Te Tusi a Ioane 3:1-36
3 E isi se tagata mai te kau Falesaio e igoa ki a Nikotemo,+ se pule o tino Iutaia.
2 Ne fanatu a ia ki a Iesu i te po+ kae fai atu ki ei: “Te Faiakoga,*+ e iloa ne matou i a koe ne vau mai te Atua e pelā me se faiakoga, me e seai se tino e mafai ne ia o fai a galuega ‵mana konei+ e fai ne koe seiloga ke fakatasi ki ei te Atua.”+
3 Ne tali atu a Iesu ki a ia: “Au e fai ‵tonu atu ki a koe, e se mafai o lavea ne se tino a te Malo o te Atua+ seiloga ke toe fanau mai*+ a ia.”
4 Muna a Nikotemo ki a ia: “E mafai pefea o toe fanau mai se tino telā ko matua? E a, e mafai o toe ulu atu a ia ki loto i te moegatama o tena mātua ke toe fanau mai i te lua o taimi?”
5 Ne tali atu a Iesu: “Au e fai ‵tonu atu ki a koe, e se mafai o ulu atu se tino ki te Malo o te Atua seiloga ke toe fanau mai a ia i te vai+ mo te agaga.+
6 A te mea telā ne fanau mai i te foitino ko te foitino eiloa, kae ko te mea telā ne fanau mai i te agaga ko te agaga eiloa.
7 Sa ofo i taku muna ne fai atu ki a koe: E ‵tau mo koutou katoa o toe fa‵nau mai.
8 E agi te matagi ki te koga e manako ki ei, e lagona fua ne koe kae e se iloa ne koe me e vau mai fea io me e fano ki fea. E penā foki a tino katoa kolā ko oti ne fa‵nau mai i te agaga.”+
9 Ne tali atu a Nikotemo ki a ia: “E mafai la pefea o ‵tupu a mea konei?”
10 Ne tali atu a Iesu: “A koe se faiakoga o Isalaelu kae e se iloa ne koe a mea konei?
11 Au e fai ‵tonu atu ki a koe, a mea kolā e iloa ne matou e faipati atu ne matou kae ko mea kolā ne lavea ne matou e molimau atu matou ki ei, kae e se talia ne koutou te molimau telā e tuku atu ne matou.
12 Kafai e se tali‵tonu koutou ki mea faka-te-lalolagi kolā ko oti ne fai atu ne au ki a koutou, e mafai la pefea o tali‵tonu koutou māfai e fai atu ne au a mea faka-te-lagi?
13 E ui i ei, e seai se tagata kai fanaka ki te lagi+ kae ko ia fua telā ne fanaifo mai te lagi,+ ko te Tama a te tagata.
14 E pelā eiloa mo te sisiakaga ki luga ne Mose a te gata i te koga lavaki,+ e penā foki te Tama a te tagata, e ‵tau o sisi aka ki luga,+
15 ko te mea ke maua ne tino katoa kolā e tali‵tonu ki a ia a te ola se-gata-mai.+
16 “Ona ko te lasi o te alofa o te Atua ki te lalolagi ne tuku mai ei ne ia tena Tama fagasele e tokotasi,+ ko te mea ke se fakaseai atu so se tino telā e fakaasi atu faeloa te fakatuanaki ki a ia kae ke maua ne ia te ola se-gata-mai.+
17 Me ne seki uga mai ne te Atua a tena Tama ki te lalolagi o fakamasino a te lalolagi, kae o fakasao a te lalolagi e auala i a ia.+
18 So se tino telā e fakaasi atu faeloa te fakatuanaki ki a ia e se fakamasinogina.+ So se tino telā e se fakaasi atu faeloa te fakatuanaki ko oti ne fakamasinogina, me ne seki fakaasi atu faeloa ne ia te fakatuanaki ki te igoa o te Tama fagasele e tokotasi a te Atua.+
19 Tenei eiloa te fakavae o te fakamasinoga: me ko oti ne oko mai te mainaga ki te lalolagi,+ kae e fia‵fia atu a tino ki te pouliga i lō te mainaga, me e matagā olotou galuega.
20 Me ko so se tino e fai faeloa ne ia a mea ma‵sei e takalialia ki te mainaga kae se vau ki te mainaga, ko te mea ke mo a ma polopoloki* a ia i ana galuega.
21 Kae ko so se tino telā e fai mea tonu e vau ki te mainaga,+ ko te mea ke fakaasi mai ana galuega kolā ne fai e ‵tusa mo te loto o te Atua.”
22 I te otiga o te mea tenei ne olo atu a Iesu mo ana soko ki te kogā fenua o Iuta, kae ne ‵nofo a ia mo latou i konā i se taimi tai mata leva kae ne fai ne latou te papatisoga i ei.+
23 Kae ne fai foki ne Ioane te papatisoga i Ainona i tafa o Salima, me ne uke ‵ki a vai i konā,+ kae ne solo atu faeloa a tino kae ne papatiso latou;+
24 me ne seki ‵pei a Ioane ki te falepuipui i te taimi tenā.+
25 Ne sae aka se kinauga i te va o soko o Ioane mo se tino Iutaia e uiga ki te faka‵māga.
26 Tenā ne olo atu ei latou ki a Ioane kae fai atu ki a ia: “Te Faiakoga, a te tagata telā ne ‵nofo mo koe i te suā feitu o te Iolitana, telā ne molimau mai koe e uiga ki ei,+ kiloke, e fai foki ne ia te papatisoga kae ko solo atu a tino katoa ki a ia.”
27 Ne tali atu a Ioane: “E seai se mea e tasi e mafai o maua ne se tino seiloga ke tuku atu ki a ia a te mea tenā mai te lagi.
28 Ne molimau eiloa koutou ki aku pati ne fai atu, ‘Au e se ko te Keliso,+ kae ko au ne uga mai ke mua atu i te tino tenā.’+
29 So se tino e ‵nofo mo te fafine ka fakaipoipo ko ia tenā te tagata ka fakaipoipo.+ Kae kafai e tu a te taugasoa o te tagata ka fakaipoipo kae e lagona ne ia a tena leo, ka fiafia malosi eiloa a ia ona ko te leo o te tagata ka fakaipoipo. Tela la, ko katoatoa ei toku fiafia.
30 E ‵tau o gasolo atu faeloa ki mua a te tino tenā, kae ko au e ‵tau o gasolo ifo faeloa ki lalo.”
31 A te tino telā e vau mai luga+ e sili atu i tino katoa. A te tino o te lalolagi e vau mai te lalolagi kae e faipati ki mea o te lalolagi. A te tino telā e vau mai te lagi e sili atu i nisi tino katoa.+
32 E molimau a ia ki mea ne lavea kae lagona ne ia,+ kae e seai se tino e talia ne ia tena molimau.+
33 So se tino ne talia ne ia tena molimau, ko faka‵mau ne ia tena fakamailoga ki ei* me e tonu te Atua.+
34 Me ko te tino telā ne uga mai ne te Atua e faipati mai ne ia a muna a te Atua,+ me e se fakatapula ne Ia te tukumaiga o tena agaga.
35 E alofa te Tamana ki te Tama+ kae ko oti ne tuku atu ki ana lima a mea katoa.+
36 A te tino telā e fakaasi atu faeloa ne ia te fakatuanaki ki te Tama e maua ne ia te ola se-gata-mai;+ a te tino telā e se fakalogo ki te Tama ka se lavea ne ia te ola,+ kae ka tumau eiloa te kaitaua o te Atua i luga i a ia.+
Fakamatalaga mai lalo
^ Io me kāti, “fanau mai luga.”
^ Io me “fakaasi.”
^ Io me “ko oti ne fakamautinoa aka.”
