Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Ne a Mea e Akoako ‵Tonu Mai i te Tusi Tapu?

 MATAUPU E LIMA

Te Togiola—Te ‵Toe Meaalofa Sili a te Atua

Te Togiola—Te ‵Toe Meaalofa Sili a te Atua
  • Se a te togiola?

  • Ne fai pefea te mea tenā?

  • Se a tena aogā ki a koe?

  • E mafai pefea o fakaasi atu ne koe tou loto fakafetai e uiga ki ei?

1, 2. (a) Se a te vaegā meaalofa telā e fakatāua malosi ne koe? (e) Kaia e mafai ei o fai atu me i te togiola ko te ‵toe meaalofa tafasili i te tāua e mafai o maua ne koe?

SE A te ‵toe meaalofa sili ne maua ne koe? E se fai pelā me e ‵tau faeloa o ‵togi ‵mafa se meaalofa ko te mea ke fai mo fai se meaalofa tāua. Me e se faka‵na faeloa te tāua o se meaalofa ki tupe kolā ne fakamāumāu ki ei. Kae e tāua eiloa se meaalofa māfai e fiafia koe ki ei io me e manako malosi koe ki ei.

2 Mai meaalofa katoa kolā kāti e fia maua ne koe, e tasi faeloa te meaalofa telā e tafasili i te tāua. Ko te meaalofa a te Atua ki tino katoa. Ko oti ne tuku mai ne Ieova te fia o mea ki a tatou. Kae ko tena toe meaalofa sili ki a tatou, ko te taulaga togiola a tena Tama, ko Iesu Keliso. (Faitau te Mataio 20:28) E pelā mo te mea ka lavea atu ne tatou i te mataupu tenei, a te togiola ko te ‵toe meaalofa tāua eiloa e mafai o maua ne koe, me e mafai o maua i ei a fakamanuiaga sē fuafuagina kae e fakama‵lie aka foki i ei ou manakoga tāua. A te togiola ko te ‵toe fakaasiga sili o te alofa o Ieova ki a koe.

SE A TE TOGIOLA?

3. Se a te togiola, kae se a te mea e ‵tau o maina faka‵lei tatou i ei ko te mea ke iloa ne tatou a te tāua o te meaalofa tenei?

3 E faigofie fua te tali. A te togiola ko te auala telā e fakaaogā  ne Ieova ke faka‵sao, io me ke fakaola ei a tino katoa mai te agasala mo te mate. (Efeso 1:7) Ke maina faka‵lei i te uiga tonu o te akoakoga tenei i te Tusi Tapu, e ‵tau o toe mafau‵fau tatou ki mea kolā ne ‵tupu i te fatoaga o Etena. Kafai e maina faka‵lei tatou i mea kolā ne ‵galo atu i a Atamu i te taimi ne agasala ei a ia, ka iloa ei ne tatou a te pogai e fai ei te togiola mo fai te ‵toe meaalofa tafasili i te tāua.

4. Se a te aogā o te ola ‵lei katoatoa ki a Atamu?

4 I te taimi ne faite ei a Atamu, ne tuku atu ne Ieova ki a ia se mea telā e tāua ‵ki—ko te ola ‵lei katoatoa. Mafaufau la ki te aogā o te mea tenā ki a Atamu. Ne seki ‵tau o masaki, gasolo aka o matua, io me e mate Atamu ona ko te mea ne ‵lei katoatoa tena foitino mo tena mafaufau. Ona ko te mea ne ‵lei katoatoa a ia, ne maua ei ne Atamu se fesokotakiga fakapito mo Ieova. E fai mai te Tusi Tapu me i a Atamu ko “te tama a te Atua.” (Luka 3:38) Tela la, ne maua eiloa ne Atamu se fesokotakiga ‵lei mo Ieova te Atua, e pelā mo te fesokotakiga o se tama tagata mo tena tamana alofa. Ne fesokotaki atu a Ieova ki tena tama i te lalolagi, mai te tuku atu o galuega fakafia‵fia kae ne fakailoa atu foki a mea kolā e manako a ia ke fai ne Atamu.—Kenese 1:28-30; 2:16, 17.

5. Se a te mea e fakauiga ki ei te Tusi Tapu i te faimaiga me ne faite a Atamu ki ‘foliga o te Atua’?

5 Ne faite a Atamu ke ‵pau mo ‘foliga o te Atua.’ (Kenese 1:27) E se fakauiga i ei me ne soko eiloa Atamu ki foliga ‵tonu o te Atua. E pelā mo te mea ne suke‵suke tatou ki ei i te Mataupu 1 o te tusi tenei, a Ieova se agaga sē matea. (Ioane 4:24) Tela la, e se fai te foitino o Ieova pelā mo ‵tou foitino. Ne faite Atamu ki foliga o te Atua, me ne faite a ia ke fai ana uiga pelā mo uiga o te Atua. E aofia i ei te alofa, te poto, te fakamaoni, mo te malosi. Ne fai eiloa Atamu pelā mo tena Tamana i se isi auala tāua me ne maua ne ia te saolotoga ke fai ana filifiliga. Tela la, ne seki fai Atamu pelā me se masini telā e fai fua te mea telā ko oti ne fakapolokalame ki ei. I lō te fai penā, ne mafai ne ia o fai ana filifiliga totino, e uiga ki te mea ‵lei mo  te mea masei. Moi ne filifili a ia ke fakalogo ki te Atua, penei, ne mafai eiloa o ola a ia ki te se-gata-mai i te lalolagi Palataiso.

6. I te taimi ne ‵teke atu ei Atamu ki te Atua, se a te mea ne galo atu i a ia, kae ne pokotia pefea ana tama‵liki i ei?

6 E manino ‵lei i ei, me i te taimi ne ‵teke atu ei Atamu ki te Atua kae ne fakasala a ia ki te mate, e uke ‵ki a mea ne ‵galo atu i a ia. Ne galo atu i a ia te meaalofa ko te ola ‵lei katoatoa, fakatasi mo fakamanuiaga kolā ne maua mai i ei. (Kenese 3:17-19) Se mea fakafanoanoa, me ne seki galo atu fua i a Atamu a te ola tāua tenei, kae ne galo atu foki i ana tama‵liki kolā ne fai fakamuli. E fai mai te Muna a te Atua, penei: “Ne oko mai te agasala ki te lalolagi i te tagata e tokotasi [ko Atamu], ne aumai foki ne tena agasala te mate. Tela la, ko oko ki tino katoa te mate, i te mea ko agasala a tino katoa.” (Loma 5:12) E tonu, ne maua ne tatou katoa te agasala mai i a Atamu. Tela la, e fai mai te Tusi Tapu me ne “‵togi atu” ne Atamu a ia eiloa mo ana tama‵liki ke fai mo pologa ki te agasala mo te mate. (Loma 7:14) Ko seai eiloa se fakamoemoega mō Atamu mo Eva me ne filifili laua mo te mata‵fatu ke se faka‵logo ki te Atua. Kae e a la a tama‵liki a laua, e aofia i ei tatou?

7, 8. Ne a mea tāua e lua kolā e aofia sāle i se togiola?

7 Ne fesoasoani mai a Ieova ki tino e auala i te togiola. Se a te togiola? E aofia sāle se avā mea tāua i se togiola. Muamua la, a te togiola ko te ‵togi telā e avatu ke ‵tala io me ke fakasaoloto mai i ei se tino. Kāti e tai ‵pau mo te ‵togi telā e avatu ke fakasaoloto ei se pagota i taimi o taua. A te lua o mea tāua, e ‵tau o fetaui ‵lei te togiola mo te mea telā e ‵tau o ‵togi. E tai ‵pau mo te ‵togi telā e avatu ke fetaui mo fakamaseiga mo pa‵kiaga kolā ne ‵tupu. E fai pelā mo te tino telā e fakapakia fakafuasei ne ia se mea. E ‵tau o tuku atu ne ia se aofaki tupe telā e fetaui mo te ‵togi o te mea telā ne galo io me ne pakia i a ia.

8 E mafai pefea o toe faka‵foki mai te fia o mea kolā ne ‵galo atu i a tatou ona ko Atamu kae toe fakasaoloto foki tatou mai te ‵nofo pologa ki te agasala mo te mate? Ke na mafau‵fau nei  tatou ki te togiola telā ne fakatoka ne Ieova mo te aogā o te mea tenei ki a koe.

TE AUALA NE FAKATOKA EI NE IEOVA TE TOGIOLA

9. Se a te vaegā togiola telā ne manakogina?

9 Ona ko te galo atu o te ola ‵lei katoatoa, e seai eiloa se tino sē ‵lei katoatoa e mafai o toe ‵togi mai ne ia te ola tenā. (Salamo 49:7, 8) Ne manakogina i ei se togiola telā e ‵pau mo te tāua o te mea telā ne galo atu. E fetaui ‵lei te mea tenei mo te akoakoga fakavae e uiga ki te tulafono ‵lei katoatoa telā e maua i te Muna a te Atua, penei: “A te fakasalaga ko te ola ki te ola.” (Teutelonome 19:21) Se a la te mea e mafai o ‵togi atu ke toe maua mai ei te ola ‵lei katoatoa telā ne galo i a Atamu? Ne ‵tau eiloa o tuku atu te suā ola ‵lei katoatoa o se tino ‘ke fakasaoloto ei a tino.’—1 Timoteo 2:6.

10. Ne fakatoka pefea ne Ieova te togiola?

10 Ne fakatoka pefea ne Ieova te togiola? Ne uga mai ne ia ki te lalolagi nei se tama ‵lei katoatoa mai i ana tama i te lagi. Kae ne seki uga mai fua ne Ieova so se tama telā ne avanoa. Ne uga mai ne ia te ‵toe tama pele ki a ia, ko tena Tama fagasele eiloa e tokotasi. (Faitau te 1 Ioane 4:9, 10) Ne loto malie te Tama tenā ke tiakina tena koga nofo tumau i te lagi. (Filipi 2:7) E pelā mo te mea ne fatoā suke‵suke tatou ki ei i te suā mataupu o te tusi tenei, ne fai ne Ieova se vavega i te taimi ne tuku ei ne ia te ola o tena Tama ki te moegātama o Malia. E auala i te agaga tapu o te Atua, ne fanau mai a Iesu e pelā me se tino ‵lei katoatoa kae ne seki pisipisia a ia i te agasala a Atamu.—Luka 1:35.

Ne tuku mai ne Ieova tena Tama fagasele e tokotasi e pelā me se togiola mō tatou

11. Ne mafai pefea o fai ne se tino e tokotasi te togiola mō te fia miliona o tino?

11 E mafai pefea o fai ne se tino e tokotasi se togiola mō tino e tokouke, ko te fia miliona o tino? E a, ne maua pefea ne te fia miliona o tino te agasala i te kamataga? Masaua la, me i te taimi ne agasala ei a Atamu, ne galo atu i ei te mea tāua ko te ola ‵lei katoatoa. Tela la, ne seki mafai o tuku atu ne ia te mea tenā ki ana tama‵liki. I lō te fai penā, ne mafai fua o tuku mai  ne ia te agasala mo te mate. A Iesu, telā e fakaigoa foki i te Tusi Tapu ki te “Atamu fakaoti,” ne maua ne ia se ola ‵lei katoatoa, kae ne seki agasala foki eiloa a ia. (1 Kolinito 15:45) Ne sui ne Iesu a Atamu ko te mea ke fakaola ei tatou. Mai te tuku atu o tena ola ‵lei katoatoa mo tena tumau foki i te fakalogo katoatoa ki te Atua, ne ‵togi atu ei ne Iesu te ‵togi o te agasala a Atamu. Ne tuku mai i ei ne Iesu se fakamoemoega mō tama‵liki a Atamu.—Loma 5:19; 1 Kolinito 15:21, 22.

12. Se a te mea ne fakaasi mai i logo‵maega o Iesu?

12 E fakamatala likiliki mai i te Tusi Tapu a logo‵maega kolā ne kufaki ne Iesu mai mua o tena mate. Ne logo‵mae malosi a ia i ‵kiniga fakasauā, i te ‵tukiga ki luga i te sataulo, mo tena mate fi‵ta. (Ioane 19:1, 16-18, 30; Mataupu Fakaopoopo, te itulau e 204-206) Kaia ne ‵tau ei o logo‵mae malosi a Iesu? I se mataupu fakamuli o te tusi tenei, ka onoono tatou me ne kinau atu a Satani me e mata, ka isi ne tavini a Ieova i te lalolagi nei, ka tumau i te fakamaoni mai lalo i tofotofoga io me ikai. Mai te kufaki mo te fakamaoni o Iesu i logo‵maega faiga‵ta, ne tuku atu ei ne ia te ‵toe tali ‵lei ki pati ‵toa a Satani. Ne fakaasi mai i ei ne Iesu me e mafai ne se tino ‵lei katoatoa o tumau i te fakamaoni ki te Atua faitalia me e isi sena saolotoga ke se fai penā. Ne fai eiloa a ia penā faitalia a mea matagā ne fai ne te Tiapolo ki a ia. Ko tafaga la te fiafia o Ieova ona ko te fakamaoni o tena Tama fagasele!—Faataoto 27:11.

13. Ne ‵togi atu pefea te togiola?

13 Ne ‵togi atu pefea te togiola? I te po 14 o te masina faka-Iutaia ko Nisani i te 33 T.A., ne talia ei ne te Atua ke tamate ne tino tena Tama ‵lei katoatoa telā e seai sena agasala. Ne ofo atu ei ne Iesu tena ola ‵lei katoatoa e pelā me se taulaga “fakatasi” eiloa mō taimi katoa. (Epelu 10:10) I te tolu o aso mai tua ifo o te mate o Iesu, ne toe fakatu aka ei a ia ne Ieova mai te mate ki te ola faka-te-agaga. I tena okoatuga ki te lagi, ne tuku atu ei ne Iesu ki te Atua a te ‵togi tāua o tena ola telā ne ofo atu e pelā me se taulaga ke ‵togi ei te ola o tama‵liki a Atamu. (Epelu 9:24) Ne talia ne Ieova te taulaga tenā a Iesu ke fai mo fai te  ‵togi telā ne ‵tau o avatu ke fakasaoloto ei a tino mai i te ‵nofo pologa ki te agasala mo te mate.—Faitau te Loma 3:23, 24.

TE AOGĀ O TE TOGIOLA KI A KOE

14, 15. Ke “fakamagalogina foki o‵tou agasala,” ne a mea e ‵tau o fai ne tatou?

14 Faitalia ‵tou tulaga agasala, e mafai eiloa o maua ne tatou a fakamanuiaga sē fuafuagina ona ko te togiola. Ke na mafau‵fau nei tatou ki nisi mea aogā i aso nei mo aso mai mua, kolā e mafai o maua ne tatou mai te ‵toe meaalofa sili tenei a te Atua.

15 Te fakamagaloga o agasala. Ona ko ‵tou vāivāiga, se mea faigata ‵ki ke fai ne tatou te mea tonu. E agasala katoa tatou i ‵tou pati mo ‵tou faifaiga. Kae e auala i te taulaga togiola a Iesu, e mafai ei o “fakamagalogina foki o‵tou agasala.” (Kolose 1:13, 14) Ko te mea ke fakamagalo ‵tou agasala, e ‵tau o sala‵mō tonu tatou. E ‵tau o fakamolemole atu tatou mo te loto maulalo ki a Ieova, ke fakamagalo mai tatou e auala i te ‵tou fakatuanaki ki te taulaga togiola a tena Tama.—Faitau te 1 Ioane 1:8, 9.

16. Se a te mea e fai ei ke tapuaki atu tatou ki te Atua mo se loto lagona ‵mā, kae e pefea te tāua o te vaegā loto lagona tenā?

16 Te loto lagona ‵mā i mua o te Atua. Kafai ko logosala ‵tou lagonaga, se mea faigofie ke galo i a tatou ‵tou fakamoemoega kae kamata foki o mafau‵fau tatou me e seai se aogā o ‵tou olaga. Kae mai i te fakamagaloga o agasala e auala i te togiola, ne fakatoka ei mo te atafai ne Ieova tatou ke mafai o tapuaki atu ki a ia fakatasi mo se loto lagona ‵mā faitalia te sē ‵lei katoatoa o tatou. (Epelu 9:13, 14) Ko mafai ei ne tatou o fai‵pati atu ki a Ieova i so se taimi. Tela la, ko se mā tatou o ‵talo atu faeloa ki a ia. (Epelu 4:14-16) Kafai e tausi ne tatou ‵tou loto lagona ke ‵lei, ka filemu, tokagamalie, kae fia‵fia foki faeloa ‵tou loto.

17. Ne a fakamanuiaga ne mafai fua o maua ona ko te mate o Iesu mō tatou?

17 Te fakamoemoega ki te ola se-gata-mai i te lalolagi palataiso.  E fai mai te Loma 6:23, penei: “Me i te taui o te agasala ko te mate ka ko te meaalofa faivasaga a te Atua; ko te ola se gata mai i a Keliso Iesu te ‵tou Aliki.” I te Mataupu e 3 o te tusi tenei, ne sau‵tala tatou e uiga ki fakamanuiaga i te lalolagi Palataiso. (Fakaasiga 21:3, 4) Ne mafai fua o fakatoka a fakamanuiaga katoa mō aso mai mua, e aofia i ei te ola se-gata-mai i te malosi ‵lei katoatoa, ona ko te mea ne mate a Iesu mō tatou. Ke maua a fakamanuiaga konā, e ‵tau o fakaasi atu ‵tou loto fakafetai e uiga ki te meaalofa ko te togiola.

E MAFAI PEFEA O FAKAASI ATU TOU LOTO FAKAFETAI?

18. Kaia e ‵tau ei o loto fakafetai tatou ki a Ieova ona ko te togiola?

18 Kaia e ‵tau ei o loto fakafetai malosi tatou ki a Ieova ona ko te togiola? E sili atu te tāua o se meaalofa māfai e uke a taimi, taumafaiga, mo tupe ne fakamāumāu i te faiga o te meaalofa tenā. E otia ‵tou loto māfai e iloa ne tatou me ne tuku mai te meaalofa ona ko te alofa tonu o te tino tenā ki a tatou. A te togiola ko te ‵toe meaalofa tāua eiloa i meaalofa katoa, me ne fai ne te Atua te ‵toe mea faigata eiloa ke tuku mai i ei ne ia te meaalofa tenā. E fai mai te Ioane 3:16: “Me ne penā eiloa o alofa mai te Atua ki te lalolagi, ne tuku mai ei ne ia tena Tama e tokotasi.” A te togiola ko te ‵toe fakamaoniga sili o te alofa o Ieova mō tatou. Ko te fakamaoniga foki o te  alofa o Iesu, me ne loto fiafia a ia o tuku mai tena ola mō tatou. (Faitau te Ioane 15:13) Tela la, e ‵tau o fakatalitonu mai ki a tatou, a te meaalofa ko te togiola, me e a‵lofa mai a Ieova mo tena Tama ki a tatou taki tokotasi.—Kalatia 2:20.

A te taumafai ke momea aka ‵tou iloaga e uiga ki a Ieova ko te auala e tasi e fakaasi atu ei ‵tou loto fakafetai ki te meaalofa ko te togiola

19, 20. Ne a auala e mafai ei o fakaasi atu ne koe tou loto fakafetai e uiga ki te meaalofa a te Atua ko te togiola?

19 E mafai la pefea o fakaasi atu ne koe tou loto fakafetai e uiga ki te meaalofa a te Atua ko te togiola? Muamua la, taumafai ke iloa ne koe a mea e uke atu e uiga ki te Tino Sili telā ne tuku mai ne ia te meaalofa tenā, ko Ieova. (Ioane 17:3) A te sukesuke ki te Tusi Tapu fakatasi mo te fesoasoani o te tusi tenei ka fesoasoani atu ke fai koe penā. Kafai e gasolo aka tou iloaga e uiga ki a Ieova, ka momea aka foki te lasi o tou alofa ki a ia. Ka fai ei ne te alofa tenā ke fia fakafiafia atu koe ki a ia.—1 Ioane 5:3.

20 Fakatuanaki eiloa ki te taulaga togiola a Iesu. Ne fai mai e uiga ki a Iesu, penei: “A te tino telā e talitonu ki te Tama, ko i a ia te ola se gata mai.” (Ioane 3:36) E mafai pefea o fakaasi atu ne tatou te ‵tou fakatuanaki ki a Iesu? E se fakaasi atu fua te vaegā fakatuanaki tenā i pati. E fai mai te Iakopo 2:26, penei: “A te fakatuanaki e mate manafai e seai ne galuega.” E tonu, e fakamaoni aka te fakatuanaki tonu i ‵tou “galuega,” ko tena uiga, ko ‵tou faifaiga. E tasi te auala e fakaasi atu ei me e fakatuanaki tatou ki a Iesu, ko te taumafai malosi o fakaakoako atu ki a ia i ‵tou pati mo ‵tou faiga foki.—Ioane 13:15.

21, 22. (a) Kaia e ‵tau ei o ‵kau atu tatou ki te fakamanatuga o te ‵Kaiga a te Aliki i te Afiafi i tausaga katoa? (e) Se a te mea ka fakamatala mai i te Mataupu e 6 mo te 7?

21 Ke kau atu ki te fakamanatuga o te ‵Kaiga a te Aliki i te Afiafi, i tausaga katoa. I te afiafi po o Nisani 14, 33 T.A., ne kamata ei ne Iesu se fakamanatuga fakapito telā e taku ne te Tusi Tapu ki te “‵kaiga a te Aliki” i te afiafi. (1 Kolinito 11:20; Mataio 26:26-28) E taku foki te sauniga tenei ki te Fakamanatuga o te mate o Keliso. Ne kamata ne Iesu te mea tenā ke fakamasaua atu ei ki ana apositolo penā foki loa mo Kelisiano ‵tonu katoa kolā ne ola mai tua ifo o latou, me e auala i tena mate e  pelā me se tino ‵lei katoatoa, ne tuku atu ei tena ola e pelā me se togiola. Ne fakatonu atu a Iesu e uiga ki te fakamanatuga tenei: “Ke fai [te mea tenei] mo fakamanatuga ki a au.” (Luka 22:19) A te Fakamanatuga o te mate o Iesu e fakamasaua mai ei ki a tatou te alofa sili telā ne fakaasi mai ne Ieova mo Iesu e auala i te togiola. E mafai o fakaasi atu ne tatou te ‵tou loto fakafetai e uiga ki te togiola mai te ‵kau atu ki te Fakamanatuga o te mate o Iesu i tausaga katoa. *

22 A te fakatokaga ne Ieova o te togiola se meaalofa tafasili eiloa i te tāua. (2 Kolinito 9:14, 15) E aogā foki te meaalofa sē fuafuagina tenei ki tino kolā ko oti ne ‵mate. Ka fakamatala mai i te Mataupu e 6 mo te 7 a te auala e aogā ei te meaalofa tenei ki a latou.

^ pala. 21 Ke maua a nisi fakamatalaga e uiga ki te ‵Kaiga a te Aliki i te Afiafi, ke onoono ki Mataupu Fakaopoopo, i te itulau e 206-208.