Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Ne a Mea e Akoako ‵Tonu Mai i te Tusi Tapu?

 MATAUPU E VALU

Se a te Malo o te Atua?

Se a te Malo o te Atua?
  • Ne a mea e akoako mai i te Tusi Tapu e uiga ki te Malo o te Atua?

  • Ne a mea ka fai ne te Malo o te Atua?

  • Ka fakataunu māfea ne te Malo a te loto o te Atua i te lalolagi nei?

1. Se a te ‵talo takutakua telā ka onoono nei tatou ki ei?

E MASANI ‵lei eiloa te fia miliona o tino i te lalolagi kātoa mo te ‵talo telā e taku sāle ko te ‵Talo a te Aliki. E fakasino eiloa te tugāpati tenei ki te ‵talo takutakua telā ne fai atu ne Iesu e pelā me se ‵talo fakaakoako. E uke ‵ki a manatu tāua i te ‵talo tenā. Kae kafai e mafau‵fau faka‵lei tatou ki fakamolemole e tolu i te kamataga o te ‵talo tenā, ka fesoasoani mai i ei ke iloa ‵lei ne tatou a mea e uke kolā e akoako ‵tonu mai i te Tusi Tapu.

2. Ne a mea e tolu kolā ne fakaakoako ne Iesu ana soko ke ‵talo atu ki ei?

2 I te kamataga o te ‵talo fakaakoako tenei, ne fakatonu atu a Iesu ki ana tino fakalogo‵logo: “Tela la, ke ‵talo koutou penei: ‘Te motou Tamana telā i te lagi: ke tapu tou igoa, ke oko mai tou Malo, ke fai te mea e loto koe ki ei i lalo nei, e pelā mo te faiga i te lagi.’” (Mataio 6:9-13) Se a te uiga o fakamolemole e tolu konei?

3. Ne a mea e ‵tau o iloa ne tatou e uiga ki te Malo o te Atua?

3 Ko oti ne iloa ne tatou a mea e uke e uiga ki te igoa o te Atua, ko Ieova. Kae ko tai uke foki a mea ne sau‵tala tatou ki ei e uiga ki te loto o te Atua—ko mea ko oti ne fai ne ia mo mea kolā ka fai ne ia mō tino. Se a la te mea ne fakasino atu ki ei a Iesu i te taimi ne fai mai ei a ia ke ‵talo atu, penei: “Ke oko mai tou Malo”? Se a te Malo o te Atua? Ka faka‵malu pefea  te igoa o te Atua māfai ko oko mai te Malo tenā? Kae e aofia pefea te faiga o te loto o te Atua i te taimi e oko mai ei te Malo tenā?

SE A TE MALO O TE ATUA?

4. Se a te Malo o te Atua, kae ko oi te Tupu i ei?

4 A te Malo o te Atua se pulega telā ne fakatu aka ne Ieova te Atua mo te Tupu ne filifili foki eiloa ne ia. Ko oi te Tupu i te Malo o te Atua? Ko Iesu Keliso. E sili fakafia atu a Iesu e pelā me ko te Tupu i tino pule katoa kae e fakaigoa foki a ia ki “te Tupu o tupu mo te Aliki o aliki.” (1 Timoteo 6:15) E maua ne ia te ‵mana ke fai ne ia a mea e sili atu i te ‵lei i lō so se tino pule, ke oko eiloa ki te ‵toe tino ‵lei i a latou.

5. Ka pule mai fea te Malo o te Atua, kae se a te mea ka pule mai ki ei?

5 Ka pule mai fea te Malo o te Atua? Ia, tefea nei Iesu? Kāti e masaua ne koe me ne tamate a ia i luga i te sataulo fakasauā, kae ne toe fakatu aka foki mai te mate. Mai tua malie ifo i ei, ne fanaka ei a ia ki te lagi. (Galuega 2:33) Tenā eiloa te koga e pule mai i ei te Malo o te Atua—i te lagi. Tenā foki eiloa te pogai e taku ei ne te Tusi Tapu te mea tenā ko te “Malo faka te lagi.” (2 Timoteo 4:18) E tiga eiloa e tu te Malo o te Atua i te lagi, ka pule mai te Malo tenā ki te lalolagi kātoa.—Faitau te Fakaasiga 11:15.

6, 7. Ne a mea e fai ei a Iesu mo fai se Tupu telā e tu ‵kese?

6 Ne a mea e fai ei a Iesu mo fai se Tupu telā e tu ‵kese? E tasi te pogai, me ka se toe mate eiloa a ia. I te fakatusatusaga o Iesu ki tupu i te lalolagi nei, e taku ne te Tusi Tapu a ia ki se tino telā “e se oko foki te mate ki tona foitino; kae nofo foki i te mainaga telā e se mafai o oko ki ei se tino.” (1 Timoteo 6:16) Ko tena uiga, ka tumau a mea ‵lei katoa e fai ne ia. Kae ka fai foki ne ia a toe mea aogā kae ‵lei mō tino.

7 Mafaufau la ki te valoaga i te Tusi Tapu e uiga ki a Iesu: “A te agaga o te Aliki ka aumai ne ia ki a ia a te poto, te atamai mo te apo i te pulepulega o ona tino. Ka iloa ne ia te loto o te Aliki, kae ka fakaaloalo foki ki ei, kae fiafia o fakalogo ki a ia.  E se fakamasino ne ia a tino i olotou foliga io me ko muna faipati a latou; ka fakamasino ne ia a tino ma‵tiva mo te ‵tonu katoatoa, kae puipui foki ne ia te saolotoga o tino fakaa‵lofa.” (Isaia 11:2-4) E fakaasi mai ne pati konā me ka fai a Iesu mo fai se Tupu amiotonu kae alofa telā e pule atu ki tino i te lalolagi. E mata, e fiafia koe ke maua se vaegā pule penā?

8. Ko oi ka pule fakatasi mo Iesu?

8 Tenei te suā munatonu e uiga ki te Malo o te Atua: Ka se pule tokotasi mai fua a Iesu. Ka isi ne tino kolā ka pule fakatasi mai mo ia. E pelā mo pati a te apositolo ko Paulo ki a Timoteo, penei: “Kafai e kufaki tatou, ka pule tatou fakatasi mo ia.” (2 Timoteo 2:12) E tonu, a Paulo, Timoteo, mo nisi tino fakamaoni kolā ko oti ne filifili ne te Atua, ka pule fakatasi mo Iesu i te Malo faka-te-lagi. E tokofia ka maua ne latou te tulaga taulia tenā?

9. E tokofia ka pule fakatasi mo Iesu, kae ne kamata anafea o filifili aka ne te Atua a latou?

9 E pelā mo te mea ne fakamatala mai i te Mataupu e 7 o te tusi tenei, ne lavea atu ne te apositolo ko Ioane i se fakaasiga “a te Tamā Mamoe [ko Iesu Keliso] e tu mai i te Mauga o Siona [tena tulaga fakatupu i te lagi]; kae ‵tusa mo te toko selau fasefulu fa afe tino e ‵tu mai mo ia, kolā e tusi ei o la igoa mo tona Tamana i olotou lae.” Ko oi te toko 144,000 konā? E fai mai a Ioane ki a tatou, penei: “Ko latou konei . . . e tau‵tali eiloa i te Tamā Mamoe i so se koga e fano a ia ki ei; ko oti ne fakaolagina latou mai te tokoukega o tino, ka ko latou foki ko tino muamua e tuku atu ki te Atua mo te Tamā Mamoe.” (Fakaasiga 14:1, 4) E tonu, a latou ko soko fakamaoni o Iesu Keliso kolā ne filifili fakapito ke pule fakatasi mo ia i te lagi. Kafai ko oti ne toe faka‵tu aka latou mai te mate ki te ola i te lagi, “ka pule latou [pelā me ne tupu ki] te lalolagi” fakatasi mo Iesu. (Fakaasiga 5:10) Talu mai aso o te kau apositolo, ne filifili aka ne te Atua a Kelisiano fakamaoni ko te mea ke fakakātoa ei te aofaki ko te 144,000.

10. Kaia e fai ei te fakatokaga ke pule mai a Iesu mo te toko 144,000 ki tino mo fai se fakatokaga alofa?

 10 Se faiga alofa a te fakatokaga ke pule mai a Iesu mo te toko 144,000 ki tino. E tasi te mea tāua, e iloa ne Iesu a te olaga e pelā me se tino mo te ola i se olaga logo‵mae. Ne fai mai Paulo me i a Iesu “e ‵kau fakatasi mai ki o‵tou puapuagā, ne fakaosoosogina e pelā eiloa mo tatou, kae ne seki agasala la a ia.” (Epelu 4:15; 5:8) Ne logo‵mae foki a tino kolā ka pule fakatasi mo ia kae ne kufaki latou e pelā me ne tino i te lalolagi nei. E se gata i ei, ne fakatau‵fai latou mo olotou vāivāiga kae fe‵paki foki mo vaegā masaki kese‵kese katoa. E mautinoa eiloa, me ka malamalama latou i fakalavelave kolā e fe‵paki sāle mo tino!

NE A MEA KA FAI NE TE MALO O TE ATUA?

11. Kaia ne fai atu ei a Iesu me e ‵tau o ‵talo atu ana soko ke fai te loto o te Atua i te lagi?

11 I te taimi ne fai atu ei Iesu me e ‵tau o ‵talo atu ana soko ke na oko mai te Malo o te Atua, ne fai atu foki a ia me e ‵tau o ‵talo atu latou ke fai te loto o te Atua i “lalo nei, e pelā mo te faiga i te lagi.” E nofo atu te Atua i te lagi, kae ko oti ne fai faeloa tena loto i konā ne agelu fakamaoni. Kae ne fakamatala mai i te Mataupu e 3 o te tusi tenei, me ne ‵lave te faiga o te loto o te Atua ona ko te agelu masei e tokotasi kae ne fai foki ne ia ke agasala a Atamu mo Eva. Ka fakamatala mai i te Mataupu e 10 a mea e akoako mai i te Tusi Tapu e uiga ki te agelu masei tenei, telā ko Satani te Tiapolo. Ne talia ne te Atua a Satani mo ana agelu, te kau temoni, ke ‵nofo atu i te lagi mō se vaitaimi. Tela la, e se ko tino katoa i te lagi ne fai ne latou te loto o te Atua i te taimi tenā. Ne ‵fuli te tulaga tenā i te taimi ne kamata ei o pule mai te Malo o te Atua. Ne taua atu te Tupu fou, ko Iesu Keliso, ki a Satani.—Faitau te Fakaasiga 12:7-9.

12. Ne a mea tāua e lua ne ‵tupu, kolā e fakamatala mai i te Fakaasiga 12:10?

12 E fakamatala mai i pati fakavaloaga kolā e ‵soko mai a mea ne ‵tupu mai tua ifo i ei: “Ne lagona ne au a te leo lasi i te lagi e faipati penei: ‘Ko oti nei ne oko mai te fakaolataga  a te Atua! Ko oti foki ne fakaasi mai ne te Atua tena ‵mana faka-Tupu! Nei ko oti foki ne fakaasi ne tena Keliso tena pule. Me i te tino telā ne ‵moli ne ia o‵tou taina [ko Satani], telā e tu nei i mua o te Atua o ‵moli i te ao mo te po ke sala latou, ko oti nei ne ‵pei ifo ki lalo.’” (Fakaasiga 12:10) E mata, e lavea atu ne koe a mea tāua e lua ne ‵tupu, kolā ne fakamatala mai i te fuaiupu tenā i te Tusi Tapu? Muamua la, ne kamata o pule mai Iesu Keliso i te Malo o te Atua. Ako te lua, ne ‵pei ifo a Satani mai te lagi ki te lalolagi nei.

13. Se a te ikuga o te ‵peiifoga o Satani mai te lagi?

13 Ne a mea ne iku mai i mea e lua konā ne ‵tupu? E fai‵tau tatou penei e uiga ki mea kolā ne ‵tupu i te lagi: “Tela la, ke fiafia te lagi, pelā foki mo tino katoa e ‵nofo i ei.” (Fakaasiga 12:12) E tonu, ona ko te ‵galo atu o Satani mo ana temoni mai te lagi, ko fia‵fia i ei a agelu fakamaoni me i tino katoa i te lagi ko fakamaoni ki a Ieova te Atua. Ko maua atu foki se filemu ‵mautakitaki kae tokagamalie katoatoa i konā. Ko fai eiloa nei te loto o te Atua i te lagi.

Ko fakaalofa te lalolagi ona ko te ‵peiifoga o Satani mo ana temoni mai te lagi ki te lalolagi nei. Ko pili o fakagata atu a vaegā fakalavelave penā

14. Ne a mea ko oti ne ‵tupu ona ko te ‵peiifoga o Satani ki te lalolagi nei?

14 Kae e a te lalolagi? E fai mai te Tusi Tapu, penei: “Kae kalofa eiloa i te lalolagi mo te tai! I te Tiapolo ko oti ne fanaifo ki a koulua, ka ko oko eiloa i te kaitaua, me e iloa ne ia ko se leva ona aso i te lalolagi.” (Fakaasiga 12:12) E kaitaua a Satani ona ko tena ‵peiifoga mai te lagi mo te sē leva foki o ana aso. Ona ko tena kaitaua, ko faka‵tupu ei ne ia a fakalavelave, kae ko fakaalofa i ei te lalolagi. Ka fakamatala mai a fakalavelave konā i te suā mataupu. Kae ona ko te manatu tenā, e mafai ei o fesili ifo tatou penei, E mafai pefea o fai ne te Malo a te loto o te Atua i te lalolagi nei?

15. Se a te loto o te Atua mō te lalolagi nei?

15 Ia, masaua la te loto o te Atua mō te lalolagi nei. Ne faitau koe ki ei i te Mataupu e 3. I te fatoaga o Etena, ne fakaasi mai ne te Atua tena loto mō te lalolagi ke fai mo fai se palataiso telā e ‵fonu i tino amio‵tonu kolā e se ‵tau o ‵mate. Ne fai ne Satani ke agasala a Atamu mo Eva, kae ne pokotia i ei te  fakataunuga o te loto o te Atua mō te lalolagi. Kae ne seki ‵fuli eiloa i ei te fuafuaga a te Atua. Koi tumau eiloa te fuafuaga a te Atua e uiga ki “tino amio‵tonu [me] ka fai mo latou te fenua [“te lalolagi,” NW], kae ka ‵nofo faeloa i ei ki te se gata mai.” (Salamo 37:29) Kae ka fakataunu ne te Malo o te Atua te mea tenā. Se a te auala ka fakataunu i ei?

16, 17. Ne a mea e fakaasi mai i te Tanielu 2:44 e uiga ki te Malo o te Atua?

16 Mafaufau la ki te valoaga i te Tanielu 2:44. E fai‵tau tatou ki ei, penei: “I te taimi o takitaki konā, kae ka fakatu ne te Atua o te lagi a te malo telā ka se toe gata mai. Ka se toe mafai o takavale a te malo tenā. Ka fakatakavale ne ia a malo katoa konā, kae ka tumau ki te se gata mai.” Ne a mea e fakaasi mai ne te mea tenei e uiga ki te Malo o te Atua?

17 Muamua la, e fakaasi mai ki a tatou me ka fakatu te Malo o te Atua “i te taimi o takitaki konā,” io me ko te taimi koi pule mai i ei a nisi malo. A te lua o mea, e fakaasi mai ki a tatou me ka tumau ki te se-gata-mai a te Malo tenā. Ka se mafai o fakatakavale te Malo tenā io me e sui ne se isi malo. Ako te tolu, e lavea atu ne tatou me ka isi se taua i te va o te Malo o te Atua mo malo o te lalolagi tenei. Ka manumalo te Malo o te Atua. Fakamuli loa, ka pule atu fua te Malo o te Atua ki tino katoa. Kae ka maua i ei ne tino te ‵toe pulega ‵lei eiloa.

18. Se a te igoa o te ‵toe taua i te va o te Malo o te Atua mo malo o te lalolagi tenei?

18 E uke ‵ki eiloa a mea e fakaasi mai i te Tusi Tapu e uiga ki te ‵toe taua i te va o te Malo o te Atua mo malo o te lalolagi tenei. E pelā me se mea e tasi, e akoako mai i ei me kafai ko pili mai te gataga, ka olo atu a agaga ma‵sei o fakasalalau atu a fakamatalaga ‵loi ke fakaloiloi i ei a “tupu i te lalolagi kātoa.” Mo a la? Ke “‵luku latou [a tupu] ki te taua i te aso lasi o te Atua e o ia te Malosi Katoatoa.” Ka fakamaopoopo a tupu o te lalolagi ki te “koga telā e taku faka-Epelu ko Amaketo.” (Fakaasiga 16:14, 16) Ona ko pati i te avā fuaiupu konā, a te ‵toe taua i te va o malo o tino mo te Malo o te Atua e fakaigoa ki te taua o Amaketo.

19, 20. Ne a mea e faka‵lave aka ei te faiga o te loto o te Atua i te lalolagi i aso nei?

 19 Ne a mea ka fakataunu ne te Malo o te Atua i Amaketo? Toe mafaufau la ki te loto o te Atua mō te lalolagi. Ne fuafua ne Ieova te Atua ke faka‵fonu te lalolagi ki itukāiga o tino amio‵tonu kae ‵lei katoatoa kolā e tavini atu ki a ia i te Palataiso. Kaia ko ‵lave ei te fakataunuga o te mea tenā i aso nei? Muamua la, koi agasala tatou, e ma‵saki kae ‵mate atu foki. Kae ne fakamatala mai i te Mataupu e 5, me ne mate a Iesu mō tatou ko te mea ke mafai o ola tatou ki te se-gata-mai. Kāti e masaua ne koe a pati kolā ne tusi ki lalo i te Evagelia a Ioane: “Me ne penā eiloa o alofa mai te Atua ki te lalolagi, ne tuku mai ei ne ia tena Tama e tokotasi, ko te mea ke se malaia so se tino e fakatuanaki ki a ia, kae ke maua ne ia te ola se gata mai.”—Ioane 3:16.

20 A te suā fakalavelave, koi tokouke eiloa a tino e fai ne latou a mea ma‵sei. E pati ‵loi, e fai togafiti, kae finalalolagi latou. E se ma‵nako latou o fai te loto o te Atua. Ka fakaseai atu a tino kolā e fai ne latou a mea ma‵sei i te taua a te Atua i a Amaketo. (Faitau te Salamo 37:10) Kae ko te suā pogai e seki fai ei te loto o te Atua i te lalolagi nei me e faka‵tuka atu a malo ki tino ke se fai ne latou. E amio ma‵sei kae amio fakasauā sāle a nisi malo, kae e se ma‵losi olotou pulega. E fai ‵tonu mai te Tusi Tapu, penei: “Ka ko tino kolā e ‵nofo i se tulaga malalo, e ‵nofo puapuagā i te pulega a tino ma‵luga.”—Failauga 8:9.

21. Ka fakataunu pefea ne te Malo te loto o te Atua i te lalolagi nei?

21 Ka oti atu Amaketo, kae ka ‵nofo ei a tino mai lalo i te pulega fua e tasi, ko te Malo o te Atua. Ka fakataunu mai i ei te loto o te Atua kae ka maua foki i ei a fakamanuiaga ‵gali. E pelā me se mea e tasi, ka ave keatea i ei a Satani mo ana temoni. (Fakaasiga 20:1-3) Ka fakagalue aka ei te malosi o te taulaga a Iesu ko te mea ke se toe ma‵saki kae ‵mate a tino fakamaoni. I lō te fai penā, ka mafai o ola latou ki te se-gata-mai mai lalo i te pulega a te Malo. (Faitau te Fakaasiga 22:1-3) Ka fai te lalolagi mo fai se palataiso. Tela la, ka fakataunu ei ne te Malo  te loto o te Atua i te lalolagi nei kae ka faka‵malu foki i ei te igoa o te Atua. Se a te tena uiga? E fakauiga i ei me ka fakaaloalo atu fakamuli a tino ola katoa mai lalo i te Malo o te Atua ki te igoa o Ieova.

KA FAI MĀFEA NE TE MALO O TE ATUA A MEA KATOA KONEI?

22. Kaia e iloa ei ne tatou me ne seki oko mai te Malo o te Atua i te taimi ne nofo ei a Iesu i te lalolagi io me mai tua malie ifo o tena toetuga?

22 I te taimi ne fai atu ei a Iesu ki ana soko ke ‵talo atu penei: “Ke oko mai tou malo,” ne manino ‵lei eiloa me ne seki oko mai te Malo i te taimi tenā. E mata, ne oko mai te Malo tenā i te taimi ne fanaka ei a Iesu ki te lagi? Ikai, ona ko te mea ne fai mai a Petelu mo Paulo me mai tua o te toetuga o Iesu, ne fakataunu i ei te valoaga i te Salamo 110:1 e uiga ki a ia: “Muna a te Aliki [Ieova] ki toku aliki, te tupu, ‘Nofo i konei i toku feitu fakaatamai, ke oko ki te taimi e tuku atu ei ne au ou fili ke nofo mai lalo o ou vae.’” (Galuega 2:32-35; Epelu 10:12, 13) Ne ‵tau o faka‵tali malie aka a ia.

Mai lalo i te pulega a te Malo, ka fai eiloa te loto o te Atua i te lalolagi nei e pelā mo te faiga i te lagi

23. (a) Ne kamata anafea o pule mai te Malo o te Atua? (e) Se a te mea ka suke‵suke ki ei i te suā mataupu?

23 E pefea la te leva? Talu mai te 19 mo te 20 seniteniali, ne kamata malielie o iloa ne tino a‵koga fakamaoni i te Tusi Tapu me ne oti atu te taimi ne ‵tau o faka‵tali i ei i te 1914. (Ke maua a nisi fakamatalaga e uiga ki te taimi tenei, ke onoono ki Mataupu Fakaopoopo, i te itulau e 215-218.) A mea kolā ne ‵tupu talu mai te 1914 e fakamautinoa mai i ei me e tonu eiloa  te mainaga telā maua ne tino a‵koga fakamaoni konei i te Tusi Tapu. A te fakataunuga o valoaga i te Tusi Tapu e fakaasi mai i ei me i te 1914, ne fai ei a Keliso mo Tupu kae ne kamata foki o pule mai te Malo faka-te-lagi o te Atua. Tela la, ko ‵nofo nei tatou i te vaitaimi toetoe telā koi ‵toe mai mō Satani. (Fakaasiga 12:12; Salamo 110:2) E mafai foki o fai atu tatou mo te mautinoa me ko pili o fakataunu ne te Malo o te Atua tena loto i te lalolagi nei. E mata, e fai te mea tenei mo fai te ‵toe tala gali ki a koe? E mata, e talitonu koe me se mea tonu eiloa? Ka fesoasoani atu te suā mataupu ki a koe ke lavea atu me e akoako mai eiloa i te Tusi Tapu a mea konei.