Galuega a Apositolo 2:1-47

  • Ko ‵ligi atu te agaga tapu i te Penitekoso (1-13)

  • Te lāuga a Petelu (14-36)

  • Ne talia ne te vaitino te lāuga a Petelu (37-41)

    • 3,000 ne papatiso (41)

  • Maopoopoga faka-Kelisiano (42-47)

2  Kae koi fai te ‵Kaiga Fiafia o te Penitekoso,+ ne ‵nofo atu a latou katoa i se koga e tasi.  I te taimi eiloa tenā ne lagona ei ne latou te ‵gulu mai te lagi e pelā eiloa me se afā, kae ne ‵fonu ei a te fale kātoa telā ne saga‵saga i ei latou.+  Kae ne lavea atu ne latou a mea e pelā me ne ulaga afi e foliga pelā me ne alelo i luga i a latou taki tokotasi,  kae ne ‵fonu latou katoa i te agaga tapu,+ kamata ei o fai‵pati ki ‵gana kese‵kese, e pelā eiloa mo te mea ne fai ne te agaga tapu ke mafai ne latou o fai‵pati.+  I te taimi tenā, ne ‵nofo atu i Ielusalema a tāgata Iutaia tali‵tonu mai fenua katoa i lalo o te lagi.+  Tela la, i te lagonaga ne latou a te mea tenei, ne maopoopo mai se vaitino kae ne ofo me ne lagona ne latou a te kau soko ko fai‵pati ki olotou ‵gana eiloa.  E tonu, ne ofo malosi latou kae fai aka: “Kiloke, e se ne tino Kalilaia+ katoa konei e fai‵pati?  Kae e pefea o lagona ne tatou taki tokotasi a ‵tou ‵gana eiloa?*  A tatou ne tino Patia, Metai,+ mo tino Elama,+ tino e ‵nofo i Mesopotamia, Iuta mo Kapatokia, Pono mo te kogā fenua o Asia,+ 10  Felukia mo Pafulia, Aikupito mo kogā koga o Lipia i tafa o Kulene, tino ne o‵mai mai Loma, kolā ko tino Iutaia mo tino ne ‵fuli ki te lotu Iutaia,+ 11  tino Keleta, mo tino Alapi—ko lagona ne tatou a latou e fai‵pati i ‵tou ‵gana e uiga ki galuega fakaofoofogia a te Atua.” 12  Ao, ne ofo katoa latou kae ‵numi, kae fai aka olotou pati i a latou eiloa: “Se a te uiga o te mea tenei?” 13  Kae ne fakatauemu atu a nisi tino ki a latou kae fai atu: “Ko ko‵nā latou i te uaina magalo.”* 14  Kae ne ‵tu aka a Petelu fakatasi mo te toko Sefulutasi+ kae faipati atu ki a latou i se leo maluga: “Tāgata o Iuta mo koutou katoa tino e ‵nofo i Ielusalema, fai ke iloa ne koutou a te mea tenei kae faka‵logo faka‵lei mai ki aku pati. 15  A tino konei e se ko‵nā e pelā mo otou pati, me tenei fua te tolu o itula o te aso.* 16  E ‵kese mai i ei, konei eiloa a pati kolā ne fai mai e auala i te pelofeta ko Ioelu: 17  ‘“Kae i aso fakaoti,” ko pati a te Atua, “ka ‵ligi atu ne au a nisi vaega o toku agaga ki luga i vaegā tino valevale, kae ko otou tama tāgata mo otou tama fāfine ka ‵valo fakapelofeta, kae ko otou tamataene ka lavea ne latou a fakaasiga kae ko otou toeaina ka fai moemiti,+ 18  kae ka ‵ligi atu foki ne au ki luga i aku pologa tāgata mo aku pologa fāfine i aso konā a nisi vaega o toku agaga, kae ka ‵valo fakapelofeta latou.+ 19  Kae ka fakaasi atu ne au a mea fakaofoofogia i luga i te lagi mo fakailoga i lalo i te lalolagi—te toto mo te afi mo te ausaga matolu. 20  A te la ka pouli kae ka liu toto te masina kae koi tuai o oko mai a te aso lasi kae fakapito o Ieova.* 21  Kae ko tino katoa kolā e ka‵laga ki te igoa o Ieova* ka ‵sao.”’+ 22  “Tāgata o Isalaelu, faka‵logo mai ki pati konei: A Iesu te Nasaleta ko te tagata telā ne fakaasi faka‵sau atu ne te Atua ki a koutou e auala i galuega ‵mana mo mea fakaofoofogia mo fakailoga kolā ne fai ne te Atua ki a koutou e auala i a ia,+ e pelā eiloa mo te mea e iloa ne koutou. 23  A te tagata tenei, telā ne tuku atu ki a koutou e ‵tusa mo te loto mo te iloa ‵mao o te Atua i mea ka ‵tupu,+ ne ‵tuki ne koutou ki te pou e auala i lima o tāgata solitulafono kae tamate ne koutou.+ 24  Ne toe fakatu+ kae fakasaoloto a ia ne te Atua mai te malosi o te mate, me ne seki mafai ne te mate o taofi aka a ia.+ 25  Ne fai mai a Tavita e uiga ki a ia, ‘E tuku faeloa ne au a Ieova* i oku mua i taimi katoa; me i a ia e nofo i toku feitu fakaatamai ko te mea ke se malaia eiloa au. 26  Ona ko te mea tenei ne fiafia malosi ei toku loto kae ne faipati atu au mo te fiafia. Kae ko au ka nofo mo te fakamoemoe; 27  me ka se tuku tiaki ne koe au i te Tanuga,* io me talia ne koe a tau tino fakamaoni ke oko te pala ki tena foitino.+ 28  Ko oti ne fakailoa mai ne koe ki a au a te auala o te ola; ka faka‵fonu ne koe au ki te fiafia lasi i ou mua.’+ 29  “Taina, e fai‵pati atu matou e aunoa mo te ma‵taku ki a koutou e uiga ki te ulu o te kāiga ko Tavita, me ne mate a ia kae ne tanu foki,+ kae ko tena tanuga tenei eiloa e ‵nofo mo tatou ke oko ki te aso tenei. 30  Ona ko ia se pelofeta kae ne iloa foki ne ia me ne tauto atu a te Atua ki a ia ke fai ne ia se tokotasi o ana tama* ke sagasaga i luga i tena nofogaaliki,+ 31  ko leva ne iloa ne ia kae ne faipati mai e uiga ki te toetu o te Keliso, me ka se tuku tiaki a ia i te Tanuga* io me e oko te pala ki tena foitino.+ 32  Ko Iesu eiloa tenei ne toe fakatu aka ne te Atua, kae e molimau matou katoa e uiga ki ei.+ 33  Tela la, ona ko te mea ko oti ne fakamaluga aka a ia ki te feitu fakaatamai o te Atua+ kae ko maua ne ia te agaga tapu telā ne folafola mai ne te Tamana,+ ko oti ne ‵ligi ne ia ki tua a te mea ko lavea kae lagona ne koutou. 34  Me i a Tavita ne seki fano ki te lagi, kae ne fai mai a ia, ‘Ne fai atu a Ieova* ki toku Aliki: “Sagasaga i toku feitu fakaatamai 35  ke oko ki te taimi e tuku ei ne au ou fili mo fai te mea e tuku ei ou vae.”’+ 36  Tela la, ke na iloa mo te mautinoa ne kāiga Isalaelu katoa me ko oti ne fai ne te Atua a ia mo fai te Aliki+ mo te Keliso, ko Iesu telā ne tamate ne koutou i luga i se pou.”+ 37  I te lagonaga ne latou te mea tenei ne mafatia olotou loto i te fanoa‵noa, kae ne fai atu latou ki a Petelu mo te ‵toega o apositolo: “Taina, ne a omotou mea e ‵tau o fai?” 38  Muna a Petelu ki a latou: “Sala‵mo+ kae ke papatiso+ katoa koutou i te igoa o Iesu Keliso ke fakamagalo ei otou agasala,+ kae ka maua ne koutou a te meaalofa ko te agaga tapu e aunoa mo se ‵togi. 39  Me i te folafolaga+ tenei se mea ne fai ki a koutou mo otou tama‵liki, mo latou katoa kolā e ‵nofo ‵mao, ki a latou katoa kolā e kalagagina ne Ieova* te ‵tou Atua ke o‵mai ki a ia.”+ 40  Kae ne molimau kae fakamalosi atu faeloa a ia ki a latou i nisi pati aka, ana muna: “Fai ke ‵sao koutou mai te kautama fai mea piko‵piko tenei.”+ 41  Tela la, a latou kolā ne talia mo te fia‵fia ne latou ana pati ne papatiso,+ kae kāti e toko 3,000 a tino ne fakaopoopo ki a latou i te aso tenā.+ 42  Kae ne tumau eiloa latou i te ‵saga tonu atu ki akoakoga a te kau apositolo, ke ‵kau fakatasi, ke ‵kai+ fakatasi kae ‵talo.+ 43  E tonu, ne kamata o ma‵taku a tino katoa, kae e uke a mea fakaofoofogia mo galuega ‵mana ne kamata o ‵tupu e auala i apositolo.+ 44  Ne tuku fakatasi ne latou katoa kolā ne tali‵tonu a olotou mea katoa, 45  kae fakatau atu ne latou olotou mea mo olotou kope+ kae tufa atu a ‵togi o olotou mea i a latou katoa, e ‵tusa mo manakoga o tino taki tokotasi.+ 46  Kae i aso takitasi ne maopoopo faeloa latou i te faletapu mo te loto tasi, kae ave olotou meakai ki fale kese‵kese, kae ‵kai i ei mo te fia‵fia lasi mo te loto fakamaoni, 47  o tavae atu ki te Atua kae ne fia‵fia a tino katoa ki a latou. Kae i te taimi eiloa tenā, ne tumau a Ieova* i te fakaopoopo atu ki a latou i aso takitasi a tino kolā ko fakaolagina.+

Fakamatalaga mai lalo

Io me “te ‵gana ne fanau mai mo ia.”
Io me “uaina fou.”
Telā kāti ko te 9:00 i te tafataeao.
Onoono ki te MF A5.
Onoono ki te MF A5.
Onoono ki te MF A5.
Io me “Heitisi,” telā ko te tanuga masani o tino. Onoono ki te FP.
Eleni, “se tokotasi mai i fuataga o ana tega.”
Io me “Heitisi,” telā ko te tanuga masani o tino. Onoono ki te FP.
Onoono ki te MF A5.
Onoono ki te MF A5.
Onoono ki te MF A5.