Se Fakaasiga ki a Ioane 5:1-14

  • Peluga tusi mo fakamailoga e fitu (1-5)

  • Ne puke ne te Tamā Mamoe a te peluga tusi (6-8)

  • E ‵tau mo te Tamā Mamoe o ‵tala a fakamailoga (9-14)

5  Kae ne matea ne au i te lima fakaatamai o te Atua telā e sagasaga i te nofogaaliki+ se peluga tusi telā e tusi a pati i ei i feitu e lua,* kae ne faka‵piki ke ‵mau ki fakamailoga e fitu.  Kae ne matea ne au se agelu malosi e folafola mai i se leo maluga: “Ko oi e ‵tau o ‵tala ne ia te peluga tusi mo ana fakamailoga?”  Kae e seai eiloa se tino i te lagi io me i te lalolagi io me mai lalo i te lalolagi e mafai o ‵tala ne ia te peluga tusi io me kilo ki loto i ei.  Ne tagi malosi au me e seki maua se tino telā e ‵tau o ‵tala ne ia te peluga tusi io me kilo ki loto i ei.  Kae e tokotasi te toeaina ne fai mai ki a au: “Sa tagi. Kiloke! Ko oti ne manumalo+ te Leona mai i te matakāiga o Iuta,+ ko te aka+ o Tavita,+ telā e ‵tau o ‵tala ne ia te peluga tusi mo ana fakamailoga e fitu.”  Kae ne matea ne au e tu i te va* o te nofogaaliki mo te va o manu ola e fa mo te va o te kau toeaina+ se tamā mamoe+ telā e foliga mai me ko oti ne tamate,+ e fitu ana suki kae e fitu ana mata, kae e fakauiga a mata konā ki agaga e fitu o te Atua+ kolā ne uga atu ki te lalolagi kātoa.  Ne fanatu fakavave a ia ki mua kae puke te peluga tusi mai i te lima fakaatamai o te Atua telā e sagasaga i te nofogaaliki.+  I tena pukega ki te peluga tusi, ne to‵tuli ifo a manu ola e fa mo toeaina e toko 24+ i mua o te Tamā Mamoe, kae ne tofu te toeaina mo tena kitala mo tena pōla aulo telā e ‵fonu i mea ma‵nogi. (A mea ma‵nogi konā e fakauiga eiloa ki talosaga a tino tapu.)+  Kae e usu ne latou se pese fou,+ olotou muna: “E ‵tau eiloa o puke koe ki te peluga tusi kae ‵tala ana fakamailoga, me i a koe ne tamate kae mai i tou toto ne ‵togi ei ne koe a tino mō te Atua+ mai i matakāiga mo ‵gana mo tino mo fenua katoa,+ 10  kae ne fai ne koe a latou mo fai se malo+ mo faitaulaga ki te ‵tou Atua,+ kae ka pule latou ki te lalolagi e pelā me ne tupu.”+ 11  Kae ne matea ne au, kae lagona ne au a leo o agelu e tokouke e ‵tu fakatamilo i te nofogaaliki mo manu ola mo te kau toeaina, kae e fia afe mo afe* te aofaki o latou,+ 12  kae ne fai atu latou i se leo maluga: “E ‵tau eiloa o maua ne te Tamā Mamoe telā ne tamate+ a te ‵mana mo koloa mo te poto mo te malosi mo te vikiga mo te ‵malu mo te fakamanuiaga.”+ 13  Kae ne lagona ne au a mea ola katoa i te lagi mo te lalolagi kae mai lalo i te lalolagi+ kae i luga i te tai, mo mea katoa i loto i ei, ne fai atu penei: “Ke avatu ki te Atua telā e sagasaga i te nofogaaliki+ mo te Tamā Mamoe+ a te fakamanuiaga mo te vikiga+ mo te ‵malu mo te ‵mana ki te se-gata-mai, se-gata-mai eiloa.”+ 14  Ne fai atu a manu ola e fa: “Amene!” kae ne to‵tuli ifo a toeaina o tapuaki atu ki te Atua.

Fakamatalaga mai lalo

Eleni, “i te koga i loto mo te koga i tua.”
Io me “i te kogaloto.”
Io me “fia sefuluafe fatele mo te fia sefuluafe.”