Promé Karta di Huan 4:1-21
4 Rumannan stimá, no kere tur mensahe inspirá,*+ pero hasi sigur si e mensahenan inspirá* ei ta bini di Dios,+ pasobra tin hopi profeta falsu den mundu.+
2 Asin’akí boso ta sa ku un mensahe inspirá ta bini di Dios: Tur mensahe inspirá ku ta bisa ku Hesukristu a bini na tera komo hende ta bini di Dios.+
3 Pero un mensahe inspirá ku no ta bisa esaki tokante Hesus no ta bini di Dios.+ De echo, boso a tende ku e mensahe inspirá ei lo a bini di e antikristu.+ Wèl, awor e ta na mundu kaba.+
4 Mi yunan stimá, boso ta pertenesé na* Dios, i boso a vense e profetanan falsu,+ pasobra Dios, ku ta den union ku boso,+ ta mas fuerte ku Diabel, ku ta den union ku mundu.+
5 E profetanan falsu ei ta bini di mundu.+ P’esei, nan ta papia loke ta kuadra ku pensamentu di mundu, i mundu ta skucha nan i bai nan tras.+
6 Nos ta pertenesé na Dios. Un hende ku siña konosé Dios ta skucha nos;+ un hende ku no ta pertenesé na Dios no ta skucha nos.+ Di e manera ei, nos por rekonosé kua mensahe inspirá ta bèrdat i kua mensahe inspirá ta falsu.+
7 Rumannan stimá, laga nos sigui stima otro,+ pasobra amor ta bini di Dios. Tur hende ku ta demostrá amor ta yu di Dios, i nan konosé Dios.+
8 Un hende ku no ta demostrá amor no a siña konosé Dios, pasobra Dios ta amor.+
9 Dios a demostrá e amor ku e tin pa nos na e siguiente manera: Dios a manda su Yu unigénito*+ na mundu pa nos por haña bida pa medio di dje.+
10 E amor ei ta nifiká esaki: No ta nos a stima Dios, sino ta e a stima nos i manda su Yu komo un ofrenda pa nos pikánan+ pa nos por sera pas ku Dios.*+
11 Rumannan stimá, si ta asina Dios a stima nos, e ora ei nos tambe mester stima otro.+
12 Nunka ningun hende no a yega di mira Dios.+ Si nos sigui stima otro, Dios ta keda ku nos, i su amor ta keda eksistí na un manera perfekto den nos kurason.+
13 Nos sa ku nos ta den union kuné i e ta den union ku nos, pasobra e ta duna nos su spiritu santu.
14 Ademas, nos mes a mira ku e Tata a manda su Yu komo salbador di mundu,+ i nos ta duna testimonio di esei.
15 Ken ku ta deklará públikamente ku Hesus ta Yu di Dios,+ Dios ta keda den union kuné i e ta keda den union ku Dios.+
16 I nos a mira ku Dios ta stima nos,+ i nos ta konvensí di esei.
Dios ta amor,+ i un persona ku konstantemente ta mustra amor ta keda den union ku Dios i Dios ta keda den union kuné.+
17 Di e manera akí, amor ta ser demostrá na un manera perfekto. Asina nos por tin konfiansa*+ durante e dia di huisio, pasobra den e mundu akí, nos ta meskos ku Hesus.
18 Un hende ku ta stima Dios no tin miedu.+ Amor perfekto ta kore ku miedu, pasobra miedu ta stroba* nos. Si un hende tin miedu, su amor no ta perfekto.+
19 Nos ta demostrá amor, pasobra Dios a stima nos promé.+
20 Si un hende ta bisa: “Mi stima Dios,” pero e ta odia su ruman, e ta un gañadó.+ Pasobra un hende ku no ta stima su ruman,+ ku e ta mira, no por stima Dios, ku e no ta mira.+
21 Anto nos a haña e mandamentu akí for di dje: Un hende ku ta stima Dios mester stima su ruman tambe.+
Nota
^ Lit.: “e spiritunan.”
^ Òf: “tur mensahe ku ta parse di ta bini di Dios.” Lit.: “tur spiritu.”
^ Òf: “ta bini di.”
^ Esta, e úniko yu ku Dios a krea sin yudansa di ningun otro persona.
^ Òf: “pa nos por haña pordon di piká; pa nos por rekonsiliá ku Dios.” Wak Glosario, “Areglo pa haña pordon di piká.”
^ Òf: “nos por papia ku frankesa; nos por papia ku konfiansa.”
^ Òf: “ta limitá; ta restringí.”
