Isaías 3:1-26
3 ¡Uñjapjjam! Cheqpach Dios Tatitojja, ejercitonakan Jehová Diosapajja,Jerusalén markatsa Judá markatsa taqe kasta yanapanakjja apaqaniwa,tʼantʼsa umsa apaqaniwa,+
2 chʼamani chacharusa, guerran nuwasir chacharusa,juezarusa, profetarusa,+ yatirirusa, ancianorusa* jupajj apaqaniwa,
3 phesqa tunka chachanakar pʼeqtʼirirusa,+ respetat jaqerusa, ewjjtʼirirusa,magianak lurañatak suma yatjjattʼat jaqerusa, layqarusa jupajj apaqaniwa.+
4 Waynitunakarojja jupanakan principenakaparuw nayajj tukuyäjja,jupanakajja amuyunakap sapa kuti mayjtʼayir jaqenakamp* apnaqatäpjjaniwa.
5 Jaqenakajja jupanakkamaw tʼaqesiyasipjjani,sapa mayniw jaqe masipar tʼaqesiyani.+
Mä waynitojja mä jilïr jaqeruw jan waltʼayani,jan yäqat mä jaqejja respetat mä jaqeruw qallasini.+
6 Sapa mayniw awkipan utapankir jilaparojj katuntapjjani, akham sapjjarakiniwa:
“Jumaw mä mantonïtajja, jumay nanakar apnaqapjjeta.
Jumay aka qʼala tʼunjat lugarat encargasim” sasa.
7 Ukampis uka urunjja akham sasaw jupajj arusini:
“Janiw nayajj jumanakan heridanakam qolltʼkäti,*janiw utajan manqʼas ni isis utjkituti.
Jan markar apnaqañajatakejj uttʼayapjjestati” sasa.
8 Jerusalén markajj lanktʼasiwa,Judá markajj tinkurakiwa,kuna laykutejj uka markanakajja parlatanakapampis luratanakapampis Jehová Dios conträpjjewa,kʼajtatap nayraqatansa kutkatasir markanakäpjjewa.+
9 Ajanunakapan uñnaqapajja jupanak contraw qhanañchi,Sodoma markjamaw juchap yatiyapjjaraki,+janiw kunsa imtʼapkiti.
¡Ay jupanakat kunakïkani, jupanak pachpaw jan waltʼäwinak thaqasisipki!
10 Cheqap sarnaqer jaqenakarojja taqe kunas sumaw jumanakatakejj sarani sasin sapjjam,jupanakajj luratanakaparjamaw pago katoqapjjani.*+
11 ¡Ay jan wali jaqenakat kunakïkani!
¡Jupanakajj jan waltʼäwinakanwa uñjasipjjani,kuntï jupanakajj amparanakapamp lurapki uka pachpaw jupanakar lurasini!
12 Nayan markajan capatazanakapajja tʼaqesiyirinakäpjjewa,jupanakarojj warminakaw apnaqapjje.
Nayan markaja, pʼeqtʼirinakamajj jan waliruw apasipktamjja,jupanakajj thakinakamatwa saranukuyapjjtamjja.+
13 Jehová Diosajj juchañchañatakiw wakichasiski,markanakar juchañchañatakiw jupajj saytʼasiski.
14 Jehová Diosajja markapan ancianonakampiru principenakampirojj juchañchaniwa.
Diosajj jupanakar akham saniwa: “Jumanakajj uvas yapu phichantapjjtajja,pobrenakar lunthatapkta ukanakajj utanakamankiwa”+ sasa.
15 Taqe Kunjjar Munañani Tatitojja, ejercitonakan Jehová Diosapajja akham sarakiwa: “¿Kunatarak markajar aynachtʼayapjjtasti,kunatarak pobrenakar wal tʼaqesiyapjjtasti?”+ sasa.
16 Jehová Diosajj akham siwa: “Niyakejjay Sionan phuchanakapajj jachʼa jachʼa tukurïpjjchejja,pʼeqe waytataw sarnaqapjje,nayranakapampi coqueteasa, jiskʼat jiskʼar chellqtasa,kayunakapankir adornonakap chholloqeyasaw sarnaqapjjaraki,
17 Jehová Diosajja Sionan phuchanakapan pʼeqenakapar qarachrantayasaw castigani,pʼeqenakapsa Jehová Diosajj qʼarstayaniwa.+
18 Uka urunjja Jehová Diosajj taqpach adornonakapwa apaqani: kayur uchasiñ brazaletenakapsa,pʼeqer uchasiñ cintanaksa, phajjsir uñtasit adornonaksa,+
19 aretenaksa, brazaletenaksa, velonaksa,
20 pʼeqer uchasiñ adornonaksa, kayur uchasiñ cadenanaksa, pechor uchasiñ fajanaksa,*perfume uchañ frasconaksa, munachanaksa,*
21 lukʼanar uchasiñ anillonaksa, nasar uchasiñ anillonaksa,
22 importante urun uskusiñ isinaksa, patjja isinaksa, mantonaksa, bolsanaksa,
23 jiskʼa espejonaksa,+ linot lurat isinaksa,*turbantenaksa, velonaksa apaqaniwa.
24 Bálsamo sat aceiten+ suma olorap lantejja, tʼamantat olorakiw utjani,mä cinturón lantejja, mä pitakiw* utjani,suma askichtʼat ñikʼutanakap tukstayasisajja, pʼeq qʼarakëjjapjjaniwa,+jila alani isi lantejja, llakisiñ isikiw*+ utjani,suma uñnaqtʼanïpkchisa, parintayat hierromp marcatäpjjaniwa.
25 Chachanakamajja espadampi jiwarayatäpjjaniwa,wali chʼamani chachanakamas guerranwa jiwarapjjarakini.+
26 Markar mantañ lugaranakas jachapjjaniwa, llakisipjjarakiniwa,+uka markajj utjirinakap aparat warmir uñtasitäniwa, chʼusa oraqeruw qontʼasini”.+
Notanaka
^ Jan ukajja, “jilïr irpirirusa”.
^ Jan ukajja, “munañan jaqenakamp”.
^ Jan ukajja, “jumanakan doctoramäkäti”.
^ Hebreo arunjja, “luratanakapan achunakapwa manqʼapjjani”.
^ Jan ukajja, “cintanaksa”.
^ Jan ukajja, “amuletonaksa”.
^ Jan ukajja, “manqha isinaksa”.
^ Variante: “kawuyakiw”.
^ “Llakisiñ isi” siski uk glosarion liytʼäta.
