Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Ne a Mea e Akoako ‵Tonu Mai i te Tusi Tapu?

 MATAUPU FAKAOPOOPO

Te Valoaga a Tanielu e Uiga ki te Oko Mai o te Mesia

Te Valoaga a Tanielu e Uiga ki te Oko Mai o te Mesia

NE OLA te pelofeta ko Tanielu i tausaga e silia atu i te 500 a koi tuai o fanau mai Iesu. E tiga eiloa te feitu tenā, ne fakaasi atu ne Ieova ki a Tanielu a fakamatalaga kolā ne fakasino tonu atu ki te taimi ne ‵tau ei o fakaekegina, io me e ‵tofi aka Iesu mo fai te Mesia, io me ko te Keliso. Ne fai atu ki a Tanielu, penei: “E ‵tau o iloa  kae maina foki koe i ei me mai te avatuga o te fakatonuga ke toe faite kae ati aka Ielusalema ke oko ki te Mesia te Takitaki, ka isi ne vaiaso e fitu mo vaiaso foki e onosefulu-lua.”—Tanielu 9:25, NW.

Ke iloa tonu ne tatou te taimi ne ‵tau ei o oko mai te Mesia, e ‵tau o iloa muamua ne tatou te kamataga o te vaitaimi telā ne fakasino atu ki te okomaiga o te Mesia. E ‵tusa mo te valoaga, ne kamata mai te taimi tenā i “te avatuga o te fakatonuga ke toe faite kae ati aka Ielusalema.” Ne fai anafea “te avatuga o te fakatonuga” tenā? E ‵tusa mo te tino tusitala o te Tusi Tapu ko Neemia, ne avatu te fakatonuga ke toe faite kae ati aka a ‵pui o Ielusalema i te ‘luasefulu  tausaga o te pulega a te tupu ko Aletaseta.’ (Neemia 1:1; 2:1, 5-8) E fakamaoni mai ne tino tusitala me ne kamata te pulega a Aletaseta i te tausaga ko te 475 T.L.M. Tela la, a te 20 tausaga o tena pulega ko te 455 T.L.M. Ko maua ei ne tatou te kamataga o te fakataunuga o te valoaga a Tanielu e uiga ki te Mesia, ko te 455 T.L.M.

Ne fakaasi mai ne Tanielu te leva o te vaitaimi telā ka iku atu ei ki te oko mai o te “Mesia te Takitaki.” E taku mai i te valoaga a “vaiaso e fitu mo vaiaso foki e onosefulu-lua”—telā ko 69 katoa ei a vaiaso. E pefea te leva o te vaitaimi tenei? E iloa ne nisi tino ‵fulitusi o te Tusi Tapu me i te vaitaimi tenei, e se ko vaiaso o aso e fitu, kae ko vaiaso o tausaga. Tela la, a te vaiaso e tasi ko tausaga e fitu. Ne masani ‵lei a tino Iutaia i aso mua ki te manatu tenei e uiga ki vaiaso o tausaga, io me ko te takifitu tausaga. E pelā mo te fakamanatuga ne latou o te Sapati i te takifitu tausaga. (Esoto 23:10, 11) Tela la, a vaiaso fakavaloaga e 69 ko vaiaso e 69 kolā e taki 7 tausaga i vaiaso takitasi. Ko tena uiga, ko tausaga e 483.

Nei la, e ‵tau fua o lau aka ne tatou te aofaki o tausaga. Kafai e lau aka ne tatou te 483 tausaga mai te 455 T.L.M., ko oko atu ei tatou ki te tausaga ko te 29 T.A. Tenā eiloa te tausaga ne papatiso i ei a Iesu kae ne fai foki mo fai te Mesia! * (Luka 3:1, 2, 21, 22) Ko tafaga la te gali o te fakataunuga tenā o te valoaga i te Tusi Tapu, i ne?

^ pala. 2 E 454 tausaga mai te 455 T.L.M. ki te 1 T.L.M. E tasi te tausaga mai te 1 T.L.M. ki te 1 T.A. (e seai se tausaga ko te leai). Kae e ‵tusa mo te 28 tausaga mai te 1 T.A. ki te 29 T.A. Kafai e fakaopoopo aka a aofaki e tolu konei, ko maua ei ne tatou te aofaki kātoa o tausaga e 483. Ne “tamate” a Iesu i te 33 T.A., i loto i te 70 vaiaso o tausaga. (Tanielu 9:24, 26) Ke onoono ki te tusi ko te “Ke Oko Mai Tou Malo” te mataupu e 7, mo te Ke Ola Koe ki te Se-Gata-Mai i te Lalolagi Palataiso, te itulau e 138. Ne ‵lomi te avā tusi konā ne Molimau a Ieova.