Isaías 54:1-17
54 “¡Jan wawanakan warmi, kusisiñat arnaqasim!+
Partomp jan tʼaqesir warmi,+ kusisim, kusisiñat arnaqasirakim,+kuna laykutejj chachani warmin wawanakapat sipansa,jaytjat warmin wawanakapaw jukʼamp waljanïpjje”+ siw Jehová Diosajja.
2 “Carpaman lugarapjja jukʼamp jachʼaptayam.+
Jachʼa tabernaculoman telanakap jachʼaptayam.
Carpaman pitanakap* jachʼaptayam,chʼakurunakapsa sum segurtʼarakim.+
3 Kuna laykutejj kupi toqempiru chʼeqa toqempiruw jumajj aywitatäta.
Wawanakamaw markanak katuntapjjani,chʼusar tukuyata markanakanwa jakapjjarakini.+
4 Jan ajjsaramti,+ kuna laykutejj janiw phenqʼachat uñjaskätati,+humillatäkasmas ukham jan amuyasimti, kuna laykutejj janiw chuyma pʼakintat uñjaskätati.
Tawaqökasin phenqʼachat uñjaskayäta ukat armasjjätawa,viudäkasin jiskʼachat uñjaskayäta ukatjja janirakiw jukʼampejj amtasjjätati” sasa.
5 “Jachʼa Luririmajj+ juman esposomäkaspas ukhamawa,+jupan sutipajj ejercitonakan Jehová Diosapa satawa,Israelan Santo Diosapajj juman Salvirimawa.*+
Jupajj oraqpachan Diosapa satarakïniwa.+
6 Kunapachatï Jehová Diosajj jumar jawskayätam ukhajja, apanukut warmir uñtasitayätawa, wali llaktʼat warmirakiyätawa,+tawaqökasin casarata ukat jaytanukut warmir uñtasitayätawa” siw juman Diosamajja.
7 “Mä ratutakikiw jaytanukuyäsma,ukampis wal khuyaptʼayasitaj laykuw nayajj mayamp irpanïma.+
8 Wal colerasitaj laykojja mä jukʼa tiempokiw ajanuj jumat imantasta,+ukampis munasirïtajasa jan jaytjasirïtajas wiñayatakïniwa, nayajj jumat khuyaptʼayasirakïmawa”+ siw juman Salvir* Jehová Diosamajja.+
9 “Akajja nayatakejj Noé chachan urunakapjamawa.+
Umanakajj janipuniw mayampis oraq chhaqtaykaniti sasaw nayajj juramentompi arsuyäta,+ukhamarakiw jumatak jan mayamp colerasiñatakisa jumar jan castigañatakisa juramentompi arsta.+
10 Qollunakajj onjjtayatäspawa,jiskʼa qollunakajj thaljatäpjjaspawa,ukampis munasiñajasa jan jaytjasiñajas janiw chhaqtkaniti,+sumankañ pactojas janiw thaljatäkaniti”+ siw jumat khuyaptʼayasir Jehová Diosajja.+
11 “Tʼaqesiyat warmi,+ jachʼa thayampi asutʼjat warmi, jan chuymachtʼat warmi,+qalanakamarojj ñeqʼempiw nayajj usköjja,cimientonakamarusti zafiro sat suma qalanakampiw* uskurakëjja.+
12 Markaman perqa patanakapjja rubí sat suma qalanakampiw* luräjja,punkunakamsti llijkir suma qalanakampiw* luräjja,taqpach thiyanakamjja* suma qalanakampiw lurarakëjja.
13 Taqe wawanakamajj* Jehová Diosampi yatichatäpjjaniwa,+wawanakaman* sumankañapajj waljapunïniwa.+
14 Kunanakatï cheqapäki ukanak luratam laykojja jumajj suma uttʼayatäyätawa.+
Tʼaqesiñajj jumat wali jayankaniwa,+janiw kunarus ajjsarkätati, janirakiw kunats wal ajjsarayaskätati,kuna laykutejj janiw ukajj jumar jakʼachaskaniti.+
15 Maynitï jumar atacätam ukhajja,janiw ukajj nayan ordenajarjamajj luraskaniti.
Khititï jumar atackätam ukajja atipjatäniwa”.+
16 “Nayaw metalamp trabajir jaqerojj lurtjja,khititï aqkir nina sankʼanakar phustʼki ukarojj nayaw lurtjja,khititï nuwasiñatak mä arma lurki ukarojj nayaw lurtjja.
Nayarakiw tukjir jaqerojj lurtjja, ukhamat jan waltʼäwi apaniñataki.+
17 Mä armatï jumar jan waltʼayañatak lurasini ukhajja, janiw ukajj kunatakis sirvkaniti,+khititï juma contra parlkani ukarojja mä juicionwa juchañchäta.
Akasti Jehová Diosan servirinakapan herenciapawa,jupanakarojj cheqapar sarnaqer jaqenakarjamaw nayajj uñjta” siw Jehová Diosajja.+
Notanaka
^ Variante: “kawuyanakap”.
^ Hebreo arunjja, “Mayamp Alasirimawa”.
^ Hebreo arunjja, “Mayamp Alasir”.
^ “Suma qalanaka” siski uk glosarion liytʼäta.
^ “Suma qalanaka” siski uk glosarion liytʼäta.
^ Jan ukajja, “nina color qalanakampiw”.
^ Variante: “qawayanakamjja”.
^ Jan ukajja, “yoqall wawanakaman”.
^ Jan ukajja, “yoqall wawanakamajj”.
