Isaías 27:1-13
27 Uka urunjja, Jehová Diosajj wali ari, jachʼa ukhamarak chʼollqhe espadapampiw+Leviatanarojj* castigani, mä arunjja qatatnaqtir asirurojj* castigani,Leviatanaruw castigani, linkʼu linkʼu sarir asiruruw castigani,jupajj lamar qotankir jachʼa animalaruw jiwayani.
2 Uka urunjja, akham sasin jupar* cantapjjam:
“¡Walja vino churir uvas yapu!+
3 Naya Jehová Diosaw jupar jarkʼaqta.+
Sapa kutiw nayajj umamp regarakta.+
Uruy arumaw jarkʼaqta,ukhamat jan khitis jupar jan wal lurañapataki.+
4 Janiw nayajj coleratäkti.+
¿Khitis mä nuwasïwin chʼapinakampi jan wali qoranakampejj nayamp nuwasini?
Nayasti ukanak qʼal taksöjja, ninampiw qʼal phichkatarakëjja.
5 Antisas uka jaqejj imantasiñ lugarajar imantaspan.
Nayamp sumankthappan,sumankthappan nayampejja” sasa.
6 Jutkani uka urunakanjja, Jacobojj saphintaniwa,Israelajj panqaraniwa, machaq ramanakanirakïniwa,+aka oraqerojj achunakampiw jupanakajj phoqantapjjarakini.+
7 ¿Jupan ukham jan wali castigatäñapajj wakisiti?
¿Kunatarak jupajj ukham jiwayatäñapäspasti?
8 Jupar alisnukkäta ukhajja, sustjaskañ arnaqasisaw jupampejj quejar mantäta.
Phustʼatamampiw jupar alisnuküta, wali chʼamampi phustʼatamajj inti jalsu toqet phustʼanir thayar uñtasitäniwa.+
9 Ukhamatwa Jacobun pantjasitapajj perdonatäni,+kunapachatï juchapajj apaqatäjjani ukhajj akaw pasani:
jupajj altarankir taqpach qalanakapjjatizar uñtataw qʼal ñutʼjani,janiw ni mä sagrado postesa ni incienso loqtañatak mä altaras utj-jjaniti.+
10 Jachʼa perqanakampi muyuntat markajja chʼusakëjjaniwa,pastonakani oraqenakas chʼusakëjjaniwa, wasarar uñtasit chʼusa apanukutäjjaniwa.+
Ukanwa torillojj pasto manqʼasini, jiptʼasirakini,qoqanakan* ramanakapsa manqʼarakini.+
11 Kunapachatï jiskʼa ramanakapajj wañsjjani ukhajja,warminakaw jutasin jikʼirapjjani,ukanakampiw nina naktayapjjarakini.
Aka markajj jan amuytʼasir markawa.+
Ukatwa jupanakan Luriripajj jupanakat jan khuyaptʼayaskaniti,khititï jupanakar lurki ukajja janiw jupanakat sinttʼaskaniti.+
12 Israel marka,+ kunjamtï maynejj mä qoqat* achunak apaqasin mayat mayat apthapkejja, ukhamarakiw Jehová Diosajj jumanakarojj jawirat* qalltasin Egipto markan wali chʼamamp jalir jawirapkam apthapipjjätam.+
13 Uka urunjja, mä jachʼa pututuw tuktʼasini,+ Asiria oraqen jiwañampïsipki ukanakasa+ Egipto oraqen aywitatatäpki ukanakasa+ jutasinwa Jehová Dios nayraqatan altʼasipjjani, Jerusalén markankir sagrado qollunwa altʼasipjjani.+
Notanaka
^ Jan ukajja, “katarirojj”.
^ “Jupar” sasinjja, inas Israel markat parlaskchi, Israel markajj uvas yapur uñtasitawa.
^ Jan ukajja, “arbolanakan”.
^ Jan ukajja, “arbolat”.
^ Ukajja, Éufrates jawiratwa parlaski.
