Isaías 6:1-13
6 Uzías reyejj jiwjjäna uka maranjja,+ Jehová Diosaruw nayajj jachʼa ukhamarak alto tronon qontʼat uñjta,+ uchtʼasitäkäna uka largo isipasti temploruw phoqantäna.
2 Jupa muytpachanjja serafín* angelanakaw saytʼatäsipkäna, sapa maynejj sojjta chheqanakanïpjjänwa. Sapa mayniw pä chheqanakampejj ajanup imtʼasipjjäna, pä chheqanakampisti kayunakapwa imtʼasipjjäna, pä chheqanakampejj jalnaqapjjarakïnwa.
3 Uka angelanakajj jupanakkamaw jachʼat akham sasipjjäna:
“Ejercitonakan Jehová Diosapajja santo, santo, santo Diosawa.+
Taqe oraqpachajj jachʼa chʼamapampi phoqantatawa” sasa.
4 Arnaqasitanakap laykojja punkunakan bisagranakapajj khatatipjjänwa, utas jewqʼe phoqakirakïnwa.+
5 Ukatjja nayajj akham sayätwa: “¡Ay nayat kunakïkani!
¡Jichhajj cheqpachapuniw jiwäjja,kuna laykutejj nayajj jucharar jaqëtwa, kunatï jan qʼomäki ukwa parlarakta,kunatï jan qʼomäki uk parlir marka taypinwa jakarakta,+nayranakajajj Reyiruw uñjapjje, ejercitonakan pachpa Jehová Diosaparuw uñjapjje!” sasa.
6 Ukatsti serafín angelanakat mayniw nayan ukar jutäna, amparapanjja mä nina sankʼaw utjäna,+ ukjja altaratwa tenazanakamp apanitayna.+
7 Jupajj lakajatwa llamktʼitäna, akham sarakïnwa:
“¡Uñtam! Aka nina sankʼampiw nayajj lakamat llamktʼsma.
Juchamajj chhaqtayatäjjewa,juchanakamjja Diosajj perdonjjewa” sasa.
8 Ukatjja Jehová Diosan arupwa nayajj istʼayäta, jupajj akham sänwa: “¿Khitirus nayajj khitäjja, khitis jiwas lanti sarani?”+ sasa. Nayasti akham sarakiyätwa: “¡Nayajj akankasktwa! ¡Nayar khitita!”+ sasa.
9 Jupasti akham sarakïnwa: “Saram, uka markar akham sanim:
‘Jumanakajj kutin kutiniw istʼapjjäta,ukampis janiw entiendipkätati.
Jumanakajj kutin kutiniw uñjapjjäta,ukampis janiw kuna yatiñsa jikjjatapkätati’+ sasa.
10 Aka markarojj qala chuymanir tukuyam,+jiñchunakapsa llupantam,+nayranakapsa jistʼantam,ukhamat nayranakapamp jan uñjapjjañapataki,janirak jiñchunakapamp istʼapjjañapataki,ukhamat chuymanakapajj jan amuyapjjañapataki,janirak nayan ukar kuttʼanisinsa qollatäpjjañapataki”+ sasa.
11 Ukatjja nayajj akham sayätwa: “Jehová Dios Tata, ¿ukajj kunapachkamarakïnisti?” sasa. Jupasti akham sarakitänwa:
“Markanakajj qʼala tukjatäpjjañapkama, jan jaqeni laqayar tukuyatäpjjañapkama,utanakas jan jaqeni quedasipjjañapkama,oraqes qʼala tukjata chʼusaki uñjasiñapkama,+
12 Jehová Diosajj jaqenakar jayar apañapkama,+oraqet jilapartejj wasarar tukuñapkama.
13 Ukampis Israel markanjja sapa tunkat mayniw jiltʼani, ukatjja wasitatwa markajj phichantatäni. Israel markajj mä jachʼa qoqar* uñtasitäniwa, mä jachʼa roble qoqar uñtasitäniwa, kunapachatï qoqajj khuchoqatäjje ukhajja jiskʼa troncopakiw jiltʼjje, khuchoqat uka jiskʼa troncojja mä santo jathäniwa” sasa.
