Isaías 16:1-14
-
Moab marka contra arsut arunakajj utjaskakiwa (1-14)
16 Marka apnaqerirojj mä orqo oveja apayapjjam,Sela lugarat wasarnam apayapjjam,Sionan phuchapan qollupkam apayapjjam.
2 Arnón vallen utjki uka pasañjam jawir umanakanjja,Moab markan phuchanakapajj+ tapapat chhukunukuyat mä jamachʼir uñtasitäpjjaniwa.+
3 “Ewjjtʼapjjam, kunatï amtatäki uksa phoqapjjarakim.
Chika urojja chʼiwimarojj arum chʼamakar uñtat tukuyam,taqe toqer ananukutanakarojj imantam, escapirinakarojj jan traicionamti.
4 Moab marka, taqe toqer ananukutanakajajj juma taypin jakapjjpan.
Tukjir enemigo kawsajj jupanakatakejj mä imantasiñ lugarar tukum.+
Tʼaqesiyirejj janiw utj-jjaniti,tʼunjäwejj tukusjjaniwa,mayninakar takichasirinakajj oraqet chhaqtjjapjjaniwa.
5 Ukatjja munasiñjjaru jan jaytjasiñjjaruw mä tronojj uttʼayasini.
Khititï Davidan familiapat uka tronor qontʼaskani ukajja jan jaytjasirïniwa,+jan khitir yaqhachasaw jupajj juzgani, jankʼakiw justicia lurarakini”.+
6 Moab markajj jachʼa jachʼa tukur markätapa, wali jachʼa jachʼa tukur markätapwa jiwasajj istʼtanjja,+Moab markajj wali wal tukur markätapa, jachʼa jachʼa tukur markätapa, wali colerasiri markätapwa istʼaraktanjja,+ukampis ina chʼusa arunakapajj janiw kunarus apkaniti.
7 Moab markajj Moab markatjamwa wararini,taqe jupanakaw wararipjjani,+jan waltʼäwin uñjasirinakajj Quir-Haréset sat markankir uvas pasasanakatjamwa* wararipjjani.+
8 Kuna laykutejj Hesbón+ markankir oraqenakajj wañsjjewa,Sibmá+ markankir uvas alinakas wañsjjarakiwa,markanakan apnaqerinakapajj kʼajkir wila color ramanakapwa takichasipjje,uka ramanakajj Jazer+ markakamaw puripjjäna,wasarnamaw uka ramanakajj puripjjäna.
Chʼichtanir alinakapajja jiltasajj lamar qotakamaw puripjjäna.
9 Ukatwa nayajj Sibmá markankir uvas alinakat jachäjja, kunjamtï Jazer markatjam nayajj jachkta ukhama.
Hesbón marka, Elealé+ marka, jachanakajampiw nayajj chʼaranjäma,kuna laykutejj juntʼupacha achunakamat arnaqasiñasa cosechamat arnaqasiñas tukusjjewa.
10 Huertotjja kusisiñas kʼuchisiñas chhaqtjjewa,uvas yapunakanjja janiw arnaqasiñanakasa kusiskañ cancionanakas istʼasjjeti.+
Uvas chʼirwañ lugaranakanjja janiw khitis uvasanak takjjeti,kuna laykutejj nayaw arnaqasiñanak chhaqtayta.+
11 Ukatwa chuymajajj Moab+ markatjam khatatiski,kunjamtï arpan cuerdanakapajj khatatki ukhama,nayajj Quir-Haréset+ markatjamajj wali llakitätwa.
12 Moab markajj jan qarjtasas alto lugarar adorañatak* sarkchinejja, santuariopar oración luriris sarkchinejja, janiw kunsa jikjjatkaniti.+
13 Jehová Diosajj uka arunakwa Moab markat arsüna.
14 Jichhajj Jehová Diosajj akham siwa: “Akat kimsa maranakatjja,* Moab markan jachʼañchäwipajj kunayman jan waltʼäwinakampi jiskʼachatäniwa, khitinakatï jiltʼapkani ukanakajj jukʼanikëjjapjjaniwa, pisi chʼamakëjjapjjarakiniwa”+ sasa.
Notanaka
^ Ukham sasinjja, uvas pasasanakampik lurat mä quequetwa parlaski.
^ Jan ukajja, “yupaychañatak”.
^ Hebreo arunjja, “Akat kimsa maranakatjja, mä arunjja sueldot trabajir jaqen maranakapjamajja”.
