Fanatu ki te fakasologa

Fanatu ki te fakasologa o mataupu

E Mata, Tenei Eiloa te Loto o te Atua?

E Mata, Tenei Eiloa te Loto o te Atua?

KAFAI e faitau koe ki so se nusipepa io me fakalogologo ki te letiō, ka lavea atu i ei ne koe me e malaku eiloa a tala e uiga ki tino amio takafia‵toa, taua, mo amioga solitulafono. Kae faitalia a tala kolā e maua i nusipepa, ke na mafaufau la ki nisi mea kolā e manavase koe ki ei, kāti ka ‵pau eiloa koe mo te tagata ‵lei, ko Iopu, telā ne fai mai me i a ia ko “puapuagā kae ko māsiasi masei eiloa.”​—Iopu 10:15.

Fesili ifo ki a koe eiloa, penei:

  • E mata, e manako te Atua ke fai penei toku olaga, penā foki eiloa mo olaga o nisi tino katoa?

  • Tefea te koga e mafai o maua ne au se fesoasoani ke fa‵ki ei au i oku fakalavelave?

  • E mata, e isi se fakamoemoega me ka maua ne tatou te filemu i te lalolagi nei?

E tuku mai eiloa i te Tusi Tapu a tali fakama‵lie loto ki fesili konei.

 E AKOAKO MAI I TE TUSI TAPU ME KA AUMAI NE TE ATUA A ‵FULIGA KONEI KI TE LALOLAGI.

“Ka se toe ai ne loimata i olotou mata. Ka se toe ai se mate, se fanoanoa, se tagi io me se ‵mae.”​—Fakaasiga 21:4

“A tino vae ma‵sei ka eva ki luga kae ‵saka.”​—Isaia 35:6

“A tino ‵kivi ka lavea ne latou a mea.”​—Isaia 35:5

 “Ko oko mai eiloa te taimi . . . latou katoa kolā e i loto i tānuga, . . . ka ulu mai ei latou ki tua.”​Ioane 5:28, 29

“Ka seai eiloa se tino i luga i te ‵tou fenua e tagi i a ia e masaki.”​—Isaia 33:24

“Ke fakamaumea te fenua i saito; ko mauga foki ke ‵fonu i fuagālakau.”​—Salamo 72:16

 KE NA MAUA A MEA AOGĀ MAI I AKOAKOGA A TE TUSI TAPU

Ke mo a ma sōna fakaiku fakavave aka ne koe me i mea kolā ko oti ne fakaasi mai ne tala ‵loi fua. Ko oti ne folafola mai ne te Atua me ka fakataunu eiloa ne ia a mea konei, kae e fakamatala mai i te Tusi Tapu a te auala ka fai ei ne ia a mea konā.

Kae e uke atu a mea e aogā ei te Tusi Tapu. Ko te auala eiloa tenā ke maua nei ne tatou se olaga fakamalie loto. Mafaufau malie aka ki ou fakalavelave mo mea kolā e manavase koe ki ei. E mafai o aofia i ei a te sē lava o tupe, fakalavelave i te kāiga, masaki, io me ko te mate o se tino pele. E mafai o fesoasoani atu te Tusi Tapu ke mafai o fa‵ki koe i fakalavelave i aso nei, kae e mafai foki o tuku mai i ei se fakatapūga mai te tukumaiga o tali ki vaegā fesili penei:

  • Kaia e logo‵mae ei tatou?

  • E mafai pefea o fa‵ki tatou i fakalavelave o te olaga nei?

  • E mafai pefea o fai ke momea aka te fia‵fia o ‵tou kāiga?

  • Ne a mea e ‵tupu māfai ko ‵mate atu tatou?

  • E mata, ka mafai o toe fetaui tatou mo tino ‵pele kolā ko oti ne ‵mate atu?

  • E mafai pefea o tali‵tonu katoatoa tatou me ka fakataunu eiloa ne te Atua ana folafolaga mō aso mai mua?

 Kāti e fia iloa ne koe me ne a mea e akoako mai i te Tusi Tapu. Tenā loa te pogai ko faitau ei koe ki te tusi tenei. Ka fesoasoani atu eiloa te tusi tenei ki a koe. E lavea atu ne koe me e tofu eiloa te palakalafa mo tena fesili telā e maua i te fakaotiga o itulau takitasi. Ne fia‵fia eiloa te fia miliona o tino ke fakaaogā te auala tenei ko te faiga o fesili mo tali māfai ko sau‵tala latou ki te Tusi Tapu fakatasi mo Molimau a Ieova. E fakamoe‵moe eiloa matou me ka fiafia foki koe ki ei. Ke na fakamanuia atu te Atua ki a koe māfai ko maua ne koe a mea fakafia‵fia kae fakamalie loto i te sukesuke ki mea kolā e akoako ‵tonu mai i te Tusi Tapu!