Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Ne a Mea e Akoako ‵Tonu Mai i te Tusi Tapu?

 MATAUPU E FITU

Te Fakamoemoega Tonu mō Ou Tino Pele Kolā ko ‵Mate

Te Fakamoemoega Tonu mō Ou Tino Pele Kolā ko ‵Mate
  • E iloa pefea ne tatou me ka toe ‵tu mai a tino ‵mate?

  • E pefea a lagonaga o Ieova e uiga ki te toe‵tuga o tino ‵mate?

  • Ko oi ka toe‵tu mai?

1-3. Se a te fili telā e se mafai o ‵sao tatou mai i ei, kae kaia e fakamafanafana loto ei a te mafaufau ki mea kolā e akoako mai i te Tusi Tapu?

MAFAUFAU la me ko tele koe keatea mai se fili amio fakasauā. E malosi kae makini fakafia atu te fili tenā i a koe. E iloa ne koe me e seai eiloa sena alofa me ko oti ne lavea ne koe te tamatega ne ia o ou taugasoa. Faitalia eiloa tou tele keatea mai i a ia, e momea aka eiloa tena pili atu ki a koe. E foliga mai me ko seai eiloa sou fakamoemoega. Kae e poi eiloa koe me ko tu fakapulele mai se tino o fesoasoani atu ki a koe. E sili fakafia atu tena malosi i tou fili, kae e tauto atu foki te tino tenā me ka fesoasoani atu a ia ki a koe. Ka pelā aka eiloa koe!

2 E fai pelā me ko tuli eiloa koe ne se vaegā fili penā. E penā loa tatou katoa. E pelā mo te mea ne suke‵suke tatou ki ei i te suā mataupu, e fai mai te Tusi Tapu me i te mate ko te ‵tou fili. E seai eiloa se tino i a tatou e mafai o sao mai i ei. Ko oti foki ne matea ne te tokoukega o tatou a te tamatega ne te fili tenei a ‵tou tino pele. Kae sili fakafia atu te malosi o Ieova i lō te mate. A ia ko te ‵tou Tino fakasao telā e alofa mai kae ko oti ne fakamaoni mai ne ia me e mafai o fakatakavale ne ia te fili tenei. Kae e tauto mai foki a ia me ka fakaseai katoatoa atu ne ia te fili tenei, ko te mate. E akoako mai i te Tusi Tapu, penei: “A te ‵toe fili e ‵tau o fakatakavale, ko te mate.” (1 Kolinito 15:26) Ko oko eiloa i te gali o te tala tenā!

 3 Ke onoono malie aka tatou me ne a mea e ‵tupu ki a tatou māfai ko oko mai te fili tenā, ko te mate. Ka fesoasoani mai te mea tenei ke malamalama tatou i se mea telā ka fai ei tatou ke fia‵fia. E tonu, e folafola mai a Ieova me ka toe faka‵tu mai ne ia a tino ‵mate. (Isaia 26:19) Ka toe fakaola mai eiloa a latou. Tenā eiloa te fakamoemoega o te toe‵tuga.

KO TE MATE O SE TINO PELE

4. (a) Kaia e momea aka ei te ‵tou malamalama e uiga ki lagonaga o Ieova ona ko mea kolā ne fai ne Iesu i te mate o tena taugasoa? (e)  Ko oi ne fai mo taugasoa pele o Iesu?

4 E a, ko oti ne mate atu sou tino pele? Kāti e faigata ke fa‵ki koe i te logo‵mae, te fanoanoa, mo te fi‵tā telā e oko mai i ei. I vaegā taimi penā, e ‵tau o ‵saga atu tatou ki te Muna a te Atua mō fakamafanafanaga. (Faitau te 2 Kolinito 1:3, 4) E fesoasoani mai te Tusi Tapu ke malama‵lama tatou i lagonaga o Ieova mo Iesu e uiga ki te mate. Ne iloa ne Iesu, telā ko te fakatusa ‵lei katoatoa o tena Tamana, a te faigata māfai ko mate sou tino pele. (Ioane 14:9) I te taimi ne nofo ei a ia i Ielusalema, ne āsi sāle atu a Iesu ki a Lasalo mo ana tuagane, ko Malia mo Maleta, kolā ne ‵nofo i se fa‵kai pili mai, ko Petania. Ne ‵pili ‵ki te lotou va fakataugasoa. E fai mai te Tusi Tapu, penei: “Ne alofa a Iesu ki a Maleta mo tona taina, pelā foki ki a Lasalo.” (Ioane 11:5) Kae ne mate a Lasalo, e pelā mo te mea ko iloa ne tatou mai i te suā mataupu.

5, 6. (a) Ne pefea a lagonaga o Iesu i te taimi ne ‵nofo fakatasi ei a ia mo kāiga mo taugasoa fanoa‵noa o Lasalo? (e) Kaia e fakamalosi mai ei ki a tatou te fanoanoa tenā o Iesu?

5 Ne pefea a lagonaga o Iesu i te mate o tena taugasoa? E fai mai te tala me ne fanatu a Iesu ki kāiga mo taugasoa o Lasalo kolā ne fanoa‵noa i tena mate. I te laveaga ne ia, ne otia tena loto. Ne ‘lagona ne ia te ‵mae o tena loto, mo te fi‵ta o tena mafaufau.’ Tela la, e fai mai te tala me ne “tagi Iesu.” (Ioane 11:33, 35) E mata, ne fakauiga te fanoanoa o Iesu me e seai sena fakamoemoega? E se tāitāi eiloa. A te ‵tonuga loa, ne iloa ne Iesu me ko pili o tupu se mea gali. (Ioane 11:3, 4) Kae e tiga  eiloa te feitu tenā, ne lagona ne ia te logo‵mae mo te fanoanoa kolā e māfua mai i te mate.

6 E pelā me e fakamalosi mai te fanoanoa tenā o Iesu. E akoako mai i ei ki a tatou, me e se fia‵fia a Iesu mo tena Tamana, ko Ieova, ki te mate. Kae e mafai ne Ieova te Atua o ‵teke atu kae manumalo foki i te fili tenā! Ke onoono aka tatou me ne a mea ne fai ne Iesu ona ko te malosi mai te Atua.

“LASALO, VAU KI TUA!”

7, 8. Kaia ne foliga mai ei me ko seai eiloa se fakamoemoega mō Lasalo i te kilokiloga a tino kolā ne ‵nofo atu i konā, kae ne a mea ne fai ne Iesu?

7 Ko oti ne tanu a Lasalo i loto i se ana, kae ne fai atu a Iesu ke ave keatea te fatu telā e ‵pono i ei. Kae ne pati ‵pole atu a Maleta me kāti ko manogi masei te foitino o Lasalo ona ko te mea ko fa a aso ne tanu ei a ia. (Ioane 11:39) I manatu o tino ko seai eiloa se fakamoemoega mō Lasalo, i ne?

Ne fia‵fia malosi a tino i te toetuga o Lasalo.—Ioane 11:38-44

8 Ne ave keatea te fatu, kae ne pakalaga atu a Iesu i se leo lasi, penei: “Lasalo, vau ki tua!” Se a te mea ne tupu? “Ne vau ei ki tua te tino ne mate.” (Ioane 11:43, 44) Se a la tau faka‵tau ki te lasi o te fia‵fia o tino i konā? Ne iloa katoa ne tuagane, kāiga, taugasoa, mo tuakoi o Lasalo me i a ia ne mate. Kae ne toe tu mai te tagata gali tenā. Kāti ne fui tali‵tonu latou ki ei. Kae kāti ne ‵sai atu mo te fiafia a tino e tokouke ki a Lasalo. Ko tafaga la te gali o te manumalo tenā i te mate!

Ne toe fakaola aka ne Elia te tamaliki a te fafine ko mate tena avaga.—1 Tupu 17:17-24

9, 10. (a) Ne fakaasi mai pefea ne Iesu me i ōi te ‵mana ne faka‵tu aka ei ne ia a Lasalo? (e) Ne a nisi mea aogā e mafai o maua māfai e fai‵tau tatou ki tala i te Tusi Tapu e uiga ki toe‵tuga?

9 Ne seki fai ne Iesu te vavega fakaofoofogia tenei i tena ‵mana eiloa. I tena ‵talo mai mua o tena kalagaatuga ki a Lasalo, ne fakaasi manino mai i ei me ne māfua mai i a Ieova te toetuga tenā. (Faitau te Ioane 11:41, 42) E se tenā fua te taimi ne fakaaogā ei ne Ieova tena malosi i se vaegā auala penā. E aofia te tala o te toetuga o Lasalo i tala e iva o toe‵tuga kolā ne tusi ki lalo i te Muna a te Atua. * Se mea fakafiafia ke faitau  kae sukesuke ki tala konei. E akoako mai i ei ki a tatou me e se fakailoga tino a te Atua, me ne aofia a tama‵liki mo tino ma‵tua, fāfine mo tāgata, tino Isalaelu mo tino mai fenua fakaa‵tea i tino kolā ne toe‵tu. Kae ko se faka‵tau eiloa te fia‵fia o tino i tala konei! E pelā mo te taimi e tasi ne fakatu aka ei ne Iesu se tamaliki fafine mai te mate, “ko oko eiloa i te ofo” o ana mātua. (Maleko 5:42) E tonu, ne fai ne Ieova ke maua ne latou se vaegā fiafia telā ne seki mafai o toe puli i a latou.

Ne toe fakatu aka ne te apositolo ko Petelu a te fafine Kelisiano ko Tokasi.—Galuega 9:36-42

10 E tonu, ne toe ‵mate fakamuli a tino kolā ne faka‵tu aka ne Iesu. E mata, ko tena uiga me e se aogā te lotou toe‵tumaiga? E se penā loa. E fakamaoni mai ne tala konei i te Tusi Tapu a muna‵tonu tāua konei kae e tuku mai foki i ei ki a tatou se fakamoemoega.

TE AOGĀ O TALA O TINO KOLĀ NE TOE‵TU MAI

11. E fesoasoani mai pefea te tala o Lasalo ke fakamaoni aka ei te munatonu i te Failauga 9:5?

11 E akoako mai te Tusi Tapu me i tino ‵mate “e seai se mea a latou e iloa.” E se toe ola io me e mafau‵fau latou i se koga. E fakamaoni mai ne te tala o Lasalo te munatonu tenei. I te taimi ne toe ola mai ei a ia, e mata, ne fai ne Lasalo a tino ke ofo i ana fakamatalaga e uiga ki te lagi? Io me e mata, ne fakamatakutaku ne ia latou ki tala e uiga ki te afi ‵ka ulaula i seoli? Ikai. E seai eiloa ne vaegā fakamatalaga penā a Lasalo i te Tusi Tapu. I aso e fa ne mate ei a ia, ne ‘seai eiloa sena mea e iloa.’ (Failauga 9:5) Ne moe eiloa a Lasalo i te mate.—Ioane 11:11.

12. Kaia e mafai ei o tali‵tonu katoatoa tatou me ne toetu mai Lasalo?

12 E akoako mai foki te tala o Lasalo me i te toe‵tuga se mea tonu eiloa, kae e se se tala ‵kai fua. Ne fakatu aka ne Iesu a Lasalo i mua o tino e tokouke kolā ne molimau tonu atu ki ei. Ke oko foki eiloa ki takitaki lotu, kolā ne takalia‵lia ki a Iesu, ne seki mafai o fakafiti ne latou te vavega tenei. I lō te fai penā, ne fai atu latou, penei: “Se a te mea ka fai ne tatou? A fakailoga fakaofoofogina katoa, ko fai ne te tagata tenei [ko Iesu]!” (Ioane 11:47) Ne olo atu a tino e tokouke o onoono ki te tagata telā ne toetu mai. Ne fakatuanaki i ei a tino e tokouke  ki a Iesu. Ne lavea atu ne latou te fakamaoniga i te toe ola mai o Lasalo me ne uga mai a Iesu ne te Atua. Ne malosi ‵ki eiloa te fakamaoniga tenei, telā ne taumafai ei a takitaki lotu Iutaia loto ma‵keke o tamate a Iesu mo Lasalo.—Ioane 11:53; 12:9-11.

13. Se a te fakavae o te ‵tou talitonuga me e mafai eiloa o toe fakaola mai ne Ieova a tino ‵mate?

13 E mata, se mea valea fua ke talitonu ki te toetuga? Ikai, me ne akoako mai a Iesu me ka isi se aso telā ka toe‵tu mai i ei a “latou katoa kolā e [‵nofo] i loto i tanuga.” (Ioane 5:28) Ne faite ne Ieova a mea ola katoa. E se ‵tau o faigata ke tali‵tonu tatou me e mafai o toe fakaola mai ne ia a tino, i ne? Ke fai penā, e ‵tau o masaua ne Ieova a ‵tou tino pele kolā ko ‵mate. E mata, e mafai o masaua ne ia latou katoa? E ‵fonu te lagi i te fia tiliona o fetu, kae e iloa ne te Atua a igoa o fetu taki tasi katoa konā! (Isaia 40:26) Tela la, e mafai o masaua ne Ieova te Atua a mea likiliki katoa e uiga ki ‵tou tino pele kolā ko ‵mate kae e mafai foki o toe fakaola mai ne ia latou.

14, 15. E pelā mo te mea ne fakaasi mai i pati a Iopu, e pefea a lagonaga o Ieova e uiga ki te toe fakaola mai o tino ‵mate?

14 E pefea a lagonaga o Ieova e uiga ki te toe faka‵tumaiga o tino ‵mate? E akoako mai te Tusi Tapu me e olioli eiloa a ia ke toe fakaola mai a tino ‵mate. Ne fesili atu te tagata fakamaoni ko Iopu, penei: “Kafai e mate se tagata, e mata e mafai o toe ola mai?” Ne faipati a Iopu e uiga ki tena faka‵tali i te tānuga ke oko ki te taimi e masaua ei ne te Atua a ia. Ne fai atu a ia ki a Ieova, penei: “Ka kalaga mai koe, kae tali atu au, kae ka fiafia ei koe ki a au, tau mea ola ne faite.”—Iopu 14:13-15.

15 Mafaufau la! E olioli eiloa a Ieova ke toe fakaola mai ne ia a tino ‵mate. E mata, e se otia ‵tou loto ke iloa atu me e penā eiloa a lagonaga o Ieova? Kae e a te toe‵tuga i aso mai mua nei? Ko oi ka toe‵tu mai, kae ki fea?

‘LATOU KATOA KOLĀ E ‵NOFO I LOTO I TĀNUGA’

16. Ne a vaegā fakanofonofoga ka faka‵tu aka ki ei a tino ‵mate?

16 A tala i te Tusi Tapu e uiga ki toe‵tuga o tino, e akoako  mai i ei ki a tatou a mea e uke atu e uiga ki te toe‵tuga i aso mai mua. A tino kolā ne toe faka‵tu mai ki te lalolagi nei, ne toe fetaui mo olotou tino pele. Ka tai ‵pau foki eiloa te toe‵tuga i aso mai mua—kae ka sili atu eiloa tena ‵lei. E pelā mo te mea ko iloa ne tatou i te Mataupu e 3, a te fuafuaga a te Atua ko te faiga o te lalolagi kātoa mo fai se palataiso. Tela la, kafai ko toe‵tu mai a tino ‵mate, ka se toe ai ne taua, amioga solitulafono, mo masaki i te lalolagi nei. Ka maua ne latou te avanoaga ke ola ki te se-gata-mai i te lalolagi tenei i fakanofonofoga filemu kae fia‵fia.

17. E pefea te tokouke o tino kolā ka toe‵tu mai?

17 Ko oi ka toe‵tu mai? Ne fai mai a Iesu me ka “lagona ei a tena leo [te leo o Iesu] ne latou katoa kolā e [‵nofo] i loto i tānuga, kae ka ulu mai ei latou ki tua.” (Ioane 5:28, 29) E tai ‵pau a pati i te Fakaasiga 20:13: “Ne tuku ake foki ne te tai ona tino ‵mate. A te mate mo Seoli ne tuku ake foki ne laua a lā tino ‵mate.” E fakauiga a “Seoli” ki te tānuga masani o tino. (Ke onoono ki Mataupu Fakaopoopo, i te itulau e 212-213.) Ka toe‵tu mai a tino katoa i tānuga konā. Ka toe ola mai te fia piliona o tino kolā ko ma‵lōlō nei i konā. Ne fai mai te apositolo ko Paulo, penei: “Me i tino ‵lei mo tino sē ‵lei, ka faka‵tu mai katoa mai te mate.” (Galuega 24:15) Se a te uiga o te mea tenā?

Ka toe‵tu mai a tino ‵mate kae ka toe fetaui latou mo olotou tino pele i te Palataiso

18. Ko oi e aofia i “tino ‵lei” kolā ka toe faka‵tu mai, kae e aogā pefea te fakamoemoega tenei ki a koe?

18 E aofia i “tino ‵lei” konā a te fia o tino kolā e fai‵tau tatou ki ei i te Tusi Tapu kae ne ola a koi tuai o vau Iesu ki te lalolagi. Kāti ko mafaufau koe ki a Noa, Apelaamo, Sala, Mose, Luta, Eseta, mo nisi tino aka foki e tokouke. E laulau mai a igoa o nisi tāgata mo fāfine fakatuanaki konei i te mataupu e 11 o te Epelu. Kae e aofia foki i “tino ‵lei” a tavini a Ieova kolā e ‵mate i ‵tou aso nei. Ona ko te fakamoemoega ki te toe‵tu, ko se toe ma‵taku ei tatou ki te mate.—Epelu 2:15.

19. Ko oi a “tino sē ‵lei,” kae se a te avanoaga e tuku atu ne Ieova mo te kaimalie ki a latou?

19 Kae e a tino kolā e se tavini atu io me se faka‵logo ki a  Ieova ona ko te mea ne seki iloa aka eiloa ne latou a ia? Ka se puli atu foki a te fia piliona o “tino sē ‵lei” konei. Ka toe faka‵tu mai latou kae tuku atu se taimi ke tauloto latou e uiga ki te Atua tonu kae ke tavini atu foki ki a ia. I te vaitaimi o te afe tausaga, ka toe faka‵tu mai a tino ‵mate kae tuku atu se avanoaga ki a latou ke ‵kau atu ki tino fakamaoni i te lalolagi i te tavini atu ki a Ieova. Ka gali ‵ki eiloa te taimi tenā. Tenā eiloa te vaitaimi telā e fai mai te Tusi Tapu me ko te Aso Fakamasino. *

20. Se a Kēna, kae ko oi e olo ki ei?

20 E mata, e fakauiga i ei me ka toe faka‵tu mai a tino katoa kolā ne ola? Ikai. E fai mai te Tusi Tapu me e olo atu a nisi tino ‵mate ki “Kēna.” (Luka 12:5) Ne māfua mai te igoa o Kēna mai te koga ‵pei kaiga i tua o te fa‵kai mua o Ielusalema. Ne masani o ‵sunu i ei a foitino ‵mate mo kaiga. Ne ma‵natu sāle a tino lutaia me e se ‵tau o tanu faka‵lei kae toe‵tu mai a tino kolā ne ‵pei atu olotou foitino ‵mate ki te koga tenā. Tela la, se mea ‵tau ke fai Kēna mo fai te fakailoga o te fakaseaiga ki te se-gata-mai. E tiga eiloa ka isi se tusaga o Iesu i te fakamasinoga o tino ola mo tino ‵mate, a te ‵toe Famasino sili ko Ieova. (Galuega 10:42) Ka se fakaola mai eiloa ne ia a tino kolā e fakamasino aka ne ia me e ma‵sei kae e se fia ‵fuli.

TE TOE‵TUGA KI TE LAGI

21, 22. (a) Se a te suā toe‵tuga? (e) Ko oi te tino muamua ne toe tu ki te ola faka-te-agaga?

21 E fakasino atu foki i te Tusi Tapu ki te suā vaegā toetuga, ko te toetuga e pelā me se tino faka-te-agaga ki te lagi. E tasi ‵pau eiloa te tala o te vaegā toetuga tenei i te Tusi Tapu, ko te toetuga o Iesu Keliso.

22 Mai tua o te tamatega o Iesu e pelā me se tagata faka-te-foitino, ne seki talia ne Ieova ke tumau Tena Tama fakamaoni i te tānuga. (Salamo 16:10; Galuega 13:34, 35) Ne toe fakatu aka ne te Atua a Iesu, kae ne seki fakatu aka ne ia a Iesu e pelā  me se tagata faka-te-foitino. E fakamatala mai ne te apositolo ko Petelu me i a Keliso ne mate “faka te foitino, kae ne toe ola a ia faka te Agaga.” (1 Petelu 3:18) A te mea tenei se matugā vavega lasi eiloa. Ne toe fakaola mai a Iesu e pelā me se tino faka-te-agaga telā e malosi ‵ki! (Faitau te 1 Kolinito 15:3-6) A Iesu ko te tino muamua eiloa ke maua ne ia te vaegā toetuga ‵malu tenei. (Ioane 3:13) Kae e isi aka foki a nisi tino kolā ka aofia i te toe‵tuga tenā.

23, 24. Ko oi e aofia i te “lafu foliki” a Iesu, kae e tokofia latou?

23 Ona ko te mea ko iloa ne Iesu me ko pili o foki atu a ia ki te lagi, ne fai atu ei a ia ki ana soko fakamaoni me ka “fakatoka” ne ia se ‘koga ‵nofo’ mō latou i konā. (Ioane 14:2) Ne fakasino atu a Iesu ki tino kolā e olo atu ki te lagi e pelā me ko tena “lafu foliki.” (Luka 12:32) E tokofia ka aofia i te potukau foliki tenei o Kelisiano fakamaoni? E fai mai penei te apositolo ko Ioane i te Fakaasiga 14:1: “Ne kilo atu au, matea ei ne au a te Tamā Mamoe ko Iesu e tu mai i te Mauga o Siona; kae ‵tusa mo te toko selau fasefulu fa afe tino e ‵tu mai mo ia, kolā e tusi ei o lā igoa mo tona Tamana i olotou lae.”

24 A Kelisiano e toko 144,000 konei, e aofia i ei a apositolo fakamaoni a Iesu, e toe faka‵tu aka ki te ola i te lagi. Ko te taimi fea e ‵tau ei o kamata te lotou toe‵tuga? Ne tusi mai te apositolo ko Paulo me e ‵tau o toe‵tu aka a tino konā i te taimi e fai ei a Keliso mo fai te Tupu. (1 Kolinito 15:23) E pelā mo te mea ka iloa atu ne koe i te Mataupu e 9, ko ‵nofo atu nei tatou i te taimi tenā. Tela la, a te ‵toega o nāi tino o te toko 144,000 kolā e ‵mate nei, ka faka‵tu fakavave aka latou ki te ola i te lagi. (1 Kolinito 15:51-55) Kae ka toe faka‵tu aka te tokoukega o tino i aso mai mua nei ki te ola i te lalolagi Palataiso.

25. Se a te mea ka suke‵suke tatou ki ei i te suā mataupu?

25 E tonu, ka fakatakavale eiloa ne Ieova te ‵tou fili ko te mate, kae ka fakaseai atu foki ki te se-gata-mai! (Faitau te Isaia 25:8) Kae kāti ka fesili mai koe, ‘Ne a mea ka fai ne tino kolā e toe faka‵tu aka ki te lagi māfai ko ‵nofo atu latou i konā?’ Ka aofia latou i te pulega gali o te Malo i te lagi. Ka suke‵suke tatou ki mea e uke atu e uiga ki te malo tenā i te suā mataupu.

^ pala. 9 E maua a nisi tala i te 1 Tupu 17:17-24; 2 Tupu 4:32-37; 13:20, 21; Mataio 28:5-7; Luka 7:11-17; 8:40-56; Galuega 9:36-42; mo te 20:7-12.

^ pala. 19 Ke maua a nisi fakamatalaga e uiga ki te Aso Fakamasino, ke onoono ki Mataupu Fakaopoopo, te itulau e 213-215.