juparojj tʼaqesiyasa jan cheqapar juzgasa ukhamaw apapjjäna,¿khitirak tiempopan jakir jaqenakat* llakisinisti?
Jakirinakan ukatjja jupajj chhaqtayatänwa,+markajan juchanakap kawsaw jupajj jiwayatäna.+
9 Janis jupajj kuna jan walsa lurkchïnjja,janis jupan lakapan kuna engaños utjkchïnjja,+jan wali jaqenakamp chikaw juparojj mä sepultura churapjjäna,*+jiwjjäna ukhasti wali utjirin jaqenakamp chikaw* imapjjarakïna.+
10 Jehová Diosan munañaparjamaw jupajj wali tʼaqesiyat uñjasïna, juparakiw jupan usuntañapjja permitïna.
Jumatejj jupan jakäwipa jan wali luratat ofrendjam apanïta ukhajja,+jupajj wawanakaparuw uñjani, walja tiempow jakarakini,+jupa toqew Jehová Diosan munañapajj phoqasirakini.+
11 Wal tʼaqesitap laykojja, kunanakatï sumäki ukanakwa jupajj uñjani, chuymas chuymaw jikjjatasirakini.
Kunanaktï uñtʼki uka toqew cheqap servirijajj+walja jaqenakan cheqap sarnaqer jaqet uñjatäpjjañapatak yanaptʼani,+jupanakan juchanakapwa aparakini.+
12 Ukatwa nayajj walja jaqenak taypinjja kunatï jupar waktʼki uk churäjja,saqueysutanakjja chʼamaninakampiw jupajj jaljasini,kuna laykutejj jupajj jiwañkamaw jakäwip churäna,+jucharar jaqenak taypin jakhutarakïnwa,+walja jaqenakan juchanakapwa aparakïna,+jucharar jaqenakatakiw Diosarojj ruwtʼarakïna.+
Notanaka
^ Ukajja, “Kuntï nanakajj istʼapkta ukarojj” sasaw jaqokipasirakispa.
^ Jan ukajja, “fe; iyawsäwi”.
^ Hebreo arunjja, “amparapat”.
^ “Jupa” sasinjja, inas aleq uñchʼukir jaqeta jan ukajj Diosat parlaskchi.
^ Ukajja, “Jupajja kunjamtï jaqenakajj mä jaqerojj jan uñkatañ munapkejja ukhamänwa” sasaw jaqokipasirakispa.
^ Jan ukajja, “entiendiñapänwa”.
^ Jan ukajja, “¿kunjamsa jupajj jakäna ukat khitirak llakisinisti?”.
^ Jan ukajja, “jan wali jaqenakamp chikajja mayniw juparojj mä sepultura churani”.
^ Hebreo arunjja, “wali utjirin mä jaqemp chikaw”.
