Fanatu ki te fakasologa

Fanatu ki te fakasologa o mataupu

Molimau a Ieova

Fili se `gana Tuvalu

 MATAUPU FAKAOPOOPO

Se a te Aso Fakamasino?

Se a te Aso Fakamasino?

E FAKAATAATA pefea ne koe i tou mafaufau a te Aso Fakamasino? E leake te tokoukega o tino me ka ‵tu atu i ei a agaga taki tokotasi o te fia piliona o tino i mua o te nofogaaliki o te Atua. Ka fakamasino aka ei i konā a tino katoa. Ka maua ne nisi tino te taui o te ola i te palataiso i te lagi, kae ka fakasala a nisi tino ki te puapuagā se-gata-mai. Kae e ‵kese ‵ki a fakamatalaga i te Tusi Tapu e uiga ki te vaitaimi tenā. E fakaasi mai i te Muna a te Atua me i te aso tenā, e se se taimi fakamataku kae se taimi o fakamoemoega mō te faka‵fouga o mea katoa.

I te Fakaasiga 20:11, 12, e fai‵tau tatou ki te fakamatalaga a te apositolo ko Ioane e uiga ki te Aso Fakamasino: “Ne matea ne au a te nofogaaliki lasi kae ‵kena mo te tino e sagasaga mai i ei. Ne ‵tele keatea mai ona mua a te lalolagi mo te lagi, ko se toe matea atu eiloa laua. Ne matea ne au a tino ‵mate, tino ma‵luga io me ko tino ma‵lalo ko ‵pau eiloa, e ‵tu i mua o te nofogaaliki. Ne ‵tala a tusi, ne toe ‵tala foki te suā tusi, ko te tusi o te ola. Ne fakamasino a tino ‵mate e ‵tusa mo olotou mea ne fai, kolā e tusi i loto i tusi.” Ko oi te Fāmasino telā e fakamatala mai i konei?

A Ieova te Atua ko te Fāmasino tafasili i te maluga. Kae ne ‵tofi aka ne ia se tino ke fai mo fai te fāmasino. E ‵tusa mo te Galuega 17:31, ne fai mai te apositolo ko Paulo me i te Atua “ko oti ne  fakamoe ne ia te aso ka fakamasino ei ne ia te lalolagi kātoa ki te amiotonu, e alatu i te tino telā ko oti ne filifili ne ia.” A te Fāmasino telā ne filifili aka, ko Iesu Keliso, telā ko oti ne toetu aka. (Ioane 5:22) E kamata la māfea te Aso Fakamasino? E pefea te leva o te aso fakamasino?

E fakaasi mai i te Fakaasiga me ka kamata te Aso Fakamasino mai tua o te taua o Amaketo, māfai ko oti ne fakaseai katoatoa atu te lalolagi masei a Satani. * (Fakaasiga 16:14, 16; 19:19–20:3) Mai tua o Amaketo, ka ‵pei atu a Satani mo ana temoni ki te lua ‵poko mō se afe tausaga. I te taimi tenā, ka fai a tino pule faka-te-lagi e toko 144,000 “e pelā mo ne tupu [mo fāmasino] fakatasi mo Keliso i te afe tausaga.” (Fakaasiga 14:1-3; 20:1-4; Loma 8:17) E se fai fakavave fua te Aso Fakamasino i loto i se 24 itula. E tumau eiloa te aso tenā i te afe tausaga.

I te vaitaimi o te afe tausaga tenā, “ka fakamasino ne [Iesu Keliso] a tino ola mo tino ‵mate.” (2 Timoteo 4:1) A “tino ola” ko te “vaitino tokouke” kolā ka ‵sao atu i Amaketo. (Fakaasiga 7:9-17) Ne lavea foki ne te apositolo ko Ioane a “tino ‵mate . . . e ‵tu i mua o te nofogaaliki” telā e fakamasino mai i ei a tino. E pelā mo te mea ne folafola mai ne Iesu, ka “lagona ei a tena leo ne latou katoa kolā e i loto i tānuga, kae ka ulu mai ei latou ki tua” e auala i te toe‵tuga. (Ioane 5:28, 29; Galuega 24:15) Kae se a te mea ka fakavae ki ei te fakamasinoga o tino katoa?

E ‵tusa mo te fakaasiga a te apositolo ko Ioane, “ne ‵tala a tusi,” kae “ne fakamasino a tino ‵mate e ‵tusa mo olotou mea ne fai, kolā e tusi i loto i tusi.” E mata, ne tusi ki lalo i tusi konā a amioga a tino i olotou olaga mua? Ikai, e se fakavae te fakamasinoga tenā ki olotou mea ne fai a koi tuai o ‵mate latou. E iloa pefea ne tatou te mea tenā? E fai mai te Tusi Tapu, penei: “Kafai e mate se tino, ka fakasaoloto a ia mai te malosi o te agasala.” (Loma 6:7) Ka toe ola mai a tino kolā ka toe‵tu mai ki se olaga fou kae ‵mā. Tela la, e ‵tau o fakauiga a tusi konā ki nisi tulafono a te Atua. Ko te mea ke mafai ne tino kolā ka ‵sao atu i Amaketo mo tino ‵mate kolā ka toe‵tu mai, o ola ki te se-gata-mai, e ‵tau o faka‵logo latou ki fakatonuga a te Atua, e aofia i ei so se tulafono fou telā ka fakaasi mai  ne Ieova i loto i te afe tausaga. Tela la, ka fakamasino eiloa a tino taki tokotasi e ‵tusa mo mea kolā e fai ne latou i te vaitaimi o te Aso Fakamasino.

Ka fatoā maua ne te fia piliona o tino i te Aso Fakamasino se avanoaga ke tauloto e uiga ki te loto o te Atua kae ke fakafetaui aka foki olotou olaga ki ei. Ko tena uiga, ka fai se matugā polokalame lasi o akoakoga i te vaitaimi tenā. A te ‵tonuga loa, “ka iloa ei ne latou a te mea tonu.” (Isaia 26:9) Kae e se ko tino katoa ka loto fia‵fia o fakafetaui aka olotou olaga ki te loto o te Atua. E fai mai te Isaia 26:10, penei: “E ui eiloa e aga‵lei koe ki tino amio ma‵sei, kae e se mafai o fai ne latou te mea tonu. Ke oko foki eiloa ki te fenua tenei o tino amio‵tonu, e fai foki ne latou amioga sē ‵tonu; e se talia ne latou tou takutakua.” Ka fakaseai katoatoa atu a tino amio ma‵sei konei i loto i te Aso Fakamasino.—Isaia 65:20.

I te fakaotiga o te Aso Fakamasino, ka “toe ola mai” ei a tino kolā ka ‵sao atu e pelā me ne tino ‵lei katoatoa. (Fakaasiga 20:5) Ka fai eiloa i te Aso Fakamasino a te faka‵fokiatuga o tino ki te tulaga ‵lei katoatoa. (1 Kolinito 15:24-28) Ka ‵soko atu ki ei te ‵toe tofotofoga. Ka toe fakasaoloto mai a Satani mai te lua ‵poko kae ka talia ke takitaki ‵se ne ia a tino mō te ‵toe taimi eiloa. (Fakaasiga 20:3, 7-10) A tino kolā ka ‵teke atu ki a ia, ka maua eiloa ne latou te fakataunuga katoatoa o te folafolaga a te Tusi Tapu, penei: “A tino amio‵tonu ka fai mo latou te fenua, kae ka ‵nofo faeloa i ei ki te se gata mai.” (Salamo 37:29) E tonu, e fai eiloa te Aso Fakamasino mo fai se fakamanuiaga mō tino fakamaoni katoa!

^ pala. 1 Ke maua a fakamatalaga e uiga ki Amaketo, ke na onoono la ki te Insight on the Scriptures, Tusi 1, te itulau e 594-595, 1037-1038, mo te mataupu e 20 o te tusi ko te Tapuaki ki te Atua Tonu, kolā ne ‵lomi ne Molimau a Ieova.