Se Fakaasiga ki a Ioane 14:1-20
14 Tenā ne kilo atu au, kae kiloke! ne tu mai te Tamā Mamoe+ i luga i te Mauga o Siona,+ kae ne ‵tu fakatasi mai mo ia te toko 144,000+ o tino kolā e maua ne latou tena igoa mo te igoa o tena Tamana+ e tusi i luga i olotou lae.
2 Ne lagona ne au se leo e vau mai i te lagi e pelā mo te ‵gulu o vai e uke kae e pelā mo te pa‵pa malosi mai o fa‵tili; kae ko te leo telā ne lagona ne au e pelā mo te kau fai pese kolā e usu olotou pese kae tā‵tā olotou kitala.
3 Kae e usu ne latou se mea e pelā me se pese fou+ i mua o te nofogaaliki kae i mua o manu ola e fa+ mo te kau toeaina,+ kae e seai eiloa se tino e mafai o tauloto ne ia te pese tenā kae na ko te toko 144,000,+ kolā ne ‵togi mai i te lalolagi.
4 Konei a tino kolā ne seki lai‵lai eiloa i fāfine; a te ‵tonuga loa, a latou ne tamafine ‵ma.+ Konei a tino kolā e tau‵tali atu faeloa i te Tamā Mamoe faitalia me tefea te koga e fano a ia ki ei.+ A latou konei ne ‵togi+ mai i tino katoa e pelā me ne fuataga muamua+ ki te Atua mo te Tamā Mamoe,
5 kae e seai se pati loi ne maua i olotou gutu; kae e seai ne olotou pona.+
6 Kae ne matea atu ne au te suā agelu e eva i te vanimonimo,* kae e isi sena tala ‵lei se-gata-mai e folafola atu ki a latou kolā e ‵nofo i te lalolagi, ki atufenua mo matakāiga mo ‵gana mo tino katoa.+
7 Ne fai atu a ia i se leo maluga: “Ma‵taku ki te Atua kae tuku atu te ‵malu ki a ia, me i te itula e fai ei ne ia te fakamasinoga ko oko mai,+ tela la ke tapuaki ki te Atua ne faite ne ia te lagi mo te lalolagi mo te tai+ mo vaipuna.”
8 A te suā agelu, ko te lua o agelu, ne tautali atu i ei, ana muna: “Ko pakū a ia! Ko pakū+ a Papelonia te Sili,+ ko ia telā ne fainu ne ia a atufenua katoa ki te uaina o tena fina* ki amioga fakatauavaga sē ‵tau!”*+
9 A te suā agelu, ko te tolu o agelu, ne tautali atu i a lāua, kae fai atu i se leo maluga: “Kafai e tapuaki atu se tino ki te manu fekai+ mo tena fakatusa kae maua ne ia se fakailoga i tena lae io me i tena lima,+
10 ka inu foki a ia ki te uaina o te kaitaua o te Atua telā e ‵ligi ki tua e aunoa mo se mea e palu ki ei ki te ipu o Tena kaitaua,+ kae ka fakapuapuaga a ia i te afi mo te pauta ‵ka+ i mua o agelu tapu mo te Tamā Mamoe.
11 Kae ko te au o te lotou puapuaga e fanaka ki te se-gata-mai, se-gata-mai eiloa,+ kae e se maua ne latou se malōlōga i te ao mo te po, ko latou kolā e tapuaki ki te manu fekai mo tena fakatusa mo so se tino telā e maua ne ia te fakailoga o tena igoa.+
12 Tenei te taimi e manakogina i ei ne tino tapu a te kufaki,+ ko latou kolā e tausi ki fakatonuga a te Atua kae ‵piki ‵mau ki te fakatuanaki+ o Iesu.”
13 Kae ne lagona ne au se leo mai te lagi e fai mai, “Tusi a mea konei: E fia‵fia a tino ‵mate kolā e ‵mate i te ‵kau fakatasi mo te Aliki+ mai te taimi tenei o fano ki mua. Ao, e fai mai te agaga, ke na malō‵lo latou mai i olotou galuega fakafi‵ta, me e olo eiloa mo latou a mea kolā ne fai ne latou.”
14 Tenā ne kilo atu au, kae kiloke! se kaumana ‵kena, kae e sagasaga i luga i te kaumana tenā se tino e pelā mo te tama a te tagata,+ mo se foualiki aulo i tena ulu mo se naifi mata ‵kai i tena lima.
15 A te suā agelu ne sae mai i te faletapu, e kalaga atu i se leo maluga ki te tino e sagasaga i luga i te kaumana: “Puke tau naifi kae ‵kati, me ko oko mai te itula ke ‵kati ei a lakau, me ko ‵pala ‵lei a fuataga o te lalolagi.”+
16 Kae ne tuku ifo te naifi a te tino telā e sagasaga i luga i te kaumana ki te lalolagi, kae ne fai ei te ‵katiga o fuataga i te lalolagi.
17 Kae ne sae mai te suā agelu mai i te faletapu telā i te lagi, kae ne isi foki sena naifi mata ‵kai.
18 Kae ko te suā agelu ne sae mai i te fatafaitaulaga, kae e isi sena pule ki luga i te afi. Kae ne kalaga atu a ia i se leo maluga ki te agelu telā e isi sena naifi mata ‵kai, ana muna: “Puke tau naifi kae ‵tae mai a kaufui vine o te lalolagi, me ko ‵pala ana fuagavine.”+
19 Ne tuku ifo ne te agelu tena naifi ki te lalolagi kae ne ‵tae mai i ei a vine o te lalolagi, kae ne ‵pei atu ne ia ki loto i te mea ‵tau uaina lasi o te kaitaua o te Atua.+
20 Ne lakalaka te mea ‵tau uaina i tua o te fakai, kae ko toto kolā ne ‵sali mai i te mea ‵tau uaina ne oko atu tena maluga ki fagutu o solofanua, i te ‵mao e ‵tusa mo te 1,600 setatia.*
