Failauga 8:1-17

  • Te ‵nofo mai lalo i pulega a tino sē ‵lei katoatoa (1-17)

    • Fakalogo ki tulafono a te tupu (2-4)

    • A te pulega a te tagata e maua i ei te logo‵mae (9)

    • Māfai e seki fai fakavave se fakasalaga (11)

    • ‵Kai, inu kae fia‵fia (15)

8  Ko oi e ‵pau mo te tagata poto? Ko oi e iloa ne ia te faka‵leiga ki se fakalavelave?* A te poto o te tagata e fakamaina mai ne ia ana mata kae fai i ei ke galo tena mata fanoanoa.  Aku muna: “Fakalogo ki fakatonuga a te tupu+ e ‵tusa eiloa mo te tautoga ne fai ki te Atua.+  Ke mo a ma fakava‵vave o fano kea‵tea mai i ana mua.+ Ke mo a ma ‵lago atu ki se mea masei;+ me e mafai eiloa ne ia o fai so se mea e fiafia a ia ki ei,  me e malosi ‵ki te fakatonuga a te tupu;+ ko oi e mafai o fai atu ki a ia, ‘Ne a au mea e fai?’”  A te tino e fakalogo ki te tulafono ka se oko ki ei a logo‵maega,+ kae ko te tino e poto tena loto ka iloa ne ia te taimi tonu mo te faifaiga e ‵tau o fai.+  E isi eiloa se taimi mo te faifaiga e ‵tau o fai ki mea katoa,+ ona ko fakalavelave o tino ko oko eiloa i te uke.  Ona ko te mea e seai se tino e iloa ne ia te mea ka tupu, ko oi e mafai o fai atu ki a ia a te auala ka tupu ei te mea tenā?  E pelā mo te tagata e seai sena pule i te malosi o te ola* io me mafai o taofi aka ne ia te malosi o te ola, tela la, e seai se tino e isi sena pule i te aso o te mate.+ E pelā mo te sē talia ke tiakina ne se sotia te faiga o se taua, ka se talia foki ne te amioga masei ke ‵sao* a latou kolā e amio ma‵sei.  Ne lavea ne au a mea katoa konei, kae ne tuku atu ne au toku loto ki galuega katoa kolā e fai i lalo o te la, i te taimi ne pule ei te tagata ki te suā tagata kae logo‵mae i ei.+ 10  Kae ne lavea ne au a tino amio ma‵sei e tanu, ko latou kolā ne masani o olo sāle ki loto kae toe ‵foki ki tua mo te koga tapu, kae fakamuli ifo ko fakapuli atu latou i te fakai telā ne fai ei ne latou a mea konā.+ A te mea foki tenei e seai se aoga. 11  Ona ko te mea e seki fai fakavave se fakasalaga ki se amioga masei ne fai,+ ko fai ei ke loto ma‵keke a tāgata o toe fai a mea ma‵sei.+ 12  E tiga eiloa e fai ne se tino agasala a mea ma‵sei fakaselau taimi kae ola i se taimi leva, kae e iloa ne au me e ‵lei atu a mea ka ‵tupu ki a latou kolā e ma‵taku ki te Atua tonu, me e ma‵taku latou ki a ia.+ 13  Kae ka se ‵lei a mea e ‵tupu ki te tino masei,+ kae ka se mafai foki ne ia o fakaleva ana aso kolā e fai pelā me se ata,+ me i a ia e se mataku ki te Atua. 14  E isi se mea sē aoga* telā e tupu i te lalolagi: E isi ne tino amio‵tonu kolā e fai pelā me ne tino amio ma‵sei,+ kae e isi ne tino amio ma‵sei kolā e fai pelā me ne tino amio‵tonu.+ Au e fai atu me i te mea foki tenei e seai se aoga. 15  Tela la, e fakamālō eiloa au ki te fiafia,+ me e seai se mea e ‵lei atu ki se tagata i lalo o te la i lō te kai kae inu kae fiafia; e ‵tau o fai ne ia a mea konei i te taimi e galue malosi ei a ia i aso o tena olaga,+ kolā ne tuku atu ne te Atua tonu ki a ia i lalo o te la. 16  Ne tuku atu ne au toku loto ke ‵sala ki te poto kae ke kilo atu ki mea katoa e ‵tupu i te lalolagi,+ ke oko eiloa ki te sē moe i te ao mo te po.* 17  Tenā ne mafaufau ei au ki galuega katoa ne fai ne te Atua tonu, kae ne iloa aka ne au me e se mafai o malamalama a tino i mea e ‵tupu i lalo o te la.+ Faitalia me pefea te taumafai malosi o tino, e se mafai eiloa o malamalama latou i ei. E tiga eiloa e fai mai latou me iloa ne latou ona ko te lotou ‵poto, e se mafai eiloa o malamalama latou i ei.+

Fakamatalaga mai lalo

Io me “te fakamatalaga o se mea.”
Epelu, “agaga.”
Io me kāti, “a olotou amioga ma‵sei e se mafai o faka‵sao i ei a tino amio ma‵sei.”
Io me “faka‵fiu.”
Io me kāti, “me e se ti ‵moe sāle a tino i te ao mo te po.”