Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Ne a Mea e Akoako ‵Tonu Mai i te Tusi Tapu?

 MATAUPU FAKAOPOOPO

Ko oi ‘Papelonia te Sili’?

Ko oi ‘Papelonia te Sili’?

E ISI ne tugāpati i te tusi ko Fakaasiga kolā e fai pelā me ne pati fakatusa. (Fakaasiga 1:1) E pelā mo te fafine telā e taku mai i ei, mo te igoa ko ‘Papelonia te Sili’ e tusi i tona lae. E fai mai i ei me e sagasaga atu te fafine tenei i luga i se ‘vaitino mo fenua.’ (Fakaasiga 17:1, 5, 15) Ona ko te mea e seai se fafine tonu e mafai o fai penei, ko tena uiga, a Papelonia te Sili se fafine fakatusa. Se a te mea e fakaata mai i te fafine talitāgata fakatusa tenei?

I te Fakaasiga 17:18, e fakaasi mai i ei me i te fafine fakatusa tenei e fai mo fai “te fa‵kai takutakua telā e pule ne ia a tupu o te lalolagi.” E fakasino atu te tugāpati ko te “fa‵kai” ki se fakapotopotoga o tino. Ona ko te pule atu o te “fa‵kai takutakua” tenei ki “tupu o te lalolagi,” e ‵tau ei o fai te fafine e igoa ki  a Papelonia te Sili mo fai se fakapotopotoga telā e maua atu i kogā koga katoa i te lalolagi nei. A te ‵tonuga loa, a te mea tenei se matugā fakapotopotoga lasi telā e pule atu ki te lalolagi kātoa. Se a te vaegā fakapotopotoga tenā? Se fakapotopotogā lotu. Onoono aka la ki te auala e ‵lago atu ei a nisi fuaiupu i te tusi ko Fakaasiga ki te fakamatalaga tenei.

E isi ne fakapotopotoga ‵lasi i mea fakapolitiki, i mea tau pisinisi, mo mea fakalotu. E se fai te fafine e igoa ki a Papelonia te Sili mo fai se fakapotopotoga fakapolitiki me e fakaasi mai i te Muna a te Atua me i “tupu o te lalolagi,” io me ko malo fakapolitiki o te lalolagi nei, “ne ‵se katoa” mo tou fafine. A tena finalalolagi e fakauiga eiloa ki tena fia fai ki tino pule o te lalolagi nei kae tenā foki eiloa te pogai ne taku ei a ia ki “te fafine tali tāgata takutakua.”—Fakaasiga 17:1, 2; Iakopo 4:4.

E se mafai foki o fai a Papelonia te Sili mo fai se fakapotopotoga i mea tau pisinisi me i “tino fai pisinisi” ka ‵tagi fanoa‵noa i te taimi e fakaseai atu ei tou fafine. A te ‵tonuga loa, e fakamatala mai i ei me i tupu mo tino fai pisinisi e “‵tu ‵mao” kae ‵kilo atu ki Papelonia te Sili. (Fakaasiga 18:3, 9, 10, 15-17) Tela la, se mea ‵lei ke fakaiku aka me i Papelonia te Sili, e se se fakapotopotoga fakapolitiki io me se fakapotopotoga fai pisinisi, kae se fakapotopotogā lotu.

E toe fakamaoni aka foki me e fakaata mai i Papelonia te Sili a lotu ona ko te fakamatalaga me e fakaloiloi ne ia a tino katoa e auala i ana “vailakau ma‵sei.” (Fakaasiga 18:23) Ona ko te mea e maua te malosi o vaegā faifaiga faivailakau katoa mai lotu mo te kau temoni, e se se mea fakapoi me e taku ne te Tusi Tapu a Papelonia te Sili e pelā me se koga e “‵nofo nei i ei a temoni.” (Fakaasiga 18:2; Teutelonome 18:10-12) E fakamatala mai foki me i te fakapotopotoga tenei e ‵teke malosi atu ki te lotu tonu, mai te fakasauā atu ki “pelofeta” mo “Kelisiano a te Atua.” (Fakaasiga 18:24) A te ‵tonuga loa, ne takalialia malosi eiloa Papelonia te Sili ki te lotu tonu telā ne fakasauā kae tamate foki ne ia a ‘tavini fakamaoni a Iesu.’ (Fakaasiga 17:6) Tela la, a te fafine tenei e igoa ki a Papelonia te Sili e fakaata faka‵lei mai i ei te fakapotopotoga o lotu ‵se i te lalolagi kātoa, kae e aofia foki i ei a lotu katoa kolā e ‵teke atu ki a Ieova te Atua.