1. Kiko ta Dios su kualidat prinsipal, i ki sintimentu esei ta duna bo?

BEIBEL ta bisa ku “Dios ta amor.” (1 Huan 4:8) Amor no ta djis un di su bunita kualidatnan; e ta esun prinsipal. Ku otro palabra, Dios no solamente tin amor, sino e ta amor. Tur loke e ta hasi ta basá riba amor. Esta maravioso pa sa ku e Kreador di universo i di tur ser bibu ta un Dios di amor!

2. Ki siguransa e amor di Dios ta duna nos? (Wak e promé plachi.)

² E tierno kariño i amor ku Dios tin pa su kreashon ta sigurá nos ku su propósito pa humanidat lo kumpli sin falta. Esei lo resultá den hopi felisidat pa esnan ku ta obedesé Dios. Por ehèmpel, debí na su amor, Yehova a “fiha un dia riba kua e ta bai husga henter mundu den hustisia pa medio di un hòmber ku el a nombra,” esta, Hesus. (Echo. 17:31) Nos por ta sigur ku esaki lo tuma lugá. Pa esnan ku ta obedesé Dios, lo tin un futuro maravioso ku lo dura pa semper.

3. Kon futuro lo ta si Dios no tin amor pa humanidat?

³ Kon futuro lo ta si Dios no tabatin amor pa hende? No ta difísil pa imaginá esei. Si bo djis wak bèk den historia di humanidat, lo bo ripará kuantu sufrimentu hende a eksperensiá bou di gobernashon di hende i di e dios kruel di e mundu akí, Satanas e Diabel. (2 Kor. 4:4; 1 Huan 5:19; lesa Revelashon 12:9, 12.) Un kos ta sigur, sin e amor di Dios, futuro di e universo akí lo pinta skur.

4. Pakiko Yehova a permití Satanas i hende rebeldiá kontra su gobernashon?

⁴ Ora Satanas a rebeldiá kontra Dios su gobernashon, el a influensiá e promé pareha pa hasi meskos. El a lanta duda enkuanto si Dios tin derecho di goberná òf nò. En realidat, Satanas a pretendé ku su manera di goberná ta mihó ku esun di e Kreador. (Gén. 3:1-5) Yehova a duna Satanas chèns pa purba di mustra ku e tin rason, pero el a permití esaki djis pa un tempu. Den su sabiduria, Yehova a laga sufisiente tempu pasa pa mustra bon kla ku su gobièrnu ta e úniko ku tin e kapasidat pa goberná humanidat. Historia a mustra ku ni hende ni Satanas no por goberná humanidat.

5. Kiko e historia di humanidat a demostrá?

⁵ Durante e último 100 añanan, mas ku 100 mion hende a muri den guera. Awe kosnan ta bayendo di malu pa pió. Esaki ta loke Beibel a profetisá ku lo pasa den “e último dianan” di e sistema akí ora ku “hende malbado i gañadónan lo bai di malu pa pió.” (2 Tim. 3:1, 13) Historia a demostrá ku loke Beibel ta bisa ta bèrdat: “O SEÑOR, mi sa ku e kaminda di hende no ta di dje mes; tampoko no ta keda na hende pa dirigí su pasonan.” (Yer. 10:23) Dios no a krea hende ku e kapasidat òf derecho di goberná nan mes sin su yudansa.

6. Dikon Dios a permití maldat pa un tempu?

⁶ Ademas di mustra ku hende ta inkapas pa goberná, e echo ku Dios a laga maldat sigui pa un tempu ta mustra ku ta solamente su gobernashon por tin éksito. Den futuro Dios lo kaba ku tur maldat. Despues di esei, si kualke persona tribi di kuestioná Yehova su manera amoroso di goberná, Dios lo aktua mesora. E no tin pakiko di tolerá maldat atrobe i lo e por usa e historia di humanidat pa mustra ku esnan ku rebeldiá mester ser destruí mesora.

7, 8. Menshoná algun manera den kua Yehova a demostrá su gran amor pa humanidat.

⁷ Yehova a demostrá su gran amor den vários manera. Por ehèmpel, pensa kon impreshonante e universo ta. Tin míles di miónes di galaksia, i kada un di nan tin míles di miónes di strea i planeta. Un di e streanan den nos Via Láktea (Melkweg) ta solo. Sin dje, bida riba tera lo no ta posibel. Tur e kreashonnan akí ta duna prueba ku tin un Kreador, i nan ta mustra nos su kualidatnan manera poder, sabiduria i amor. Sí, Dios “su kualidatnan invisibel, esta, su poder eterno i Divinidat, ta ser mirá bon kla for di kreashon di mundu padilanti, ya ku nan ta bisto den e kosnan trahá.”—Rom. 1:20.

⁸ Dios a prepará e tera ku tur loke ta  nesesario pa sostené bida. Pa hende, el a krea un bunita paradeis i a duna nan un mente i kurpa perfekto pa nan por biba pa semper. (Lesa Revelashon 4:11.) Ademas, “e ta duna tur ser bibu alimento. Su amor ta eterno.”—Sal. 136:25, BPK.

9. Ademas di amor, ki otro sintimentu Yehova sa demostrá i dikon?

⁹ Aunke Yehova ta un Dios di amor, e ta odia maldat. Por ehèmpel, Salmo 5:4-6 ta bisa: “Abo no ta un Dios ku ta hiba gustu den maldat . . . Bo ta odia tur esnan ku ta hasi inikidat.” I e ta sigui bisa: “SEÑOR ta aboresé e hòmber dramadó di sanger i gañadó.”

10, 11. (a) Kiko Yehova lo hasi ku e malbadonan? (b) Kon Yehova lo rekompensá e hustunan?

¹⁰ Debí ku Yehova ta un Dios di amor i ta odia maldat, lo e eliminá tur maldat for di henter universo ora e resolvé e kuestion tokante gobernashon na un manera satisfaktorio. Su Palabra ta primintí: “Hasidónan di maldat lo wòrdu kòrtá kitá afó; ma esnan ku spera riba SEÑOR lo heredá e tera. Pasobra aki poko tempu e malbado lo no t’ei mas . . . E enemigunan di SEÑOR lo ta manera flor di sabana: nan ta disparsé—manera huma nan ta disparsé.”—Sal. 37:9, 10, 20.

¹¹ Tambe e Palabra di Dios ta primintí: “E hustunan lo heredá e tera, i lo biba den dje pa semper.” (Sal. 37:29) E hustunan “lo deleitá nan mes den pas abundante.” (Sal. 37:11) E promesanan akí lo kumpli sigur pasobra nos Dios amoroso semper ta hasi lo mihó pa su fiel sirbidónan. Beibel ta bisa: “Lo e seka tur lágrima for di nan wowo, i lo no tin morto mas; ni tristesa ni sklamashon ni doló lo no tin mas. E kosnan ku tabata pasa ántes no t’ei mas.” (Rev. 21:4) Esta un futuro maravioso ta spera tur esnan ku ta apresiá e amor di Yehova i ta obedes’é komo nan gobernante.

12. Ken ta e hendenan “sin kulpa”?

¹² Beibel ta bisa nos: “Tuma nota di e hende perfekto [òf, “sin kulpa,” NW], i opservá esun ku ta rekto; pasobra e hende di pas lo tin desendiente. Ma transgresornan konhuntamente lo wòrdu destruí; e desendientenan di e malbado lo wòrdu kòrtá kitá afó.” (Sal. 37:37, 38) E hende “sin kulpa” ta siña konosé Yehova i su Yu, i na un manera obediente e ta hasi e boluntat di Dios. (Lesa Huan 17:3.) Un persona asina ta kere e palabranan na 1 Huan 2:17, ku ta bisa: “Mundu ta pasa bai i tambe su deseonan, ma esun ku ta hasi e boluntat di Dios ta keda pa semper.” Segun ku e mundu akí ta yegando su fin, ta importante pa nos “spera riba SEÑOR i sigui su kaminda.”—Sal. 37:34.

¹³ Aunke nos ta imperfekto, nos por sigui Yehova “su kaminda.” Ademas, nos por tin un relashon íntimo kuné pa medio di e sakrifisio di reskate di Hesus, ku ta e demostrashon di mas grandi di Dios su amor. Esaki ta habri e kaminda pa tur hende obediente keda librá di e piká i morto ku nan a heredá  for di Adam. (Lesa Romanonan 5:12; 6:23.) Hesus tabata fiel na su Tata pa míles di aña kaba den shelu, pues Yehova tabatin konfiansa ku su Yu lo a keda fiel tambe riba tera. Komo un Tata amoroso, sin duda a duel e pa mira e trato inhustu ku Hesus a haña tempu e tabata riba tera. Sinembargo, Hesus a apoyá e soberania di Dios fielmente i a demostrá ku un hende perfekto por mantené su integridat na Yehova asta bou di e sirkunstansianan di mas difísil.

14, 15. Kiko e morto di Hesus a hasi posibel?

¹⁴ Apesar di a enfrentá pruebanan hopi difísil, Hesus a keda leal na su Tata te na morto. Nos mester ta masha gradisidu ku Hesus su morto a paga e preis di reskate pa humanidat i habri kaminda pa nos por haña bida eterno den e mundu nobo! Apòstel Pablo a mustra kon grandi e akto di amor akí di parti di Yehova i Hesus tabata, ora el a bisa: “De echo, miéntras ku nos tabata débil ainda, Kristu a muri pa hende malbado na e tempu stipulá. Pasobra masha poko biaha un persona lo muri pa un hende hustu; sí, pa un bon hende, kisas, un persona por riska muri. Pero Dios a demostrá su amor pa nos di e manera akí: Kristu a muri pa nos  miéntras ku nos tabata pekadó ainda.” (Rom. 5:6-8) Apòstel Huan a skirbi: “Pa medio di esaki Dios a revelá e amor ku e tin pa nos: Dios a manda su Yu unigénito na mundu pa nos por haña bida pa medio di dje. E amor ei ta nifiká esaki: no ta nos a stima Dios, sino ta é a stima nos i a manda su Yu komo un sakrifisio di rekonsiliashon pa nos pikánan.”—1 Huan 4:9, 10.

¹⁵ Tokante Dios su amor pa humanidat, Hesus a bisa: “Dios a stima mundu asina tantu ku el a duna su Yu unigénito, pa tur ku pone fe den dje no bai pèrdí, ma haña bida eterno.” (Huan 3:16) Yehova a duna su Yu komo reskate aunke esei a kous’é hopi doló. Esaki ta mustra kuantu amor e tin pa hende, i e amor ei lo dura pa semper. Pablo a bisa: “Mi ta konvensí ku ni morto ni bida, ni angel ni gobièrnu, ni loke tin awor ni loke tin ku bini, ni podernan, ni haltura ni profundidat, ni ningun otro kreashon lo por separá nos for di e amor di Dios ekspresá mediante Kristu Hesus, nos Señor.”—Rom. 8:38, 39.

16. Kiko e Reino Mesiániko ta, i ken Yehova a skohe pa ta e gobernante?

¹⁶ E Reino Mesiániko ta un otro muestra di Dios su amor. Ken Yehova a nombra pa goberná? El a nombra su Yu, kende ta stima humanidat i ta kompletamente kualifiká pa goberná. (Pro. 8:31) Dios a skohe 144.000 hende pa goberná huntu ku Hesus den shelu, i ora nan resusitá, nan lo usa nan eksperensia komo ser humano pa benefisiá humanidat. (Rev. 14:1) E tema prinsipal di Hesus su siñansa tabata e Reino, i el a siña su disipelnan hasi orashon na e siguiente manera: “Nos Tata ku ta den shelu, bo nòmber sea santifiká. Laga bo Reino bini. Laga bo boluntat sosodé, meskos ku den shelu, tambe riba tera.” (Mat. 6:9, 10) Ora e petishon ei bira realidat, humanidat lo eksperensiá gran bendishon.

17. Ki kontraste tin entre e gobernashon di Hesus i esun di hende?

¹⁷ Ki un kontraste tin entre Hesus su manera amoroso di goberná i e gobièrnunan humano ku a kousa morto di miónes di hende den guera. Hesus ta interesá den hende i ta imitá Dios su bunita kualidatnan, spesialmente su amor. (Rev. 7:10, 16, 17) Hesus a bisa: “Bin serka mi, boso tur ku ta traha duru i ku ta kargá, i lo mi refreská boso. Tuma mi yugo riba boso skouder i siña di mi, pasobra mi tin un genio suave i un kurason humilde, i boso alma lo keda refreská. Pasobra mi yugo ta suave, i mi karga no ta pisá.” (Mat. 11:28-30) Esta un bunita promesa esei ta!

18. (a) Kiko e Reino di Dios ta hasiendo for di aña 1914? (b) Kiko nos lo konsiderá den e siguiente artíkulo?

¹⁸ Profesia di Beibel ta mustra ku e Reino di Dios a kuminsá goberná den shelu na aña 1914. For di e tempu ei, a reuní e restu di esnan ku lo goberná ku Hesus den shelu i tambe un “multitut grandi” di hende ku lo sobrebibí e fin di e sistema akí i drenta den e mundu nobo. (Rev. 7:9, 13, 14) Kuantu hende ta forma parti di e multitut grandi awe? Kiko Dios ta rekerí di nan? E siguiente artíkulo lo kontestá e preguntanan akí.