Fanatu ki te fakasologa

Fanatu ki te fakasologa o mataupu

Molimau a Ieova

Fili se `gana Tuvalu

 MATAUPU E SEFULUIVA

Ke Tumau Koe i te Alofa o te Atua

Ke Tumau Koe i te Alofa o te Atua
  • Se a te uiga o te alofa ki te Atua?

  • E mafai pefea o tumau tatou i te alofa o te Atua?

  • Ka taui atu pefea ne Ieova a tino kolā e tumau i tena alofa?

1, 2. Tefea te koga e mafai o ‵lafi tatou ki ei i aso nei?

MAFAUFAU la me ko sasale atu koe i te auala i se aso e agi ei te afā. Ko gasolo o pouli te lagi. E ‵lapa a uila, e ‵pa a fa‵tili, kae ‵lotu te vaiua. Ko fakavavave atu koe o ‵sala ki se koga ke ‵lafi ki ei. Ko kilo atu koe ki te feitu o te auala, lavea ei ne koe se tamā fale ke faka‵lafi atu ki ei. E malosi, e se āfu te vaiua ki ei, kae e gali foki te koga tenā ke ‵lafi i ei. Ko oko eiloa i te fakatāua ne koe te koga faka‵lafi tenā!

2 E ola nei tatou i taimi o afā. E gasolo aka eiloa o ma‵sei atu a fakalavelave i te lalolagi. Kae e isi eiloa se koga e mafai o faka‵lafi tatou ki ei, se koga telā e puipui ei tatou mai pa‵kiaga tumau. Se a te koga tenā? Mafaufau la ki te mea telā e akoako mai i te Tusi Tapu: “E mafai o fai atu penei ki a ia, ‘A koe ko toku ‵lafiga mo toku ‵puiga. Koe ko toku Atua; e fakatuanaki au ki ei.’”Salamo 91:2.

3. E mafai pefea o talia ne tatou a Ieova ke fai mo fai te ‵tou ‵lafiga?

3 Ke fakaataata la te mea tenā i tou mafaufau! A Ieova, te Pule Sili telā ne faite ne ia te lagi mo te lalolagi, e mafai o fai mo fai te ‵tou ‵lafiga mo te ‵tou ‵puiga. E mafai o puipui faka‵lei  ne ia tatou me e sili fakafia atu tena ‵mana i lō so se tino io me ko so se mea telā e ‵teke mai ki a tatou. Faitalia foki loa me e pa‵kia tatou i se mea, e mafai eiloa ne Ieova o toe faka‵lei aka a mea katoa konā. E mafai la pefea o talia ne tatou a Ieova ke fai mo fai te ‵tou ‵lafiga? E ‵tau o tali‵tonu katoatoa tatou ki a ia. E se gata i ei, e fakamalosi mai te Muna a te Atua ki a tatou, penei: “Tausi [“ke tumau,” NW] koutou i te alofa o te Atua.” (Iuta 21) E tonu, e ‵tau o tumau tatou i te alofa o te Atua, mai te tausiga o se fesokotakiga alofa mo te ‵tou Tamana faka-te-lagi. Ko mafai ei o iloa tonu ne tatou me i a ia ko te ‵tou ‵lafiga. Kae e mafai pefea o fakamalosi aka ne tatou se vaegā fesokotakiga penā?

KE MAINA KAE KE TALIA FOKI NE KOE TE ALOFA O TE ATUA

4, 5. Ne a nisi auala ne fakaasi mai ei ne Ieova tena alofa ki a tatou?

4 Ke tumau tatou i te alofa o te Atua, e ‵tau o fakatāua ne tatou te auala ne fakaasi mai ei ne Ieova tena alofa. Mafaufau ki nisi akoakoga i te Tusi Tapu kolā ko fatoā iloa ne koe ona ko te tusi tenei. Ko oti ne tuku mai ne Ieova te lalolagi e pelā me se fale gali mō tatou. Ne faka‵fonu ne ia te lalolagi ki meakai mo vai e uke, koloa, manu ‵gali, mo koga kolā e gali te kilo atu ki ei. E auala i te Tusi Tapu, ne fakaasi mai ei ne te Atua a tena igoa mo ana uiga. E se gata i ei, e fakaasi mai i tena Muna me ne uga mai ne ia tena Tama fagasele eiloa e tokotasi ko Iesu ki te lalolagi, kae ne talia ne ia ke logo‵mae kae mate foki mō tatou. (Ioane 3:16) Kae se a te aogā o te meaalofa tenā ki a tatou? E tuku mai i ei ki a tatou se fakamoemoega gali mō aso mai mua nei.

5 E fakavae foki te ‵tou fakamoemoega mō aso mai mua ki se mea telā ko oti ne fai ne Ieova. Ko oti ne fakatu aka ne Ieova se pulega faka-te-lagi, ko te Malo faka-Mesia. Ka fakagata ne te Malo tenā a logo‵maega katoa kae ka ‵fuli ei te lalolagi ke fai mo fai se palataiso. Mafaufau la! E mafai o ola tatou i ei i te filemu mo te fiafia ki te se-gata-mai. (Salamo 37:29) A koi tuai o oko atu tatou ki te taimi tenā, ko oti ne tuku mai ne te Atua a fakatakitakiga e uiga ki te ‵toe auala ‵lei ke ola nei tatou i ei. Ko oti foki ne tuku mai ne ia te meaalofa ko te avanoaga ke fai a ‵talo, ko te saolotoga ke fai‵pati atu tatou ki a ia i so se taimi. Konei fua a nāi auala  mai te fia o auala ne fakaasi mai ei ne Ieova tena alofa ki tino valevale, e aofia foki ei a koe.

6. Ne a au mea kāti ka fai ona ko te alofa o Ieova ki a koe?

6 Ke na mafaufau faka‵lei nei koe ki te fesili tāua tenei: Ne a aku mea ka fai ona ko te alofa o Ieova? E tokouke a tino ka fai mai, “Ia, e ‵tau o toe taui atu ne au te alofa o Ieova.” E a, e penā loa ou lagonaga? Ne fai mai a Iesu me tenei eiloa te tulafono tafasili i te tāua: “E ‵tau mo koe o alofa ki te Aliki [Ieova] tou Atua mo tou loto kātoa, mo tou agaga kātoa, mo tou mafaufau kātoa.” (Mataio 22:37) E mautinoa eiloa me e uke ‵ki a pogai e ‵tau ei o alofa koe ki a Ieova te Atua. Kae e mata, ko lava fua i te fai atu me e alofa koe ki a Ieova mo tou loto kātoa, tou agaga kātoa, mo tou mafaufau kātoa?

7. E mata, e isi aka foki ne mea e aofia i te alofa ki te Atua i lō te fakaasi atu fua o lagonaga alofa? Fakamatala mai.

7 E pelā mo te fakamatalaga i te Tusi Tapu, a te alofa ki te Atua e se se lagonaga fua. E tiga eiloa e tāua a lagonaga alofa ki a Ieova, a te ‵tonuga loa, a te mea tenā ko te kamataga fua o te alofa tonu ki a ia. E pelā eiloa mo te tega o te fuamei, e tāua ‵ki eiloa ki te ‵tupuakaga o se mei. Kafai e fia kai mei koe, e a, ko lotomalie fua koe māfai ko tuku atu se tega ki a koe? Ikai, e se tāitāi eiloa! E penā foki loa a lagonaga alofa ki a Ieova. Ko te kamataga fua tenā. E akoako mai te Tusi Tapu, penei: “Tenei te uiga o te alofa ki te Atua: ko te fakalogo ki ana fakatonuga. Ka ko ana fakatonuga e se na ‵mafa foki mo tatou.” (1 Ioane 5:3) Ke tonu te alofa, e ‵tau o ‵fua mai a fuataga ‵lei mai te alofa ki te Atua. E ‵tau o fakaasi atu te alofa tenā i au faifaiga.Faitau te Mataio 7:16-20.

8, 9. E mafai pefea o fakaasi atu ne tatou te alofa mo te loto fakafetai ki te Atua?

8 E fakaasi atu te ‵tou a‵lofa ki te Atua māfai e faka‵logo tatou ki ana fakatonuga kae tau‵tali atu foki ki ana akoakoga. E se tō faigata ke fai penā, me ne fakatoka a tulafono a Ieova ke fesoasoani mai ke mafai ei ne tatou o ola i se olaga ‵lei, fiafia, kae tokagamalie. (Isaia 48:17, 18) Mai i te ola e ‵tusa mo akoakoga a  Ieova, e fakaasi atu ei ne tatou ki te ‵tou Tamana faka-te-lagi me e fakatāua malosi ne tatou a mea katoa kolā ko oti ne fai ne ia mō tatou. Se mea fakafanoanoa me ne nāi tino fua i te lalolagi nei e fakaasi atu ne latou te vaegā loto fakafetai tenā. E se fia fai tatou pelā mo tino kolā ne ola i te taimi ne nofo ei Iesu i te lalolagi me ne seki fakaasi atu ne latou te loto fakafetai. Ne faka‵lei aka ne Iesu a lepela e toko sefulu, kae e tokotasi fua ne toe foki o fakafetai atu ki a ia. (Luka 17:12-17) E mautinoa eiloa me e ma‵nako tatou o fai pelā mo te tino loto fakafetai tenā, kae e se ko te tokoiva kolā ne seki fakaasi atu ne latou te loto fakafetai!

9 Ne a la fakatonuga a Ieova kolā e ‵tau o faka‵logo tatou ki ei? Ko oti ne sau‵tala tatou ki nisi mea i te tusi tenei, kae ke na toe mafau‵fau nei tatou ki nāi fakatonuga konā. A te faka‵logo ki fakatonuga a te Atua ka fesoasoani mai ke tumau tatou i te alofa o te Atua.

KE NA MOMEA AKA TOU FAKAPILIPILI ATU KI A IEOVA

10. Fakamatala mai te pogai e tāua ei ke tumau koe i te tauloto e uiga ki a Ieova te Atua.

10 A te tauloto e uiga ki a Ieova se faiga tāua i te fakapilipili  atu ki a ia. E se ‵tau eiloa o fakagata aka te faifaiga tenā. Kafai e nofo atu koe i tua i se po ‵moko kae fakamafanafana tou foitino ki te afi, e a, ka tiakina fua ne koe te afi ke kākā malie kae mate atu fakamuli? Ikai. Ka tumau eiloa i te tafu ne koe ki fafie ko te mea ke tumau te kā mo te ‵vela o te afi. Kāti ka fakalagolago eiloa tou ola ‵lei ki te afi tenā! E pelā eiloa mo te fai ne fafie ke kā te afi, a te ‘iloaga e uiga ki te Atua’ e fakamalosi aka foki i ei te ‵tou a‵lofa ki a Ieova.Faataoto 2:1-5.

11. Ne a mea ne iku atu ki soko o Iesu ona ko ana akoakoga?

11 Ne manako Iesu ke fakatumau ne ana soko te lotou a‵lofa ki a Ieova mo te lotou fia‵fia ki Tena Muna tonu tāua e pelā mo te afi telā e kā faeloa. Mai tua o tena toetuga, ne akoako ne Iesu ana soko e tokolua e uiga ki nisi valoaga i Tusitusiga faka-Epelu kolā ne fakataunu ki a ia. Se a te ikuga? Ne fai fakamuli mai laua, penei: “E seki lagona eiloa i o tā loto [“ne ‵ka e pelā me se afi,” NW] ana muna ne fai mai ki a taua i te alatu, kae fakamatala mai te Tusi ki a taua?”Luka 24:32.

12, 13. (a) E pelā mo te tokoukega o tino i aso nei, se a te mea ko tupu ki te lotou a‵lofa ki te Atua mo te lotou fia‵fia ki te Tusi Tapu? (e) E fakatumau pefea te malosi o te ‵tou a‵lofa?

12 I te taimi ne fatoā iloa ei ne koe a mea kolā e akoako ‵tonu mai i te Tusi Tapu, e mata, ne kamata o fiafia tou loto, kae ne momea aka foki tou loto finafinau mo tou alofa ki te Atua? E seai eiloa se fakalotolotolua me ne fai koe penā. E penā foki eiloa a tino e tokouke. Ako te mea faigata la, ko te faiga ke tumau te alofa tenā mo te fakamalosi aka faeloa. E se ma‵nako tatou ke fakaakoako atu ki faifaiga a tino i te lalolagi. Ne ‵valo mai a Iesu, penei: ‘Ka gasolo o se a‵lofa kae amio ma‵sei a tino.’ (Mataio 24:12) E mafai pefea o fakatumau ne koe tou alofa ki a Ieova mo tou fiafia ki muna‵tonu i te Tusi Tapu?

13 Ke tumau koe i te sukesuke ki fakamatalaga e uiga ki a Ieova te Atua mo Iesu Keliso. (Ioane 17:3) Mafaufau faka‵lei, io me mafaufau ‵mafa koe ki mea ko iloa ne koe mai te Muna a te Atua, kae fesili ifo penei: ‘Se a te mea e akoako mai ne te mea tenei e uiga ki a Ieova te Atua? Se a te pogai e tuku mai i ei ke momea aka toku alofa ki a ia mo toku loto kātoa, toku mafaufau kātoa, mo toku ola kātoa?’ (Faitau te 1 Timoteo 4:15) A te mafaufau ‵loto penā  ka fakatumau ei te malosi o tou alofa ki a Ieova, e pelā eiloa mo te afi telā e kā faeloa.

14. E mafai pefea o fesoasoani mai a ‵talo ke fakatumau te malosi o te ‵tou a‵lofa ki a Ieova?

14 A te suā auala ke fakatumau ei te malosi o tou alofa ki a Ieova ko te ‵talo atu faeloa. (1 Tesalonia 5:17) I te Mataupu e 17 o te tusi tenei, ne iloa ei ne tatou me i te ‵talo se meaalofa tāua ‵ki mai te Atua. E pelā eiloa mo te fakalagolago o ‵tou vā fealofani mo nisi tino ki te fesokotaki atu faeloa ki a latou, e tumau te malosi o te ‵tou a‵lofa ki a Ieova māfai e ‵talo atu faeloa tatou ki a ia. E tāua ‵ki eiloa ke mo a ma fai fua ‵tou ‵talo e pelā me se mea tauloto—ko pati mau ei kolā e fakafoki‵foki faeloa e aunoa mo te alofa io me se uiga tonu. E ‵tau o fai‵pati atu tatou ki a Ieova e pelā me se tamaliki telā e faipati atu ki tena tamana alofa. E tonu, e fia fai‵pati atu tatou mo te āva, mai i te taku atu mo te fakamaoni o mea katoa i ‵tou loto. (Salamo 62:8) E tonu, a te faiga o sukesukega ki te Tusi Tapu mo te ‵talo atu mai i ‵tou loto ne vaega tāua ‵ki o te ‵tou tapuakiga, kae e fesoasoani mai a faiga konā ke tumau tatou i te alofa o te Atua.

KE FIAFIA KOE KI TAU TAPUAKIGA

15, 16. Kaia e ‵lei ei ke ma‵natu aka tatou me i te galuega talai o te Malo se galuega taulia telā e fai foki pelā me se koloa?

15 A te faiga o sukesukega ki te Tusi Tapu mo ‵talo ne vaega o te tapuakiga kolā e mafai o fai ne tatou i ‵tou fale. Kae ke mafaufau nei tatou ki te vaega o te tapuakiga telā e fai ne tatou i mua o tino katoa: ko te fai‵pati atu ki nisi tino e uiga ki ‵tou talitonuga. E mata, ko oti ne fakaasi atu ne koe a nisi muna ‵tonu i te Tusi Tapu ki nisi tino? Kafai ko oti, ko taulia malosi eiloa koe i ei. (Luka 1:74) Kafai e fakaasi atu ne tatou a muna ‵tonu kolā ko iloa ne tatou e uiga ki a Ieova te Atua, ko fakataunu eiloa ne tatou se tofiga tāua telā ne tuku atu ki Kelisiano ‵tonu katoa—ko te talaiatuga o te tala ‵lei o te Malo o te Atua.Faitau te Mataio 24:14; 28:19, 20.

16 Ne fakatāua malosi ne te apositolo ko Paulo tena galuega talai, telā ne taku ne ia ki se koloa. (2 Kolinito 4:7) A te faipati atu ki tino e uiga ki a Ieova te Atua mo ana fuafuaga ko te ‵toe galuega ‵lei e mafai o fai ne koe. E tavini atu i ei koe ki te ‵toe Pule ‵lei,  kae e maua foki ne koe a toe mea aogā mai te galuega tenei. Mai te kau atu ki te galuega tenei, e fesoasoani atu ei koe ki tino loto fakamaoni ke fakapili‵pili atu ki te ‵tou Tamana faka-te-lagi kae ke sa‵sale atu foki i te auala ki te ola se-gata-mai! E a, e isi aka foki se isi galuega telā e sili atu i te gali? E se gata i ei, a te molimau  atu e uiga ki a Ieova mo tena Muna e fakamalosi aka ei tou fakatuanaki mo tou alofa ki a ia. Kae e fakatāua foki eiloa ne Ieova au taumafaiga. (Epelu 6:10) A te fakalavelave faeloa i te faiga o te galuega tenā e fesoasoani atu ei ke tumau koe i te alofa o te Atua.—Faitau te 1 Kolinito 15:58.

17. Kaia e ‵tau ei o fai fakavave te galuega talai faka-Kelisiano i aso nei?

17 E tāua ‵ki ke masaua ne koe me e ‵tau o ‵saga fakavave atu tatou ki te galuega talai o te Malo. E fai mai te Tusi Tapu, penei: “Folafola atu ne koe te muna, . . . ka ke ‵mau eiloa koe i te folafola atu.” (2 Timoteo 4:2) Kaia e ‵tau ei o fai fakavave te galuega tenei i aso nei? Muna a te Atua ki a tatou: “A te aso fakamataku o te Aliki ko pili—ko pili mai eiloa, kae e vave o oko mai!” (Sefanaia 1:14) E tonu, ko pili mai eiloa te taimi telā ka fakagata ei ne Ieova te olaga masei tenei. E ‵tau o fakailoa atu ki tino ke fakaeteete i ei! E ‵tau o iloa ne latou me tenei te taimi ke filifili ne latou a Ieova e pelā me ko te lotou Pule Sili. “Ka se tuai” eiloa te gataga.Sapakuka 2:3.

18. Kaia e ‵tau ei o tapuaki atu tatou ki a Ieova fakatasi mo Kelisiano ‵tonu?

18 E manako eiloa a Ieova ke tapuaki atu tatou ki a ia fakatasi mo nisi Kelisiano ‵tonu. Tenā eiloa te pogai e fai mai ei tena Muna, penei: “Ke mafaufau te suā tino ki te suā tino, ke fakatau fesoasoani foki koutou o fakaasi te alofa mo te fai mea ‵lei. Ke tumau faeloa te maopoopo sāle o tatou, e pelā eiloa mo te mea e masani ei a nisi tino o koutou. A te mea sili ke fakatau fakamalosi eiloa ne tatou o‵tou loto; i te mea ko iloa ne koutou i te Aso o te Aliki ko pili mai.” (Epelu 10:24, 25) Kafai e maopoopo fakatasi tatou mo ‵tou taina tali‵tonu i fakatasiga Kelisiano, e maua eiloa ne tatou se avanoaga gali ke tavae kae tapuaki atu ki te ‵tou Atua pele. E fakatau fakamalosi atu foki tatou i ei.

19. E mafai pefea o fakamalosi aka ne tatou te alofa mo te fealofani i te fakapotopotoga Kelisiano?

19 Kafai e ‵kau atu tatou ki nisi tino tapuaki o Ieova, e fakamalosi aka ei ne tatou te alofa mo te va fealofani i te fakapotopotoga. Se mea tāua ke ‵saga atu tatou ki uiga ‵lei i nisi tino, e pelā eiloa mo Ieova e saga mai ki uiga ‵lei o tatou. Ke mo a ma fakamoemoe koe ke ‵lei katoatoa ou taina tali‵tonu. Masaua me e kese‵kese te ga‵solo ki mua o tino katoa i te feitu faka-te-agaga kae e fai foki ne tatou katoa a mea ‵se. (Faitau te Kolose 3:13) Taumafai  o fakamalosi aka se va fakataugasoa pili mo tino kolā e a‵lofa malosi ki a Ieova, kae ka mafai foki o gasolo aka tou malosi i te feitu faka-te-agaga. E tonu, a te tapuaki atu ki a Ieova fakatasi mo ou taina mo tuagane Kelisiano ka fesoasoani atu ei ke tumau koe i te alofa o te Atua. Kae e taui atu pefea a Ieova ki tino kolā e tapuaki atu mo te fakamaoni ki a ia kae tumau foki i tena alofa?

KAUSAKI EILOA KE MAUA “TE OLA TONU”

20, 21. Se a “te ola tonu,” kae kaia e fai ei te ola tenā mo fai se fakamoemoega gali?

20 E taui eiloa ne Ieova ana tavini fakamaoni ki te ola, kae se a te vaegā ola tenā? E a, koi ola nei koe? E tali atu te tokoukega o tatou penei, “ao.” Koi mafai eiloa o mā‵nava, ‵kai, kae inu tatou. Tela la, koi ola eiloa tatou. Kae e fai atu foki tatou i taimi e fia‵fia ei tatou, “Ko tafaga la te gali o te olaga nei!” Kae e fakaasi mai i te Tusi Tapu me e seai eiloa se tino e ola tonu i se olaga gali.

21 E fakamalosi mai te Muna a te Atua ke puke ‵mau tatou ki “te ola tonu.” (1 Timoteo 6:19) E fakaasi mai i muna konā me i “te ola tonu” se mea telā e fakamoe‵moe tatou ke maua i aso mai mua. Kafai ko oko atu tatou ki te ola ‵lei katoatoa, ko tena uiga, ko fai ei pelā me ko ola tonu tatou, me ka fatoā ola tatou i te vaegā olaga telā ne manako muamua te Atua ke ola tatou i ei. Kafai ko ola tatou i te lalolagi palataiso i te malosi katoatoa, te filemu, mo te fia‵fia, ka maua eiloa ne tatou i ei “te ola tonu”—ko te ola se-gata-mai. (1 Timoteo 6:12) Mā‵faga la o fakamoemoega gali, i ne?

22. E mafai pefea o puke ‵mautakitaki koe ki “te ola tonu”?

22 E mafai pefea o puke ‵mautakitaki tatou ki “te ola tonu”? I te fuaiupu foki eiloa tenā, ne fakamalosi atu a Paulo ki Kelisiano ke “fai ne latou te ‵lei” kae “ke mauko‵loa foki latou i galuega ‵lei.” (1 Timoteo 6:18) E manino ‵lei i ei, me e fakalago‵lago eiloa a mea e uke ki te auala e fakagalue aka ei ne tatou a muna ‵tonu kolā ko iloa ne tatou mai te Tusi Tapu. E mata, ne fakauiga ne Paulo ana pati me e ‵tau eiloa o maua ne tatou “te ola tonu” ona ko ‵tou galuega ‵lei e fai? Ikai, me e fakalagolago eiloa a fakamoemoega ‵gali konā ki te “meaalofa faivasaga” mai te Atua. (Loma 5:15) Kae e fiafia eiloa Ieova o taui atu ki tino kolā  e tavini atu ki a ia mo te fakamaoni. E manako a ia ke maua ne koe “te ola tonu.” Ka maua eiloa ne tino kolā e tumau i te alofa o te Atua se olaga fiafia kae filemu telā ka se gata mai.

23. Kaia e tāua ei ke tumau i te alofa o te Atua?

23 Se mea ‵lei ke fesili ifo eiloa tatou taki tokotasi, penei, ‘E mata, e tapuaki atu eiloa au ki te Atua i te auala telā ko oti ne fakaasi mai ne ia i te Tusi Tapu?’ Kafai e fakamautinoa aka ne tatou i aso katoa me e mafai o tali atu tatou penei “ao” ki te fesili tenā, ko tena uiga, koi ‵nofo atu eiloa tatou i te auala tonu. E mafai o tali‵tonu tatou me i a Ieova ko te ‵tou ‵lafiga. Ka puipui faka‵lei eiloa ne ia ana tino i aso fakaoti kae faiga‵ta o te olaga masei tenei. Ka faka‵sao foki ne Ieova ana tino fakamaoni ki loto i te lalolagi fou kae gali telā ko pili o oko mai. Ko tafaga la te ‵tou fia‵fia māfai ko oko mai te taimi tenā! Kae ka fia‵fia foki tatou me ne fai ne tatou a filifiliga ‵tonu i aso fakaoti konei! Kafai e fai nei ne koe a vaegā filifiliga penā, ka maua eiloa ne koe “te ola tonu,” te ola telā ne manako ki ei a Ieova te Atua ke maua ne koe, ko te ola se-gata-mai eiloa!