Isaías 29:1-24
29 “¡Ay Ariel* marka, Ariel marka, jumat kunakïkani, kawkjantï Davidajj carpap saytʼaykäna uka markat kunakïkani!+
Sapa mara lurapkta uka fiestanakamjja amtasipkakim,taqe fiestanak amtasipkakim.+
2 Ukampis nayajj Ariel markarojj llakisiyäwa,+wali llakisiñampi warariñampiw utjani,+Ariel markajja nayatakejj Diosan altarapan nina phichañ lugarar uñtasitäniwa.+
3 Juma contra nuwasiñatakiw nayajj juma muytpachar carpanak saytʼayäjja,juma muytpacharojj puntani lawanakwa ucharakëjja,jumar atacañatakiw perqanak saytʼayarakëjja.+
4 Jumajj jiskʼachataw uñjasïta,oraq pampatpachwa parläta,laqʼa polvojj janiw arunakam istʼasiykaniti.
Arunakamajj oraq pampatwa istʼasini,+jiwatanakamp parlir jaqen arupjamaw istʼasini,arunakamajj wali jiskʼatakwa laqʼa polvot istʼasini.
5 Walja enemigonakamajj* laqʼa polvor uñtasitäpjjaniwa,+tʼaqesiyir walja jaqenakajja thayamp apata pajar uñtasitäpjjaniwa.+
Ukajj mä ratukiw pasani, mä akatjamatwa pasani.+
6 Ejercitonakan Jehová Diosapaw salvätam,qʼejjo qʼejjonakampi, terremotonakampi, jachʼa suynatampi,jachʼa thayanakampi, qʼal nakhantir ninampiw salvätam”.+
7 Taqpach markanakankir jaqenakajja, Ariel marka contra nuwasipki ukanakajja,+mä arunjja Ariel marka contra nuwasir markanakasa,uka marka muytpachankir torrenakasa,khitinakatï uka markar tʼaqesiyapki ukanakasa,arum toqer samkasit samkaruw tukupjjani.
8 Kunjamtï maynejj manqʼat awtjatäsajj manqʼkaspas ukham samkaskejja,ukat ikit sartasajj manqʼat awtjayaskejja ukhamäniwa,kunjamtï maynejj umat pharjatäsajj* umsa umkaspa ukham samkaskejja,ukat ikit sartasajj wali qarita umat pharjata sartaskejja ukhamäniwa.
Taqe markanakankir jaqenakarojj ukhamaw pasani,khitinakatï Sion Qollu+ contra nuwasipki ukanakarojj ukhamaw pasani.
9 Jumanakajj mayawjan saytʼat quedasipjjam, wal musparapjjarakim,+juykhuptapjjam, juykhur tukuyatäpjjarakim.+
Jupanakajj machantatäpjjewa, ukampis janiw vinomp machantatäpkiti,jupanakajj liwinaqtasipkiwa, ukampis janiw alcohol kawsajj liwinaqtapkiti.
10 Kuna laykutejj Jehová Diosajj jiwa iki jumanakjjarojj apayani,+profetanaka, jumanakan nayranakamjja jupajj jistʼantiwa,+visionanak uñjir jaqenaka, jumanakan pʼeqenakamjja jupajj chʼoqantiwa.+
11 Taqe visionanakajja jumanakatakejj sellantat mä libron arunakapar uñtasitaw tuku.+ Kunapachatï jupanakajj liyiñ yatki uka jaqeru “mirä amp suma, aka libro jachʼat liytʼam” sasin churapki ukhajja, uka jaqejj akham siwa: “Aka librojj sellantatawa, janiw liytʼañ puedkti” sasa.
12 Kunapachatï jupanakajj jan liyiñ yatki uka jaqeru “mirä amp suma, aka libro liytʼam” sasin churapki ukhajja, uka jaqejj akham siwa: “Janiw liyiñ yatki” sasa.
13 Jehová Diosajj akham siwa: “Aka markajj arumpikiw nayarojj adorapjjetu,*lakampikiw jachʼañchapjjetu,+ukampis chuymanakapajj nayat wali jayankiwa,jaqenakan mandatonakaparjama, jupanakar yatichaski uka mandatonakarjamakiw jupanakajj nayar ajjsarapjjetu.+
14 Ukhamasti mayampiw nayajj musparkañanak aka markampejj luräjja,+mä musparkañ luräwjjarojja yaqha musparkañ luräwinakampwa luräjja,yatiñan jaqenakapan yatiñapajj tukusjjaniwa,amuyasiri jaqenakapan amuytʼatanakapajj chhaqtjjaniwa”+ sasa.
15 ¡Ay kunakïkani, khitinakatï jan wali amtanakap Jehová Diosat imtʼañatak kuns lurapki ukanakatjja!+
Jan wali luräwinakapjja mä chʼamak lugaranwa lurapjje,jupanakajj akham sapjjewa: “¿Khitirak uñjistusti?
¿Kuntï lurasktan uk khitirak yatisti?”+ sasa.
16 ¡Taqe kunwa jumanakajj qʼewjjayapjjtajja!
¿Sañu lurirejj ñeqʼerjam uñjatäspati?+
¿Kunatï luratäki ukajj luriripat akham saspati,“jupajj janiw nayar lurkituti”+ sasajja?
¿Kunatï luratäki ukajj luriripat akham saspati,“jupajj janiw kuns amuykiti”+ sasajja?
17 Mä jukʼa tiempotjja Líbano qollunakajj huertor tukuyatäniwa,+huertojj monter* uñtasitäniwa.+
18 Uka urunjja, oqaranakajj uka libron arunakapwa istʼapjjani,juykhunakajja wali chʼamakat salvatäpjjaniwa, uñj-jjapjjarakiniwa.+
19 Llampʼu chuymaninakajj* Jehová Dios laykojj walpun kusisipjjani,pobre jaqenakajj Israelan Santo Diosap laykojj wali kusisitäpjjaniwa.+
20 Kuna laykutejj tʼaqesiyir jaqenakajj chhaqtjjapjjaniwa,jachʼa jachʼa tukurinakajj tukusipjjaniwa,taqe khitinakatï yaqhanakar jan waltʼayañatak listokïpki ukanakajj tukjatäpjjaniwa,+
21 khitinakatï kʼari arunakampi yaqhanakar kʼarintapki ukanakasa,khitinakatï marka punkur quejap arjjatasir sarki uka jaqer trampanak uchapki ukanakasa,+khitinakatï cheqap sarnaqer jaqerojj kʼari arunakampi cheqaparjam jan uñjapki ukanakasa tukjatäpjjaniwa.+
22 Abrahanar+ salvkäna uka Jehová Diosajja Jacob chachan utapankirinakarojj akham siwa:
“Jacob chachajj janiw jukʼampejj phenqʼasjjaniti,ajanupas janiw jukʼampejj qʼelluptjjaniti.*+
23 Kunapachatï Jacobojj wawanakaparu,mä arunjja amparanakajampi luratäpki uka wawanakar jupa muytpachan uñjani ukhajja,+sutijwa jupanakajj jachʼañchapjjani,jïsa, jupanakajj Jacobun Santo Diosaparuw jachʼañchapjjani,Israelan Diosaparojj respetapjjarakiniwa.+
24 Khitinakatï saranukutäpki ukanakajja, amuytʼasirïpjjaniwa,quejasirinakasti yatichayasipjjarakiniwa” sasa.
Notanaka
^ Uka sutejja, inas “Diosan altarapankir nina” sañ munchi. Inas Jerusalén markat parlaskchi.
^ Hebreo arunjja, “jan uñtʼatanakajj”.
^ Variante: “wañjatäsajj”.
^ Jan ukajja, “yupaychapjjetu”.
^ Jan ukajja, “bosquer”.
^ “Llampʼu chuymanïña” siski uk glosarion liytʼäta.
^ Jan ukajja, “ajanupajj janiw phenqʼasiñatsa chuyma pʼakintat uñjasitapatsa qʼelluptjjaniti”.
