Isaías 49:1-26
49 Islanaka, istʼapjjeta,jaya cheqanakankir markanaka, wali amuyumpi istʼapjjam,+Jehová Diosajj janïr nayajj naskayäta* ukhatpachwa jawsjjetäna.+
Mamajan purakapankaskayäta ukhatpachwa jupajj sutij aytäna.
2 Jupasti afiltʼat espadjamaw lakajarojj tukuyi,amparapan chʼiwiparuw imantitu.+
Afiltʼat mä flecharuw tukuyitu,flecha uchañ bolsaparuw jupajj imantitu.
3 Jupajj akham situwa: “Israel, jumajj nayan servirijätawa,+juma taypiw kʼajkirïtaj uñachtʼayäjja”+ sasa.
4 Ukampis nayajj akham sistwa: “Inamayakiw wali chʼam tukus trabajta.
Kunatï jan utjki uka laykojj inamayakiw nayajj chʼam tukta.
Cheqpachansa nayar juzgkitu ukajj Jehová Diosawa,*pagojajj nayan Diosajatwa juti”+ sasa.
5 Jichhasti khititï serviripjam mamajan purakapatpach lurkitu uka Jehová Diosajja,Jacobur jupan ukar wasitat irpaniñajatakiw mayitu,ukhamat Israelajj jupamp tantachasiñapataki.+
Jehová Dios nayraqatanjja nayajj jachʼañchatäyäwa,Diosajasti nayan chʼamajaruw tukurakini.
6 Jupasti akham sarakiwa: “Jumajj nayan servirijätawa,ukampis janiw Jacobun tribunakapar saytʼayañatakik servirijäktati,janirakiw Israel markat jakasipki* ukanakar kuttʼayañatakik servirijäktati.
Jan ukasti markanakan qhanapjamaw jumarojj churaraksma,+ukhamat salvacionajajj oraq tukuykam puriñapataki”+ sasa.
7 Israelan Salviripäki,* Santo Diosapäki+ uka Jehová Diosajja, khititï jiskʼachatäki,+ markajj ajjtaskaraki, gobernantenakan serviripäkaraki ukarojj akham siwa:
“Reyinakajj uñjapjjaniwa, sartasipjjarakiniwa,principenakajj altʼasipjjaniwa,jan apanukusir Jehová Dios layku,+jumar ajllisktam uka Israelan Santo Diosap layku”+ sasa.
8 Jehová Diosajj akham siwa:
“Nayajj suma tiemponwa jayssma,+salvasiñ urunwa yanaptʼaraksma,+nayajj jumar jarkʼaqaskakiyäsmawa, ukhamat jumarojj markatak mä pactorjam churañataki,+ukhamat oraqer wasitat sumar tukuyañataki,ukhamarak jupanakajj jaytanukut herencianakap katuntapjjañapataki,+
9 ukhamat preso katuntat jaqenakarojj ‘¡mistupjjam!’+ sañataki,chʼamakankapki ukanakarojj+ ‘¡uñstapjjam!’ sañataki.
Jumanakajja manqʼañanakwa thaki jakʼanakan jikjjatapjjäta,sarnaqatäki taqe uka thaki jakʼanakanjja pastonakanïpjjätawa.
10 Janiw jupanakajj manqʼat awtjayasipkaniti ni umatsa pharjayasipkaniti,*+janirakiw nakhantir calorasa ni lupis jupanakar nakhantkaniti.+
Kuna laykutejj khititï jupanakat khuyaptʼayaski ukaw jupanakarojj irpani,+uma jalsunakajj utjki uka cheqanaknamaw jupanakar irpani.+
11 Taqpach qollunakajarojj mä thakiruw tukuyäjja,jachʼa thakinakajasti uka cheqankir oraqet sipansa jukʼamp altonkapjjaniwa.+
12 Ukanakasti wali jayatwa jutapjje,+ukanakajj alay toqempita* inti jalanta toqempitwa jutapjje,ukanakajja Sinim markatwa jutapjjaraki”.+
13 Alajjpachanaka, kusisiñat arnaqasipjjam, oraqe, jumajj kusisirakim.+
Qollunakajj kusisipjjpan, kusisiñat arnaqasipjjarakpan.+
Kuna laykutejj Jehová Diosaw markapar chuymachtʼi,+llakitanakaparojj jupaw khuyaptʼayaraki.+
14 Ukampis Sionajj akham saskakïnwa:
“Jehová Diosajj apanukjjetuwa,+ Jehová Diosajj nayat armasjjetuwa”+ sasa.
15 ¿Mä warmejj ñuñuskir wawapat armasispati?
¿Purakapankkäna uka yoqall wawat janit sinttʼaskaspa?
Mä warmejj wawapat armaskchinisa, janipuniw nayajj jumat armaskiristti.+
16 Juman sutimjja amparanakajaruw nayajj qellqantta.
Murallanakamajj naya nayraqatankapuniwa.
17 Yoqall wawanakamajj ratukiw kuttʼanipjje.
Khitinakatï jumar allthapipkayätam, qʼal tʼunjapkarakiyätam ukanakajj jumat jitheqtjjapjjaniwa.
18 Uñtam, juma muytpachar uñtarakim.
Taqe jupanakajj tantachtʼasisipkiwa.+
Juman ukaruw jutapjjaraki.
Jehová Diosajj akham siwa: “Kunjamtï nayajj cheqpachapuni jakkir Diosätjja,adornonakäkaspas ukhamwa taqe jupanakampejj isthapisïta,mä casarasir tawaqjamaw jupanakampejj kʼachachtʼasïta.
19 Lugaranakamajj qʼala tukjata, jan jaqeni, oraqemas laqayar tukuyata ukhamas uñjaskchïnjja,+jichhajj ukan jakapkani ukanakatakejj wali jiskʼakëjjaniwa.+
Khitinakatï tukjapkayätam+ ukanakajj wali jayankjjapjjaniwa.+
20 Wawanakamajj jiwapkäna uka qhepat nasir wawanakajj akham sapjjätamwa:
‘Nanakatakejj aka lugarajj sinti jiskʼakiwa.
Akan jakapjjañajatakejj campo churapjjeta’+ sasa.
21 Chuymaman akham sarakïtawa:
‘Wawanakajajj jiwarjjapjjewa, nayas janiw wawanïñ puedjjti,yaqha markar apata, preso apata ukhamätwa,ukhamajj ¿nayajj katoqkta uka wawanakajj khitinkarakisti?
¿Khitirak jupanakar uywisti?+
Nayajj sapakëjjayätwa,+¿kawkitarak aka wawanakajj uñstjjesti?’+ sasa”.
22 Taqe Kunjjar Munañani Jehová Dios Tatitojj akham siwa:
“Markanakatakejj amparajwa nayajj loqtäjja,markanakatakejj señalajwa* aytarakëjja.+
Yoqall wawanakamarojj ichjjarusaw jupanakajj apanipjjani,imill wawanakamarojj kallachjjaruw apapjjarakini.+
23 Reyinakaw jumar cuidapjjätam,+princesanakapajj juman wawa uywirimäniwa.
Jupanakajj oraqer puriñkamaw juma nayraqatan altʼasipjjani,+kayuman laqʼa polvopwa jallqʼapjjani,+nayajj Jehová Diosätaj-jja jumajj yatiñamawa,khitinakatï nayar suytʼapkitu ukanakajja, janiw phenqʼachat uñjasipkaniti”+ sasa.
24 ¿Wali chʼamani mä jaqerojj presonakap aparatäspati?
¿Tʼaqesiyir jaqen presonakapajj salvatäpjjaspati?
25 Jehová Diosajj akham siwa:
“Wali chʼamani jaqen presonakapas aparatäniwa,+tʼaqesiyir jaqen presonakapas salvatäpjjaniwa.+
Khitinakatï juma contra saytʼasipki ukanak contraw nayajj saytʼasëjja,+yoqall wawanakamarus salvarakïwa.
26 Khitinakatï jumar tʼaqesiyapktam ukanakarojj pachpa aychapwa manqʼasiyäjja,mojjsa vinökaspas ukhamwa pachpa wilapampejj machantasipjjani.
Taqe jaqenakaw nayan Jehová Diosätaj yatipjjañapa,+nayaw juman Salvirimätjja,+ nayaw juman Mayamp Alasirimätjja,+Jacobun Wali Chʼamani Diosaparakïtwa,+ uksa yatipjjañaparakiwa” sasa.
Notanaka
^ Hebreo arunjja, “mamajan purakapankaskayäta”.
^ Jan ukajja, “Jehová Diosaw cheqaparjam uñjitani”.
^ Jan ukajja, “jiltʼasipki”.
^ Hebreo arunjja, “Mayamp Aliripäki”.
^ Variante: “wañjayasipkaniti”.
^ Jan ukajja, “norte toqempita”.
^ Jan ukajja, “mä poste señaljam”.
