Isaías 38:1-22
38 Uka urunakanjja Ezequías reyiw usuntäna, niya jiwirjamarakïnwa.+ Ukatsti Amoz chachan Isaías profeta+ yoqapaw jupan ukar jutasajj akham säna: “Jehová Diosajj akham siwa: ‘Familiamarojj sum ewjjtʼawayjjam, jumajj jiwjjätawa, janiw waliptkätati’ sasa”.+
2 Uk yatisasti Ezequiasajj perqa toqeruw kutikipstäna, akham sasaw Jehová Diosar oración lurañ qalltarakïna:
3 “Jehová Dios Tata, nayajj jumaruw ruwtʼasma, mirä amp suma, kunjamsa nayajj thakinakamat jan jitheqtas phoqat chuymampi sarnaqawayta,+ kunatï juma nayraqatan walïki ukwa nayajj lurarakta, ukanak amtasikimaya”+ sasa. Ukatjja Ezequiasajj walpun jachäna.
4 Ukatsti Jehová Diosajj akham sasaw Isaiasarojj säna:
5 “Kuttʼam, Ezequiasar akham sasin yatiyanim:+ ‘David nayra awkiman Jehová Diosapajj akham siwa: “Juman oración luratam nayajj istʼtwa,+ jachanakamsa uñjaraktwa.+ Juman vidamarojj* 15 maranakampiw yapjjatäjja,+
6 jumarusa aka markarusa Asiria markan reyipan amparapatwa nayajj salvapjjäma, aka markarus arjjatarakïwa.+
7 Kuntï Jehová Diosajj arski ukjja jupajj phoqaniwa, uk jumar uñachtʼayañatakejja, Jehová Diosan señalapajj akawa:+
8 Acaz chachan gradanakapnam* saraqki uka chʼiwirojja tunka gradanakwa qhepar kuttʼayäjja”’+ sasa”. Ukatjja kawkïr gradanaktejj chʼiwejj saraqäna uka gradanakatjja tunka gradanakwa qhepar kuttʼäna.
9 Judá markan Ezequías reyin qellqat arunakapa, uka arunakjja usuntkäna, waliptjjarakïna ukhaw jupajj qellqäna.
10 Nayajj akham sayätwa: “Janïr awkiptkasawSepulturan* punkunakapnam mantäjja.
Jakañ maranakajat jarkʼataw uñjasëjja” sasa.
11 Nayajj akham sarakiyätwa: “Janiw nayajj Jah* Diosarojj uñj-jjäti, janiw jakirinakan oraqepan Jah Diosarojj uñj-jjäti.+
Kunapachatï taqe kunas tukuski uka lugarankirinakamp chikäjjä ukhajja,janiw jaqenakarojj jukʼampejj uñj-jjäti.
12 Utjäwijajj awatirinakan carpapjam allthapitawa, aparapjjarakituwa.+
Kunjamtï telaramp trabajir jaqejj sawuñ tukuyasajj uk llawthapkejja,ukhamaw nayajj jakañ vidajar llawthapta.
Sawut isin hilonakaparjamaw jupajj khuchuritu.
Qhantatit chʼamakthapkamaw jumajj nayar tukjaskistajja.+
13 Qhepärmanthi alwakamajja sumak jikjjatasiñatakiw nayajj chʼamachasta.
Mä leonar uñtataw jupajj taqpach chʼakhanakaj pʼakiraskakitu.
Qhantatit chʼamakthapkamaw jumajj nayar tukjaskistajja.+
14 Vencejo sat jamachʼjama, jan ukajj tordo* sat jamachʼjamaw nayajj chhiweqeskta,+mä palomjamaw nayajj ayqoskarakta.+
Alto toqer wal uñchʼukkäwejja nayranakajajj qaritawa:+
‘Jehová Dios Tata, nayajj wali llakitätwa.
¡Yanaptʼakitaya!’.+
15 ¿Nayajj kamsarakiriststi?
Jupajj nayarojj parlituwa, ukatsti jupajj lurarakiwa.
Taqpach maranakajanjja humilde chuymampiw sarnaqäjja,wal tʼaqesitaj layku.
16 ‘Jehová Dios Tata, jumïpanwa* taqe jaqenakajj jakasipki,jumïpanwa espiritujajj jakaskaraki.
Jumaw nayar qolltʼasitäta, jumaw jakayarakitäta.+
17 Sumaki jikjjatasiñat sipansa wali llakitäyätwa,ukampis nayar munasitam laykojja,jiwañan pʼiyapatwa salvistajja.+
Taqe juchanakajsa qhepäjjamaruw jaqttajja.*+
18 Kuna laykutejj Sepulturajj* janiw jumarojj jachʼañchkiristamti,+jiwañajj janiw jachʼar aptkiristamti.+
Khitinakatï sepulturar saraqapki ukanakajja jan jaytjasir Diosätamjja janiw suytʼapkaspati.+
19 Jakasipki ukanakakiw jumarojj jachʼañchapjjeristamjja,kunjamtï nayajj aka urun lurkirista ukhama.
Mä awkejja jan jaytjasir Diosätamwa wawanakaparojj yatiyaspa.+
20 Jehová Dios Tata, salvakitaya,nayan cancionanakaj-jja cuerdanakan instrumentonakampiw nanakajj tukapjjäjja,+Jehová Dios Tata, taqe jakañ urunakajanjja juman utamanwa tukapjjäjja’”.+
21 Ukatjja Isaiasajj akham sänwa: “Chʼajjsut waña higosanak apanipjjam, ukatjja llagapar* apjjatapjjam, ukhamat Ezequiasajj waliptjjañapataki”+ sasa.
22 Ukatsti Ezequiasajj akham sasaw jisktʼatayna: “Jehová Diosan utapar makatañajatakejj ¿kawkïris señalajja?”+ sasa.
Notanaka
^ Hebreo arunjja, “urunakamarojj”.
^ Inas uka gradanakajj kuna horasa uk yatiñatakïchïna, chʼiwi uñtasaw kuna horas uk yatipjjerïpachäna.
^ “Jah” sutejja, Jehová Diosan jiskʼaptayat sutipawa.
^ Ukajja, “grulla” sasaw jaqokipasirakispa.
^ “Jumïpanwa” sasinjja, Diosan arsutanakapata luratanakapatwa parlaski.
^ Jan ukajja, “Taqe juchanakajsa juma nayraqatatwa chhaqtaytajja”.
^ Jan ukajja, “ulcerapar”. Ukajja llejjtir uñtasitawa.
