Te Tusi Muamua ki a Timoteo 6:1-21
6 E ‵tau o tumau a pologa i te āva katoatoa ki olotou matai,+ ko te mea ke mo a ma taku fakamaseigina te igoa o te Atua mo ana akoakoga.+
2 E se gata i ei, ke mo a ma sē āva a pologa ki olotou matai kolā ne tino tali‵tonu i a latou ne taina. I lō te fai penā, e ‵tau ke toka latou o ga‵lue malosi me i tino kolā e maua ne latou a fua o olotou galuega ‵lei, ne tino tali‵tonu kae fagasele.
Tumau i te akoako atu o mea konei kae tuku atu a fakamalosiga konei.
3 Kafai e akoako atu ne se tino se isi akoakoga kae e se fetaui mo akoakoga aoga+ mai te ‵tou Aliki ko Iesu Keliso, io me ko akoakoga e ‵tusa mo te tapuaki fakamaoni ki te Atua,+
4 a te tino tenā ko ‵fete i te fakamatamata, kae e se malamalama i se mea.+ E valea te tino tenā ki kinauga mo te fia poto ki uiga o pati.+ E iku atu a mea konei ki te loto masei, te fai taua, pati fatufatu,* masalosaloga ma‵sei,
5 mo kinauga e uke e uiga ki tamā mea fua mai tino kolā ko ma‵sei olotou mafaufau+ kae ko galo i a latou te munatonu, kae e mafau‵fau me ka uke olotou mea e maua mai te tapuaki fakamaoni ki te Atua.+
6 Kae ko te ‵tonuga loa, e uke a mea e maua mai te tapuaki fakamaoni ki te Atua+ fakatasi mo te lotomalie.
7 Me e seai se mea ne aumai ne tatou ki te lalolagi, kae e seai foki se mea e ave ne tatou kea‵tea mai i ei.+
8 Tela la, kafai ko maua a ‵tou meakai mo ‵tou gatu, ka lotoma‵lie eiloa tatou i ei.+
9 Kae ko tino kolā e ma‵nako ke mau‵mea latou e ‵to atu ki te fakaosoosoga mo te malei+ mo manakoga sē aoga kae fakalogo‵mae kolā e fakamasei kae fakaseai atu i ei a latou.+
10 Me i te fiafai ki tupe ko te māfuaga o vaegā mea ma‵sei katoa, kae mai te kausaki atu ki te fiafai ki tupe ko oti ne ‵to ki tua a nisi tino mo te fakatuanaki kae ‵suki ne latou a latou eiloa ki logo‵maega e uke.+
11 Kae ko koe, e te tagata o te Atua, tele kea‵tea mai mea konei. Kae ‵sala atu ki te amiotonu, te tapuaki fakamaoni ki te Atua, te fakatuanaki, te alofa, te kufaki mo te agamalu.+
12 Taua atu i te taua ‵lei o te fakatuanaki; puke ‵mau ki te ola se-gata-mai telā ne kalagagina ei koe kae tuku atu ne koe se molimau ‵lei i mua o molimau e tokouke.
13 I mua o te Atua, telā e tausi ne ia a mea katoa ke ola, mo Keliso Iesu, telā ne tuku mai ne ia se molimau ‵lei i mua o tino katoa ki a Ponitio Pilato,+ e fakatonu atu au ki a koe
14 ke fakalogo ki te fakatonuga tenei i se auala ‵ma katoatoa e aunoa mo se fakamaseiga ke oko eiloa ki te taimi e fakaasi mai ei te ‵tou Aliki ko Iesu Keliso,+
15 telā ka fakaasi mai ne te Pule fua e tokotasi kae fiafia i tena taimi tonu. A ia ko te Tupu o latou kolā ka pule e pelā me ne tupu mo te Aliki o latou kolā ka pule e pelā me ne aliki,+
16 ko ia fua tokotasi telā e se mafai o mate,+ e nofo i te mainaga telā e se mafai o oko ki ei a tino,+ telā e seai se tino kai lavea io me e mafai o lavea ne ia.+ Ke i luga i a ia te fakaaloalo mo te ‵mana ki te se-gata-mai. Amene.
17 Fakatonu atu ki tino kolā e mau‵mea i te olaga tenei ke mo a ma fia sili, kae ke fakavae te lotou fakamoemoega, e se ki luga i koloa sē mautinoa,+ kae ki te Atua, telā e tuku mai ne ia ki a tatou a mea katoa ke fia‵fia ei tatou.+
18 Fai ki a latou ke ga‵lue ki mea ‵lei, ke mau‵mea i te faiga o galuega ‵lei, ke kaima‵lie, ke toka o tufa atu olotou mea,+
19 ko tausi ei mō latou eiloa se fakavae ‵lei mō aso mai mua,+ ko te mea ke puke ‵mau latou ki te ola tonu.+
20 Timoteo, puipui faka‵lei te mea telā ne tuku atu ki a koe,+ ‵kalo kea‵tea mai pati sē aoga kolā e fakamasei atu ki te mea tapu mo te ‵numi o mea kolā e fakaigoa ‵se ki te “poto.”+
21 Ko oti ne ‵to kea‵tea a nisi tino mai te fakatuanaki ona ko te fakamata‵mata ki te vaegā poto tenei.
Ke i luga i a koutou katoa te alofa tauanoa o te Atua.
Fakamatalaga mai lalo
^ Io me “pati faka‵mae loto.”
