Ki te Kau Epelu 5:1-14

  • E sili atu Iesu i faitaulaga sili faka-te-foitino (1-10)

    • E pelā mo Mekisateko (6, 10)

    • Tauloto ki te fakalogo mai logo‵maega (8)

    • Tiute mō te fakaolataga se-gata-mai (9)

  • Fakaeteete i te tumau pelā me se tamaliki (11-14)

5  Me i so se faitaulaga sili telā ne filifili mai i tāgata ne ‵tofi aka ke tavini atu ki te Atua mō latou,+ ko te mea ke ofo atu ne ia a meaalofa mo taulaga mō agasala.+  E ‵tau o atafai te faitaulaga sili i ana faifaiga ki tino va‵lea mo tino fai mea ‵se ona ko te mea e isi foki ne ana vāivāiga,  kae ona ko te mea tenā e ‵tau mo ia o ofo atu a taulaga mō ana agasala totino e pelā eiloa mo te mea e fai ne ia mō tino katoa.+  E se maua ne se tagata te tofi fakaaloalo tenei i tena loto eiloa, kae maua fua ne ia māfai e kalagagina a ia ne te Atua, e pelā eiloa mo Alona.+  E penā foki a Keliso, ne seki faka‵malu ne ia a ia eiloa+ mai te faiga mo fai se faitaulaga sili, kae ne faka‵malu ne te Atua telā ne fai atu ki a ia: “A koe ko taku tama; i te aso nei ko fai au mo fai tou tamana.”+  E pelā eiloa mo ana pati ne fai i te suā koga, “A koe ko te faitaulaga ki te se-gata-mai e pelā eiloa mo Mekisateko.”+  I tena olaga i te lalolagi nei,* ne ofo atu ne Keliso a ‵talo e pelā foki mo fakatagi, fakatasi mo te ‵tagi malosi mo loimata,+ ki te Atua telā ne mafai o fakasao ne ia a ia mai te mate, kae ne talia eiloa ana ‵talo ona ko tena mataku ki te Atua.  E tiga eiloa a ia ko te tama, ne tauloto ne ia te olaga fakalogo muna mai mea ne logo‵mae a ia i ei.+  Kae i te otiga ne fai ke ‵lei katoatoa a ia,+ ne maua ne ia a te tiute ke tuku atu te fakaolataga se-gata-mai ki tino katoa kolā e faka‵logo ki a ia,+ 10  me ko oti ne filifili a ia ne te Atua ke fai mo fai te faitaulaga sili e pelā eiloa mo Mekisateko.+ 11  E uke a mea e fia fai atu ne matou e uiga ki a ia, kae e faigata o fakamatala atu me ko oti ne faka‵tuli otou taliga ki ei. 12  Me e tiga eiloa ko ‵tau nei koutou o fai mo fai ne faiakoga, koi ma‵nako eiloa koutou ki se tino ke akoako koutou mai te kamataga ki akoakoga fakavae+ o folafolaga tapu mai te Atua, kae ko toe ma‵nako koutou ki susu kae e se ko meakai ma‵keke. 13  Me ko tino katoa kolā e tumau i te inu ki susu e se masani mo te muna o te amiotonu, ona ko ia koi tamaliki.+ 14  Kae ko meakai ma‵keke e mō tino ma‵tua fua, ko latou kolā ne fakaaoga ne latou kae ne akoako i ei te malosi o olotou mafaufau ke fakavasega aka ei a te mea tonu mai te mea ‵se.

Fakamatalaga mai lalo

Eleni, “I aso koi fai ei a ia pelā me se tagata faka-te-foitino.”