U-Amy, * oneminyaka engu-17 uthi: “Uma othile ekunikeza iseluleko, ngokuyinhloko lowo muntu usuke ekutshela ukuthi kukhona ongakwenzi kahle. Kanti akekho umuntu engimaziyo oyaye athi, ‘Mina ngiyakuthanda ukutshelwa ukuthi kukhona engingakwenzi kahle!’ ”

Ingabe ukuthola kunzima ukwamukela iseluleko sabazali bakho, othisha nabanye abantu abadala? Uma kunjalo, lesi sihloko sizokusiza.

Wonke umuntu uyasidinga iseluleko.

“Sonke siyakhubeka izikhathi eziningi.”—Jakobe 3:2.

UJessica uthi: “Asikho isidingo sokuba namahloni lapho welulekwa ngoba wenze into engafanele.”

Ukwelulekwa akusho ukuthi uyisehluleki.

“UJehova * uyamsola lowo amthandayo, njengoba nje nobaba eyisola indodana ayijabulelayo.”—IzAga 3:12.

UTamara uthi: “Lapho abantu bengeluleka, ngizama ukucabanga ukuthi kumelwe ukuba kunzima kangakanani ukwenza lokhu nokuthi kuwuthando kangakanani ngabo ukungicebisa.”

Iseluleko singakusiza ube ngumuntu ongcono.

“Lalelani isiyalo nihlakaniphe.”—IzAga 8:33.

UDeanne uthi: “Iseluleko sibalulekile ukuze ukhule. Sikwenza uqonde indlela abanye abakubheka ngayo futhi sikusize ulwe nemikhuba engemihle okungenzeka awazi nokwazi ukuthi usunayo.”

Yiba nombono omuhle ngeseluleko. Ungase uthukuthele lapho welulekwa. Kodwa zama ukuyigwema leyo mizwa. Ukuze sikusize wenze lokho, ake sithi akuwena onikezwa iseluleko kodwa nguwe onikeza omunye umuntu iseluleko ngento efanayo—mhlawumbe ingane yakini. Ingabe manje kukhona okuhle okubonayo ngeseluleko? Manje phinde ubheke iseluleko osinikezwayo bese uzama ukusibheka ngendlela efanayo nosibheke ngayo ngenhla.—Isimiso seBhayibheli: UmShumayeli 7:9.

UTheresa uthi: “Ngesinye isikhathi ungase uthukuthele kakhulu uma ugxekwa uze ukhohlwe ukuthi lo muntu ubezama ukukusiza ukuze ube ngumuntu ongcono, ubengaqondile ukukuzwisa ubuhlungu.”

Hlala uthobekile. Ungavumeli ukuqhosha kukwenze wenqabe iseluleko. Ngakolunye uhlangothi, ungazivumeli ukuba udumale ngokweqile ngenxa yokuthi kunokuthile okufanele ukuthuthukise. Ukuthobeka kuyokusiza ukuba ungaweli kulezi zinhlangothi ezimbili. Khumbula: Iseluleko esikuzwisa ubuhlungu kakhulu kungase kube yiso osidinga nakakhulu. Uma, ngesizathu esithile, wenqaba iseluleko uyolahlekelwa ithuba elibalulekile lokukhula.—Isimiso seBhayibheli: IzAga 16:18.

ULena uthi: “Ukwamukela iseluleko kuyingxenye ebalulekile ukuze ube umuntu omdala ovuthiwe. Uma singazijwayezi ukusamukela futhi sisivumele sisiqeqeshe, yithina esiyolimala ekugcineni.”

Bonga. Ngisho noma ukuthola kunzima ukwamukela iseluleko, kungani ungambongi umuntu okwelulekayo? Ngokungangabazeki, lowo muntu ukukhathalela ngokujulile futhi ufuna ngempela ukuba uphumelele. —Isimiso seBhayibheli: IHubo 141:5.

UCarla uthi: “Awusoze wenza iphutha ngokuthi ‘Ngiyabonga,’ ikakhulukazi uma kunesidingo sokuba welulekwe. Ngisho noma besingadingeki, ungazithoba futhi ubonge ngomzamo walowo muntu wokukhuluma nawe.”