Se Fakaasiga ki a Ioane 22:1-21
22 Kae ne fakaasi mai ne ia ki a au te vaitafe o te vai o te ola,+ e ‵ma e pelā me se kilasi, e ‵tafe mai i te nofogaaliki o te Atua mo te Tamā Mamoe+
2 i te kogaloto o tena auala lasi. I feitu e lua o te vaitafe ko lakau o te ola kolā e ‵fua mai i ei a fuataga e 12, kae e ‵fua mai olotou fuataga i masina takitasi. Kae ko lau o lakau konā e aoga mo faka‵lei a ma‵saki o atufenua.+
3 Kae ka se toe ai se malaia. Kae ko te nofogaaliki a te Atua mo te Tamā Mamoe+ ka tu i loto i te fakai, kae ka avatu ne ana pologa te taviniga tapu ki a ia;
4 kae ka matea ne latou ana mata,+ kae ka tusi tena igoa i olotou lae.+
5 Ka se toe ai foki se po,+ kae ka se ma‵nako latou ki te mainaga mai i se moli io me ko te la, me ka fakamaina atu ne Ieova* te Atua a te mainaga ki a latou,+ kae ka pule atu latou e pelā me ne tupu ki te se-gata-mai, se-gata-mai eiloa.+
6 Ne fai mai a ia ki a au: “A pati konei e fakamaoni* kae ‵tonu;+ ao, a Ieova* te Atua telā ne fakaosofia ne ia te kau pelofeta,+ ne uga mai ne ia tena agelu ke fakaasi atu ki ana pologa a mea kolā ko pili o ‵tupu.
7 Kiloke! Au ka fanatu fakavave.+ E fiafia eiloa so se tino telā e fakalogo ki pati i te valoaga i te peluga tusi tenei.”+
8 Au ko Ioane telā ne lagona kae matea ne au a mea konei. I te taimi ne lagona kae matea ne au a mea konei, ne fakasiga ifo au o tapuaki i vae o te agelu telā ne fakaasi mai ne ia a mea konei.
9 Kae ne fai mai a ia ki a au: “Fakaeteete! Sa fai te mea tenā! Au se taina pologa fua o koe mo ou taina ko te kau pelofeta mo latou kolā e faka‵logo ki pati i te peluga tusi tenei. Tapuaki ki te Atua.”+
10 Ne fai mai foki a ia ki a au: “Sa ‵pono ne koe a pati o te valoaga i te peluga tusi tenei, me ko pili mai te taimi ne fuafuagina.
11 A te tino telā e se amiotonu, ke na tumau i te sē amiotonu, kae ko te tino telā e lailai ke na tumau i ana faifaiga lai‵lai; kae ko te tino amiotonu ke tumau eiloa i te amiotonu, kae ko te tino tapu ke tumau eiloa i te tapu.
12 “‘Kiloke! Au ka fanatu fakavave, kae e fanatu mo au te taui telā e tuku atu ne au ki tino taki tokotasi e ‵tusa eiloa mo olotou galuega ne fai.+
13 Au ko te Alefa mo te Omeka,*+ te tino muamua mo te tino fakaoti, te kamataga mo te fakaotiga.
14 E fia‵fia a latou kolā e ‵ta olotou gatu ‵loa,+ ko te mea ke maua ne latou te saolotoga ke olo atu ki lakau o te ola+ ko te mea ke talia latou ke ulu ki loto i te fakai i ana mataloa.+
15 I tua o te fakai ko kuli* mo tino faivailakau mo tino kolā e fina ki amioga fakatauavaga sē ‵tau* mo tino tatino mo tino ifo ki tupua mo tino katoa kolā e fia‵fia ki te loi kae e pati ‵loi faeloa.’+
16 “‘Ko au, ko Iesu, ne uga atu ne au taku agelu ke molimau atu ki a koutou e uiga ki mea konei mō fakapotopotoga. Au ko te aka mo te tama a Tavita+ mo te fetū o te vaveao.’”+
17 Kae e fai mai faeloa te agaga mo te fafine ka fakaipoipo,+ “Vau!” kae ko so se tino e lagona ne ia ke na fai atu, “Vau!” kae ko so se tino e fiainu ke na vau;+ so se tino telā e manako ki ei ke na puke ki te vai o te ola e aunoa mo se ‵togi.+
18 “E molimau atu au ki tino katoa kolā e lagona ne latou a pati o te valoaga i te peluga tusi tenei: Kafai e fakaopoopo ne se tino se mea ki mea konei,+ ka fakaopoopo atu ne te Atua ki a ia a mala kolā ne tusi i te peluga tusi tenei;+
19 kae kafai e ave kea‵tea ne se tino se mea mai i pati i te peluga tusi o te valoaga tenei, ka ave kea‵tea ne te Atua tena tusaga mai i lakau o te ola+ mo te fakai tapu,+ ko mea kolā ne tusi e uiga ki ei i te peluga tusi tenei.
20 “A te tino telā e molimau e uiga ki mea konei e fai mai, ‘Ao, au ka fanatu fakavave.’”+
“Amene! Vau, e te Aliki ko Iesu.”
21 Ke i luga i tino tapu a te alofa tauanoa o te Aliki ko Iesu.
Fakamatalaga mai lalo
^ Io me “fakatuagagina.”
^ Ko tena uiga: te kamataga mo te fakaotiga. A te Alefa mo te Omeka ko te mataimanu muamua mo te mataimanu fakaoti i te fakasologa o mataimanu i te ‵gana Eleni.
^ Ko tino kolā e fai ne latou a faifaiga kolā e fakatakalialia i te kilokiloga a te Atua.
