Tanielu 2:1-49

  • Te moemiti fakamataku a te Tupu ko Nepukanesa (1-4)

  • E seai se tagata poto ne mafai o fakamatala ne ia te moemiti (5-13)

  • Ko ‵fuli atu a Tanielu ki te Atua mō se fesoasoani (14-18)

  • ‵Viki atu ki te Atua mō te fakaasimaiga o te mea ‵funa (19-23)

  • Ko fakamatala atu ne Tanielu te moemiti ki te tupu (24-35)

  • Te uiga o te moemiti (36-45)

    • Ka tuki pala ne te fatu o te Malo a te tupua (44, 45)

  • Ko fakaaloalo a Tanielu ne te tupu (46-49)

2  I te lua tausaga o tena pulega fakatupu, e isi ne nai moemiti a Nepukanesa, kae ne manavase+ malosi a ia,* telā ne seki mafai ei a ia o moe.  Tenā ne fai atu ei te fakatonuga a te tupu ke ‵kami mai a faitaulaga faivailakau, tino faivailakau, tino fai tapune mo tino Kaletaia* ke fakamatala atu ki te tupu ana moemiti. Tenā ne o‵mai ei latou kae ‵tu i mua o te tupu.+  Kae ne fai atu te tupu ki a latou: “E isi saku moemiti, kae e manavase au me e fia iloa ne au taku moemiti.”  Ne tali atu a tino Kaletaia ki te tupu i te ‵gana Alamaika:*+ “Ke ola leva koe e te tupu. Fakamatala mai te moemiti ki au tavini, kae ka fakamatala atu ne matou tena uiga.”  Ne tali atu te tupu ki tino Kaletaia: “Konei eiloa aku toe pati: Kafai e se fakamatala mai ne koutou a te moemiti ki a au, fakatasi mo tena uiga, a koutou ka katikati valevale, kae ko otou fale ka ‵fuli ke fai mo falevatie o tino.  Kae kafai e fakamatala mai ne koutou a te moemiti fakatasi mo tena uiga, ka maua ne koutou mai i a au a meaalofa mo se taui mo se tulaga fakaaloalogina.+ Tela la, fakamatala mai ki a au a te moemiti mo tena uiga.”  Ne tali atu latou i te lua o taimi: “Ke fakamatala mai ne te tupu a te moemiti ki ana tavini, kae ka fakamatala atu ne matou a tena uiga.”  Ne tali atu te tupu: “E iloa ‵lei ne au me e taumafai koutou o fakalevaleva te taimi, me ko iloa ne koutou aku toe pati.  Kafai e se fakamatala mai ne koutou a te moemiti ki a au, e tasi fua te fakasalaga mō koutou katoa. Kae ko koutou ne lotoma‵lie o fakamatala mai ki a au se mea sē tonu kae loi ke oko ki te taimi ko ma‵fuli ei a mea. Tela la, fakamatala mai te moemiti, kae ka iloa ei ne au me e mafai eiloa ne koutou o fakamatala tena uiga.” 10  Ne tali atu a tino Kaletaia ki te tupu: “E seai se tagata i te lalolagi* e mafai o fai ne ia te mea e manako ki ei te tupu, me e seai se tupu sili io me se kovana kai fakamolemole mai ki se vaegā mea penei ki se faitaulaga faivailakau io me se tino faivailakau io me se tino Kaletaia. 11  A te mea e fakamolemole mai ki ei te tupu e faigata, kae e seai se tino ola e mafai o fakamatala atu ne ia te mea tenei ki te tupu kae ko atua fua kolā e se ‵nofo fakatasi mo tino.” 12  Ne kaitaua malosi i ei a te tupu kae fakatonu atu ke ‵ta fakapalele a tāgata ‵poto katoa o Papelonia.+ 13  I te taimi ne avatu i ei te fakatonuga kae ko tāgata ‵poto ko pili eiloa o tamate, ne ‵sala foki latou ki a Tanielu mo ana taugasoa ke tamate latou. 14  I te taimi eiloa tenā, ne faipati atu a Tanielu mo te poto mo te fakaeteete ki a Alioka te pule o leoleo a te tupu, telā ne fanatu o tamate a tāgata ‵poto o Papelonia. 15  Ne fesili atu a ia ki a Alioka te ofisa a te tupu: “Kaia ne fai ei ne te tupu se fakatonuga faigata penei?” Tenā ne fakailoa atu ei ne Alioka ki a Tanielu a te mea ne tupu.+ 16  Ne fanatu a Tanielu kae fakamolemole atu ki te tupu ke fakaavanoa mai se taimi ke fakamatala atu ki te tupu a te uiga o te moemiti. 17  Tenā ne fano ei a Tanielu ki tena fale kae fakailoa atu ne ia te mea tenā ki ana taugasoa ko Hanania, Misaeli mo Asalia. 18  Ne fakamolemole atu a ia ki a latou ke ‵talo mō te alofa fakamagalo mai i te Atua o te lagi e uiga ki te mea ‵funa tenei, ko te mea ke se ‵ta fakapalele atu a Tanielu mo ana taugasoa fakatasi mo te ‵toega o tāgata ‵poto o Papelonia. 19  Tenā ne fakaasi atu ei te mea ‵funa ki a Tanielu i se fakaasiga i te po.+ Ne ‵viki atu eiloa a Tanielu ki te Atua o te lagi. 20  Ne folafola mai Tanielu: “Ke ‵viki atu eiloa ki te igoa o te Atua ki te se-gata-mai,*Me i te poto mo te malosi i o ia tokotasi.+ 21  E ‵fuli ne ia a taimi mo tau o aso,+E tapale kea‵tea ne ia a tupu kae faka‵tu aka ne ia a tupu,+E tuku atu ne ia te poto ki tino ‵poto mo te iloa ki tino e ‵loto te lotou malamalama.+ 22  E fakaasi mai ne ia a mea ‵loto mo mea ‵funa,+E iloa ne ia a mea i te pouliga,+Kae e nofo i a ia a te mainaga.+ 23  Te Atua o oku tupuga, ko avatu ne au a te fakafetai mo vikiga ki a koe,Me ne tuku mai ne koe ki a au a te poto mo te ‵mana. Kae nei la ko oti ne fakailoa mai ne koe ki a au a te mea ne fakatagi atu matou ki a koe;Ko oti ne fakailoa mai ne koe ki a matou a te mea e manavase ki ei te tupu.”+ 24  Tenā ne fanatu ei a Tanielu ki a Alioka, telā ne ‵tofi aka ne te tupu ke ‵ta fakapalele ne ia a tāgata ‵poto o Papelonia,+ kae ne fai atu ki a ia: “Ke mo a ma tamate ne koe a tāgata ‵poto o Papelonia. Avatu au ki mua o te tupu kae ka fakamatala atu ne au ki te tupu a te uiga o te moemiti.” 25  Ne puke fakavave ne Alioka a Tanielu ki mua o te tupu kae fai atu ki a ia: “Ne maua ne au se tagata mai tino Iuta+ kolā ne puke fakapagota telā e mafai o fakamatala atu ne ia ki te tupu te uiga o te moemiti.” 26  Ne fai atu te tupu ki a Tanielu, telā e fakaigoa ki a Peletisala:+ “E a, e mafai eiloa ne koe o fakamatala mai ki a au a te moemiti ne lavea ne au mo tena uiga?”+ 27  Ne tali atu a Tanielu ki te tupu: “E seai se tino mai i tāgata ‵poto, tino faivailakau, faitaulaga faivailakau, io me ko tino iloilo fetū e mafai o fakamatala ne ia ki te tupu a te mea ‵funa ne fakamolemole mai a ia ki ei.+ 28  Kae e isi se Atua i te lagi ko te Atua telā e fakaasi mai ne ia a mea ‵funa,+ kae ko oti ne fakailoa ne ia ki te Tupu ko Nepukanesa a te mea ka tupu i te fakaotiotiga o aso fakaoti. Tenei tau moemiti, kae konei a fakaasiga ne lavea ne koe i te taimi ne takato ei koe i tou moega: 29  “E pelā mo koe, e te tupu, i luga i tou moega ne ma‵fuli ei ou mafaufauga ki mea kolā ka ‵tupu i aso mai mua, kae ko te Atua telā e fakaasi mai ne ia a mea ‵funa ko oti ne fakailoa atu ne ia ki a koe a te mea e ‵tau o tupu. 30  Kae penei mo au, a te mea ‵funa tenei ne seki fakaasi mai ki a au ona ko te mea e sili atu toku poto i lō so se tino ola; kae ne fai ke fakamatala atu ei a te uiga o te moemiti ki te tupu ko te mea ke iloa ne koe a mafaufauga i loto i tou loto.+ 31  “Te tupu, a koe ne kilokilo atu kae lavea ne koe se tupua lasi eiloa. A te tupua tenā e maluga kae malapulapu, kae e tu i mua o koe, kae foliga fakamataku. 32  A te ulu o te tupua tenā e faite ki aulo ‵lei,+ a tena fatafata mo ana lima e faite ki siliva,+ a tena tinae mo ana kauaga e faite ki te kopa,+ 33  ana vae e faite ki fiti,+ kae ko ana alofivae e faite ki fiti mo kele.+ 34  Ne kilokilo atu koe ke oko ki te taimi ne ‵kati ei se fatu, ne seki ‵kati ki lima, kae ne poko eiloa i alofivae o te tupua e faite ki fiti mo kele kae ne maofa likiliki.+ 35  I te taimi eiloa tenā a te fiti, te kele, te kopa, te siliva, mo te aulo, a mea katoa konā, ne maofa likiliki kae ne fai pelā me ne kaiga mai i te koga solo saito i te tau ‵vela, kae ne agina ne te matagi a mea konā kae ne seki mafai eiloa o toe maua atu. Kae ko te fatu telā ne poko ki te tupua ne fai pelā me se mauga lasi eiloa, kae ne ufi i ei te lalolagi kātoa. 36  “Tenei te moemiti, kae ka fakamatala atu ne matou ki te tupu a tena uiga. 37  A koe, e te tupu—te tupu o tupu telā ne tuku atu ne te Atua o te lagi a te malo,+ te malosi, te ‵mana mo te ‵malu, 38  kae ne tuku atu ne ia ki ou lima a tāgata i so se koga e ‵nofo latou i ei, e pelā foki mo manu fe‵kai o te vao mo manu eva o te lagi, kae fai foki ne ia ke pule atu ki mea katoa konā+—a koe ko te ulu aulo.+ 39  “Kae mai tua o koe ka tu aka te suā malo,+ e malalo ifo i a koe; ka oti ko te suā malo, ko te tolu, e faite ki te kopa, kae ka pule atu ki te lalolagi kātoa.+ 40  “A te fa o malo ka malosi eiloa e pelā mo te fiti.+ Me e pelā loa mo te fiti e tuki pala kae fakamasei valevale ne ia a mea katoa, ao, e pelā mo te fiti telā e ofa ne ia a mea, ka tuki pala kae ofa ne ia a mea katoa konei.+ 41  “Kae pelā eiloa mo vae mo matikao vae kolā ne lavea ne koe me ne vaega o te kele a te tino faite mea ki kele mo te fiti, a te malo ka mavaevae, kae ka isi se vaega makeke o te fiti i loto i ei, e pelā eiloa mo te fiti telā ne lavea ne koe e palutasi mo te kele malū. 42  Kae e pelā mo matikao vae i alofivae e faite mai i te fiti mo te kele, tela la, a te vaega e tasi o te malo e malosi kae ko te suā vaega e vāivāi. 43  E pelā eiloa mo te laveaga ne koe a te fiti e palutasi mo te kele malū, ka palutasi a mea konā mo tino;* kae ka se mafai o ‵piki fakatasi a te mea e tasi ki te suā mea, e pelā eiloa mo te fiti e se mafai o ‵piki ki te kele. 44  “I aso o tupu konā ka fakatu aka ei ne te Atua o te lagi se malo+ telā ka se mafai o fakaseai.+ Kae ko te malo tenei ka se tuku atu ki se isi atufenua.+ Ka tuki pala kae fakaseai ne ia a malo katoa konei,+ kae ka tumau eiloa a te malo tenā ki te se-gata-mai,+ 45  e pelā eiloa mo te laveaga ne koe a te fatu telā ne ‵kati mai i luga i te mauga kae ne seki ‵kati ki lima o se tino, kae ne to atu ki luga i te fiti, te kopa, te kele, te siliva, mo te aulo.+ Ko oti ne fakailoa atu ne te Atua Sili ki te tupu a te mea ka tupu i aso mai mua.+ A te moemiti se mea tonu, kae ko tena uiga e fakatuagagina.” 46  Tenā ne totuli ifo ei a te Tupu ko Nepukanesa kae fakasiga ifo mo ana mata e ‵fuli ki te laukele i mua o Tanielu kae fakaaloalo atu ki a ia. Kae ne fai atu tena fakatonuga ke ofo atu se meaalofa mo mea manogi gali ki a ia. 47  Ne fai atu te tupu ki a Tanielu: “E tonu, a tou Atua se Atua o atua mo te Aliki o tupu mo te Atua telā e fakaasi mai ne ia a mea ‵funa, me e mafai ne koe o fakaasi mai te mea ‵funa tenei.”+ 48  Tenā ne fakamaluga aka ei ne te tupu a Tanielu kae tuku atu ki a ia a meaalofa ‵lei e uke, kae ne fai ne ia a Tanielu ke fai mo pule i kogā fenua katoa o Papelonia+ mo te takitaki foki o tāgata ‵poto katoa o Papelonia. 49  Kae mai i te fakatagi a Tanielu, ne fakasopo aka ei ne te tupu a Satalaka, Mesako mo Apeteniko+ ke pulepule ne latou a mea e fai i te kogā fenua o Papelonia, kae ko Tanielu ne tavini atu i te fale o te tupu.

Fakamatalaga mai lalo

Epelu, “tena agaga.”
Telā se potukau o tino ‵poto i te fakataulaitu mo te iloiloga o fetū.
A te Tan 2:4e ke oko ki te 7:28 ne tusi eiloa i te ‵gana Alamaika.
Io me “laukele malō.”
Io me “mai te se-gata-mai ki te se-gata-mai.”
Io me “tama a tino,” kolā ko tino masani.