Isaías 19:1-25
19 Aka arunakajja Egipto marka contra arsut arunakawa:+
Jehová Diosajja ratuki sarir mä qenayjjatwa saraski, Egipto markaruw mantaskaraki.
Jupa nayraqatanjja Egipto markan jan kunatak servir diosanakapajj khatatipjjaniwa,+egipcionakan chuymanakapajj wal ajjsarapjjani.
2 “Egipcionakarojja pachpa egipcionak contraw saytʼayäjja,jupanakkamaw nuwasipjjani,sapa maynejja pachpa jilap contra ukhamarak vecinop contraw nuwasini,mä markajj yaqha marka contraw nuwasini, mä reinojj yaqha reino* contraw nuwasini.
3 Egipcionakajj janiw kamachtʼasirjamäpkanisa,amtanakapsa nayajj mayjtʼayäwa.+
Jupanakajj jan kunatak servir diosanakaruw jisktʼasipjjani,layqanakaru, jiwatanakamp parlirinakaru ukhamarak yatirinakaruw jisktʼasipjjani.+
4 Egipto markarojja mä qhoru* patronan amparaparuw katuyäjja,jan sinttʼasir mä reyiw jupanakarojj apnaqarakini”,+ ukham sasaw cheqpach Tatitojja, mä arunjja ejercitonakan Jehová Diosapajj arsu.
5 Lamar qotan umapajj wañsjjaniwa,jawirajj tukstjjaniwa, wañsjjarakiniwa.+
6 Jawiranakajj thujsapjjaniwa,Egipto markan utjki uka Nilo jawiran canalanakapas tukstjjaniwa, wañsjjarakiniwa.
Cañanakasa junco* sat alinakas ñusantjjaniwa.+
7 Nilo jawir lakankir plantanakasa Nilo jawir jalanta jakʼanakankir plantanakas wañsjjaniwa,Nilo jawir jakʼanakan yapuchat taqe oraqenakas wañsjjaniwa.+
Thayajj taqpachwa apasjjani, janiw jukʼamp utj-jjaniti.
8 Chawlla katurinakajj llakitäpjjaniwa,Nilo jawirar anzuelonak jaqontirinakajj wararipjjaniwa,qänanakap* umar jaqontirinakajj jukʼanikëjjapjjaniwa.
9 Linot+ isinak luririnakasa,telaranakampi janqʼo telanak luririnakas phenqʼachatäpjjaniwa.
10 Egipto markankir sawurinakajj aynachtʼapjjaniwa,sueldot trabajir taqe jaqenakas llakisipjjaniwa.
11 Zoan+ markan principenakapajj jan amuytʼasirinakäpjjewa.
Faraonan wali yatiñan ewjjtʼirinakapas jan sum amuytʼasisaw ewjjtʼapjje.+
¿Kunjamarak jumanakajj faraonarojj“nayajj yatiñan jaqenakat jutirïtwa,nayra reyinakat jutirïtwa” sasin sapjjasmasti?
12 Ukhamajj ¿kawkinkarak yatiñan jaqenakamasti?+
Jupanakatï yatipjjchi ukhajja, kuntï ejercitonakan Jehová Diosapajj Egipto markar lurañ amtki uk jupanakay faraonar yatiyapjjpan.
13 Zoan markan principenakapajj jan amuytʼasisaw kuns lurapjje,Nof*+ markan principenakapajj engañjatäpjjewa,Egipto markajja tribu pʼeqtʼirinakapan jan wali thakir saranukuyataw uñjasi.
14 Jehová Diosajja Egipto markarojj pantjasiyaniwa,+uka pʼeqtʼirinakaw taqe kuntï Egipto markajj lurki ukanakat maysar saranukuyapjje,kunjamtï mä machantat jaqejj pachpa waqʼaqsutapan* llustʼanaqtki ukhama.
15 Egipto markajja janiw kuns lurirjamäkaniti,janirakiw pʼeqesa, wichʼinkasa, chʼichtanir alisa, junco sat alisa* kuns lurirjamäkaniti.
16 Uka urunjja, egipcionakajj warminakjamaw tukupjjani, khatatipjjaniwa, ajjsarayasipjjarakiniwa, ejercitonakan Jehová Diosapajj egipcionak contra amparap loqtatap layku.+
17 Judá oraqejj Egipto markarojj wal ajjsarayani. Judá oraqet parlir istʼasakiw egipcionakajj ajjsarayasipjjani, ejercitonakan Jehová Diosapajj jupanak contra amtatap layku.+
18 Uka urunjja, Egipto oraqenjj Canaán+ oraqen arup parlir phesqa markanakaw utjani, uka markanakajj ejercitonakan Jehová Diosaparuw jupat jan jitheqtañatak mä juramento lurapjjani. Uka markanakat maynïrejj Tukjat Marka satäniwa.
19 Uka urunjja, Egipto oraq taypinjja mä altaraw Jehová Diosatakejj utjani, Egipto markan qorpapanjja Jehová Diosar jachʼañchañatak mä columnaw utjarakini.
20 Ejercitonakan Jehová Diosapatakejj mä señaljama ukhamarak mä testigjamaw Egipto oraqen servini, kuna laykutejj tʼaqesiyirinak kawsaw jupanakajj Jehová Diosar wal ruwtʼasipjjani, jupasti mä salviri jupanakan ukarojj khitanini, jïsa, mä jachʼa salviri khitanini, jupaw jupanakarojj salvani.
21 Jehová Diosajj egipcionakan uñtʼat Diosäniwa, uka urunwa egipcionakajj Jehová Diosar uñtʼapjjani, sacrificionakampi regalonakampwa churapjjani, Jehová Diosar mä promesa lurasajj phoqapjjarakiniwa.
22 Jehová Diosajj Egipto+ markaruw castigani, castiganiwa ukatjja qollarakiniwa, jupanakasti Jehová Diosan ukaruw kuttʼapjjani, jupasti ruwtʼasitanakaparojj jaysaniwa ukatjja qollarakiniwa.
23 Uka urunjja, Egipto markat Asiria markakamajj mä thakiw utjani,+ asirionakajj Egipto markaruw mantapjjani, egipcionakajj Asiria markaruw mantapjjani. Egipto markajj Asiria markamp chikaw Diosar servini.
24 Uka urunjja, Israel markajj Egipto markampi Asiria+ markampiw mayachasjjani, Israel markajja oraqetakejj mä bendicionäniwa.
25 Kuna laykutejj ejercitonakan Jehová Diosapajj akham sasaw jupanakar bendisini: “Egipto markajajj bendisitäpan, amparanakajampi lurat Asiria markasa, herenciajäki uka Israel markas bendisitäpan”+ sasa.
Notanaka
^ Jan ukajja, “mä gobiernojj yaqha gobierno”.
^ Variante: “phiru”.
^ Uka alejja siniya (pantano) lugaranakan jiliri jachʼa alinakawa.
^ Jan ukajja, “redenakap”.
^ Jan ukajja, “Menfis”.
^ Jan ukajja, “vomitjasitapan”.
^ Ukajja, “palmera qoqan (arbolan) ramapasa” sasaw jaqokipasirakispa.
