Salamo 37:1-40

  • A latou kolā e tali‵tonu ki a Ieova ka manuia

    • Sa kaitaua ona ko tino amio ma‵sei (1)

    • “‵Sala ke maua te fiafiaga sili i a Ieova” (4)

    • “Tuku atu ou ala ki a Ieova” (5)

    • “Tino agamalu ka fai mō latou te lalolagi” (11)

    • A tino amio‵tonu ka se mafai o seai ne olotou meakai (25)

    • A tino amio‵tonu ka ola ki te se-gata-mai i te lalolagi (29)

Ko te salamo a Tavita. א [Alefa] 37  Sa kaitaua ona ko tino amio ma‵seiIo me kaisano ki tino fai mea ‵se.+   Ka paku‵paku fakavave latou e pelā me ne mouku+Kae mage‵mage e pelā mo mouku lanu launiu fou. ב[Peta]   Talitonu ki a Ieova kae fai te mea ‵lei;+Nofo i te lalolagi* kae fakamaoni i au mea e fai.+   ‵Sala ke maua te fiafiaga sili* i a Ieova,Kae ka tuku atu ne ia a manakoga o tou loto. ג [Gimela]   Tuku atu ou ala ki a* Ieova;+Fakalagolago ki a ia, kae ka gasuesue a ia mō koe.+   Ka fai ne ia tou amiotonu ke maina e pelā mo te mafāga o te ao,Kae ko tau fakamasinoga tonu e pelā mo te la i te tutonu. ד [Taleta]   Ke nofo filemu i mua o Ieova+Kae nofo fakatalitali* ki a ia. Sa kaitaua ki te tagataTelā e manuia i te faiga o ana togafiti.+ ה [He]   Tuku kea‵tea te kaitaua kae tiaki te ita;+Ke mo a ma kaitaua kae ‵fuli atu koe o fai a te mea masei.*   Me i tāgata ma‵sei ka fakaseai atu,+Kae ko latou kolā e fakamoe‵moe ki a Ieova ka fai mō latou te lalolagi.+ ו [Vau] 10  E se leva nei, kae ka ‵galo atu a tino amio ma‵sei;+ Ka salasala koe ki a latou i te koga ne ‵nofo i ei,Kae ka ‵galo latou i ei.+ 11  Kae ko tino agamalu ka fai mō latou te lalolagi,+Kae ka maua ne latou te fiafiaga sili ona ko te lasi o te filemu.+ ז [Seini] 12  E fai eiloa ne te tagata masei tena togafiti ki te tino amiotonu;+E ū ana nifo ki a ia. 13  Kae ka kata a Ieova ki a ia,Me e iloa ne Ia me ka oko mai eiloa tena aso.+ ח [Heta] 14  E tapale ne tino amio ma‵sei olotou pelu kae ofe olotou kausanaO fakatakavale a tino mafatia mo tino ma‵tiva,O tamate a latou kolā e sa‵sale i te fai mea tonu. 15  Kae ko olotou pelu ka ‵suki ki ei olotou fatu eiloa;+A olotou kausana ka fati‵fati. ט [Teta] 16  E sili atu i te ‵lei a mumea a te tino amiotonuI lō mea e uke a tino amio ma‵sei e tokouke.+ 17  Me i lima o tino amio ma‵sei ka fati‵fati,Kae ko Ieova ka ‵lago atu ki te tino amiotonu. י [Iota] 18  E iloa ne Ieova a mea e ‵tupu ki tino e seai ne olotou mea ‵se ne fai,*Kae ko te lotou tofi ka tumau ki te se-gata-mai.+ 19  Ka se fakamasiasigina latou i te taimi o te fakalavelave;Ka uke olotou mea i te taimi o te oge. כ [Kafa] 20  Kae ko tino amio ma‵sei ka fakaseai atu;+A fili o Ieova ka ‵galo atu e pelā mo te ‵galo atu o te gali o laukele moukuā;Ka ‵galo atu latou e pelā mo te ausaga. ל [Lameta] 21  A te tino amio masei e kaitalafu kae e se toe ‵togi atu,Kae ko te tino amiotonu e kaimalie kae tuku atu fua ana mea.+ 22  A latou kolā e fakamanuia ne Ia ka fai mō latou te lalolagi,Kae ko latou kolā e fakamalaia ne Ia ka fakaseai atu.+ מ [Mema] 23  E takitaki* ne Ieova a kalafaga o se tagata+Māfai e fiafia a Ia ki ana auala.+ 24  E tiga eiloa e mafai o siga tou tagata, ka se ‵pei ‵tuki a ia ki lalo,+Me i a Ieova e puke atu ki tena lima.+ נ [Nuna] 25  Au ne talavou kae nei au ko matua,Kae e seki lavea eiloa ne au se tino amiotonu ke tuku tiaki,+Io me ko ana tama‵liki ke salasala ki falaoa.*+ 26  E tuku atu faeloa ne ia a mea e aunoa mo se ‵togi,+Kae ko ana tama‵liki ka maua ne latou a fakamanuiaga. ס [Sameka] 27  ‵Fuli kea‵tea mai te mea masei kae fai te mea ‵lei,+Kae ka tumau koe ki te se-gata-mai. 28  Me i a Ieova e fiafia ki te fakamasinoga tonu,Kae ka se tuku tiaki ne ia ana tino fakamaoni.+ ע [Aina] Ka leoleo faeloa latou;+Kae ko tino e ‵tupu mai i tino amio ma‵sei ka fakaseai atu.+ 29  A tino amio‵tonu ka fai mō latou te lalolagi,+Kae ka ‵nofo latou i ei ki te se-gata-mai.+ פ [Pe] 30  A te gutu o te tino amiotonu e faipati mai i ei te poto,*Kae ko tena alelo e faipati e uiga ki te fakamasinoga tonu.+ 31  A te tulafono a tena Atua e maua eiloa i tena loto;+Kafai e sasale a ia, ka se takasēsē ana vae.+ צ [Sati] 32  A te tino amio masei e kilokilo ki te tino amiotonu,Kae salasala ki se auala ke tamate ei a ia. 33  Kae ka se tuku tiaki ne Ieova a ia ki lima o te tino tenā+Io me maua atu ne ia me e ‵se i te taimi e fakamasino ei.+ ק [Kofa] 34  Fakamoemoe ki a Ieova kae tautali i ana auala,Kae ka fakamaluga aka ne ia koe ke fai mō koe te lalolagi. Kafai ko fakaseai atu a tino amio ma‵sei,+ ka lavea eiloa ne koe a te mea tenā.+ ר [Lesa] 35  Ko oti ne lavea ne au te tagata saua kae matagāE lauolaola e pelā me se lakau ola ‵lei telā e ola i tena laukele tonu.+ 36  Kae ne mate fakavave a ia kae galo atu;+Ne salasala faeloa au ki a ia, kae ne seki mafai o maua a ia.+ ש [Sina] 37  Saga tonu ki te tino e seai sena ‵se,*Kae kilo atu faeloa ki te tino fai mea tonu,+Me ka filemu a aso mai mua o te tagata tenā.+ 38  Kae ko tino solitulafono katoa ka fakaseai;Ka seai ne fakamoemoega o tino amio ma‵sei i aso mai mua.+ ת [Tau] 39  A te fakaolataga o tino amio‵tonu e maua mai i a Ieova;+A ia ko te lotou ‵pui malosi i taimi o fakalavelave.+ 40  A Ieova ka fesoasoani atu ki a latou kae faka‵sao latou.+ Ka faka‵sao ne ia latou mai te tino amio masei kae fakaola latou,Me ne faka‵lafi latou ki a ia.+

Fakamatalaga mai lalo

Io me “laukele.”
Io me “‵Sala ki te fiafia lasi o koe.”
Epelu, “Fakateka atu ou ala ki a.”
Io me “kufaki.”
Io me kāti, “Ke mo a ma kaitaua me mafai o takitaki atu ei ki te logo‵mae.”
Epelu, “ko aso o tino e seai ne olotou mea ‵se.”
Io me “faka‵mautakitaki.”
Io me “meakai.”
Io me “musumusu mai i ei te poto i se leo malalo.”
Io me “te tino e tausi ki te fakamaoni.”