Isaías 22:1-25
22 Aka arunakajja Visionanak Uñjañatak Vallet* parlir arunakawa:+
¿kunatsa jumanakajj terrazanak patjjar* makatapjjta?
2 Markamajj chʼajjwañanakampi phoqantatänwa,wali ojjori* markayätawa, jachʼa jachʼa tukuri markayätawa.
Jiwapkäna uka jaqenakamajja janiw espadamp jiwayatäpkänti,janirakiw nuwasïwinsa jiwapkänti.+
3 Taqe jan wali pʼeqtʼirinakamajj juntukiw escapapjjäna.+
Flechtʼañ arco jan aptasakiw jupanakarojj preso apasjjapjjäna.
Taqe khitinakarutï katjapkäna ukanakarojj preso apasjjapjjäna,+wali jayarus escapapkchïnjja preso apasjjapjjäna.
4 Ukatwa nayajj akham sista: “Jan nayar uñchʼukipjjestati,nayajj walpun jachäjja.+
Markajan phuchapajj tukjat uñjasitapatjan chuymachapjjestati.+
5 Visionanak Uñjañatak Vallenjjajan kamachtʼasiñjam uruwa, atipjatäña ukhamarak wali ajjsarañ uruwa,+uka urojja Taqe Kunjjar Munañani Tatituta, mä arunjja ejercitonakan Jehová Diosapatwa juti.
Murallanakajj allthaptaskiwa,+jaqenakajj qollu toqer uñtataw yanap mayiñatak arnaqasipjje.
6 Elam+ markajja flechanak uchañ bolsa apti,carronakat sarir chachanakampi caballonakat sarir chachanakampiw jutaski,Quir+ sat markajja escudo wakichtʼaraki.
7 Wali suma vallenakamajja,guerran nuwasiñatak carronakampi phoqantatäniwa,caballonakajj* punkunwa sayarapjjani,
8 kunatï Judá markar jarkʼaqkäna ukajja apaqatäniwa.
”Uka urunjja, jumajj guerran nuwasiñatak armanakajj imatäki uka Bosquenkir Utaruw uñtäta,+
9 Davidan Markapan perqanakapanjja jumanakajj walja pʼiyanakwa uñjapjjäta.+ Aynach toqenkir estanqueruw uma imapjjarakïta.+
10 Jerusalén markankir utanak jaktʼasasti, murallanak reforzañatakiw uka utanak allthapipjjäta.
11 Uka pä murallanak taypirojja nayra estanquen umapatakejj mä depósito lurapjjäta, ukampis janiw jumanakajj Jachʼa Luririparojj uñtapkätati, khititï nayra tiempon uk lurkäna ukarojja janiw uñtapkätati.
12 Uka urunjja, Taqe Kunjjar Munañani Tatitojja, mä arunjja ejercitonakan Jehová Diosapajjajachañataki, llakisiñataki,+pʼeqe afeitasiñataki, llakisiñ isimpi* isthapisiñatakiw jawsani.
13 Ukampis uk lurañat sipansa, jumanakajj fiestankapjjtawa, kusistʼasipkaraktawa,vacanakampi ovejanakampwa kharirasipktajja,aycha manqʼasipktajja, vino umasipkaraktajja.+
‘Manqtʼasiñäni, umtʼasiñäni, qharürojj jiwjjchiñänejjaya’+ sasa”.
14 Ukatjja ejercitonakan Jehová Diosapan arupwa nayajj istʼta, akham siri: “‘Jumanakajj jiwapkäta ukapachkamajja janiw aka juchajj perdonatäkaniti’+ sasaw Taqe Kunjjar Munañani Tatitojja, mä arunjja ejercitonakan Jehová Diosapajj arsu”.
15 Taqe Kunjjar Munañani Tatitojja, mä arunjja ejercitonakan Jehová Diosapajj akham siwa: “Sebná+ sat mayordomon ukar saram, jupaw utat* encargatajja, juparojj akham sañamawa:
16 ‘¿Kuna derechompis jumajj akan mä sepultura lurasta?’ sasa. Jupajj alto lugaranwa sepulturap lurasiski, mä jachʼa qarqaruw* jupajj mä sepultura* lurasiski.
17 ‘Jehová Diosajj wali chʼamampiw katthapïtam, jan sinttʼasisaw wali chʼamamp aynachar jaqtarakïtam.
18 Jupajj wali chʼamampiw rollthapïtam, mä pelotar uñtataw wali jachʼa oraqer jaqtʼarakïtam, ukanwa jumajj jiwäta, wali suma carronakamas ukanwa tukusini, patronaman utapatakis mä phenqʼa.
19 Ukatjja nayajj puestomatwa apaqäma, cargomatsa alisnukurakïmawa.
20 ”’Uka urunjja, nayajj Eliaquim+ servirijaruw jawsäjja, mä arunjja Hilquías chachan yoqaparuw jawsäjja,
21 kayukam purir isimampiw juparojj isthapiyäjja, usktʼasitäskta uka wakʼampiw sum wakʼantayarakëjja,+ juman utjktam uka autoridadjja jupan amparaparuw katuyäjja. Jerusalén markan jakirinakatakisa, Judá markankirinakatakisa jupajj mä awkjamäniwa.
22 Davidan utapan llavepjja Eliaquim chachan kallachipjjaruw usköjja.+ Jupaw llawirani, janiw khitis llawintkaniti, jupaw llawintani janiw khitis llawirkaniti.
23 Mä clavor uñtatwa juparojj mä chʼollqhe perqar leqʼentäjja, awkipan utapatakis mä jachʼañchkañ tronor uñtasitarakïniwa.
24 Ukatjja awkipan utapan taqpach jachʼañchäwipajj jupjjar warktʼatäniwa, jutïr wawanakasa, chʼichtanir alinakasa,* taqpach jiskʼa pʼujru* platonakasa, pʼujru platonakasa, jachʼa wakullanakasa jupjjar warktʼatäpjjaniwa.
25 ”’Ejercitonakan Jehová Diosapajj akham siwa, uka urunjja, chʼollqhe perqar leqʼentatäkäna uka clavojja apsutäniwa,+ khuchoqatäniwa, jalaqtarakiniwa, kunatï uka clavor warktʼatäkäna ukajja qʼala tʼunjatäniwa, kuna laykutejj Jehová Dios pachpaw ukham arsu’”.
Notanaka
^ Jan ukajja, “utanak patjjar”.
^ Amuyatajja, Jerusalenatwa parlaski.
^ Variante: “chʼajjwiri”.
^ Jan ukajja, “caballjjat sarir jaqenakajj”.
^ “Llakisiñ isi” siski uk glosarion liytʼäta.
^ Jan ukajja, “palaciot”.
^ Variante: “jaqheruw”.
^ Hebreo arunjja, “mä utjäwi”.
^ Jan ukajja, “wawanakasa”.
^ Jan ukajja, “hondo”.
