Isaías 21:1-17
21 Aka arunakajj lamar qotar uñtasitäki uka wasar* contra arsut arunakawa:+
jan waltʼäwejja aynach toqen* qʼal pichthapir wali jachʼa thayar uñtasitaw jutaski,wasarata, wali ajjsarkañ oraqetwa jutaski.+
2 Wali ajjsarkañ mä visionaw nayarojj uñachtʼayasitu:
traicionir markajja traicionaskakiwa,tukjir markajja tukjaskakiwa.
¡Elam marka, makatam! ¡Media+ sat marka, atacam!
Jupajj* utjayki taqe uka llakisiñanakjja nayajj chhaqtayäwa.+
3 Ukatwa nayajj wali llakitätjja.+
Kunjamtï mä warmejj ususkasin tʼaqeskejja,ukhamwa nayajj tʼaqesta.
Istʼañatakis wali llakitätwa,uñjañatakis qʼala mayjtʼatätwa.
4 Chuymajajj janiw walëjjeti, ajjsarañatsa wal khatatta.
Arumtʼjjañapjja nayajj wal munayäta, ukampis jichhajj arumtʼjje ukhajj wal khatatjjta.
5 ¡Mesa uchapjjam, asientonaksa wakichapjjam!
¡Manqʼapjjam, vinsa umapjjarakim!+
¡Principenaka, sartapjjam, escudorojj aceitempi warjjattʼapjjam!
6 Kuna laykutejj Jehová Diosajj akham situwa:
“Saram, vigilir mä jaqer uskum, ukhamat kuntï jupajj uñjkani uk yatiyañapataki” sasa.
7 Uka vigilir jaqejja, pä caballonakamp qatatit guerran nuwasiñatak mä carro uñjäna,asnonakamp qatatit guerran nuwasiñatak mä carro uñjäna,camellonakamp qatatit guerran nuwasiñatak mä carro uñjäna.
Jupajj wali amuyumpi wali atencionampiw uñchʼukïna.
8 Ukatjja mä leonar uñtataw jupajj akham sasin wararïna:
“Jehová Dios Tata, nayajj uru jurnälaw vigilañatak torren saytʼatäskta,sapa arumaw guardia lurañatak lugarajan quedasta.+
9 Kunatï jutaski uk uñtapjjam:
¡chachanakaw pä caballonakamp qatatit guerran nuwasiñatak mä carron jutasipki!”+ sasa.
Ukatjja akham sasaw jachʼat säna:
“¡Atipjatäjjewa! ¡Babiloniajj atipjatäjjewa!+
¡Jupaw diosanakapan taqe idolonakapjja oraqer phallayi!”+ sasa.
10 Nayan markaja, jumajj granonakjam taksutaw uñjasiyätajja,jumajj grano takiyañ lugarajankir granötawa,*+kuntï nayajj ejercitonakan Jehová Diosapata, mä arunjja Israelan Diosapat istʼkta ukjja jumanakarojj yatiyapjjsmawa.
11 Aka arunakajj Dumá* contra arsut arunakawa:
mayniw Seír markatpach akham sasin arnaqasinkitu:+
“Guardia, ¿niyat alwäjjani?
Guardia, ¿niyat alwäjjani?” sasa.
12 Guardiajj akham sarakiwa:
“Alwajj purisinkiwa, arumas purisinkarakiwa.
Jumanakatï jisktʼañ munapjjsta ukhajja, jisktʼasipkakim.
¡Mayamp jutapjjam!” sasa.
13 Aka arunakajj wasar pampa contra arsut arunakawa:
Dedán markankir viajir jaqenaka,+jumanakajja wasar pampankir montenwa* arumajj quedasipjjäta.
14 Temá oraqen jakir jaqenaka,+sarapjjam, umat pharjat* jaqetakejj um aparapipjjam,escapaski uka jaqetakejj tʼantʼa aparapipjjam.
15 Kuna laykutejj jupanakajj espadanakatwa escapapjje, imañapat apsuta espadatwa escapapjje,flechtʼañatak dobltʼat arcota ukhamarak tʼaqesiyir guerratwa jupanakajj escapapjje.
16 Kuna laykutejj Jehová Diosajj akham sasaw situ: “Akat mä maratjja,* Quedar+ sat markan taqpach jachʼañchäwipajj tukusiniwa.
17 Khitinakatï Quedar sat markat flechtʼañ arcompi guerrar nuwasir sarapki ukanakajj jukʼanikëjjapjjaniwa, kuna laykutejj Israelan Jehová Diosapaw ukham arsu” sasa.
Notanaka
^ Amuyatajja, nayra Babiloniankir oraqetwa parlaski.
^ Jan ukajja, “sur toqen”.
^ Amuyatajja, “jupajj” sasinjja Babilonia markatwa parlaski.
^ Hebreo arunjja, “yoqall wawätawa”.
^ Ukajja, “amuki” sañ muni.
^ Jan ukajja, “bosquenwa”.
^ Variante: “wañjat”.
^ Hebreo arunjja, “Akat mä maratjja, mä arunjja sueldot trabajir jaqen maranakapjamajja”.
